Pulse.Mail

Дзен Платформа

Google.News

Дзен Новости

Потар ханшам хоятат. Хор: Альбина Тырлина

<div class="content-lead">Тамхатӆ Пулӊават вош хоятат Национальной библиотекайн диктант ханшсат. Там потар Расул Гамзатов ханшиӆыйс, Зоя Куртямова ханты ясӊа тоӆмащсаӆӆы. Альбина Тырлина хор верас.</div><p>Ма рут ясӊем! Наӊ ма тащем, наӊ ма щунем, аратаӆ муш эӆты портун. Ма самеман тэӆыя ар, ма турсый тайӆам. Щи турсый — наӊ, ма рут ясӊем.</p><p>Ай няврэм иты, ёш эӆты катаӆман, уӆапса вантты, наӊ манэм хоятат хоща тусэн. Ма па уӆты мувем эӆты еӆӆы потарӆам. Наӊ манэм Похатур хоща тусэн, ӆув нэмаӆ — воӆаӊ рущ ясаӊ. Ӆув ищи манэма рут ясӊа йис. Ӆув манэм кимет ёшем эӆты вусӆы па па мув суӊат вантты тусӆы.</p><p>Кашӊ ханшам нэпекеман ма рут мирэм кат аӊки тайӆ. Оӆаӊ аӊкем — ма рут мувем. Тата ма сэма питсам, тата ма рут ясӊем хуӆсэм, потарты питщасам, ӆув ма вурэма, ма ӆыпема ӆыӆӆаман уӆ. Тата ма рут ясаӊан арыты ар оӆаӊ пуш хуӆсэм. Щаӆта па ишканщап арэм арэмасэм. Тата ма нянь па йиӊк вурт моштасам. Камн пуш кев вурама хуӊхман, ма курӆам кева хойӆысат, вура ӆыӆӆысат, рут мувем йиӊкатан па торнатан яммаӆсайм.</p><p>Кимет аӊкем — Россия хон мувем. Энмаӆсайм, юран масайм, хува манты юша тусайм, мир ӆоват уӆапсайн альсайм.</p><p>Кат аӊки — юр маты кат тохаӆ, кат ёш, кат сэм, кат ар. Кат аӊки хошам ёшатан охем хуват вощхисайм, мосты порайн паӆӆам эӆты таӆӆысайм. Пох щиран кат аӊкем ещаӆ ма шанша ӆойӆам.</p><p>Расул Гамзатов</p>

«РОССИЯ – МИР ХОТТЭЛ»

Ям арат таӆ юпийн Софья Шесталова опера ар еӆӆы ханшты питас. Хор: Людмила Шульгина

<div class="content-lead">Йис тэӆн хантэт па охалят йис потрат тайсат, щит эӆты оша йис, муй щирн Туром, Мувев-Йиӊкев, Най-Уртат, хатнэху, войт па па отат тыйсат. Сорни-Най эӆты йис потар кашӊ шоши хоят уйтаӆ. Там ванан «Сорни-Най» нэмпи опера ар тыйс.</div><p>Щи опера ар ханшты вер эӆты муӊева Югра мувев опера арат арыты нэ Софья Алек-сеевна Шесталова айкеӆ тус:</p><p>– Щит эӆты мин икем, охаль мир оӆаӊмет композитор ху Владимир Иванович Шесталов пиӆн хувн нумассамн. 2012-мет таӆн ӆув «Овс мув ар сов» нэмпи араӊ щуӊк дискаӆ эсаӆсаӆы. Щита Югра мувев духовой оркестр ёх (дирижёр ху Антон Яковлев ус) арсыр нарасъюхатн В.И. Шесталовн ханшам ар соват нарассат, щи тумпийн щита шоши мир нарасъюх па торсапӆ ханащсаӊан. Ма ёӆн щи диск яма хуӆантмемн роман Владимир икема ястасам: «Володя, щи ар совӆан шеӊк хорамаӊат, щишн арыты ӆаӊхаӆайм. Там ар совӆан хуват опера ар ханшӆамн!» Ӆув кашащас, туп така партас, щи опера ар туп манэма арыты мосӆ!</p><p>Софья Шесталова ясӊаӆ щирн, щи эӆты айкеӆат акатты ху Виктор Журавлёв «Тюменские известия» газетайн 23.11.2012-мет таӆн ханшас. Щи айкеӆ эӆты С.А. Шесталова ӆуӊатӆ:</p><p>– Владимир Иванович Шесталов ястаӆ: «Ма — охаль мир композитор ху, щишн шоши мир йис потар эӆты опера ар ханшты вутщиӆам. Мосаӊ, еӆӆы ма ханшам симфонической ар совӆам хуват «Сорни-Най» нэмпи опера ар тыйӆ. Ин итухӆ арат имем Софья Алексеевна утаӆтаӆ, ӆув, ванты, драматической сопрано турсый тайӆ».</p><div class="content-new-image"><img alt="pic" src="https://storage.yandexcloud.net/ym-sites-static/43555725-dfe.webp" style="width:100%" height="720" width="1281"/><div class="content-image_child">Щита Югра мувев духовой оркестр ёх (дирижёр ху Антон Яковлев ус) арсыр нарасъюхатн В.И. Шесталовн ханшам ар соват нарассат, щи тумпийн щита шоши мир нарасъюх па торсапӆ ханащсаӊан. Хор: Людмила Шульгина</div></div><p>Софья Алексеевна ястаӆ, «Сорни-Най» опера ар — щит Шесталов рут и номас эӆты тыйм ар. Мет оӆаӊан охаль мир писатель ху Юван Николаевич Шесталов 1976-мет таӆн «Сорни-Най ханя» нэмпи потраӆ ханшсаӆы, 2005-мет таӆн Владимир Шесталов, ӆув похӆ, охаль мир оӆаӊмет композитор ху, «Сорни-Най» сюита ар совӆ ханшсаӆы. 2013-мет таӆн В.И. Шесталовн ханшам «Музыка и мифология Медвежьего праздника обских угров» киникайн Сорни-Най эӆты ар ханшман ус, щит Софья Шесталова ханшас. Щиты айӆтыена шоши мир йис потар эӆты опера ар тыйты питас. 2011-мет таӆн Юван Шесталов антома йис, 2014-мет таӆн ӆув похӆ Владимир хув паната шушмас, щишн щи рупата воӆыйс. Ванты, опера ар ханшты вер — щит ун па ӆаварт рупата, щит, матты ки, ар сов потар.</p><p>– Опера ар — щит ипуляӊ нарасты, арыты па якты ун потар, щита ищи оӆаӊмет потар, мет воӆаӊ вер па сохантты вер уӆӆыӆат, — Софья Шесталова ястас.</p><p>Туп ям арат таӆ юпийн Софья Шесталова опера ар еӆӆы ханшты питас, щита Ю.Н. Шесталов ӆуӊтарӆаӆ уӆӆат, щи тумпийн Софья ищи ханшас. Ма С.А. Шесталова эӆты инщассам, муй эӆты «Сорни-Най» опера ар питӆ, ёхӆы ӆув ястас:</p><p>– Ма туса щи эӆты нумассам. Опера арн мет сыры увертюра — щит муй эӆты потар. Щаӆта оӆаӊмет ар — щит Мувев сэма питам вер, кимет — Сорни-Най сэма питам вер, хуӆмет — щит Куль Отыр Сорни-Най пиӆн таранӆаӆ, няӆмет — щит Сорни-Най ханя, ветмет — щит Сорни-Най эӆты тыйм йис потар, хутмет ар эӆты ин ан потарӆам, ханяя тайты питӆэм. Уйт ӆор тыӆащ 8-мет хатаӆан опера ар ханшты верэм сохнас.</p><p>Интам «Сорни-Най» опера ар арыты порайн етнхот альты вер эӆты нумасӆам. Щи верн манэма «Хатӆ» нэмпи ханты-охаль мирӊан театр артистат, «Ёмвош ёх» тахайн арыты нэӊат па «Монщ хот» арыты-якты няврэмат нётӆат.</p><p>Там опера 35-кем минута арат щащты питӆ. Софья Шесталова ясӊаӆ щирн, щи операйн арсыр европейской нарасъюхат эӆты шоши мир нарасъюх, торсапӆ, хутаӊъюх па пенщар щащты питӆат. Мосаӊ, еӆӆы щи опера ар охаль ясӊа тоӆмащты нётӆа. Софья Алексеевна Шесталова — творческой хатнэху, щишн хонна ант ястас, хун ӆув «Сорни-Най» опера арыты питӆ, туп щи альты вер там таӆн тыйӆ. Муӊ ӆувеӆа ар ям ясаӊ ястаӆув, ӆуӆн ар хоят «Сорни-Най» опера самаӊа ат хуӆантсат!</p><p>Людмила Шульгина ханшам потар</p>

«Сорни-Най» йис потрэв хуват опера ар тыйс

Ёлах па ертаӊ хатаӆан ищипа тохи щёрас еша антомшак хоятат пиӆтащисат: айӆ, унаӆ иса аматман хухаӆсат. Андрей Ткачёв/Ямал-Медиа

