Няръяна Ӈэрм
Ты’’ ненадумда’’ма’’
Тюку илаӈгана хуркари’’ едэй’’ мутра’’ ӈадибелыд’’. Ханяӈыдо’ ӈарка няд’’маӈэ тара’’, илма’’ сибимдемби’’, ӈамгэ тарана серм’ мер’ тидхалемби’’. Хой’ илаӈганана’’ ӈод’’ ӈани’ мэ’’эйдо’. Ӈоб’’ юн тарцясь. Ты пэрмахана ехэрана мутры мэ’’ма’ нямна ӈа. Тарабцонда танявам’ вадамбой’ манэ’’лабтаӈгудо’.
Россияна’’ тиӈгэвна нюртейӈэ Ямалханана’’ ӈадимдевы серӈэ ваде’’ӈадо’. Тикы проектадо’ «Безопасная тундра» нюбе’’ӈа. Ненэця’’ тыто’ ханяна хадырмам’ ёӈгато’ тяха’ тебдевы’’ мутравна маниеӈгудл’. Тарця ехэрана серм’ Ямальской районхы ӈэрм’ тер нядабада «Ямал» нюбета движение няби ӈэрм’ тер’’ управлениядо’ минреди’. Манзаидо’ округна’’ нермбэртя’ грант’ есявна тидхалембадо’.
Тикы проектан’ 31 ты пэрти’’ организациям’ мэванзь тасламби’’. Вадавнато’, тарем’ ты’’ хадо лэтраван’ харва’’. Хэвы си’’ив яляхана Панаевск’ вымна’’ мюсерта’’ ты пэртяха’ тэвормы’’, мале сидя спутникхад мэта сярасьм’ ты’ ик’ тяха’ тебдевыць. Тамна Яр-Саля’ хэвхы мюсерта’’ ненэцие’’ тэхэ’’ тарцядамдо’ сертаӈгу’’.
Хахаяда яля’ мат’’ ӈарка ӈэсы’’ юкад вата хасаваю’’ ёнар’’ ты проектхана манэ’’манзь тасламби’’. Ӈокханда юр’’ ёнар’’ тым’ тикы проектхана мэта’’.
Сидяӈгахана МОП «Ярсалинское»‘ Худи Василийм’, «Харп» ТСО КМНС’ терм’, Яптик Андрейм’ маниеда’’.
Автор: Марина Яр’ падвы
Авторы
Няръяна Нгэрм
Темы