Фото: Сергей Зубков / Ямал-Медиа

<div class="content-lead">Тюку илаӈгана хусувэй ӈамгэмʼ едэй мутрахаʼʼ тэврамбидоʼ. Мэта сё, тарабцо малʼ несэйвана сертабидоʼ. Хэвы сиʼʼив яляхана ӈодʼʼ несэй ӈавэ манэʼʼӈадамзь.</div>Таняʼ ядвани мальӈгана ӈамгэмʼ намдвахадани харʼʼни техэ паӈгханда нивась хамедамбюʼʼ. Тэри «Тёр»мʼ нюбеʼʼманда, ненэй ненэцяʼ няхаюниʼ хыноʼʼмаʼ еʼʼэмня таняʼ пявась. Сяхариндиʼ сейхана поёда няхаюниʼ. Пыдиʼ вэва ӈамгэмʼ нихинзь манэʼʼлабтаӈгуʼʼ. Падарканандоʼ ӈодʼʼ падысь, муно намдаӈгунаʼʼ, манэʼʼтынаʼʼ. Ихиня ханзерʼʼ ненэй ненэцяʼʼ сё манэць сава ӈэвамда нивась тасламбюʼʼ. Хардахандоʼ товани мальӈгана ненэцяʼʼ мале маʼʼлёвыць. Ихинани ненэй нинаʼʼ хыномандаӈэ тасламба ӈока хибяримʼ манэʼʼманзь нидамзь ӈатеʼʼ. Ӈани тэнз товандаӈэ нинась тасламбюʼʼ. Ӈока ниниʼʼ поӈгана ӈобʼʼ сававна теневана нями манэʼʼӈадмʼ, някунда пяв. Хонрав: «Ненэй сёхоʼʼ инзелеванзь тосан?» Нями маʼʼнив:— Ненэй ненэцяӈгавʼʼ хыносʼʼнимʼʼ, тарця ӈавэ тамна манэʼʼмадавэядмʼ. Ихиня ӈулиʼʼ мэкадаӈэ тасламбив. Товыʼʼ хибяриʼʼ ӈокаʼʼнёʼʼ, пыдоʼ вадамʼ ехэрабтоʼ ӈодʼʼ инзелеванзь пэрӈанёʼʼ. Манзьванʼ нянани юнета ненэй ненэцяʼ няни хынокавабʼʼ, ӈулиʼʼ сава ӈэӈгу.<div class="content-new-image"><img alt="pic" src="https://storage.yandexcloud.net/ym-sites-static/f12a0eba-aae.webp" style="width:100%" height="708" width="1260"/><div class="content-image_child">Фото: Сергей Зубков / Ямал-Медиа</div></div>Ненэй ненэцяʼʼ сата неняӈгадревʼ мятʼ тэри вэрнаʼʼ. Ихиня сава. Лохоʼ мюня терсяда ӈамдёрцьʼ яӈгу. Ӈани тэнзʼʼ ӈокамбойʼʼ ӈэвыʼʼ. Няхаюнаʼʼ — Елена Хабиевна Уфимцева, Нядма Семенович Няруй нернаʼʼ няна ӈадимяхаʼ. Торомдавы паны, мальци нихиʼ мэсʼʼ. Маняʼʼ ӈулиʼʼ ӈатенаваʼʼ. Ӈамгэʼ пиркана маситиʼ няд яхаʼ ендʼ ӈадимя, лохоʼ мюй пэвсюмя. Няюндиʼ сырапʼʼ, яхаʼ лаӈгхана нунараханʼ, итʼ сыртарханʼ. Тецьдаӈэ хантарха. Тикытиʼ ирманя пыдиʼ сенасяда музыкаʼ серʼ хуркари муӈгʼʼ хаʼʼморʼʼӈахаʼ. Сарёӈэ хэʼʼня тоʼʼолха ӈэсеты, нувʼ сармикʼʼ мунʼʼ ӈадимзетыʼʼ. Ӈамгэʼ пиркана махандиʼ няна хад нумӈэ хая, мерцяʼ выврё, ядʼʼмаʼ сенаʼʼ, тыʼʼ тобаʼʼ мунʼʼ ӈадибелыдʼʼ. Нядма сёмда ханаʼʼмахаданда лэрёнархаваʼʼ. Хареʼʼ вадаваʼʼ намдваваʼʼ сейхана пои. Тэхэʼʼна ӈэдалёртарахаваʼʼ. Елена Хабиевна «Тёр» поэмаʼ пелямʼ мэё вадахана вадеʼʼӈась. Хоркэхэʼ, ханебцёхоʼ нямна лаханакомʼ хайналабтась. Сыртаӈэ ханзерʼʼ няхаюнаʼʼ сиднаʼʼ маябтавамʼ ниваʼʼ хамедаʼʼ. Пэдёдаваʼʼ нэкалпаданаʼʼ мале суса.<div class="content-new-image"><img alt="pic" src="https://storage.yandexcloud.net/ym-sites-static/f9f8cdae-bb0.webp" style="width:100%" height="708" width="1260"/><div class="content-image_child">Фото: Сергей Зубков / Ямал-Медиа</div></div>Пуна пинʼ тарпорта ядабтаʼʼмахадани ненэцие хонрамбидамзь. Манэʼʼмыдоʼ, намдвыдоʼ нянандоʼ хурка ӈэвамʼ намтиедамзь. Алла Хосевна Вануйто мась:— Ёльце савов. Маняʼʼ миʼʼманаʼʼ мальӈгана сававна ниваць хамедамбюʼʼ, хурка ӈэвамда. Тяхананда хусувэй мундиʼ, сёдиʼ сейхана лимбикавна хаʼʼмыдʼʼ. Ихинани хойхана мэвэрахадмʼ. Сяхаринда няхаюнаʼʼ пирӈадиʼ.Тамара Очевна хадаваʼʼ маʼʼнисяв:— Ехэрана мутраʼʼ ӈаниʼ сава ӈэвыʼʼ. Нерцюбтʼ тарцямʼ манэць ехэрадамзь. Ненэй ненэцяʼʼ нинаʼʼ пирӈадоʼ. Маниʼ Алла Хосевна няʼ концертʼʼ ӈэдарамбаданиʼ ниниʼ ӈаʼʼ.<div class="content-new-image"><img alt="pic" src="https://storage.yandexcloud.net/ym-sites-static/2da69f0c-887.webp" style="width:100%" height="708" width="1260"/><div class="content-image_child">Фото: Сергей Зубков / Ямал-Медиа</div></div>Тикы мунодиʼ, музыкарʼʼ, кинодиʼ — малʼ ӈэбатоʼ нянанаʼʼ ехэрана мутра ӈэвы. Хибяри вадамʼ ехэрабта ӈоʼʼ тось пирӈада. Манэʼʼлабтамбавыдиʼ хамеда пиртыда. Тикыʼ няюʼ вадамʼ тенева ни тараʼʼ. Сырмыʼʼ ненэцяʼʼ сяниʼʼ яӈорэйʼ пеидоʼ тоебтамбидонзь. Ихиня, масиʼʼ, тедаʼ манэʼʼлабтавыдиʼ ӈани яӈорэй сяхариʼ намдаӈгунаʼʼ. Няндиʼ сыраць ӈани яхана ӈэрмʼ терʼʼ илаʼ саирмʼ нерняʼ минренаʼʼ, сава иӈудмʼ ӈаниʼ мэтадоʼ. Няхаюнаʼʼ тамна едэй ӈавэ ӈамдимдеӈгухуʼ. Инзелеванзь ӈани яӈорэйʼ хантадамзь.Автор: Марина Марюйʼ падвы