<div class="content-lead">Хоятат, хой хухатӆыты вер самаӊа тайӆат, тампуш Пулӊават вошан ӆапатмет пуш «Полярный круг» касапсая яха актащисат. Ямал мувев тумпийн, касты ёх 11 регионат эӆты пиӆтащисат. Казань, Сыктывкар, Воркута, Уфа, Сосногорск, Новосибирск, Москва па Хон Петра вошат эӆты хоятат там касапсая нэман ёхтыӆысат.</div><p>Унт ӆор тыӆащ 30-мет хатӆ кеша Пулӊават вош хулат хуват хухатӆыты юшат ӆэщатсайт. Мет оӆӊа 500 метра хухаӆты кут хоятат эсаӆсайт. Ёлах па ертаӊ хатаӆан ищипа тохи щёрас еша антомшак хоятат пиӆтащисат: айӆ, унаӆ иса аматман хухаӆсат.</p><p>– Ванты, ма ай пора эӆты касты лотата яӊхӆам, нёхамтыты па хухатӆыты карӆыман уӆӆам. Ин па няврэмӆам щи вера ищи утаӆтаӆӆам, — Александр Лонгортов ястас. — Щиты, похӊаӆам пиӆан ван кутан хухатӆыты ӆойӆыӆув. Айшак, Богдан похием мет харщи. Ӆув пиӆэӆан там хухатӆыты касапсая нэман ӆэщатысув. Кат ӆапат сыс, кашӊ хатӆ, вош хулат хуват хухатӆысув па нёхамтысув. Ар юр понам верӆув нох этсат. Щёрас кем хоят кутан Богдан нох этас. Мет оӆӊа хухаӆмамаӆан еша ёхи хащамтыйс, щаӆта нумаӆмасӆы, хоты муӊ ӆэщатысув, муй арат юр версув па еӆӆы таканшак курӆаӆ нёхтасӆы. Щиты похием 500 метра хуват хухаӆман оӆаӊ места шитас, карты мевал посан мойӆаса.</p><div class="content-new-image"><img alt="pic" src="https://storage.yandexcloud.net/ym-sites-static/b67cf720-04f.webp" style="width:100%" height="1440" width="2560"/><div class="content-image_child">Мет оӆӊа 500 метра хухаӆты кут хоятат эсаӆсайт. Хор: vk.ru/salekhard_adm</div></div><p>Щаӆта катсот антомшак хоят 3 километра хухаӆсат. Ар хоят кутан, Роман Талеев мет харщи уӆмаӆ. Касапсая ӆув нэман Охсар вош эӆты ёхтыӆымаӆ. Айӆат ёх кутан уншак ханты хоятӆув ищи такан ёхи ант хащаптысат. Ардалион Павлович Пырысев касты юшаӆ кентат хухаӆсаӆӆы.</p><p>– Ма там хухатӆыты касапса эӆты интернет хуват айкеӆ кащаӆасам, щаӆта па эвеман заявка ӆэщатты нётсайм. Щи кеша щёрас соӆкува сохаптасам. Аратаӆан, тата кашӊ хухатӆыйм хоят ох шук тый сохаптссат. Там охат «Ямине» фонд хоща акатӆайт па мушаӊ няврэмат яммаӆты нётӆайт. Нумастэман, хухатӆыман няврэмата нётты, щит шеӊк ям вер, –Ардалион Пырысев ястас. — Муй арат манэм нумӆэм ма иса хухатӆыӆам, ашкуӆа пора эӆты ӆохан касты самаӊ. Оӆӊа Мужи вош, щаӆта Ӆорвош район, еӆӆы па Пулӊаватан утаӆтыман, Ямал мувев сахат хухатӆыман кассам. Ин па пенсияйн уӆман аӆ щиты ант омасӆам, порайн хухатӆыӆам, хиӆыӆам патан тутӆыӆӆам, утаӆтаӆӆам.</p><p>Хащам катсот-кем хоят 10 па 21,1 километра хухаӆсат. Хой ёхтыӆыйс иса верытсат финиш унты ёхтаптаты. Кашӊ хоят нётап верас, аратаӆан 727 щёрас соӆкува ох акатса па няврэмат яммаӆты кеша «Ямине» фонда китса.</p><p>Иван Сандрин ханшам потар</p>

Хухатӆыман няврэмата нётсат

Щи тахайн №1206 Овкурт участковой комиссия рупитас. Хор: Анна Родионова

<div class="content-lead">Ямал мув ӆоватан унт ӆор тыӆащ 30-мет хатӆ вуш эӆты щёхар тыӆащ 17-мет хатӆ унты касӆыман, хуӆ веӆпасӆаман уӆты мохет пирасты питсат. Россия ӆоватан 36 мув суӊан аӆаӊшак пирасӆа. Хойтат ай куртатан уӆӆат, па ӆув хощаеӆ шеӊк ӆаварт ёхтаптаты, хой ТЭК муй тутаӊ хопан рупитаӆ.</div><div class="content-new-image"><img alt="pic" src="https://storage.yandexcloud.net/ym-sites-static/a332a1f8-95d.webp" style="width:100%" height="1440" width="2560"/><div class="content-image_child">Кашӊ хоят унты ёхатты юш сот моӆтас километра тохӆаӊ хопан манты мосаӆ. Хор: Анна Родионова</div></div><p>Хащам ӆапат вуш эӆты участковой комиссияя ӆоӊам хоятат тохӆаӊ хопан, мотур хопан, тутаӊ хопан, карты юш хуват яӊхты питсат. Няӆ регионан беспилотник онтасан пирасапса верӆа, щий ӆоӊксат Красноярской край па Кемеровская область — Кузбасс, па безэкипажной катьратна Карелия Республика па Архангельская область.</p><p>Ӆорвош район хуват ин ищи Избирком хоща ӆоӊам хоятат ай куртат па касӆыман яӊхты мохет унты яӊхӆат. Ӆорвош район Территориальной избирательной комиссия секретарь Анна Родионова ясаӊ верас: «Хащам хатӆатан муӊ аӆаӊшак нэпек эсаӆты мохет хоща яӊхсув. Овкурт эӆты Эрнст Ильич Рохтымов па Владимир Григорьевич Лонгортов усӊан. Тохӆаӊ хопан Мужевской совхоз няӆ бригадайн усув. 39 хоят нэпек эсӆас. Щи тахайн №1206 Овкурт участковой комиссия рупитас. Муӊ ӆув пиӆӆаӆан рупата вантман яӊхсув».</p><p>Марина Лонгортова хув тэӆан касӆыйӆ, авка тайӆ, иса ӆув юпеӆан яӊхаӆ. Нэпек эсаӆты ищи яха ёхатсаӊан. «Муӊ авкаев нэмаӆ — Ром пох. Туняӆ вуш эӆты муӊ пиӆэван уӆ. Кураӆ каши, щишан иса ванан тайӆэв. Иса ма пиӆэман яӊхиӆыйӆ, щишан ин нэпек эсаӆмем порайн ищи ма пиӆэман ус», — Марина ястас.</p><div class="content-new-image"><img alt="pic" src="https://storage.yandexcloud.net/ym-sites-static/e19c0055-977.webp" style="width:100%" height="1440" width="2560"/><div class="content-image_child">Ӆуӊан па сусан ар пелак йи тахайн хотӆаӆ ӆойӆат. Хор: Анна Родионова</div></div><p>Кевн каматса хоттэӆ Мужевской совхоз эӆты уӆ, щит Лонгортоват, Епринат, Рохтымоват. Пирасты нэпек эсаӆты еӆпийн, кашӊ хоят па валэмийӆ, хой ураӊан ӆув тур сыеӆ маӆэӆ. Кашӊ хоят унты ёхатты юш сот моӆтас километра тохӆаӊ хопан манты мосаӆ. Ям хатӆ порайн мет еӆаншак уӆты ёх унты яӊхӆа.</p><p>Юш альман шоши хоятат уӆӆат, Эдуард Макаров ин яӊхас. Ӆув катра зоотехника рупитас, хащам хольмаӊ таӆан ӆув Избирком хоятата юш алиӆыйӆ. «Там йисан шеӊк ӆаварт антом, кашӊ хоттэӆ спутниковой телефон тайӆ. Кашӊ ӆапат ясаӊ верыӆыӆат. Щи веран уйтӆэм, хота ӆув ӆойӆат. Ӆуӊан па сусан ар пелак йи тахайн хотӆаӆ ӆойӆат. Шеӊк хува ант касӆыӆат, 10-15 километрайн. Щишан кен», — Эдуард ястаӆ.</p><p>Андрей Гиберт ясаӊ щиран: «Аӆаӊшак пирасты харатан 55 участковой комиссия хоятат рупитты питӆат. Ма нумасӆам, постам план щиран рупатаев иса туӊа-щира манаӆ».</p><p>Щёхар тыӆащ 18-20-мет хатӆатан аратаӆ мир пирасаӆ. Кашӊ хоята тамащ хатӆат амтап туӆат. Аратаӆ мир ӆаӊхаӆ ямашак уӆты. Щишан, нын ищи яӊхаты, пирасаты. Нын эӆтайн еӆӆы уӆапса ищи ӆойӆ.</p><p>Аллина Тоярова ханшам потар</p>

Касӆыман яӊхты мохет пирасты питщасат

Тампуш альпийской нэмпи хуӆам па кутумской нэмпи кат ош пошхат ӆутсам. Хор: vk.ru/popovolegshur

