обновлено: 10:31, 15 ноября 2024
Няръяна Ӈэрм
Сава сехэрым’ нёдаӈгу’’
Ямал’ тиӈгэвна хусувэй районхана нюртей классаха’’на мэна’’ ӈацекы’’ ненадо ялямдо’ мэ’’ӈаць. Тад нерня’ «орлёнок»‘ нюмам’ мэта’’. Сидто’ нерня’ тидхалембадаӈэ ӈаркамбой’’ нидо’ тараӈгу’’.
Тазовской районхана Ӈоя хардахана Тасу я’ ерв Виктор Югай е’’эмняндо’ сава вади мэ’’манзь товы. Икто’ тяха’ паской’’ сюнраха’’, няръянарка’’ ӈоксяико сярвы. «Ӈацекы’’, небянадо’, нисянадо’, сидто’ тохоламбада’’ ӈоб’’ сер’ «Орлята России» командахана мэӈгу’’. Тасу яханана’’ ӈобт’ толаб’’, толырманандо’ ёнаркад ва’’ӈа’’. По’ ямбан’ мэкад сянакубц тасламбаӈгу’’, сава серо нерня’ тидхалембаӈгу’’, нюдя ӈэдахандо’ мале яна’’ пирмда’’маӈэ тараӈгу’’. Нерняӈы ялява нядандо’ пере», — сидто’ савуць тарем’ лаханавы.
Надымской районхана Ӈыд хардахана 32 орлёнокдо’ ӈадимы. «Россия яна’’ тер’’ тотрев’ ӈоб’’ няю’ нятаӈгуда’’. Хусувэй яля’ няю’ ӈэда серкад теневаӈгуда’’. Иламда’’ харта’’ несэймдамбаӈгура’’», — едэй сехэрэндо’ нямна школандо’ ерв няндо’ табековы.
Сюнай-Саля’ ӈацекэця’’ мале хор’’ иры’ пудана яля’ пиркана ненадо нюбедо’ мэ’’элвы’’. Ӈани’’ нюдя’’ хардаха’’на тохолкода’’ нито’ сер’ орлёнокӈэ хэвы’’. Пыдо’ тенева’’: тэри тарця нюмам’ ни’’ мэс’’, иламдо’ несэймдамба харто’ варемдо’ мэта’’.
Автор: Г. Окотэтто’ падвы
