Няръяна Ӈэрм
Мяту’’ та’амна дятыԓяш’’
Чуки пома’’ — дечашама пуӈc тунԓы, Ямална ӈаԓка веԓв таньше тасԓамы. Дечашама — ненэй ӈаԓкамана нешант таԓа. Чуки ноптухуна куԓкаԓи’’ кавша’’ ӈычимшту’’. Ненымана тавсуԓта’’ деча’’ вайма’’. Пу’’ тахана ӈука тэмс неша’’ тонԓакота’’ дечахана’’ канынԓаштут.
Таԓям’ лекԓы’’ выӈкна диԓина’’ нешаде’’, канаԓмантуӈ тайхана, неԓьшут паԓтонхана шичиԓпёштутуӈ. Наԓаӈ Таԓкахай лекаԓ’’ мя’кна мансԓанна’’ нешай’’ ӈысы’’мана дятынԓаштут’’. Ваԓныӈ диԓихина чуувна мэна’’ нешади’’ паԓтонхана шичиԓмантуӈ мэты, лекаԓ’’ чиԓта кан’хана мяту’’ та’амна чиԓяш’’. Кот’’ дечахат, кыӈкуԓу’’ дечахат’’, ӈыди’’ тавсуԓта’’ кавшаӈкат’’ выӈкна диԓина’’ нешади’’ шичиԓпитоньш. Шичиԓмантуӈ неԓьня нешаде’’ конԓаштутуӈ, нянатуӈ каныԓмантуӈ нямна дюничаԓьшту’’. Ԓаттуӈ, шейнтуӈ деч’’ дет дюньшиԓюԓьшту’’, шодютуӈ манэшту’’. Кимя ни’ канэԓ, таԓьша нешинԓим паԓтонхана ши’шту’’.
Лекԓы’’ маньшту’’, тавсуԓта деча неньшаԓмана хомяхамтанана ниӈа. Выӈкна диԓина нешиӈ канаԓпата, чики минханта меԓ лекаԓ мят’ тош’ выни’та пиԓас’. Таԓям лекԓы’’ пу’’ тахана нешаде’’ тонԓакота’’ дечахат’’ шичиԓпёштутуӈ. Паԓтонхана ши’мы нешиӈ, лекаԓ вихиня, канаԓпата ӈотнаӈ, дечата меԓ хомяхамты. Ненымана ӈаԓка нешаӈкна’’, ӈашки’удехана’’ тавсуԓта деча’’ вэйма’’. Таԓям кимя прививкам’ ӈамтаман ха’ӈа’’, таԓьша нешай’’ чупей шичиԓдятоньш’’. Таньше куптана диԓина’’, выӈкна мэна’’ нешади’’ дяԓян падиԓматоӈ хома шеԓ.
Четаӈ куняӈи’’ вэку’’, пуша’’ каԓват някудёԓ тcвнана выни’ӈа’’. Пон ӈамтампючетуӈ прививкетуӈ камна, чуки похона нешаде’’ мыт дечахана канаԓмантуӈ тайхана шичиԓпитоньш. Ԓакхай похо’’ты ӈука дяӈ тамна хамум ташту. Хамуӈ минюмахат дя вомшту, вит’’ ӈэԓанаӈc ниш’ту кай. Таԓям четаӈ канаԓмантуӈ тайхана выӈкна диԓина’’ нешади’’ гепатит’А нимита дечахат шичиԓпитоньш.
Чикиӈ камна каныԓмамтуӈ манымантуӈ мэты, лекԓы’’ нешай’’ кыму’’ нэхэпиш’’. Кимяӈ мят куняна ӈаймям лекаԓки’’ нешай’’ дет тасԓёта управленихина мансԓанна’’ тапаташтутуӈ, «Ямал -нюна’’ дя!» нимита ассоциацихит мэна’’ нянатоӈ дятэԓьшту’’.
Чуки похона ӈыдихийтуӈ шеԓ лекԓы’’ ӈука мяту’’ коӈаш’’. Выӈкна, петаԓахана диԓина’’ нешади’’ чупей шичиԓмантуӈ мэты, няхаԓ диԓиӈ выӈкай мятумана дятыԓты’’.
Автор: Андрей Пяк патмы
Авторы
Няръяна Нгэрм
Темы