<div class="content-lead">Кашӊ хоят, уӆтаӆ хуват, ӆув сама рахты вер мощатаӆ. Ун вошатан рупата ар, щишан хоятат тохи рупитты манӆат. Хой па ӆув ай куртыеӆан еӆӆы уӆты па рупитты номас тайӆ. Илья Леонидович Пугурчин щимащ номас верас.</div><p>Ӆув Овкуртан сэма питас. Щита ашкуӆайн утаӆтыйс па ус. Хун СВО ляль питас, мохты нумасты питас — шоши муваӆа нётты мосаӆ. 2024-мет таӆ сус порайн, Министерство обороны РФ пиӆан, контракт ханшӆтас. Донецкой Народной Республика аратыман 87-мет батальонан лялясас. «За отвагу» меваӆ посан мойӆаптаса.</p><p>– Ляльсты харан такан мушмаӆтсайм, кат атаӊ-хатӆ ёхӆам пеӆа ваӊксам. Моӆты кут щах ракантсам. Леккар хотан туп нох сайкапсам. Щита яммаӆсайм па 2025-мет таӆан ёхи китсайм, — Илья Леонидович ястас. — Куртэван рупата антом. Щишан нумаӆмасэм, хоты ащем-антем мисат энмаӆман тайсат. Щи вер нох ӆэщатты па еӆӆы туты номас понтсам. «Реализуй себя — открой свое дело» сервис щиран грант мощатты фонд «Защитники отечества» хуват нётсайм. Ветсот щёрас ох соӆкувайн митаӆысайм. Тампуш альпийской нэмпи хуӆам па кутумской нэмпи кат ош пошхат ӆутсам. Ин ӆувиӆаӆ энмаӆӆаӆам. Комбикорм хират ӆутсам. Таӆ кеша торн сэварӆам. Сус унты пушасэм етшаптаты мосаӆ. Вой пиӆан рупата ар, иса нёхамтыӆа. Еӆӆы хоӆна ай мис ӆутты утщиӆам.</p><p>Хой ищи щиты ӆув шоши вераӆ туты ӆаӊхаӆ, верытӆат грант щира заявка ханшты. Хоятата, хой ай вошатан па куртатан ёра вер верман уӆ 2019-мет таӆ вуш эӆты, кашӊ таӆ, 100 миллион моӆтас ох мийӆыса. Тампуш департамент АПК хоща грантовой заявкайт уйт ӆор тыӆащ 27-мет хатӆ эӆты унт ӆор тыӆащ 25-мет хатӆ унты ӆаваӆӆайт. Хой номас тайӆ, там QR-код хуват ӆоӊаты, ӆуӊтаты па заявка китаты. Моӆты инщасты вер тайӆаты ки, там телефон хуват потартаты: 8 (349 22) 6-71-86 (доб. 575).</p><p>Иван Сандрин ханшам потар</p>

Ащеӆ-антеӆ вер еӆӆы туӆ

Щёхар тыӆащ 12-мет хатаӆан питаӆ. Хор: vk.ru/shur_adm

<div class="content-lead">Там каш верты па тынасты уйтантопса кашӊ таӆ сус порайн Ӆорвош районан верыӆыӆа. Тампуш щёхар тыӆащ 12-мет хатаӆан питаӆ. Кашӊ курт эӆты Мужи воша хоттэӆ хоятат ёхтыӆыӆат, рутӆаӆ-ӆухасӆаӆ пиӆан уйтантыӆат. Уйтты па хошты верӆаӆ мира этаӆтыӆат.</div><p>Нын па «Живые традиции» фестиваля ёхтыӆыяты. Хой муй ӆуӊ сыс ӆэщатас: хуӆ вой, шумах, соӆаӊ хуӆ, вонщамот, толах па арсыр ӆэвпас. Ёра щиран рупитты хоятат, хой мис йиӊк, щищкурэк пошах, нёхи ӆэщатӆат, иса верытӆат тынасты хара тутӆыты. Щи кеша мосаӆ щёхар тыӆащ 5-мет хатӆ унты Ӆорвош район управление экономики хоща ёхтыӆыты па заявка ханшты.</p><p>Хой ёхатты кум ант шитаӆ, верытӆат там электронной почта хуват заявка китты: ekonom@shur.yanao.ru. Моӆты инщасты вер тайӆаты ки, там телефон хуват потартаты: 8 (34994) 22365.</p><p>Ямал мувев ӆоватан тынасты-пелтащты вер хув пора эӆты манаӆ. Щи порайн Мужи вош ай куртые ус, хотӆаӆ веӆщи этты питсат. Ванты, нумаӆта, Тобольск па Сумат вошат эӆты Ай Ас хуват тынасты тутаӊ хопат Пулӊават пеӆа яӊхиӆысат. Манты юшеӆ хуват Мужи вош каӆнаӊан щутщаты ӆойӆысат, щи кут хоятат мосты пормасат ӆув эӆтыӆаӆ ӆутыӆысат. Айнайн каӆнаӊ тынасты хар уна йиты питас. Шоши ёх шай, саккар, ӆат, шар, щашкан па сак сахат вой сох, вуӆы нёхи, хуӆ, ӆытап па арсыр вонщамот пелтыӆысат. Щиты сус пора эӆты Ас потты унты тынассат. Кашӊ таӆ аршак тынасты-ӆутасты хоятат яха актащиты питсат. Катра нэпекатан ханшман уӆ: «1850-мет таӆан, Мужи курт тынасты харан тыныйм пормасат 2710 щёрас соӆкувая хоймеӆ. Щи таӆатан Ирбитской ярмарка мет ун тынасты хара уӆмаӆ, ӆув тыныйv пормасӆаӆ 75 щёрас моӆтас соӆкувая ёхатмеӆ». 1917-мет таӆ революция юпийн щи верат шитама ювантысат.</p><p>Еӆӆы па яӆап щиран 1942-мет таӆан щимащ вер уӆӆыйс. Щи порайн Ӆорвош район ӆоватан уӆты яӊ моӆтас колхозат ӆэщатам па энмаӆтам ӆэтотӆаӆ алиӆысӆаӆ. Щи тумпийн аӆ хоятат ищи тохи пиӆтащисат. Катра порайн воӆаӊ ох антом ус, щишан хоятат ӆэщатам ӆэтотӆаӆ па пормасӆаӆ пиӆан пелтащисат.</p><p>Хуӆамхощъяӊ таӆ хащаман, 2013-мет таӆан «Ас тынасты хар» мет оӆаӊ пуш ӆарпитса. Ӆувел пуншты Дмитрий Кобылкин ёхтыӆыйс. Аратаӆ, щи порайн Ямал мувев ӆоват эӆты 40 моӆтас тынасты хоттэӆат актащисат. Па муват эӆты тынасты ёх ищи усат.</p><p>Щиты «Ас тынасты хар» яӊ таӆ нэматса, 2023-мет таӆ эӆты «Ӆыӆаӊ уӆапса щират» нэман понтса, рущ щиран — «Живые традиции». Щишан, ӆэщатыяты, актащияты па щи фестиваля яӊхаты.</p><p>Иван Сандрин ханшам айкеӆ</p>

«Ӆыӆаӊ уӆапса щират» фестиваля пиӆтащияты

Александра Ларионовна Юхлымова ермак щашкан эӆты ёшан щуртам ханшеӊ рупатайт. Хор: Александра Юхлымова

<div class="content-lead">Там ванан, Новосибирск вошан, йис пормасат шавиты хотан, шеӊк хорам па умащ «Ямал мув ханшет» нэмпи вантапса пуншса. Александра Ларионовна Юхлымова ермак щашкан эӆты ёшан щуртам ханшеӊ рупатайт щита этаӆтаӆайт.</div><div class="content-new-image"><img alt="pic" src="https://storage.yandexcloud.net/ym-sites-static/4082a9b0-ee4.webp" style="width:100%" height="1080" width="1920"/><div class="content-image_child">Турмеӆ, йиӊкел, мувеӆ шавиман, ротая усат. Хор: Александра Юхлымова</div></div><p>Ямал мув ӆоват верантты па Новосибирской йис пормасат шавиты хотӊан кутӆанан яха рупитты нэпек ханшсат. Щи пора эӆты Новосибирск вошан кимет пуш тамащ вантапса верӆа. Туняӆ оӊат ӆов эӆты эвтам хорам хорат па пормасат тата этаӆтасайт. Тампуш па ермак щашкан эӆты верам охшамат, хорат, ернасат тусайт.</p><p>«Тами анта туп аӆ щуртам ханшет. Там матты ки, катра пора эӆты китам айкеӆат, хоты хантэт йис порайн веӆпасӆысат. Турмеӆ, йиӊкел, мувеӆ шавиман, ротая усат. Таӆ пора ищкет па ӆуӊ сыс хорам ольпат тата лакки ӆарпиӆаӆат. Хора понам войӆаӆ матты ки ин нох пурӆаӆат, еӆ шушмаӆат.</p><div class="content-new-image"><img alt="pic" src="https://storage.yandexcloud.net/ym-sites-static/a5d9d52b-fd7.webp" style="width:100%" height="948" width="1686"/><div class="content-image_child">Ханты нэ ернас. Хор: Александра Юхлымова</div></div><p>Тамащ рупата вертыйн, муй арат юр па ош понты мосаӆ. Кашӊ щашкан щелам ар пуш оляпан нёсытты, каврам аяман шошамты, пусты, сораӆты. Щи тумпийн, тыйты хораӆ вантты хорпия верты мосаӆ. Рупатайт ванттыйн, нумасӆан, нэпек нёсытты иӆампа кеншак, хун тамащ ващ ермак щашкан хораматты», — Новосибирской каш па вантапса верат туты воӆаӊ нэ Юлия Шуклина ястас.</p><div class="content-new-image"><img alt="pic" src="https://storage.yandexcloud.net/ym-sites-static/04cdbdfd-7f5.webp" style="width:100%" height="1005" width="1788"/><div class="content-image_child">Ворӊа ими калащи караӆ пиӆан. Хор: Александра Юхлымова</div></div><p>Вантапса пуншам порайн, мойӊ хоятат кеша, мет оӆӊа Александра Ларионовна потар тус. Хоты ӆув номас вераӆ, маты щашкана муй хорпи хор понты. Рупатая тыйм хорат хоӆща уӆ па муй хорпи еӆӆы манты номпсат хоӆна тайӆ, хоятата ястас.</p><p>Тамащ ошаӊ, хорасаӊ па тус ёшаӊ нэӊие муӊ ханты хоятӆув кутан уӆ.</p><p>Зоя Куртямова ханшам айкеӆ</p>

