Няръяна Ӈэрм
Нядˮмиˮ няюʼ ӈэда ядэръя
Хойʼ терˮ ненэциеˮ илʼ едʼ миндиˮ нядˮми минрена «Дорожная карта» серо тасламба ӈобˮ ядэръи мэˮӈаˮ. Тасуʼ яʼ няю неняӈгʼ ирыхына лахарёмʼ минреванзь Виктор Климентьевич Югай няби Андрей Николаевич Кугаевский ненэцяӈгˮ тэворӈаханзь.
Хэвы сиˮивхана пыдиʼ нядаӈгодидиʼ няць Находкаʼ, Антипаютаʼ, Гыдаʼ хойʼ нямна ӈэдалёрӈаханзь. Ӈокхандоʼ таняна сидя юˮ сидндет мядʼ терхана лаханакурмыˮ. Хойʼ терˮ сававна ӈаврандаваʼ еˮэмня «Танама» факторияхана тасалкуць. Ненэциеˮ едʼ тамна ӈамгэ таранамʼ сертавамдоʼ вадеˮӈаць. Поʼ тяхана тикахана едэй няньʼ мяˮ ӈадимда. Тикы пекарняхана хойʼ терˮ едэйвана ябцавыˮ нянё тэмда пиртаˮ.
Тикыʼ хавна мюсертиˮ илʼ няюʼ таславыˮ нядˮмиʼ нямна лаханакурӈаць. Школандоʼ пуд тохолкованзь хантиˮ илʼ нямна, выʼ терˮ хардахаˮна мядотоʼ таняваʼ нямна ӈаниʼ ибедорӈаць.
Тикы ядэръямдоʼ малевандоʼ нерня Тасуʼ яʼ няӈы Юрибей факторияхана халямʼ пэртиˮ ненэциеˮ ӈарка ялянʼ тывыдаць. Танянанда «Гыдагро»хана манзаранаˮ самляӈг юˮ халямʼ пэртиˮ мядʼ терˮ маˮлёвыць. Халямʼ пэрмахана сямянхат ваˮлёйдоʼ саваˮ ӈудитоʼ терад няˮмарӈаць. Тикыʼ хавна тамнаʼ тяхаʼ пэрманда манзаидоʼ вадеˮӈаць.
Янаˮ терˮ ненэцяˮ иринатоʼ тотревʼ хартоʼ иландоʼ хариˮ минрейдоʼ. Вымна мюсертаˮ латаˮ хоёˮ нимня тыдоʼ танабиˮ. Халямʼ пэртинаˮ невхытоʼ серʼ поӈгдоʼ нэкалпиˮ.
Хойʼ терˮ илʼ едʼ миндяˮ нядˮмаˮ ненэцие сававна илеваʼ няюʼ таславыˮ.
Нюдяне Махакуйʼ падвы
Авторы
Няръяна Нгэрм
Темы