Няръяна Ӈэрм
Вырэй ныхыдырта
Небо’ Яр-Саляхана ты пэртя’’ Сянакова’ яляхана тодо’’ харад’ тер’’ ӈацекы’’ ныхыдырӈаць. Тикы’’ пирдырта’’ поӈгана ӈопой мэбета хасава ӈацекым’ манэ’’ӈаваць. Нюртей тарем’ ныхыдырць хорпавахананда таминда няхаромдэян’ ха’’мыць.
Тамальӈгана Роман Лаптандер’ нюмам’ хэтвандо’ сер’ сырта’’ ненэця’’ тёрдо’ ёльце я’’авлыць… Пуна ныхыдырмам’ саваӈэ манэ’’мэда, тикан’ тоходана таславэда. Харта инда сер’ пыхыдамда таня’ падвэда. Ӈэрё’ няна тид’’ пирдырмаха’’ хамеко пэвы’’. Ялэхэ’’ сюрберманзь хан’’мы, вэва нумгад ехэравы. Няданда ӈарка’’ няха’’ната пивна сюрбермы, сёбар’’ мэлван’ ӈобӈгэв’ ядэрмы.
Нямэхэна сита Хальмер’’ Седе’’эн’ ӈэдарамбиць. Таняӈы ян’ сяхаӈгарт’ тэвормадавэй ӈэвысь. Яра иры’ 28 яляхад ты’’ саполана иры’ 1 яля’ ӈэсонд’ помнандо’ Тазовской, Пуровской, Ямальской район’, Новый Уренгой’ тер’’ пирдырмыць. Ӈокханда самляӈг ю’’ матдонзь. Подо’ юкад вата сидяхад юкад вата си’’ив’ пирт’ тэворӈаць. Саӈговодо’ тет юкад сидндет ю’’ ӈэсонд’ ӈаць.
Роман саӈгомдо’ мат’’ ю’’, 14-15 пота’’ поӈгана мэсь. Няданда мэбета яӈгусь, ныхыдырць пямда ӈобкарт’ нидась ӈэдара’’. Мяканда тэв’’махаданда ня’’мавы медальмда ӈадьда ян’ ӈыдадась. Мята тер’’ харбё ӈэвамда ӈули’’ саву’’ӈадо’. Неноховавна нюдяко няхаюда ӈармдыхы’. Ӈарка неканди’ тотрев’ ӈани’ мэбе’’ман’ харваӈаха’.
Мань хадамда хонрадамзь:
— Романхав хусувэй ӈамгэмда ивъер’ сертабасетыда. Хэт’’махаданда вадамда нисетыда мадабю’’. Мэван харванамда ненэся мэӈгуда. Та’ хой’ няна турпата ӈани’ тарця ӈэсеты. Ялэхэ’’ сюрберцеты. Ӈамгэри нум’ ӈэя. Манзетыдм’: «Ӈэд нёя’’ са’’не’’». Хутыта хэсеты. Манд’’нив: «Ни’’им ханяцей’ саӈговот’’». Пя’’ помна сюрбертаханда нёховы ӈэӈгува. Теда’ хамекобта ӈадьбята варемда мэць пэрманӈгабя. Хэвнямна ядэрма, пирдырма нянанда ёльце сава ӈэ’’нив’’. Ненэцие, харад манэта. Манд’’нив: «Тамна таремрка таравынё’’». Ӈамгэри ӈамгы няхад манэпада. Нерня’ ӈэван’ харвабцода ӈармда.
Вырэй ныхыдырта ӈани яляхана Чебоксары хардан’ ханда. Россия’ тиӈгывна илена’’ сёбар’’ няха’’ната пирдырта. Пыда’ хавнанда Тазовский хардан’ ядэрмы’’ поӈгад тамна мат’’ ва’’лёйм’ тэравыць. Пыдо’ сиддо’ мал’ округ’ ныхыдырти’’ мандалт’ падвыць. Тад нерня’ «Лидер»м’ нюбета сёбар’’ тохолкулван’ ханта’’, варемдо’ мэць пыхыдадо’ тохоламбаӈгу’’.
Автор: Анна Яптик’ падвы
Авторы
Няръяна Нгэрм
Темы