Няръяна Ӈэрм
Ӈацекы’’ е’’эмня сертабидо’
Небой та’ Ямал’ нямна ӈэда «мультфильм» ӈадимясь. Нюмда — «Край Земли». Илна’’ нямна ӈэда падтавы иле’’мярхам’ луца вадахад ненэця’ вадан’ тэвравыдонзь. Тарця сава серм’ сертаба округна’’ ӈэвахана мэна ервава’’ нядаӈговысь.
Время для чтения ~ 2 минуты
Сие ниць иры’ матдомдэй яляхана тикы иле’’мям’ Нядаӈгарад’ няна манэ’’лабтадонзь. «Сё мэти’’ мядм’» нюбета студия’ тер’’ ваде’’ӈадонзь. Луца вадавна лаханана Хадкохо’, Илнехэ’ ненэй вадавна вахалмэхэнзь.
Хадкохо’, Илнехэ’ иле’’мяхана Марина’, Валентин’, Артём’, Максим’, Илья’ вабцо намдаваць. Тюку’’ ненэця’’ мал’ Сэротэтто еркарм’ мэ’’ӈа’’. Хэтыбавы’’ вадидо’ ӈули’’ сававна хан’’ӈаць. Ӈацекы ӈэбта ӈацекэдрев’ лаханаць, ӈармы ненэць’ ӈэбта вадидо’ ӈармы ненэцяндрев’ хэтыбидонзь.
— Вабцм’ мутран’ падыбава нензел’’ манзая ни ӈа’’. Лаханана ненэць’ вабцамда яӈгамдамбабата тара. Ненэй вадан’ тидхалеӈгова’ серм’ пухуцяни ня’ ӈобкана минреми’. Марина, Валентин, Артём, Максим — мал’’ пыда нида. Сидя иры’ ямбан’ манзаява’’ пэрӈаваць. Нерня харе’’ вадан’ пада тарась, пуна — нини’’ вабц падыбиваць. Тарцям’ пэраць торомбэйва’’. Небой по’ «Ми-ми-мишки» мультфильмам’ вадахана’’ мэваць. Сейхад минда вади Тусида Светлана Ивановнан’ няби Худи Евгений Варьевичан’ хэтыбива’’. Манзаява’’ пэрмана’’ мальӈгана ненэй вадам’, илна’’ саирм’ теневана няхаюна’’ хонрамбиваць. Ненэй вадамда’’ лэтрамбира’’, тенера’’, — «Сё мэти’’ мяд»‘ ерв Илья Сэротэтто тарем’ лахана.
Тад нерня’ тарця иле’’мядрев’ тадтавы ядэръя хуркари мутра’’ сер’ ненэй вадавна ӈадимдембабато’ ӈацекы’’ маймбаӈгу’’, вадамдо’ нидо’ юрыбаӈгу’’. Харе’’ вадавна ӈэда падтавыдарев’ сертавы иле’’мякоцям’ манэ’’мандо’ сер’ ненэця’’ ма’’нисям’’: «Манэсарп’’, ёльце илека ӈэвы. Пелямда тамна’ сяха’ манэтава’’?»
«Край Земли» иле’’мям’ Москва’ хардахана ӈэда «КиноАтис» студия’ тер’’ сертабавэдонзь. Ӈавна «Белка и Стрелка» падтавыраха иле’’мям’ ӈадимдевыць.
Автор: Анна Яптик
Авторы
Няръяна Нгэрм
Темы