Няръяна Ӈэрм
Тохолкоди’’ олимпиада
Ӈэрё’ няна школаха’’на паднана’’ олимпиада падыби’’. Тарем’ теневабцодо’ манэ’’лабтамби’’, тохолавыдо’ манэ’’сарӈа’’. Ӈэрм’ тер’’ ӈацекы’’ ӈобтикы вадавнандо’ олимпиадам’ падыби’’. Ненэй ненэця’’, тавыс’’, манто’’, туӈго’’ ӈацекы’’ вадамдо’ теневавам’ яханана’’ ӈани’ хорпидо’. Ӈацекы тохоламбада’’ ма’’ним’’, хусувэй по’ сававна вадамдо’ теневана’’ тянёворӈа’’. Едэй тохолко мэта книгидо’ юӈгу’’, вадидо’ факультативхана тохоламбидо’. Тохолкова’ ватохона едэй учебник мэпто’ тара.
Время для чтения ~ 2 минуты
Манто’’, тавыс’’ ӈацекы’’ тянё ӈэвандо’ е’’эмня школарихина пирдырӈа’’. Ӈокаюм’: ненэй ненэця’’, туӈго’’ районан’ турӈа’’. Тюку по’ школахана самляӈг юркад вата тохолкода’’ паднаць, юркад ватадо’ нябимдей этапан’ ӈадимяць.
Няхар’’ ю’’ мат’’ ненэй ӈацекы олимпиадам’ падыбиць. 5-7 класс’’ помна няхатата сававна олимпиадам’ Егор Пальчин падвэдась, Усть-Порт’ школахана тохолку. Сидта Валентина Накочевна Комарова тохоламби. Пыда ӈацекыда ёльце сававна вадан’ тидхалембида. Салиндер Елена Носок’ хардахад ӈэда, 8-11 класс’’ помна нюртей ян’ ха’’амвыць. Оксана Васильевна Тэседо тохолкода ӈацекыда хусувэй по’ олимпиадам’ сававна падыби’’. Нюдяко ӈацекы’’ помна Воронцово’ школахад Егор Коледа ва’’лёй ӈэвы.
Салиндер Елена тёняӈы Ямал’ няю’ пяӈгуда. Таняна тодо яхат товы ненэй ненэцие’’ помна минрена ӈэрм’ тер’’ олимпиадахана теневабцуда ӈадимдеӈгу. Теда’ сита тохоламбаданда ня’ хэванзь хамекурӈаха’.
Автор: Елена Ямкина’ падвы
Сидяӈг: Е.Ямкина’ тадтавы
Авторы
Няръяна Нгэрм
Темы