Ехэрана муно намдаваʼʼ

Фото: Анна Яптик / Няръяна Нгэрм

<div class="content-lead">Ӈока по’’ тяхана округханана’’ ӈэрм’ тер нядабава’ е’’эмня «Ямал-ню’’на’’ я!» Ассоциациям’ сертаць. Минрена манзаядо’ тодо ян’ тяро’’ӈа. Поӈганандо’ ӈармы’’ ненэцие’’ Советадо’ ӈани’ таня. Тикы’ нямна хэвы си’’ив яляхана юнм’ намдаваць.</div>Ӈармы’’ ненэциена’’ Советхана едэй ӈудонданадо’ ӈадимясь. Кузьма Николаевич Ямкин тад нерня’ округна’’ тиӈгывна илена’’ вэсако’’, пухуци’’ илам’ нерня’ минренаӈэ тараӈгу. Сяхаринда Кузьма Николаевич тэри ӈамдёда ненэця’ нись ӈа’’. Пили’’ нядавандада, нерня тэвравандада ненэцянда танясеты. Теда’ тюку манзаяда ӈод’’ нянанда едэй ни ӈа’’. Пыда ӈока по’’ Тасу’ явхана «Ямал-ню’’на’’ я!» Ассоциация’ правленияхана янда тер нядабись. Тикы манзаям’ сававна теневада. Ханзер’’ серо нерня’ тидхалембавам’, хибян’ лаханавам’ серокута сер’ тасламбида.Харта ӈод’’ иланда ямбан’ техэ яхананда Хальмер’’ Седе’ няна палытанаӈэ тарась. Юкад вата си’’ив по’ ямбан’ пыда ила’ ватом’ мадавы’’, хадкэпявы’’ серо тидхалембись. Ӈока серм’ техэ паӈгханда тэврамбидась. Нылана хэ’’мяхаданда факторияхана манзарась.Теда’ ӈармы ненэцие’’ Советхана пяванда манзаяда ӈока ӈэӈгу. Серм’ теневаб’’, нянанда ӈарка тоенанада яӈгода.Автор: Марина Марюй’ падвы

Едэй ӈудонданадо’

Фото: Инесса Вануйто’ тавы

<div class="content-lead">Россия яна’’ ӈардавна тодо’’ тэнз’’ ненэцяӈэ ӈопой я’ терӈэ тарава’’. Толырма’’ толава’ техэ. Неноховавна сэхэ’’ паӈохона нина’’ нядаба, маяӈгад нэкалпа варева’’ мэ’’цетыва’’. Ӈадьбята мэта пова’’ Ӈарка яна’’ нермбэртя’ табековна Ӈоб’’ няю’ нятва’ поӈэ нюмдевы.</div>«Хусувэй ненэць’ харта соя’’ма’ яда таня. Тикы ё мал’ ӈобт’ ма’’лаб’’ ӈарка Россия ява’’ ӈэӈгу. Хар’’на’’ якоцява’’ сямянхат сяӈава’’. Вэва вадахана сяхаӈгарт’ нива’’ хомбю’’. Сидна’’ тодалаванда, сидна’’ ӈавлаванда — маня’’ Ӈэрм’ ярива’’», — тарем’ иле яндо’ нямна Сёяха’ тер’’ ӈацекы’’ ибедорӈа’’.Тандая’ ӈарка нидо’ няць едэй по’ нямна ӈэда’’ ялям’ мэ’’мы’’. Сиддо’ ядабтаванзь хардандо’ ӈэвахы ерв Станислав Вануйто няби тохолкось’ яндо’ ерв Оксана Матшина товэхэ’. Ӈацекэхэ’’ ӈоб’’ няю’ нятва’ нямна лаханавэхэ’.Ӈацекы тарця ненадо яляханандо’ тодо’’ тарабцо ӈадимдембавы’’, стихотворение толабавы’’. Нюртей по’ тохолкодаха’’ «Арктическая азбука» нюбетам’ ӈудито’ терӈэ ми’’мы’’. Тикы толаӈгобцьм’ яна’’ тиӈгэвна илена’’ ӈацекы’’ мале тетимдей по’ ямбан’ мэ’’ӈадо’. Таняд ӈани яхат товы’’ ненэця’’ Ӈэрм’ терӈэ илма’’ торомдамби’’.Ӈацекы тохоламбада Меретя Григорьевна Тусида’ вадавна, мале ӈахакуд хамеко пявыд’’. Няхаромдэй классхана мэнаха’ Вануйто Алёна няби Лаптандер Лидия ненэй ной паныди’ мэць концертм’ минре нядаӈговэхэ’. Ӈули’’ сававна толаӈговэхэ’. Ӈарка нидо’ луци’’ тарабцо ӈадимдембавы’’.Харад’ тер’’ е’’эмня тарця ӈарка серм’ толаӈгова’ мякана манзарана Молчанова Елена Павловна, педагог-организатор Шоломова Татьяна Александровна, школа’ ервм’ нядабада Даминова Яна Радиковна сертавы’’. Сиддо’ няд’’мяць Сёяха’ тер’’ ӈацекы’’ ненадо ялямдо’ пон’ тенеӈгудо’.Автор: Галина Окотэтто’ падвы

