95 по’’ ямбан’ паднава’’

Газетаха’’на, журналха’’на, телевидениеха’’на манзарана’’ ненэця’’ ӈопой манзаям’, паднавам’ минре’’. Маня’’ округханана’’ Советской власть ӈамд’’махад 1931 похона сие ниць иры’ 19 яляхана ненэй вадавна «Няръяна Ӈэрм» газетава’’ ӈадимясь. Нерде’ сидямбой страницадась. Тамальӈгана Пэсь Павлович Анагуричи, Иван Антонович Юганпелик, Елена Григорьевна Сусой паднанаӈэ тараць.

Время для чтения ~ 3 минуты

Газетана’’ редакторӈэ Иван Григорьевич Истомин таралъяць. Тэнзувнанда ӈысма ӈэбта ӈод’’ ненэй вадам’ ӈули’’ савовна теневавэдась. Тамна стихотворения падыбись. Тикы нява’’ саць ӈарка таром’ ха’’аврась.

Ӈани ӈопой газетава’’ ня’’амбавы — Иван Антонович Юганпелик. Сайноро’’махаданда нява’’ манзаямда хуркаси’’ хараси’’ минре пядась. Ӈобтарем’ стихотворения падыбись. Таддикад Культпросвет училищан’ тохолко лабцевыць. Тохолко ӈэвада’’махаданда Иван Антоновичм’ Тазовской районхы Ӈэдя хардан’ ӈэдаравэдо’. Танянанда ӈани’ паднавы. Нюртей’’ падвы’’ стихотворенита нюв’’ ти’’: «Сельсовет’ ний флаг», «Нохо’ сё», «Сихирти’’ не ню». Иван Антонович ханяри’ тэвбата лаханако мэта ненэцяӈг’’ ӈули’’ инзеле пэрмы. Ханяӈыдо’ падарк’’ падыбавыда. Тальцюня ӈобт’ ма’’лавыда. Яӈга книгаӈэ ӈадимяць. Нюбедо’ тарця’’: «Мань хыно’’ӈадм’», «Ӈэрм тер ӈацекы», «Хар’’н», «Хэд’’ Нардалеко». «Няръяна Ӈэрм» газетахана вэсэйманда’ ӈэсонд’ манзарась. Книгаха’’ната, газетан’ падвэхэ’’ната вы’ яна’’ илам’ едэй ӈадимы манзаи’’ тэнз ваде’’ӈась. Ӈарка ненэциена’’ падыбись.

Нянда сехэрым’ Леонид Васильевич Лапцуй нёдалӈадась. Та’ мальӈгана газетана’’ тамна сидя страницадась. Манэ’’сыта саву’’мась. Леонид Васильевич ненэй вадавна, луца вадавна падна пир’’ӈадась. Падвыда нидо’ поёць хуркари’’ журналха’’на, газетаха’’на ӈадиберӈаць. Хусувэй падвэхэнанда невхы ӈарка Совет’’ яна’’, ӈэрм’ тер’’ нита илам’, манзарабцом’, тид’’ сертавыто’ нямна лаханась. Ӈацекы нидясь юрыбю’’. Книгыта нюв’’ ти’’: «Сэвтя», «Едэйко». «Инзер’ толаӈгобць». 1982 похона нява’’ яӈгумась.

Ӈани ӈопой паднавы ненэця’’ма’’ — Геннадий Алексеевич Пуйко, нянда ед’ минта стихотворением’ падась. Падвэхэнанда тарем’ мась: «Мэ’’мэр’’ тюрамд, мэ’’мэр’’ паднабцямд, мэ’’мэр’’ тынзямд теда’ тю’’у’ миндя’’ нюд ня’’маӈгудо’».

Автор: Хабэча Нямбара’ падвы

Авторы

Няръяна Нгэрм

04:30, 27 апреля 2026

Темы