Няръяна Ӈэрм
«Мел’ не» ю’’ пода
Округханана’’ «Ямал-ню’’на’’ я!» Ассоциацияхана ӈармы’’ ненэцие’’ Совет манзара. Ӈоб’’ «Мел’ не»м’ нюбета кружокдо’ таня. Пенсияхана мэна’’ не’’ тикан’ турӈа’’. Ӈобт’ ма’’люрӈа’’, серодо’ тасламби’’, сэдора’’, панорӈа’’, хуркари’’ ӈамгэри ӈудахана сертаби’’. Харто’ манзаито’ нямна падна’’.
Хэвы си’’ив яляхана клубандо’ соя’’ма’ ялям’ ядабтамбиць. Ю’’ подандо’ хаясь. Тикы ненадо яляндо’ е’’эмня ӈарка выставкам’ сертавыць. Таӈок по’’ ямбан’ сэдвыдо’, паӈгалмыдо’ манэ’’лабтамбиць. Ӈэвахана мэнадо’ Татьяна Александровна Ямщикова тарем’ мась:
— Тарця тарана иӈуд ӈавна Окотэтто Елена Николаевнан’ товысь. Пыда ма’’нисяв: «Маня’’ нива’’ манзара’’. Ханяӈына’’ тэри ӈопой яхана ӈамды’’, хэвня’ ни’’ ханас’’. Тарем’ ма’’люрць нина’’ хар’’на’’ нерня’ пэртярхава’’ ӈэӈгува’’. Няхана’’ енаӈгува’’». Тюкова’’ нердена ӈарка выставкава’’ ни ӈа’’. Ю’’ по’ сер’ хуркари’’ тарана’’ ӈавэ сертаваць. Теда’ сайнорта’’ ненэцие нядабива’’. Пыдо’ е’’эмняндо’ юдерсавэй носкадамдо’ паӈгалпива’’. Няна’’ ядэрта’’ тад’ нерня’ тамна варемдо’ мэта’’.
Ӈоб’’ си’’ивхана ӈобт’ ма’’люрӈа’’. Мал’’ ӈэрм’ тер’’ не’’, тодо’ тэнз’’. Паркола’’, сэдора’’, ӈадьбято’ — «Мел’ не’’». Ненэй не’’ ядхана хабей не’’ ӈодякохот панор’’ӈа’’. Паской’’ имбытадо сэдыбасеты’’. Яберена’’ ик’ тяха’ серыбада’’ ӈодякудо’ паӈгалпасеты’’.
Теневана’’ манзаидо’ тамна’ тяха’ ӈацекэхэ’’ ваде’’ядо’, пыдо’ няндо’ сыраць ӈобтарем’ сэдораван’ харбиласетыд’’. Тикы’ хавна тарана’’ серо падыби’’, мал’’ ӈобт’ ма’’ламбидо’. Нидо’ сэдора, панорць тохоламби’’. Хаданана’’ пуня’ ӈэда’’ ни’’ ӈа’’. Ил’ нерня’ миӈа, пыдо’ мале ӈарма’’, ханяӈы’’ нидо’ пилибт’’ нядандо’ мараӈгыманзь ханӈа’’. Тикы нидо’ хэбидя яляханандо’ ӈани’ тензебтейдонзь.
Манзаито’ помна сяйӈа’’, нито’ соя’’ма’ ялэ ядабтамби’’. Сейхад миндя’’ вади помнандо’ мэцеты’’. Хусувэй сава серкана мал’’ тарасеты’’. Лакри’ нидо’ манэ’’пато’ майсетыд’’. «Мел’ не» кружокхандо’ тандая’ турти, сэдора ехэрани харто’ тохоламбидо’. Тодо’’ явна хэвандо’ нерцюна Валентина Нёлековна Няруй, юнета нява’’ тарем’ мась:
— Пыдар ӈод’’ ӈани’ тоин’’, ӈопойӈэ нён ӈамдю’’. Ӈэрм’ яханана’’ неӈэ мал’’ мелва’’. Тоб’’нанд ня’’анд ӈули’’ майӈгува’’.
Ти, тарем’ «Мел’ не» клуб’ тер’’ ю’’ по’’ нидо’ майбтамби’’, масиёдо’ няхато’ тэворць моёпидо’.
Автор: Марина Ярой’ падвы
Авторы
Няръяна Нгэрм
Темы