Няръяна Ӈэрм
Вырэй ненэць’
Окотэтто Альберт — яна’’ тиӈгэвна юнета илебей ненэць’. Пыда сёётэй ӈэванда хавна тамна сёбар’’ серо нерня’ тидхалемби. Ӈани яхана илебата ӈод’’ соя’’ма’ ямда нида юрыбю’’. Ханяри’ тэворпата, Ямалхад ӈэвамда етри’ вадецетыда. Ирината ила’ саирм’, ненэй вадамда ныхында ӈарамдамаӈэ мэта то’’олхыда.
Тандая’ няданда ӈани’ едэй юнм’ намдаваць. Россия яна’’ ӈарка маркад Ямал’ няю’ тованзь мэ. Тэри вуни ядаӈгу’’ — варемда мэць сюрмбаӈгу. Ӈопойриӈэ мэё сехэры’ ядувна Ӈэрм’ ня’ нэкалтада.
— Сава нини’’, маӈгты’’ иры’ нюртей яля’ Москва няд Ноябрьскан’ пяӈгув. Сехэрэни ямбдада 3200 км’ пир’’ ӈэӈгу. Хусувэй яля’ 55 — 60 километрм’ пирдалембаӈгудм’. Нянани хонё мэта’’ ӈаворини’’, ӈаврани’’, имбытадони’’ содаӈгудм’. Сюрберць мэта «коляска»’
мю’ мэӈгун. Москвахана сямянхат ненадо Красная площадь нюбета яхад сюрмбаӈгудм’.
Ты’’ ниць иры’ 18 яля’ интернет’ мутрам’ няд’’мяць таславы серта нямна лаханась:
— Си’’ми ненэця’’ етри’ хонрамбасеты’’: «Сюрбермар тикы ӈамгэ? Нянанд хурка тарода таня? Ханяд тарця иӈудм’ хосан?» Мань теда’ няхаромдэй мэва’ сюрмбаӈгудм’. Нюртейвана 2022 похона Нядаӈгардахад Саляӈгардан’ тэвыдамзь. Сёбар’’ тарця сюрберма’ тэнзм’ «ультрамарафон»ӈэ нюбе’’ӈадо’. Тамальӈгана ими ядэр’’ӈась: «Тамна ӈамгэм’ серта сава ӈэдакы? Тарем’ Харпхад Ноябрьск’ ёльцянд’ вэӈгалёда’’ сехэрым’ пирдале тасладамзь. 2024 похона нябимдей мэва’ сюрмбидамзь. Ямалм’ ӈарханда сюртена то’’олхав. Теда’ соя’’ма яхани Москва’ няюд тутадм’. Тарем’ ненэй ненэцяӈэ невхы илаӈгад мэбе’’мава’’ ӈадимдембидм’.
Лахарёмда ӈарханда намдаван харвабата’’ Альберт’ страницахана хоӈгура’’. «Няръяна Ӈэрм»хана ханзер’’ сюрмбавамда тамна падыбаӈгува’’.
Автор: Галина Кинчина’ падвы
Авторы
Няръяна Нгэрм
Темы