Няръяна Ӈэрм
Таԓана, хома патаԓ
Нешади’’ дилыӈ дюнь дяӈ тамна канԓаӈа. «Няръяна Ӈэрм» кашем’дюԓ хампԓяӈк по’’та кадя. Нешаӈ ватамана ӈайта патаԓ дилта дямпны ӈука ӈут матаӈаш. Шитчет пуӈ чена «Няръяна Ӈэрм»хана петаԓахана диԓина’’ нешади’’ ватамана ӈайта полоса’ ӈычимяш. Четаӈ Пюԓ дяхана диԓина’’ неша’’ каԓьтуӈ ватаманантуӈ тонԓакошту’’, дюԓмэйтуӈ вачитуӈ вивхаԓьшту’’.
Время для чтения ~ 3 минуты
Каԓпюԓкай школа-интернатхана нешаӈ ватан ӈашки’’ тохоԓампё мансԓаӈа Юлия Айваседо маньшту, пы’тоӈ «Няръяна Ӈэрм» пон тонԓапёштутуӈ:
— Нешаӈ ватамана ӈайта газетам хашаӈоӈама’’, тонԓапёштума’’. Тохоԓкота’’ ӈашки’уди’’ патмайтуӈ сочиненитуӈ «Мынико»н ӈайтапташту’’. «Няръяна Ӈэрм» нешаӈ ватам ԓэтԓампюӈа, чуув падиԓя. Каԓьна ватаманана тонԓако’ нешай’’ де’эмня ӈайта дюнь намташтума’’, шиниӈкуй дилхай шеԓу’’ каматаштума’’. «Няръяна Ӈэрм» поздравийпёшь маман ха’ӈат, тат неԓьняӈ пон хомана мансԓадя, деты формата пюԓьштодя, тадёмшей ӈаԓтана’’ ӈашкcхcна’’ вильманта мэт.
Марина Дзюненко лекаԓӈc мансԓаӈа, пы’та газетаӈ нямна мунуш маньшту:
— Таԓьша патԓу’уди нивня таԓа. Деты ӈамы новостьудим танят коштума. Нешаӈ ватаманана пачута патаԓ тонԓапёш неньшаԓ ӈcшту. Мань нинчеԓ ватам ташта ниш’тум каматымпю, таԓям нешаӈ ватамана пачутам ӈамым тонԓапанай майпёштут.
Пуровский’ ассоциацин «Ямал-потомкам!» ӈаԓдя ӈашки’’ дет ӈайта советхат мэна Мария Вэлло газетаӈ нямна мунуш маӈаш:
— Мань нешаӈ ватамана ӈайта патаԓ «Няръяна Ӈэрм» соцсетьмана коштум, таԓям тонԓапёштум. Ӈаԓтана ӈашки’’ нешаӈ ватам дюԓмаӈ тайхана, шичина’’ мян неша’’ каԓьтуӈ ватаманантуӈ мунумаӈ, патнамаӈ мэт чики газета’ таԓаӈа.
Каԓпюԓ садикхана мансԓана Владимир Казымкин ӈупчики хома вачи’’ «Няръяна Ӈэрм» де’эмня мэ’ӈаш: «Нешаӈ ватамана ӈайта газетама «Няръяна Ӈэрм» дёԓьше хома. Чики патаԓкат нешади’’ дил нямна ӈайта дюнь намташтума’’, дяна чеԓ’’ нешади’’ де’эмня ӈайта статьи’’ тонԓаштума’’. Чики газета’ нешаӈ ватам ԓэтԓампюта. Четаӈ кашем’ дюԓ хампԓяӈк пота каймя юбилейхананта хома шоньшахана поздравийпим. Пон хома ӈcдя, пон минԓената ӈотакота ненса ӈcдя».
Таԓкахай школа-интернатхана ӈашки’’ нешаӈ ватан тохоԓампё мансԓана Ольга Докучаева маньшту:
— Мань нешаӈ ватамана ӈайта газетам тонԓапёштум. Таԓьша патаԓ таԓа. Нешаӈ вата культурам, дилм ԓэтԓампюӈа. Ӈаԓтана ӈашки’’ шиниӈкуй ниԓинатуӈ диԓивсум чедимямаӈ мэт нешаӈ вата таԓа.
Нешай дет тонԓюта управленин веԓв Маргарита Маслова ӈупчики газетам тонԓапёштута:
‒ Чуки дилхана нешаӈ ватам чу’ув падеԓьш хома. Нешаӈ вата шиниӈкуй дилм ԓэтԓампюта. Маня’’ каԓьна ватаманана патнаштума, тонԓако’ тохоташтума. Газетама пон хома, вильта статьета’’ ӈука ӈcдя’’.
Газетам’ тонԓапёши Пюԓ дяхана диԓина’’ неша’’ шанат дяхат туԓта’’ дюньхат конпы ӈcшту’’, дяна чеԓ’’ нешади’’ дилм, куше мансԓамам намташту’’.
Автор: Лариса Айваседо патмы
Авторы
Няръяна Нгэрм
Темы