Лух Авт
Няврэмат пиӆн рупиттыя умащ
Суматвоша айкеӆат каншты щирн яңхман, Екатерина Ивановна Зенгер (Сафронова) пиӆн уйтантысам па ӆув рупатайӆ эӆты мин потрэмисман. Мосаӆ ястатыя, хоты там нэңев ин Суматвошан коррекционной ашкуӆа-интернат хотан уншак классатан похат-эвет рущ ясңа, литературая, история па обществознания верата утаӆтыман рупитаӆ.
Екатерина Ивановна потартас, хоты охаль ёхат хоттэӆ хотан Кондинской куртан сэма питас па айтэӆан энмас. Опращаӆ па щащеӆ имийн кашң пуш вонщам отат, толхат акатты па нохар сэңкты унта тутӆыса. Тухаӆ пораятан хуӆ веӆпасӆатыя ияха яңхсат. Мосаң, щи верат онтасан там хатӆат вуш унты ӆув хуӆ веӆпасӆатыя па вонщам отат акатты верат шеңк самаңа па мосман тайӆаӆӆы.
Еӆӆы ма инщассэм, муй щирн па хун ӆув Суматвоша ёхтас, няврэмат пиӆн коррекционной ашкуӆа-интернат хотан рупата мощатас. Там нэңев манэма потартас, хоты мет оӆаңан Кондинской вошан кутап ашкуӆа хот етшаптас. Щи юпийн 2002-мет таӆн А.И. Герцен нэмпи Российской государственной университета Хон Петра воша утаӆтытыя манас, хота ӆув Овас мират институтан «культурология па история» факультета питас. Щи тахайн туса па туңа щира кашң утаӆтыты вер ӆэщатас. Щаӆта 2008-мет таӆн университет етшаптас, диплом нэпек хоӆомтас па ёхи ёхтас.
Щиканща ёӆан ӆув рупата мощаттыя ант па верытас. Имоӆты хатаӆан телефон киника ёшңаӆаӆа вус па Суматвош карты кеӆ хуват потартты номерат ӆуңтас.
Щитаӆан па ӆув номсаӆа ун аңкаңкеӆ ими шуңат Прасковья Прокопьевна Копьева ёхтас. Щи ими, ванта, Воӆаң Лялев верат сохнам порайн, 1945-мет таӆн, ӆув хоттэӆ ёхӆаӆ па яйӆ ики Василий Прокопьевич Копьев пиӆн Конда мувеӆ эӆты Суматвоша тынаң кеват верты тахая рупиттыя китсайт. Юхат па щи тахайӆ эӆты ӆын китамтак консервайт верты хуӆ вуты хотан яӆап рупатая ӆоңксаңан. Ун аңкаңкеӆ ими шуңат кашң пуш нэпекаң айкеӆат китас па ӆув рутӆаӆ Суматвоша вохсаӆӆы. Щаӆта па 2000-мет таӆн ӆув парас. Щи верат онтасан Екатерина номас верас па щиеӆ уӆты-хоӆты щирӆаӆ ӆэщатты манас.
Мет оӆаңан Екатерина Ивановна кутап ашкуӆа хоща рупата ӆувеӆа мощатас, похат па эвет историяя, мировой художественной культурая, обществознания верата утаӆтаман ус. Хут таӆ сыс щи тахаяӆан рупитас. Юхат па Суматвошаң коррекционной ашкуӆа-интерната кущаятан вохса. Щиканща ин яӆап рупитты тахая ӆув нох аматман манмаӆ. Щи вер ураңан тамхатӆ унты тайты рупатайӆ эӆты тамиты манэма потартас: «Тухаӆ порайн, ин муң кутап коррекционной ашкуӆаев хоща уӆты похат па эвет 21-мет таӆ вуша ёхаттэӆан, утаӆтыты верӆаӆ веӆщи етшаптаӆат. Тата ӆый хотат омасты хоятата, мув харатан энамты ӆэтотат тайты па ёнтасты нэңата вещката па туса утаӆтаӆайт».
Тамхатӆ ашкуӆа-интернат хотэван аратэӆн 70-кем пох па эви утаӆтыйӆ. Ар пелак няврэм — щит хантэт, охалят па ёрнат. Ӆый тамхатӆ хоӆыена Суматвош район арсыр ай куртат муй па уншак вошат эӆты щий утаӆтытыя ёхтыӆыӆат. Ашкуӆа-интернатан Ӆэв ёхан, Ванзетур, Тэк, Саранпауль па Игрим вошат эӆты уӆты няврэмат ияха утаӆтыман тайӆайт.
Мет ун класс хоща 12 пох па эви туп уӆ. Там пуш, Екатерина Ивановна верам айкеӆӆаӆ щирн, яӆпа айшак классата няврэмат районэӆ ӆоватан ияха акатӆайт. Щи ураңан, мосаң, еша аршак пох па эви ӆый хощаеӆа еӆӆы утаӆтыты ёхатаӆ.
Мет ёхи хащам порайн Екатерина Ивановна потартас, хоты туняӆ таӆн арсыр ун классатан няврэмат рущ ясңа, литературая, историяя па обществознанияя утаӆтыман рупитас. Там пуш па туп рущ ясңа ай ёх утаӆтыты питӆ. Кашң рупата туса ӆэщатты ураңан, щи вер тумпийн, ашкуӆа-интернат хот кущаятан методист нэңа пайтса. «Манэма тамащ похат па эвет пиӆн аӆ умащ рупиттыя, ванта, ӆый иса кутэӆан нётасман уӆӆат», — ёхи хащам кутан няврэмат утаӆтаты нэ нюхмас.
Владимир Енов ханшам потар
Авторы
Лух Авт
Темы