Сэман вантты умащ вантапса

<div class="content-lead">Хон мувева ляль ёхатты порайн шоши мув хоятӆув, мувев шавиты па аратыты ант нумасман маныӆысат. Ин па СВО нэмпи яӆап ляль ветмет таӆ ант верытаӆ етшаптаты. Муӊ хоятӆув ищи пуӊаӆан ант хащсат, оӆаӊ хатӆат эӆты шоши мувев аратыман ешащӆат.</div><p>Оӆаӊ таӆан кашӊ куртые эӆты ар ханты хоят мобилизация щиран ляля китсайт. Щи юпийн па хоятат ӆув щирӆаӆан, ӆув нумасӆаӆан тохи манты питсат. Ар ханты айӆат ёх ёхи ант ёхатсат, век кеша мантсат. Хащам ущ тыӆащан па щи атом айкеӆан ёхатсаюв, Роман Леонидович Севли антома ювмаӆ, паратам.</p><p>Роман Тюмень вошан 1999-мет таӆан щёхар тыӆащ 28-мет хатаӆан сэма питас. Ащеӆ Леонид Петрович Севли, антеӆ па Анастасия Егоровна. Ӆорвош районан Горки вошан ус па энмас. Щи вошаӊ ашкуӆа 2016-мет таӆан етшаптасӆы па мохты еӆӆы утаӆтыты манас. Пулӊаватан Ямальской многопрофильной колледж хоща «оператор ИСР» нэмпи специальность щира утаӆтыйс. Щи юпийн соӆтана китса.</p><p>Щита ӆув танковой войска хоща пиӆтащиман ус. Соӆтан пора етшам юпийн ӆув еӆӆы щи щир туты номас понас. 2020-мет таӆан Хон мувев Министерство обороны пиӆан контракт ханшӆтас.</p><p>Туп СВО ляль веӆщи питас, мохты тохи манас. Шоши Хон мувев шавиман па аратыман оӆаӊ гвардейской танковой армияйн группировка «Запад» Харьковской область хоща лялясман яӊхас. Щёхар тыӆащ 2022-мет таӆан мушмаӆтса. Тумтак, яма ювмаӆ юпийн па лялясты хара манас.</p><div class="content-new-image"><img alt="pic" src="https://storage.yandexcloud.net/ym-sites-static/dd394490-05e.webp" style="width:100%" height="1408" width="2038"/><div class="content-image_child">Оӆаӊ шитам меваӊ посаӊ. Хор: Василий Тыликов</div></div><p>Каркама па вещката рупатайӆ тайты ураӊна «отличник сухопутных войск» нэман юкантса. Ар пуш меваӆ посатан постаса. Мет оӆӊа 11-мет хатаӆан Ас потты тыӆащан 2022-мет таӆан «За воинскую доблесть 2 степени» меваӆ посан мойӆаптаса. Таӆ шуп хащаман, Воӆаӊ Ляльн нох питам емаӊ хатӆ еӆпийн, «За отвагу» нэмпи медалян юкантса. Щаӆта «За храбрость 2 степени» па «Участнику специальной военной операции» меваӆ картыйн мийӆыса. Туняӆ таӆэв соханты еӆпийн «5 лет на военной службе» меваӆ пос шитас. Щи юпийн хоӆна таӆ шуп лялясас…</p><div class="content-new-image"><img alt="pic" src="https://storage.yandexcloud.net/ym-sites-static/a10db9dc-e9c.webp" style="width:100%" height="1240" width="2560"/><div class="content-image_child">Шитам меваӆ посӆаӆ. Хор: Василий Тыликов</div></div><p>Опращӆаӆ ищи Воӆаӊ Ляльн нох питты ураӊна ар юр понтсат. Роман Яковлевич Русмиленко Ленинградской фронтат лялясас, 1943-мет таӆан пармаӆ. Гаврил Михайлович Контеров Украина мув эӆты немщат ёхӆы воштыман Днепр ёхан хоща такан мушмаӆтса, щи юпийн ёхи китса. Николай Данилович Севли (Микуӆ ики) «трудовой армияя» китса па щита ляль етшаптаты унты рупитас.</p><p>Роман еӆӆы уӆты уратас. Хот ӆутас. Пиӆнэӊаӆ пиӆан хащам товийн яха ханштаӆтысӊан, ийимеӊа-ийикеӊа йисӊан. Там ант етшаты лялян уӆапсайӆ сохнас. Московской область Одинцово вошан иӆ лоттаса. Век кеша нумты питӆэв!</p><p>Иван Сандрин ханшам потар</p>

Шоши муваӆ аратыман уӆапсайӆ хайс

<div class="content-lead">Таӆ шуп хащам юпийн, хуӆ веӆпасӆаты рупитты харат кутан артаӆаса, хой мет ар хуӆ мас. Там пора унты, округ хуват, ӆоватаӆан хуӆам щёрас пеӆа нийӆсот моӆтас тонна хуӆ мощатса. Туняӆ, йи там порайн хуӆам щёрас пеӆа катсот моӆтас тонна туп маса.</div><p>«Кев сыӆ район хуӆ веӆпасӆаты ёх ӆапатсот моӆтас тонна хуӆ масат. Округ хуват щит мет аршак, щитэӆан ӆув оӆаӊ тахая этсат. Ӆув юпеӆан Ӆорвош район, еша ёӆта хащсат, ӆапатсот пеӆа няӆхощъяӊ тонна хуӆ мощатсат. Тазовской район хуӆмет тахайн — мощатам хуӆэӆ няӆсот моӆтас тонная туп этас.</p><p>Тампуш, рупитты хоятӆув ар пелак ёханатан па ӆоратан веӆпасӆысат. Молам щарс мув сыӆан мийм хуӆаӆ йи ветмет шупа ант ёхатаӆ. Ӆашкупата па хуӆ потаӆтаты хотата аршак питы хуӆ маӆа. Нови хуӆ шимаӆ хойӆыйӆ.</p><p>Цифра ӆуӊатты хоты кен. Туп кашӊ тамащ ӆуӊатты нэпек юпийн ӆаварт рупата ӆойӆ па щи рупата верты хоятӆув. Нётапса туты щиран, кашӊ таӆ моӆтас рупитты тахайт пуншӆув, хуӆ маты тынаӆ эӆатӆэв. Веӆпасӆаты хоятӆув пиӆан уйтантыӆув, потрэмиӆув, инщасӆаӆӆув, хота муй вер хоӆна туӊматты мосаӆ», — АПК рупата верат туты департамент куща ху Андрей Рубашин ястас.</p><p>Туняӆ эӆты, округ хуват ярсот пеӆа хут хуӆ мощатты па ӆэщатты таха рупитаӆ. Щёрас моӆтас веӆпасӆаты ёх кутан, ар пелак шимӆаӊ рут мир хоятӆув рупитӆат.</p><p>Зоя Куртямова ханшам потар</p>

Ар хуӆ мощатам ёх

<div class="content-lead">Ямал мувеван йис ханты уӆапса монщ иты нэпека понты рахаӆ. Щимащ вещкат ханшатты нэ муӊ кутэван уӆ. Уӆтаӆ хуват опращӆаӆ, рутӆаӆ па ӆухасӆаӆ эӆты муй хуӆӆыйс, ант ёрэматы ураӊна, кум шитман, иса нэпека понӆаӆӆы.</div><p>Щиты айӆта яӆап ӆуӊатты нэпек этас, хота ияха самаӊа уӆты кат айӆат хоятӊан эӆты потар манаӆ. Нэпекаӆ нэм — «Любовь Юхура».</p><p>– Там ханшам нэпекем рутӆам уӆапса вер эӆты понман уӆ. Хоты Юхур па Посӆаӊнэ яха уйтатсатӊан, хоты ӆаварт Воӆаӊ Ляль порайн уӆапсайн еӆӆы манты питас. Ванты, щи уӆапса сахат ныӆа, хоты ханты хоятӆув еӆӆы уӆты уратсат, — нэпек ханшты нэ Зинаида Викторовна Лонгортова ястас. — Потарӆам ма шеӊк хув ханшӆаӆӆам, кашӊ каскем, кашӊ ай вер ёрэматы ант мосаӆ. Щи эӆты иса утпем ими эӆты инщасысам. Ма уӆтэм хуват ӆув эӆтаеӆ утаӆтысам, ӆув пеӆаеӆ хуӆантысам. Инщасысэм, вантсам муй хоты вераӆ. Ӆув пиӆаӆан иса потрэмисам.</p><p>Ас нопатты тыӆащ оӆаӊ ӆапатан Хон Петра вошан «Четыре» нэмпи издательство хоща Зинаида Лонгортова ӆэщатам ун потраӆ нэпека понты питса. Ханшты нэӊев ястас: «Яӆап ӆуӊатты нэпекем ущ тыӆащан таӆаӊа йис. Хон Петра вош эӆты ты китса. Ин ӆавӆасӆам, хун Пулӊавта ёхатаӆ». Муӊ ищи ӆавӆасӆув хун Зинаида Викторовна ханшам нэпекаӆ муӊев этаӆтаӆӆы па ӆуӊатты ортӆаӆӆы.</p><p>Иван Сандрин ханшам потар</p>

