Няръяна Ӈэрм
Нум’ хурка ӈэвахад теневава’’
Тюку си’’ивхана ӈоб’’ тарана юнм’ намдаваць. Нерняна мэ’’манда’’ нувона’’ хурка ӈэвахад теневана’’ ненэця’’ тарем’ лаханаць.
Время для чтения ~ 2 минуты
Вадавнандо’ тюку по’ таӈы ёльць’ ӈоб’’ градус’ пирувна ядембаӈгу. Ябтада, сарёда, итя ӈокамбой ӈэӈгу. Округна’’ ЦГМС’ ӈэвахана мэна Артем Кошкин тарця юнм’ ваде’’ӈась: «Маӈгты’’ ирыва’’ ядембаркаӈгу, явода +8...+13 ёльцянд’ тэворта. Неняӈг’’ ирыхына сававна ядембаӈгу. Пилю’’ иры ӈахат ӈэванда пир’’ ӈэӈгу.
Мэта си’’ив ныланава’ яляханана’’ нумда ибаӈэ ханда. Сие ниць ирына’’ пудана яля’ пиркана ӈани’ тецьхамда. Ты’’ ниць ирыхына нумда ӈахат пирда ӈэӈгу, -3, +3 ӈэсонд’ ядемда.
Тюку по’ сидя ӈарка хардана’’ Салехард няби Си’’ив Харв марк’ поӈгы салабава’’ ёльцяӈгананда хэӈгадаӈгу. Ты’’ ниць иры’ 22 яля’ пиркана итя салабасяламда. Мужи харад’ хэвхы, хаби’’ нина’’ илелава’ няюна сидя яля’ пирувна мерарка савоӈэ ханда. Яханандо’ салабадо’ ты’’ ниць иры’ еркана хэӈгадаӈгу. Хоя саляхана ты’’ ниць ирына’’ пудана яля пиркана итя ӈадимда.
Яв’ салаба 109 сантиметр’ пир’’ ӈэрха. Мале танякуй 1956 похона тюку ялэ’’ ёльцяӈгана салабанда латдада 158 см ӈэвы. Та’ мальӈгана саць няӈо’’мы.
Теда’ Саля’ явна’’ салаба тю’’уна Томской область’ няна яна’’ няю’ мюсе.
Автор: Марина Ярой’ падвы
Авторы
Няръяна Нгэрм
Темы