Няръяна Ӈэрм
Паӈгхататоʼ перенаˮ ненэцяˮ
Пилёʼ ирыʼ хасаваюдимдейʼ яляхана яʼ сярʼ ниня ӈобˮ ӈарка ялямʼ ядабтамбиˮ, нюмда «Международный день коренных народов мира». Невхыˮ, хартоʼ сояˮма яханатоʼ паӈгмʼ мэтаˮ ненэциеˮ едʼ таславы яля.
Яʼ сярʼ ниня сояˮма яханатоʼ невхыˮ паӈгхататоʼ перенаˮ хуркариˮ тэнзмʼ мэтаˮ ненэцяˮ таняˮ. Тодоˮ пареӈодаˮ яхаˮна тарцяˮ иленаˮ мале ӈокаˮ. Толырманандоʼ самляӈгʼ юрˮ луцаʼ юˮ ёнарˮ пирˮ ӈэӈгуˮ. Помнандоʼ няхататоʼ яӈгаˮ. Хусувэдоʼ иландаʼ минанʼ харта таславыˮ серода минре. Яʼ ханярина малˮ ӈобˮ пирсувна ниˮ илеˮ. Ханяӈыˮ нензелˮ илмʼ ниˮ мэсˮ. Маӈгба илеˮ, толырманандоʼ саць тянёворӈаˮ, хартоʼ вадавнандоʼ лаханакурць ӈэвадаӈгаˮ. Ӈаниˮ — пилиˮ сусаӈгаˮ. Яʼ нид ненэциеˮ тэнзˮ сусаӈгава сава серˮ ӈулиˮ вуни ӈаˮ.
Хибяриˮ хартоʼ мысодотоʼ, тохолиртоʼ серʼ, иринатоʼ вадамʼ мэць сававна илевандоʼ няюʼ Организация Объединённых Наций 1982 поход ибедоˮлыць. Тиканда 1994 поход пилюˮ ирыʼ 9 яля яʼ ханярина «Невхыˮ паӈгхататоʼ перенаˮ ненэцие»ˮ ӈарка яляӈэ толы. Нерденя юˮ поˮ ямбанʼ яʼ сярʼ ниня ӈока хибя тикы ӈадимыˮ сероˮ таромʼ ховэдоʼ, тароˮмэдоʼ. 2004 похона ООНʼ терˮ нябимдей ӈобтʼ маˮлёрмыˮ. Иландоʼ саирмʼ тидˮ нёдавандоʼ няюʼ вадеˮмы серодоʼ тамальӈгад минрейдоʼ. Неноховавна ӈаврандаваˮ, лекаратаӈговаˮ, тохолковаˮ серˮ сямянхат таранаˮ нядˮмаˮ. Таремʼ сававна илеваʼ еˮэмня нядаӈгуˮ.
Пилюˮ ирыʼ 9 яля маняˮ яхананаˮ ӈаниʼ саць тарана яля. Тикы яляхана хартоʼ яханатоʼ невхэт илениˮ едʼ ӈэдаˮ сероˮ нямна ваць лаханаˮ. Юркад вата хасава юˮ тэнзмʼ мэта ненэцьʼ мэёвна Россия яхаданда паӈгды. Тет юˮ сиˮив тэнз толырмавнандоʼ тянёмбойˮ хибяˮ.
Тикыˮ поӈгад тетˮ юˮ — ӈэрмʼ яʼ няюна иленаˮ. Невхы паӈготоʼ илаʼ хари, хартоʼ вадамдоʼ нёдабавандоʼ еˮэмня янаˮ ӈэвахана мэнаˮ табеку сертабиˮ. Ӈобнзерˮ тасалкомахадандоʼ нядˮмаʼ няюʼ ӈэдаˮ серо ненэциеˮ илӈгана тароˮядоʼ. Хуркари хибяʼ тэнзʼ илмʼ лэтрамбава ӈабцата сава серˮ.
Яʼ невхы хартоʼ сояˮма яханатоʼ паӈгмʼ мэтаˮ ӈэрмʼ терˮ хартоʼ иландоʼ саирмʼ нерняʼ минреваʼ няюʼ ӈаниʼ тасалкодаˮ. Сянриˮ ёнарˮ поˮ хэбˮ ӈодˮ невхыˮ паӈгхататоʼ перенаˮ ненэцяˮ иринатоʼ мэˮмыˮ илаʼ саиро минребтоʼ тараˮ.
Алла Вануйтоʼ падвы
Авторы
Няръяна Нгэрм
Темы