Няръяна Ӈэрм
Яля’ сэвхад паӈгадыва’’
Хаер’’ сэв тю’’у’ хэва’ сер’ ялэна’’ ямбумдана’’. Выӈгана, пэдарахана илена’’ нина’’ пихий манзаидо’ сертаба варемдо’ мэ’’ӈа’’. Харад’ тер’’ ӈани’ маямби’’. Нядаӈгардахана мале сян по’ ямбан’ ӈобт’ ма’’люрцеты’’. Харад’ еркана мярда ненэй мято’ хэвхана ӈацекыдо’ няць сянакосеты’’, хыноцеты’’. Тюку по’ нядандо’ ӈани’ сава юнм’ намдава’’.
Время для чтения ~ 2 минуты
Ненэй ненэця’’, хаби’’, ӈысма’’, ӈани тэнзм’ мэта’’ Нядаӈгарад’ тер’’, мал’’ хардандо’ еркана ма’’лёвы’’. Сиддо’ ӈобт’ ма’’лавы’’ — Культура’ мяд’ манзарана’’, «Ямал-нюна’’ я!» Ассоциация’ тер’’.
Антонина Салиндер — сёётэй не хынопата ӈули’’ ва’’лёй. «Хаерако’ сей, хэй-хэй! Пыдар няриндэй маня’’ маямбивов’’, пыдар е’’эмняндэй маня’’ хыноӈавов’’!», — ненэця’’ мэта сёхонда инзелехэя, нито’ ӈуди ня’’амхая таравы’’. Хабей некоця’’ ӈани’ хыномы’’. Мал’’ хаер’ сэвм’ хынабтамбавы’’ Ӈацекэця’’ тэри илебядё ядэсумбавы’’. Таняна мэвы ненэцие’’ вадавна нумда ӈули’’ хэнёкоко ӈэвы. Хаӈоротаванзь тэвравы ӈаврадо’ хуркари’’, ненадовна ӈэрм’ яна’’ ӈодя’’, есьмы ӈамза, халя ӈани’ танявы’’.
Пихид мякандо’ тювы’’, таняна ямб толь’ тяхана ядембада сяйхана, ӈавыдота ӈавраханато’ нидо’ ӈавламбавы’’. Тарем’ ӈэрм’ яна’’ тер’’ хаер’’ тю’’у’ хэвам’ ядабтамбавы’’. Хардахана илена нюто’ е’’эмня иринато’ невхы илам’ манэ’’лабтамбавы’’.
Автор: Г.Кинчина’ падвы
Авторы
Няръяна Нгэрм
Темы