Ӈоб’’ няю’ нятва’ пом’ мэ’’ӈава’’

<div class="content-lead">Ӈарка пэвдей ирийхана Антон Петрович Пырерка’ юр’’ сидя ю’’ помда ядабтамбиваць. Округханана’’ яндахана иленаӈэ теневана нява’’ темзебтембиваць. Пыда иланда, сертавыта нямна лаханаваць.</div>Ненэцяӈгат нюртей учёнойва’’ — лингвист, паднана, лаханаку ма’’ламбада. Иланда ямб нись ӈа’’. 1905 по’ ӈарка пэвдей’ ирий 5 яляхана соявы, 1941 похона хор’’ ирий’ 15 толыркана яӈгумысь. Тарем’ ӈод’’ пуданда хаевэда ӈока, сехэрэда лата. 1932 поход Антон Петрович паднава’ серм’ ӈадимдембада’’ хибяри’’ поӈгана манзаравы. Илебей ненэця’ тоходанава’ серкана тарана’’ учебник, пособия сертабавы. Пыда луца’ вадахад А.С.Пушкин’ падвы’’ вадако хари’’ вадаханда тэвравы. Ненэцие’’ вадако, сё ӈобт’ ма’’ламбавы, сборник сертавы. Та’ мальӈгана сайнорманзь хэванда нерцю’, харта иланда’ нямна «Младший сын Вэдо» книгам’ падвы. Тикада 1960 похона тарпыць. Пухуцянда’ Наталья Терещенко’ ня ниди’ нядабахая луца’’, ненэця’’ вада’’ словарьм’ ма’’лавэхэ’, учебник’’мана ӈобкана манзаравэхэ’. Тарем’ ӈэсь иланда ӈани’ сер’ сюрхалмыць. Ӈарка сайнорма яхана’’ тэвыць, Антон Петрович хэвняд товэхэт ява’’ нэкалпаванзь сайнорманзь хэвысь. Таняна 1941 по’ хор’’ ирий’ толыркана Ленинград мар’ хэвхана Стрельна станцияхана яӈгумы.Сяӈок хибярим’ тенер’’, тев’ ёльцянд’ тенда иле. Ненэцие’’ ӈарка учёной’ юр’’ сидя ю’’ пом’ ядабтавана’’ сер’ яханана’’ хуркари’’ ӈавэ хамадавы’’. Тарця серо нюртейӈэ’ пявы’’ А.И. Пичков’ нювм’ нюбета Ненэцие’’ еръй библиотекава’’. Тикы’ нямна ӈэрм’ яна’’ отдел’ ервота Зоя Ивакилева вадам’ хэтась:— Антон Петрович Пырерка — ӈарка хибяри, теневана учёной, ненэй ненэць’. Иланда мер’ ныклавы. Тюку яля’’ пиркана юнета яна’’ тер’ няна’’ соя’’ма’ ялям’ мэ’’ӈава’’. Нява’’ тензебтембива’’, ханярина ма’’лёва’’ ваераӈга’’, выставка хамадавы’’.Тюку по’ толаӈгова’ хардахана манзарана’’ учёнойна’’ ил’ нямна школахана тоходанана’’ ӈацекэхэ’ вадидо’ тэвраць. Сертавы’’ манзаита нямна выставкам’ «Пыреркахат ӈэда ненэць. (Туда ни хабтёд’’)» манэ’’лабтаць. Тарця выставка Антон Петрович’ хасава ню, Валерий Пырерко’ падвы книга’ нюмам’ мэ’’ӈа’’. Тикы’ хавна ӈацекэхэ’’ Антон Пырерка’ ненэця’’ вадан’ сертавы’’, Александр Пушкин’ вадако -книга манэ’’лабтаць. Тарця книга’’ — «Сказка о рыбаке и рыбке», «Сказка о попе и его работнике балде», «Сказка о царе Салтане».Школахана тоходанана’’ ӈарка ӈацекы’’ «Младший сын Вэдо» книгавна сянаковам’ мэ’’манда’’. Ненэця’ вада’ тохолкода Матрёна Ивановна Талеева хари’’ вадавнанда лаханась. Школахана тоходанаха’’, яндахана теневана яна’’ тер’ ил’ нямна вадамда мэ’’ӈась:— Антон Петрович Пырерка ӈарка яна’’ хойхана соявы. Соя’’манда ёльцяӈгана небяда, нисяда хасава нюкцямди’ Сяратиӈэ нюмдевэдинзь. Харта паӈгхатата, мята терхат перена хибяри. Небяхаюда-нисяхаюда мер’ яӈгумэхэ’, Антон Еванем’ нюбета не нянда ня Ёкушахана хаёвэхэ’, ӈока маям’ палевэхэ’. Оксино’ ӈэсы’ тер ёртя сидди’ сэвтевы, ӈацекэхэ’ мяканда тэвравэхэюда. Тикы’ пуд Антон Тельвискахана церковно-приходской школахана тохолко пявэдась. Тарця серм’ ёльце харвабтавэда. Хусувэй несэй ӈамгэм’ тохоламбава ивнанда ӈэвы. Антон Петрович’ илевада сибё нись ӈа’’. Нюдякоходанда хусувэй тоенана серм’ пирдалемба тухувы, выдаравам’ ехэравэда. Тикахад илебей хасава тоходанаванзь Ленинградан’ хаясь. 1932 похона аспирантуран’ тэвыць. Ӈокавна манзаравы ненэць’ ӈарка теневана учёнойӈэ хаясь. Ленинградхана пухуцянда’ ня илесь. Пыди’ сидя хасава нюдись — Борис няби Валерий.Антон Петрович сайнормахад нись ту’’. Ленинград мар’ хэвхана 1941 похона яӈгумы. Яна’’ тер няна’’ 35 подась. Нява’’ пыдась ӈацекы’’ нерняри’ миӈа’’.Автор: Юлия Талеева’ падвы

