обновлено: 10:41, 29 ноября 2023
Няръяна Ӈэрм
Нермбэртидо’ тэравы’’
Хор’’ иры’ пуданана яляхана Салехардахана «Ямал-ню’’на’’ я!» ассоциацияна’’ ӈэвахана мэнад тэраваць. Тикы’ пуд округна’’ тиӈгы отделенийха’’на ӈани’ тэраӈгова мэ’’лаць. Едэй ӈуданданидо’ тэраба пяць. Носиндалава’ иры’ пудана ялэ’’ пиркана Надымской няби Тазовской районхана «Ямал-ню’’на’’ я!» Ассоциация филиал’ тер’’ ӈобт’ ма’’люрӈаць.
Время для чтения ~ 2 минуты
Нядаӈгардан’ Наре’, Еръяха’, Ӈыд’, Пангоды’ тер’’ турмы’’. Ӈокханда сидя юкад вата ненэця’’ тасалковы’’. Нюрте’’э’ Эгамова Вера Павловна тет по’’ ямбан’ минревы серодо’ ваде’’ӈась. Манзаямдо’ тид’’ минревэдо’. Ӈэрм’ тер’’ ила’ паӈгам’ нерня’ минренаӈэ, ненэцяӈг’’ юне тэволанаӈэ таравы’’. Хуркари серо тидхалембавы’’. Я’ мидыхыд харто’ яханандо’ илена ненэцие’’ вато лэтрамба нядаӈговы’’. Мюсерта ненэцяӈг’’, ёртяха’’ едэйвана ӈадиберта закон’’ вато’’ нямна лаханавы’’. Культура’ серо’’, тохолкова’ нямна ӈани’ нядаӈговы’’. Ӈэваханандо’ мэнаӈэ няхар’’ нямдо’ нерня’ мэмбавы’’, тикы нито’ поӈгад Виталий Кузьмич Нахрачёвм’ тэравы’’.
Тасу я’ ня’ Салеӈгардахад ӈэвахы Ассоциацияхад Эдман Хасевтевич Неркаги, Худи Сергей Валентинович ӈэдалёрӈаханзь. Теда’ округна’’ тиӈгывна таняна ӈэда Ассоциацияна’’ паӈг сямянхат сававна манзаранаӈэ толы. Пыдо’ я’ тебтм’ тарпрамбада ня’’ манзаядо’ ӈули’’ сававна тидхалевы. Ӈани’ нидо’ нядандо’ сыраць тохолку’’. Виталий Николаевич Сатыков, ӈэваханандо’ мэвэдо’ ханзер’’ манзаравамдо’ ваде’’ӈась, ма’’лёвы няхата сава вади хэтвысь. Ӈамгэ сава серо минревамдо’ ваде’’ӈась. Яханандо’ харад’ терри ни’’ нядабю’’, тарана няд’’ми мюсерта нито’ е’’эмня ӈадимдемби’’. Я’ тебтм’ нэкалпади’’ ня’ ӈобкана серодо’ тидхалемби’’, ӈока ӈавэ ям’ ся’’ма’ нямна сертаби’’. Ненэця’’ мэ’’мы вадида саву’’мыдо’. Тикы’ пуд тэраӈговы’’. Нермбэртядандо’ Вэнго Наталья Павловнам’ мэвы’’. Нядаӈгодадамда таминдо’ таславы’’. Тад нерня’ ӈобкана нито’ илам’ нерня’ тидхалембаӈгудо’.
Надымской няби Тазовской районхы «Ямал — ню’’на’’ я!» Ассоциация’ паӈгм’ минрена’’ серодо’ пили’’ ненадо ӈэсеты’’. Тад нерня’ етри’ тарем’ манзарая’’.
Автор: Г.Окотэтто’ падвы