Яӆап ӆуӊтап этас

<div class="content-lead">Щёхар тыӆащ 18, 19, 20-мет хатӆатан Хон мувев ӆоватан депутатат пирыты питӆайт. Пиращты комиссия куща ху Андрей Гиберт айкеӆ верас, хоты щи хатӆат кеша ӆэщатыӆа па муй арат хоят тохи пиӆтащийӆ.</div><p>Щи кеша хащам ӆапатан Андрей Николаевич пресс-конференция верас, хота айкеӆат ханшты ёх актащисат. Ӆув ястас, тампуш йи эӆты хуӆам пиращты вер питаӆ, щишан таӆаӊ хуӆам хатӆ сыс депутатат пирыты питӆайт:</p><p>Хон мувев Государственной Дума (9-мет созыв);</p><p>Тюменской областной Дума (8-мет созыв);</p><p>Ямал мувеван муниципальной Думайт (Губкинский вош, Ямальской па Красноселькупской районӊан).</p><div class="content-new-image"><img alt="pic" src="https://storage.yandexcloud.net/ym-sites-static/a5dd3083-d46.webp" style="width:100%" height="1405" width="2498"/><div class="content-image_child">Хор: Фёдор Воронов</div></div><p>Государственной Дума хоща 11 политической партия пиращты кеша ханшӆтантысат: Единая Россия, КПРФ, ӅДПР, Справедливая Россия, Новые люди, Яблоко, Партия пенсионеров, Коммунисты России, Родина, Партия прямой демократии па Зеленые. Аратаӆ тохи 2066 щёрас хоят ӆуӊтасаӆ.</p><p>Ямал мувеван пиращты одномандатной округ № 225 эӆты вет хоят нэпекӆаӆ ӆэщатсаӆӆаӆ.</p><p>Тюменской областной Думая 7 партия 237 хоятӆаӆ пиӆан пиращты ӆытӆайт. Щи кутан Ямал мувев эӆты 19 хоят 4 партия эӆты.</p><p>Ямал мувеван хуӆам муниципальной образование хоща 4 партия эӆты 81 хоят пиращты хара нэпекӆаӆ масӆаӆ. Щи эӆты туп 47 хоят пирыты мосаӆ.</p><p>Ин пирыты партияята ӆоӊам хоятат айкеӆ па потар ӆэщатӆат. Унт ӆор тыӆащ 22-мет хатӆ эӆты ӆэщатам хораӊ потрат кина па газет хуват щёхар тыӆащ 17-мет хатӆ унты поныӆыты питӆайт.</p><p>Вуӆы тащ хотатан касӆыман яӊхман, хуӆ веӆпасӆаты панатан па ай куртатан уӆты ёх кеша нэман ёхтыӆыты пиращты харат, унт ӆор тыӆащ 30-мет хатӆ эӆты щёхар тыӆащ 17-мет хатӆ унты, верыӆыты питӆайт. Пиращты харатан рупитты ёх ӆув хощайӆаӆ тохӆаӊ, тутаӊ па аӆ хопатан яӊхиӆыты питӆат.</p><p>Хой пиращты хатӆатан уӆты муваӆ эӆты кимет тахайн питаӆ, ванан уӆты МФЦ, пиращты харата па Госуслуги хуват айкеӆ верты верытӆат. Хой, мосаӊ, моӆты инщасты утщийл там телефон номер хуват рахаӆ потарты: 8-800-302-00-89.</p><p>Иван Сандрин ханшам потар</p>

Пирыты хатӆата ӆэщатыӆа

Хор: Галина Артанзеева

<div class="content-lead">Пора сора хащаӆ. Ӆуӊев кутпаӆ ванамас па емаӊ хатӆэв ёхтас. Унт ӆор тыӆащ 2-мет хатӆ кеша аратаӆ уӆты мир ёх ӆув уӆты тахайӆаӆан порыӆыты харатан яха актащиӆат.</div><p>Хоты, катра порайн, там емаӊ хатӆ порыӆыса Надежда Егоровна Лонгортова потартыйс. Щи хатаӆан Иӆта мув икия поры верты щир ӆэщатӆа. Ванты, щи хатӆ эӆты хув найӊ хатӆат ёхӆы керӆаӆат, вана йиты питӆат. Щишан, хой хоӆна моӆты верат тайӆ, мосаӆ сус-таӆ кеша етшаптаты.</p><p>Катра там иты потартыса: «Там емаӊ хатӆ унты ки уӆты верытсув, еӆӆы па уӆты питӆув». Там хатаӆан кашӊ хоттэӆ хоятат ӆув рутӆаӆ пиӆан уйтантыӆат, порыӆыты харата яӊхӆат. Вуӆы тащат энмаӆты ёх там порайн сах нёпиӆув хорӆат. Хуӆ веӆты ёх па аӆаӊ эӆты яӆап хуӆ мощатыман ноптаӆтыты ӆэӆамтыӆат. Хой муй ямшак ӆэтот тайӆ, щитаӆ пасана омасаӆ.</p><p>Хуӆам хуван яӆап ӆэщатом ӆэтот пиӆан хуӆам тахая омпсыӆыӆа: муван юх пуӊӆа, тут имия па йиӊк пеӆа.</p><p>Кашӊ ёхтам хоят патан карты охан ярам щашкан щелам тайӆ. Тут ими пеӆа ӆувеӆ шашиӆыӆӆы па емаӊ сумат нува ярӆаӆӆы. Щи кут мосаӆ ям эӆты нумасты па хатӆ манты щиран хуӆам пуш ӆарэматы па ох понты. Нэӊат па ӆапат нови ай ернас юха ярӆат.</p><p>Тут ими шоппи вуншты ант рахаӆ. Полщаӊ тута лякты ищи ем. Емаӊ тут ими пиӆан потрэмиӆа па пойкащман ям уӆапса вохӆа. Хоятат ратхар пуӊӆа ӆойӆат, ёш нох аӆамман потарӆат: «Ун Турам Аӊкие! Юр муӊев мия!».</p><p>Щаӆта па порыӆыты омпсыӆыйм анат нох вуӆайт па йи пасана туӆайт. Ар хоят ун пасан сурыйн ӆэты питӆат, хой муй айкеӆ тайӆ, щи эӆты потартаӆ. Юхат па каш верты пора ёхатаӆ. Хой арыты хошаӆ, арыты ӆойӆыйӆ. Хой якты хошаӆ, тус як этаӆтыйӆ. Касты ёх юрӆаӆ артаӆаман нох ӆойӆыӆат: тынщаӊ ёваӆмиӆат, юх катна пертащиман омпсыӆыӆат, ухаӆ шоппи наварӆат. Уншак ёх кутӆаӆан потрэмиӆат, юращты ёх пеӆа вантӆат па няврэмӆаӆа пиӆ каншӆат.</p><p>Етна пелка, ехи манты еӆпийн, хоятат карты ох шук юх иӆпия ёваӆӆат. Ӆапат ай нови ернас ёх хоятатан нох вуӆайт, ияха ярӆайт па юх тая ющтаӆайт. Нэӊат щи кут тамиты потарӆат: «Турам Аӊкев ӆапат пох тайс. Там ернасыет Турам Аӊкева китӆаӆӆув». Щи юпийн ёх ӆапат пуш увемаӆат, хатӆ манты щиран ӆарыӆат, хуӆам пуш ох понӆат па ёхи манӆат. Щимащ порыӆыты щир!</p><p>Иван Сандрин ханшам потар</p>

Ӆуӊ кутап хатӆ

<div class="content-lead">Унт ӆор тыӆащ 9-мет хатаӆан 1994-мет таӆан Генеральной Ассамблея ООН рупитты мохет уйтантопса версат, хота мир ӆоватан шошия уӆты арсыр рут хоятата нётап вер эӆты потар тусат. Щишан щи пора эӆты емаӊ хатӆ постаты питса.</div><p>«Там емаӊ хатӆ ванамаман муӊ нумасӆув хоты рут ясаӊӆув еӆӆы туты, хоты ӆувиӆаӆ шавиты мосӆат! Муӊ хорам па тарм Овс мувна уӆӆув, самаӊа тайӆэв. Тата уӆты шоши хоятӆув мет такан сайӆаты мосӆат, ӆув катра йис уӆапсаеӆ па ясӊеӆ еӆӆы туӆэӆ. Ӆувиӆаӆ хоӆна еӆӆы нётап мосаӆ. Щи щирн муӊ ивеван ияха актащиӆув. Мосаӊ па хоятӆува нёттыя яӆап щир оша ёхатаӆ. Ин там яӆап щирн уӆты порайн муӊев шеӊк мосаӆ рут ясаӊӆув шавиман тайты. 2022-мет таӆ эӆты мир ӆоватан уӆты шоши ёх кеша нэпек щирн яӆап программа ханшса — Международное десятилетие языков коренных народов. Щи щирн ар нётты нэпекат ханшӆайт, законат туӊа щира ӆэщатӆайт», — ястас Ассоциация «Ямал — потомкам!» куща ху Эдуард Яунгад.</p><p>Щи емаӊ хатӆ кеша унт ӆор тыӆащ 8-мет хатаӆан Канащ пухаран ун каш верты лот ӆарпитӆа. Араӊ-монщаӊ тус хоятат ёхатӆат. Ар па вещката рупитам шоши хоятат мойӆаптаты питӆайт. Щи тумпийн ур ёх поры верты питӆа. Мойӊ хоятата верантты лотата пиӆтащиты рахаӆ па моӆты пормас ӆувиӆаӆа ӆэщатты верытӆат.</p><p>Щи хатаӆан Ямал мувев ӆоватан хольмаӊ моӆтас арсыр уйтантыты вантапса лотат ӆэщатӆайт. Нын па уӆты вошӆанан, куртӆанан емаӊ хатӆа яӊхаты па каш вераты!</p><p>Иван Сандрин ханшам потар</p>