Туда ни хабтёд’’

<div class="content-lead">Тадриʼ янаˮ ӈардавна Ты пэртиˮ сянакова яляˮ пэӈгудˮ. Ненэцяˮ тодоˮ пирдырмахаˮна ныхыдоʼ хорпаӈгуˮ. Неноховавна нидоʼ нертемба тэхэˮна ӈэдалёртаˮ. Тедаʼ ӈахакуд хусувэй ӈамгэмдоʼ хамедамбиˮ. Тыˮ лекарˮ вато ӈобтикы нёдаӈгудоʼ. Харданʼ тэвравандаˮ тыдоʼ яӈгавыˮ ӈэбатоʼ тараˮ.</div>Тыˮ хабцяӈодоʼ няхатоʼ нива палаӈгаваʼ еˮэмня прививкитоʼ падарˮ тараӈгуˮ. Ненэйвана «бруцеллёз» хабцяʼ сэбине. Пирдырманʼ яӈгавыˮ тэсавэйˮ ненэцялиˮ ӈэдарамбаӈгуˮ.Ӈадьбята тандаяркаʼ тыˮ лекарˮ табекурӈаць: «Ты пэртяˮ яляхана мэˮмандаˮ тыдаˮ палаӈганаˮ хабцяӈгат лекарабтамбидаˮ. «Бруцеллёз» нюбета хабцяʼ хаӈгуртаˮ тэхэт ненэцяӈгˮ палаӈга пирӈада». Хибяхавˮ ӈэсыхынатоʼ бруцеллёзхана хаӈгурмыˮ тыдоʼ танявы ӈэбˮ, тикы ненэцие хардахана тэхэˮна ӈэдалёрць нидоʼ ӈэдарамбаӈгуˮ.Тэхэˮнатоʼ ӈэдалёрмандаˮ янаˮ терˮ тыˮ лекарахат тытоʼ сенз ӈэваʼ нямна падартамдоʼ ханабтоʼ тара. Ямалʼ терˮ, Ты пэртиˮ ялэˮ нерцюна падродаˮ ӈахакуд сертабидаˮ. Сидя, няхарˮ сиˮив яляʼ нерцюна тыˮ лекарахат хонаркурӈадаˮ. Тыˮ лекаратаˮ манзарась яˮ тюкод манэць пиръядаˮ: httpʼ://vetcentr89.yӈnӈo.ru/ӈbout/contӈctʼ/.Таняна манзаранаˮ тыˮ лекарˮ ненэциеˮ еˮэмня таранаˮ падродоʼ мирциˮ сертабаӈгудоʼ. Ненэйвана Надымской, Пуровской, Тазовской, Красноселькупской районхаˮна иленаˮ ненэцяӈгаˮна лекарˮ падарˮ тараӈгуˮ.Ямалʼ тиӈгэвна 25 хардахаˮна Ты пэртяˮ пирдырмаʼ яляˮ ӈэӈгуˮ. Яра ирыхана сямянхат нерденаӈэ Нядаӈгарадʼ няна маˮлёдаˮ. Таняна мале няхарˮ юдимдей мэваʼ сянаковаʼ ялэдоʼ мэтаˮ. Ненэцяˮ тодоˮ яхат тутаˮ. Ӈани яʼ терˮ ӈаниʼ таняӈгуˮ.Галина Кинчинаʼ падвы

