обновлено: 10:31, 15 ноября 2024
Няръяна Ӈэрм
Тиртя ӈанори’’ тирӈа’’
Тюку по’ сидя маркаюна’’ помна вэркода’’ пон манзараць. Ӈарка тецьдава’’ яӈгусь. Ӈадьбята Саля яв’ и’’ янамбовна ханимдаӈгота. Носиндалава’ иры’ сидндетимдей яля’ ненэця’’ ханярид-танярид юнм’ намдаць: ӈарка ту ӈано’’ пэвсюмя’ няӈы ю’’ час’ пуд мале ни’’ ӈэдалёрт.
Салехард’ няӈы яха’ вархана сею’’ ӈокмаць. Ту ӈано’’ нулаӈгалавахана сацьри’’ ӈонабты’’. Ӈадьбята мале няби хубтахана яна’’ тер’’ тиртя ӈанохо’’на мякто’ тэвыдаць.
Теда’ сидя хардахаюна’’ помна тиртя ӈанори’’ мун’’ со’’. Салехард’ няд билетадамдо’ аэропортхана тэмдаби’’. Лабытнанги маркана яӈга тиртя ӈано’’ ӈамдолава манзара. Харад’ еркад хубтаркахана ӈа, машинарихина таня’ тэваӈгун. Ӈармы ненэць’ сехэрэмда 1360 есявна салдаӈгуда, ӈацекэнда билет’ мир’’ 680 рубль ӈэӈгу. Интернет’ мутравна ӈахакуд akyamal.ru сайтхана тэмдорць пирӈава’’.
Салаба ёльцянда пирувна няӈорома’ сер’ «подушка»ӈэ нюбета’’ ӈано’’ ӈэдалёрць пэӈгуд’’. Сидя «Нептун-23» хубтахад 6:45 часхад пэвсюмя’ няӈы 23:00 ёльцянд’ ӈэдалёрта’’. Тараванда мальӈгана няд’’маӈэ няхаромдэйм’ мэта’’. 170 есям’ ӈарка ненэць’ салдаӈгу, ӈацекы’’ е’’эмня 85 рубльм’ мита’’. Ӈаворито’ саӈгом ю’’ килограмм ӈэбта 17 есям’ салдаӈгу’’.
Сяхари’ хонравандара’’ танябта телефонувна лаханада’’:
Салехард’ няӈы тиртя ӈано’’ ӈамдолаван’: +7-349-22-2-52-51, 2-52-52 (доб. 2201), Лабытнанги’ няна: +7-908-860-84-80.
Автор: Галина Окотэтто’ падвы
А. Яптик’ тадтавы’’