Мир ӆоватан шошия уӆты ёх кеша

<div class="content-lead">Округев хуват шоши мир ёх хоятат ураӊан кашӊ таӆ моӆты яӆап нётапсайт ӆэсятӆайт. Тампуш, хуӆ веӆпасӆаты ёх уйтантопсайт юпийн, Ямал мув куся партапса хуват яӆап вер этас.</div><p>Кашӊ шимӆаӊ мир хуӆ веӆпасӆаты хоттэӆ вет таӆ йи пуш ӆыӆ шавиты кат порах сохан маты питӆа. Хой си пормас вуты ант кашасяӆ, ӆувиӆаӆ ӆутты ураӊан, хут сёрас соӆкувайн сохаптаӆа. Хой хоӆна нэпек ант ханшас, уӆты куртаӆан уӆты утхотан нэпекӆаӆ ӆэсятты верытаӆ.</p><p>Ӆорвош па Приуральской районаӊан хуӆ веӆпасӆаты ёх мет оӆӊа симась пормасатан маты питсайт. Ӆорвош районан уйт ӆор тыӆасян рыпакат хуӆ веӆпасӆаты ёх емаӊ хатӆатан, хопан яӊхты ӆуматты порах сохатан масайт.</p><p>Сит эӆты Ӆорвош районан утхот шоши мир верат туты ху Дмитрий Леонидович Костин ясаӊ верас: «Ӆорвош районан хуӆ веӆпасӆаты ёх, хой нэпек китыӆыйс, хоӆ симась пормасат шитсат. Катсот заявление китман ус. Яӆап таӆ эӆты хуӆамсот пеӆа няӆъяӊ жилет ӆутса. Еӆӆы хоӆна ӆутты питӆув. Катсот пеӆа няӆ хоттэӆ симась пормасан масӆув. Сит хуӆамсот пеӆа нийӆ жилет. Оӆаӊ пормасӆув хуӆ веӆты ёх емаӊ хатӆатан Аканьлейман, Ӆорвошан па Хашкуртан ортсаӆӆув. Там ӆапатан Асов, Ӆоркурт, Ямкурт па Овкурт ёх симась пормасат шитсат».</p><p>Симась рупата ин Надымской, Пуровской па Тазовской районатан манаӆ. Шоши мир ёх эӆты, си пормасат шитты ураӊан, хуӆамсот пеӆа ӆапатъяӊ заявление нэпек китман ус. Там хатӆа йи сёрс ветсот ӆыӆ шавиты порах сох ӆутса.</p><p>Альбина Тырлина ханшам потар</p>

Шоши мир ёх яӆап нётапса

Мурах Кев пайн. Хор: Иван Сандрин.

<div class="content-lead">Хошам па ертаӊ хатӆат уӆам онтасан унтан ӆэвпасат яма энамӆат. Мет оӆӊа мурах акатты пора ёхатаӆ. Ин ты «Ӆух Авт» газет ӆуӊатты хоятат хорат понӆув. Унта яӊхтыйн, ищи хор верыӆыяты па муӊев китыӆыяты.</div><p>Тампуш ӆуӊев ёлах хатӆат пиӆан ёхтас. Щаӆта па, щи юпийн муй арат вотаӊ хатӆат усат. Туп уйт ӆор тыӆащан веӆщи хошам хатӆат ёхатсат. Хойтат ястаӆат анта хошам, руваӊ хатӆат. Щи ям найӊ хатӆат ёхтам юпийн унтатан лыптат яма энамты питсат.</p><div class="content-new-image"><img alt="pic" src="https://storage.yandexcloud.net/ym-sites-static/17556921-c3c.webp" style="width:100%" height="1080" width="1920"/><div class="content-image_child">Вуӆы хотаӊ няврэмат мурах акатты нётӆат. Хор: София Максарова</div></div><p>Лыптат похантсат па унтэв мет хорамаӊа ювмаӆ. Щи кут хоятат ӆаваӆӆат хун вонщамот акатты пора ёхатаӆ. Мет олаӊан мурах вонщапса пошаӆ.</p><div class="content-new-image"><img alt="pic" src="https://storage.yandexcloud.net/ym-sites-static/67294df5-21c.webp" style="width:100%" height="1021" width="1817"/><div class="content-image_child">Хор: Алена Хартаганова</div></div><p>Мурах — щит мет хорам па эпӆаӊ рых. Хоятатан ӆув шеӊк самаӊа тайӆа. Туп мурах акатты кен антом. Ар юр понты мосаӆ. Рув кутан нюрмат, сотаят па варсаӊ соймат кутан шушиӆыты мосаӆ. Щи тумпийн пирмат, пеӆӊайт па нипируват тэӆыя. Хоят ёхи ӆэты утщиӆэӆ. Мурах акатты кутаӆ ван, кум ант шитсан ки — пора хащас.</p><div class="content-new-image"><img alt="pic" src="https://storage.yandexcloud.net/ym-sites-static/9f60a0fb-91f.webp" style="width:100%" height="1440" width="2560"/><div class="content-image_child">Самаӊ мурах. Хор: Алексей Енов</div></div><p>Щишан щи ар юр понман актам рых, шеӊк эпӆаӊа айӆӆа па самаӊа тайӆа!</p>

Мурах акатты пора

Хор: Нелли Фролова архив эӆты

<div class="content-lead">Там ванан ашкуӆайн утаӆтыйм эвет, похат яртъяӊмет, хой па ихощъяӊмет класс етшаптасат. Тухаӆ энамты няврэмат еӆӆы утаӆтыты манӆат. Ӆув аӊкиӆаӆ-ащиӆаӆ пиӆан нумасӆат, маты воша па муй рупата пеӆа еӆӆы утаӆтыты манты. Там потар шупан Нелли Фролова (Сибарева) эӆты ясаӊ туӆув.</div><p>Нелли Артёмовна Ёхан Кутап вошан (Зелёной Яр) куртан сэма питас. Аӊкеӆ-ащеӆ хуӆ веӆман усӊан. Аӊкеӆ — Александра Лукинична, хоттэӆаӆ шавийс, ащеӆ — Артем Сергеевич, хуӆ веӆман ус. Юхат ӆув пиркатира рупитты питас. Ӆын уӆман хуват кутӆана иса нётсаӊан.</p><p>Ай Нелли Охсар куртан яртъяӊмет класс етшаптас. Щи юпийн Пулӊават вошан вой леккара утаӆтыйс.</p><p>«Шеӊк ям пора ус, муӊ рупитты лот ант каншсув, — Нелли Артёмовна ястас, — ма Тюменской область Заводоуковской района, Сединкино ай курта китсайм. Щита хуӆам таӆ рупитсам. Мусат, пурщат, тохӆаӊ войт яммаӆсам. Щикуш ям ус войт пиӆан рупитты, туп ма шеӊк ай няврэмат пиӆан рупитты ӆытсайм. Номпсэман ивеван еӆӆы манты утаӆтыты нумассам».</p><p>Юхат ӆув няврэмат шавиты нэӊа утаӆтыты Топаӆ воша манас. Утаӆтыты етшамаӆ юпийн, ёхӆы Сединкино курта ёхтас па щита ай няврэмат хатӆ сыс яӊхты хотан рупитты питас. Оӆӊа воспитателя рупитас, пора хащман, садик куща нэӊа понтса.</p><p>«Ма ащем-аӊкем па рут мувем эӆты шеӊк хуван усам. Щикуш ийикем энмам мув ус, туп ма ёхи манты номас усам. 1996-мет таӆан Пулӊавта ёхатсам па мохты еӆӆы ай няврэмат пиӆан «Брусничка» нэмпи садикан рупитты питсам, — ханты нэӊиев нумаӆмиман ястаӆ. — Ай няврэмата ма мурэм, уӆапсайӆ, емаӊ хатӆат эӆты альсам па потарсам. Ханты ясаӊан арат, ӆуӊтарат утаӆтысам. Ма ханты сохӆам ӆумтыӆысам, няврэмата ищи ернасат ёнтыӆысам. Ӆув па моӆты емаӊ хатӆатан умащӆыман щи сохат тайсаӆӆаӆ. Ай няврэмӆам пиӆан сак каратсам, нуй эӆты ай хирыет ёнтсув. Рупитты группаеман ай ур хот ӆонщсам, ухӆыет омассам па пормасат эӆпа понтсам. Муӊ ханты аканьӆуван няврэмат ивеван ёнтӆат. Тухаӆ ишан хоӆна па ёхи тутӆыӆӆаӆ. Ай няврэмат пиӆан ма хольмаӊ моӆтаскем таӆ рупитӆам».</p><p>Нелли Артёмовна хуӆам няврэм тайӆ. Ӆув иса Пулӊават вошан уӆӆат па рупитӆат. Там ванан щутщаты манты номас ус. Пора сора хащаӆ, хиӆыӆаӆ пиӆан уйтантыты па ӆувиӆаӆа нётты ищи ӆытӆа. Щи порайн веритаӆ ивеван ай куртаӆа яӊхты, щита яйӆаӆ уӆӆат.</p><p>«Ащем-аӊкем уӆам, ма сэма питам лотэм умащӆыман тайӆэм. Яна щи, мет сама мосты лот — щит муӊ ащев-аӊкев хот. Ӆын хуван антома йисӊан. Муӊ ащиӆув па аӊкиӆув уӆтэв хуват саман па номасан шавиман тайӆаӆӆув.   «Ма аӊкием» ӆуӊтаран Тамара Александровна Пырысева сама хойты ясӊат ханшас», — Нелли Артёмовна ястас.</p><p>Ма аӊкием хоты нумӆэм</p><p>Рупатайӆы ант уӆӆыйс.</p><p>Ӆуӊ порайна хуӆэӊ хурэт</p><p>Тэрмат иса ӆэщатыйс.</p><p>Соӆаӊ хуӆэн ванщты мосаӆ,</p><p>Нырӆаӆ шумахна тахартыя.</p><p>Таӆ кешая щохаӊ война</p><p>Путӆаӆ мосаӆ вертыя.</p><p>Ёхантайнэ аӊкем ими</p><p>Метты вер па ант уйтыйс.</p><p>Шаӊк йиӊк кутна щиты ванты</p><p>Хатӆ хуват шушамтыйс.</p><p>Аӊкев аӆаӊсахат ахун</p><p>Кармас юхи паят аӆтаӆ.</p><p>Хой порайна мурхи сунӆаӆ</p><p>Муӆан ӆойӆат муӊев ӆаваӆман.</p><p>Аӊкев рупатайӆ хоӆӆы:</p><p>Тонты ёнтты хот лаӊктыя,</p><p>Щи кут мосаӆ торан верты,</p><p>Щаӆта кепӆат ӆэптаптыя.</p><p>Тупар шупат етшаптаты,</p><p>Тохам посат лап ёӆтыя.</p><p>Сах ханшиӆаӆ еша ёнтты,</p><p>Охшам сыӆӆаӆ кераттыя.</p><p>Щимащ аӊки тайиӆысув —</p><p>Хоттэӆ няврэм энмаӆтыйс.</p><p>Аӆ куш таӊха метыӆыйс,</p><p>Щит хун муӊев ястыӆыйс.</p><p>Щира-паӆа потартыйс,</p><p>Нопса ясаӊ хаиӆыйс.</p><p>Пумащипа, ям аӊкиев,</p><p>Уӆтэв хуват наӊен нумӆэв.</p><p>Любовь Возелова ханшам потар</p>