Пирдырмаʼ нерня

Сидяӈг: Галина Севлиʼ сертавы

<div class="content-lead">Хаермаˮ мале тюˮуна хая. Тадриʼ ты пэртинаˮ сянаковаʼ ялэдоʼ пэӈгудˮ. Тедаʼ сяхаʼ ӈобтʼ маˮлёвамдоʼ мале намдаваць.</div>Яра ирыʼ еркана нердена ӈэдалёдаˮ ӈадимдаˮ. Надым хардахана тодоˮ яхана иленаˮ, тэхэˮна мэнаˮ ненэцяˮ маˮлёдаˮ. Яра ирыʼ пудана яляхана тасу хабиˮ Ратта хардахана нидоʼ ядабтаӈгуˮ.Тыˮ саполана ирыхына хусувэй ныланаваʼ яляхана сянаковаˮ таняӈгуˮ. Новой Уренгойхана «Праздник народов Севера» ӈэсеты. Тыˮ сапоˮлана ирыʼ сибимдей яляхана сянаковадоʼ ӈэӈгу. Таняʼ хахая ӈэда районхат ты пэртяˮ турцетыˮ. Ӈобˮ сиˮив яля хэˮмяхад Шурышкарской районхы Ханты-Мужи хардахана ты пэртидоʼ пирдыртаˮ.Тикы яляʼ пиркана Пуровской районхы Харампурхана тэхэˮна мэнаˮ маˮлёдаˮ. Пуровской районхана сянаковаʼ ялэдоʼ малʼ тыˮ саполана ирыʼ ямбанʼ мэтыдоʼ. Ямальской районхана ты пэртяˮ сие ниць ирыхына ӈобтʼ тэваӈгудˮ. Сямянхат пуда Сёяхаʼ терˮ пирдыртаˮ. Выӈгана мюсертаˮ сие ниць ирыʼ 17-18 ялэˮ пиркана хардахандоʼ хаˮмаӈгудˮ.Пудана мале сян поˮ серʼ тарця ӈарка маркаˮна, Муравленко, Ноябрьск, ты пэртиˮ ялэ ӈаниʼ мэˮлыдоʼ. Тюку поʼ Губкинской маркана сянаковаʼ ялядоʼ ӈаниʼ ӈэӈгу. Тикыʼ нерцюна тарця ӈавэ ниˮ сертабасетуˮ. Салехардахана, Хальмер Седехэна яндоʼ терˮ ӈопой яляхана сянакуртаˮ. Тыˮ саполана ирыʼ 22 яляхана тэхэна мэна ненэцяˮ пирдыртаˮ. Таняна ӈэрмʼ терˮ сяхаринда ӈока ӈэсетыˮ. Тасуʼ явʼ няна тодоˮ вымна мюсертаˮ турцетыˮ. Сие ниць ирыʼ нердена яляхана Яр-Саляхана ненадо ялямдоʼ мэтаˮ. Тюку поʼ яханандоʼ няхарˮ юдимдей сянаковаʼ ялядоʼ ӈэӈгу. Тикыʼ няюʼ яханандоʼ ӈанэкурӈаˮ.Тедариʼ ты пэртяˮ ханярина тэри хамекуˮ. Ӈэдалёвандаˮ хасаваˮ пирдырць мэˮмандаˮ тыдоʼ пахаламбиˮ. Ныхыдырмандидоʼ — ӈэсоӈодоʼ высылпиˮ, ярколавандидоʼ — тынзеӈодоʼ вэнпиˮ. Неˮ ӈобтикы тэри ниˮ ӈамдюˮ. Пыдоʼ серувнда варˮ мадавы паныдоʼ, сиˮив падрота пибидоʼ хамедамбиˮ. Хардахана иленаˮ нидоʼ ядабтаванзь яʼ ханярина нярканаˮ. Маняˮ нинаˮ ӈаниʼ ядабтаӈгунаˮ, манэˮтынаˮ.Марина Яройʼ падвы