Няврэмат шавиты нэ

<div class="content-lead">Овс мув шимӆаӊ рут мир ёх «Российский Север» нэмпи уйтантопсая сус порайн актащӆат. Щёхар тыӆащ 17-мет хатӆ унты заявкайт китты мосаӆ. Туп 100-кем хоят пирыӆа, хой мет тусшака ӆув эӆтэӆ потар лэщатаӆ.</div><p>Щиты мет туса потар ӆэщатты Алексей Эдуардович Конев ищи хошаӆ. Хон Петра вошан утаӆтымаӆ порайн, ӆув там уйтантопсая каматса пуш яӊхас.</p><p>«А.И. Герцен нэмпи университет хоща утаӆтымеман, мет оӆӊа 2018-мет таӆан там форума ханшӆтантысам. Ӆув щикем ма самема рахас, ар ӆухас мощатсам, ин хой хоятат пиӆан хоӆна уйтантыӆам. Щи таӆ эӆты ма кашӊ таӆ там уйтантопсая ёхтыӆыӆам. Йи пуш туп 2021-мет таӆан ант верытсам ёхатты. Щаӆта па ма ты рупата щиран нётты ёхтыӆысам. Туӊа ястаты-ки, ма участника, волонтёра па эксперта усам. Тампуш па там форума кущая рупитты вохсайм. Олӊа кат тыӆащ нумассам, щаӆта ястасам — муя ма хурыӆам, там уйтантопса вер шеӊк яма уйтӆэм!</p><p>Ин еӆпи таӆ сыс верам рупатаев артаӆасэв, программа ӆэщатӆэв па экспертат пирыӆув. Там форум ӆэщатты ураӊан шеӊк ар юр понты мосаӆ. Ма ар таӆ Овс мув шимӆаӊ мир энамты няврэмат пиӆан рупитӆам. Ващъёханован вет таӆ ханты ясӊа няврэмат утаӆтасам. Тампуш Пулӊавта касаӆсам, энамты няврэмат пиӆан «Движение Первых» хоща рупитты питсам. Ма ӆаӊхаӆайм, няврэмат ӆуӆан шоши мир уӆапсаеӆ еӆӆы па ат туӆэӆ, ант ёрэмиӆэӆ», — «Российский Север» форум программной куща ху Алексей Конев ястас.</p><p>Там таӆан Хон мувев ӆоватан уӆты регионат эӆты айӆат ёх катхощъяӊмет пуш яха актащиӆайт. Мет оӆӊа там уйтантопса 2015-мет таӆан Клязьма нэмпи куртан Москва вош пуӊаӆан ӆарпиӆыса. Ямал мувеван иса 2021-мет таӆ эӆты уйтантопса ӆэщатты питса. Туняӆ 105 хоят 35 регионат эӆты Новый Уренгой вошан ияха уйтантысат.</p><p>Таӆэв арсыр рут хоятат ияха пиӆтащиты Таӆа постаман уӆ. Щишан айӆат ёх потарты па альты питӆат, хоты сахат шоши мир ёх ясаӊ шавиты па уӆапса еӆӆы туты мосаӆ. Хой рут ясаӊ ант уйтаӆ, щи хоятата альты па потарты, муй щиран щи вер сорашак верты рахаӆ. Там йисан щи верата нётты ураӊан арсыр мутрайт ӆэщатман уӆӆат.</p><p>Тампуш там уйтантопса Ас потты тыӆащ 17-20-мет хатӆатан Пулӊаватан манты питаӆ. Тохи пиӆтащты хоята анкета нэпек ханшты па нёхты хор верты мосаӆ. Няӆхощъяӊ таӆ эӆты па няӆъяӊ пеӆа вет таӆ ӆоват унты энамты ёх, хой номас понас, заявка QR-код хуват китты верытӆат.</p><p>Энамты ёх опращӆаӆ йис уӆапса шавиты ураӊан, арсыр проектат ханшӆат па уӆапсая ӆоӊаӆӆэӆ. Кашӊ ай куртаӊ хоят ӆув самаӆ хошиты верат па рупатайт мира этаӆтыты верытаӆ. Щи кеша 18 номинаций ӆэщатман уӆ. Мет тусшак па мосты проект ураӊна 800-кем щёрас соӆкува шитты рахаӆ. Хой щимащ вер ӆэщатты номас тайӆ, ай тахайт потты тыӆащ 1-мет хатӆ унты там ссылка хуват заявка китты верытаӆ: cӆck.ru/3UspY8. Щишан пиӆтащияты, ӆухсаӊа ювиӆыяты, мойӆапсайт шитыӆыяты!</p><p>Иван Сандрин ханшам потар</p>

Айӆат ёх ияха пиӆтащиӆат

Валерий Александрович Любовь Николаевна ийимеӆ пиӆан. Хор: Альбина Тырлина

<div class="content-lead">Там мосванан хуӆ веӆпасӆаты ёх емаӊ хатӆэӆ постасэӆ. Горковской рыбозаводан Ӆорвош рыбоучасткан рупитты хоятат Ӆорвош куртан уйтантысат. Ванан уӆты куртыет эӆты хуӆ мосятты хоятат си веӆпасӆаты тахая ӆуӊтасӆат.</div><p>Мет апраӊ хуӆ веӆпасӆаты ёх</p><p>Ӆорвош рыбоучасткан рупитты куся ху Андрей Иосифович Кондыгин рупитты хоятӆаӆ эӆты потар тус: «Ма хуӆмет таӆ рупитӆам. Муӊ хосяев штат хуват хольмаӊ пеӆа хут хоят хуӆ веӆпасӆыман уӆ. Ӆапат хоят ӆуӊ сыс туп хуӆ мийӆыйӆ. Там таӆан таӆ сыс ярсот пеӆа кат тонна хуӆ мосятсув. Ӆуӊ сыс емаӊ хатӆ унты катсот пеӆа ӆапатъяӊ тонна хуӆ масув. Ин хоӆапӆув ӆоран омасман уӆӆат. Ар пелак питы хуӆ, айнайн сарах хойӆыйӆ. Пышьян шимаӆ хойӆ, ин хоӆна ӆаваӆӆув.</p><p>Кашӊ веӆпасӆаты хоятэв яма рупитаӆ. Мет оӆӊа веӆпасӆаты нэӊева ям ясаӊ ястаты утсиӆам. Сит — Арина Анатольевна Кельчина. Ӆув яӆап таӆ тыӆась эӆты ун кер тыӆась унты, катхосьяӊ моӆтас тонна хуӆ мосятас. Таӆ планаӆ тэкаптасӆы. Валерий Александрович па Мартын Романович Ребасьӊан таӆ сыс иси ар хуӆ масӊан. Планэв тэкаптаты ураӊан, ӆуӊ па сус пораев уӆ. Си пора унты мохиӆув аршак хуӆ мосятӆат».</p><p>Ай Ас хумпат хуват</p><p>Ёханован хуӆ мосятты хоятат иси Ӆорвош рыбоучастка ханшӆтаман уӆӆат. Си куртан ар таӆ хуӆ веӆпасӆыман Валерий Александрович Ребась рупитаӆ. Сикем потраӊ, няхаӊ, веськат хоят. Ёханован энмас па уӆ. Няӆъяӊ моӆтас таӆ хуӆ веӆман рупитаӆ. Уӆапсайӆ эӆты каматса ясаӊ ястас: «Муӊ куртэв ай куртые. Муйкем сита энампсам, иса хуӆ веӆман усам. Ӆуӊ порайн утся курта яӊхиӆыӆув. Ёханов эӆты хус километрайн уӆ. Туӊӆор нэмаӆ. Таӊха катра ӆор овӆаӆ туӊа мантсат. Еӆпи хоӆна катьрат, хопат тапиӆысат».</p><p>Веӆпасӆаты питсям порайӆ</p><p>Ханты хоятэв ашкуӆайн утаӆтымаӆ порайн веӆпасӆаты питас. Асеӆ рыпака ус. Ун яйӆ па веӆпасӆыйс, ӆувиӆаӆа нётас. Сит эӆты па потар тус: «Яӊ таӆ эӆты утся ай хопан яӊхты питсам. Хоӆпа манты мосаӆ, аӆаӊ нох киӆтаӆайм, вет сёс кеман. Си порайн ӆоваӆман яӊхсув. Ай хопна утся. Ащем-аӊкем, ун яем па уншак хопан. Уӆмев сыс рыпака иса усув.</p><p>Армияйн Дальний Востокан служитсам. Ёхи ёхатмеман, утаӆтыты манты утсисам, си вер ант артмас. Асем-аӊкем пирсясайӊан. Аӊкем сэмӆы питас. Сиӊанся утаӆтыты таха эӆты нох воӆысам. Мохты хуӆ веӆпасӆаты ӆэсятысам. 1982-мет таӆ эӆты ин там хатӆ унты хуӆ веӆман рупитӆам. Ай ёх пеӆа хоӆна ант эваӆӆам. Оӆаӊ тахайт ма си уӆӆам, такан хуӆ веӆман ешащӆам. Ай ёх хоты муӊ хосяев ванан ант ӆойӆ».</p><p>Яха хуӆ веӆман яӊхӆаӊан</p><p>Ёханован рупитты ёх таӆ сыс хуӆ веӆман уӆӆат. Хасям таӆан Валерий Александрович па Любовь Николаевна ийимеӆ пиӆан няӆъяӊ таӆа йис, хоты яха уӆӆаӊан. Яха хуӆ веӆман яӊхӆаӊан. Ийимеӆ Ӆорвош нэ. Нянь верты нэӊа утаӆтыйс. Куртан еша рупитас. Сяӆта ху сая манас, Ёханова касӆас. Си пора эӆты пиӆ хоятаӆа нётаӆ.</p><p>Валерий Александрович рупатайӆ эӆты ситы ястас: «Ӆуӊан Туӊӆоран уӆӆув, ӆоран хуӆ хоӆапан мосятӆув. Хун ӆорӆув сорӆат, нык касаӆӆув. Си порайн ноптаӆӆув. Еӆ куртэван хут, ӆапат рыпак ус. Катра «Ӆапат сохаӆ хота» Туӊӆор курт аяӆса. Сохаӆ хотӆув инты унты ӆойӆат. Хоятат сита хоӆна уӆӆат. Си хотат мосаӊ катсот таӆа йисат, мосаӊ па аршак. Сохаӆӆаӆ пусаӊан манман уӆӆат, сишан такат. Аӆ вансям сохӆат».</p><p>Планэв тэкаптасэв</p><p>Хуӆ веӆпасӆаты хоятата таӆ сыс план хуват яӊ тонна хуӆ маты мосаӆ. Таӆ порайн, хой хуӆ шимаӆ мосятас, ӆуӊ сыс планаӆ тэкаптаӆӆы, мосаӊ па аршак мосятты верытаӆ. Хоты си вер манаӆ, ханты хоятэв ситы ястас: «Муӊ планэв тэкаптасэв. Сус унты хоӆна хуӆ веӆман ешащты питӆув. Ин катхосьяӊ тонная йис ки.</p><p>Хасям таӆатан кашӊ тыӆась аванс па хуӆ ураӊан сохаптаты охан мийӆыты питсаюв. Муй кем хуӆ веӆӆан, си арат ох шитӆан. Моӆты порайн аршак этаӆ, тухаӆ ишан щах шимаӆ.</p><p>Муӊ оӆӊа Мужевской совхоза ӆуӊтассув. Хун пуӊӆа вусаюв, ма мохты куртаӊ мохиӆам пиӆан Горковской рыбозавода ханшӆтантысам. Совхозан рупитмеман, хут таӆ бригадира усам. Куртэман мин Мартын Романович Ребась пиӆан кат рыбак хасьсаман. Ай ёхӆув хоӆ пуӊӆа мантсат. Мин муй, утаӆман уӆӆаман, ай тэӆан рупитӆаман. Хиӆыӆам рупитсат, воӆаӊ ант верытӆат. Утаӆман уӆӆан ки, нопсэн тохи уӆ ки, туп веӆси. Нопсэн тохи антом ки, муя си рупата верты».</p><p>Альбина Тырлина ханшам потар</p>

Ӆорвош район – хуӆаӊ веӆпасӆаты мув

Хор: Окружной дом ремёсел

<div class="content-lead">Там ванан Красноярской мув сыӆан уӆты Шушенское куртан «Мир Сибири» уйтантопса ус. Хошты верӆаӆ хоятата альты, хоят рупатайт вантты па моӆты верат номпса вуты ураӊан, Хон мувев па па муват эӆты пормас нёхарты па рут мир ясаӊан арыты ёх яха ёхтыӆысат.</div><p>Шоши мувев эӆты верантты хотан рупитты Наталья Сергеевна Талигина па Семён Максимович Севли, щаӆта па каш ӆэщатты хотан арыты Нядма па Масне Няруй щи уйтантопсая яӊхсат. Ур ёх имеӊан-икеӊан ӆув рут ясӊеӆан арат арысӊан. Наталья па Семён юх па ӆов эӆты эвтам рупатайӆан вантопсая тутӆысӊан.</p><p>«Там вантопсайн, арсыр мув сыӆат эӆты ёхтам тус ёшаӊ хоятат кашӊ верам рупатаяӆан ӆув уӆты муваӆ, унтаӆ, войӆ этаӆтас. Кашӊ рупата, туп ӆувеӆ рахты хорам тайс. Щимащ хорпи кимет пормас мув кеман ант уйтты.</p><p>Ма ай тэӆан вантсам, хоты ащем юх эӆты нёхарман пормасат верас. Арсыр ухӆат, ӆохат, ӆупат, хопат иса ӆэщатыйс. Уна ювмем юпийн, юх эӆты пормас нёхарты хоят пеӆа утаӆтыты мантсам. Пулӊават верантты хотан хольмаӊ пеӆа кимет таӆ рупитӆам. Хун моӆты пормас верты питщатэман, щи хорэм номпсэман тайӆэм па ӆувеӆ нэпека понӆэм. Щаӆта нэпек эӆты вантман юхем нёхарӆэм. Тухаӆ ишан еша па щиран тыйӆ. Щит ванта, рупатая вуйм юхем хоты манаӆ, щит ураӊан верты пормасэм еша па щиран тыйты верытаӆ. Кашӊ верантты хоят ӆув сэмаӆа ныты щиран пормасаӆ верӆаӆӆы», — тус ёшаӊ нэӊиев ястас.</p><p>Рупиттаӆ сыс Наталья Сергеевна тэӆыя мойӆапса нэпекатан маса па ишакты нэматан юкантса. 2007-мет таӆан нэман юкантам Губернатор нэмпи премия шитас. Щи таӆан Хон мув воӆаӊ вошеван «Лауреат ВВЦ» меваӆ посан мойӆаптаса. 2012-мет таӆан мир кеман верты «Сокровища Севера» ӆапатмет вантопсайн «Лучший мастер» нэман юкантса, щаӆта па «Союз художников России» хоща пиӆтащийс. Ямал мув кеман мастер декоративно-прикладного искусства и ремесел нэм тайӆ. 2019-мет таӆан ун юх эӆты эватты хорат нийӆмет Международной фестиваль-касапса манас. Щита Наталья «За женский взгляд» атэӆ юкантам мойӆапсайн маса.</p><p>Ӆув ёшӆаӆан верам рупатайт Хон мувев хуват арсыр вошатан уӆӆат. Ун юх эӆты эвтам хорат Мордовия, Удмуртия Хон муватан, Тюменской область, Пулӊават па Ӆапатнаӊк вошатан ӆойӆат. Пулӊават воша ёхаттыйн, Ас питаран, паӆ рэп ӆоӊаӆан кев эӆты верам ун «Мамонт» нэмпи хор ӆойӆ. Щи от ищи Наталья Сергеевна юх эӆты эвтам «Мув хор» рупатайӆ хуват верса.</p><p>Там касапсайн, юх па ӆов эӆты верантты хоятат кутан ӆув оӆаӊ тахая этас па «МИР» нэмпи Лауреат мастеровой премия ёша пайтас. Семён Максимович па Дипломант нэман юкантса.</p><p>Зоя Куртямова ханшам потар</p>

Тус ёшаӊ хоятӊаӆув мойӆапса

<div class="content-lead">Йис руч Рязань нэмуп вочен энэӆ фестиваль вӓри. Чет тӧса йонтэста нэӊәт сух йонтоста вӓрэн кассәт. Россия ар кәрт эвалт нэӊәт ювит.</div><p>Мәӊ Увәс мэӽәв йонтэм пурмасэт тусэт Тарлина Елизавета па Кечимова Галина. Ӆын эвет па имет ӄантэӄ сохэт ернаса ханши йонтэста онэӆтәсәт. Лук па васэҳ оӆӊәс йонэста онэӆтэсэт.</p><p>Қантэӄ ими ернас па ики ернасэт руч мира тусэт. Ат лэилат ӄуты ӄантэӄ имет йонтэста хошӆэт.</p><p>Сук эвалт верум мевӆсук, тучаӊ, намэт па тусэт. Ар мир эвэӆт йювим ёх ӆын мәӽәӆ верты сухэт тусэт. Сэмэн эмащ ӆэита, тӧс ёх ар мирән иса воӆӆәт.</p><p>Чи фестиваль «От ремесла к подиуму» нэм тоиӆ. Кимит оӆ вӓри чи фестиваль.</p><p>Йис щирэн верта пурасэт па сухэт нуммән тойта мосэӆ. Тэм йис тойта пурмасэн па сухэн йис ханшет верта мосэӆ. Чи фестиваль «От ремесла к подиуму» мэӊ арктической «Ямалица» хурпи.</p><p>Тарлина Елизавета па Кечимова Галина чи вохум Рязань мәӽ еха вэн пэмасипа ястэӆәт.</p><p>Галина Кечимова ханшам потар</p>

Лух Авт

Публикации автора