Сянаковаʼ яляˮ тальняʼ миӈаˮ

Фото: Хабэча Яунгад’ тадтавы

<div class="content-lead">Округханана’’ ханена’’ ненэця’ сыв’ нюрцямгандо’ тунидо’ нэкалпи’’. Хэвы си’’ив яляхана нянандо’ тарана юн ӈадимясь. Хане хэван’ харвана’’ ненэцие’’ падар’’ февраль иры’ 28 яля’ ӈэсонд’ ня’’марпаӈгудо’.</div>Тюку илаӈгана ватормы ханесэй сяхаринда ӈокдада таня. Тикыдо’ ханеванда’’ ненэцие’’ помна тярпидо’. Ма’’ним’’ теда’ ватормы ханесэй’’ поӈгана тамна хаёвы’’ ӈокад’’ таня’’. Иӈгней’’, тос’’, лидяӈг’’ ӈоб’’, сидя тэнзадо’ район’ тиӈгывна тярман’ харвэйдо’. Сямян’ ӈокавна тос’’ хаёвы’’. Тарем’ Пуровской районхана тет юркад вата тосм’ нивы тяр’’. Нядаӈгарад’ район’ тер’’ помна няхар’’ юр’’ тосм’ хадаван’ нивы’’ харва’’. Тасу’ явхана ӈоб’’ ёнаркад вата пир’’ ватормы’’ ханесэй’’ хаювы’’. Ӈани ханесэйхана ӈоб’’, сидявна нивыдо’ хана’’.Сыв’ хадабада’’ ханесэйӈэ толёда’’: тос’’, иӈгней’’, таряха’’, лидяӈг’’, нерка’’, пия’’. Тикы’ хавна ӈанидо’ я’ сармик’’ хадабидо’, нябидо’ ӈокдандо’ сяӈок хаёвам’ толаби’’.Ямалханана’’ сыра’ ниня яд’’мавнато’ я’ сармик’’, нув’ сармик’’ толаба пяць. Ненэйвана нянандо’ хабарта, тос, иӈгней, илебцие тола тара’’. Тола’’махадандо’ сяӈок ханесэйӈэ ӈэдарамбавам’ тасламби’’. Тарця тарана манзаямдо’ лимбя’ иры’ 15 яляхана пядонзь. Ты’’ саполана иры’ 15 яля’ ёльцянд’ минреӈгудо’.Автор: Марина Яр’ падвы

Нув’ сармикаха’’ ханеӈгу’’

Татма: Лариса Айваседо таттамы

<div class="content-lead">Каймы пуӈ хусыкана Пюԯ дяханана ӈайта ассоциациӈ «Ямал-потомкам!» мансдям минԯена председательӈc Андрей Игоревич Пяк тэԯаӈашˮ. Андрей Игоревич дюˮ пуӈ Пуровскийʼ районхана ӈайта телевиденихина специальныйʼ корреспондентӈэ мансԯаӈа. Пыʼта государственныйʼ муниципальныйʼ управлениӈ мансдян дет тохоԯкуш. Дёԯьше чиԯьний, вивӈутутаˮ, ватата нэхэтаˮ нешаӈ. Нянанта деты общественныйʼ мансдянта нямна мунуӈамаш.</div>— Андрей Игоревич, чуки похона шеԯтавантаˮ мансдетаˮ ӈукаˮ?—Шеԯтавантаˮ мансденаˮ ӈука ӈайтыˮ. Мань вихиняй, четыдяӈ общественныйʼ организациӈ мансԯа чепьмы нешаӈкна, чики мансдя неньшаԯ ниӈа. Ӈыматана кcвханай, шиʼий нятапёта неша нейˮ тадямэӈаˮ. Кукитуӈ ватахана нятакоштуˮ, кукитуӈ — няӈна тоштуˮ, намыԯиˮ ӈайватам шеԯтапё шичинаˮ нятамантуӈ мэты. Чуки ноптухуна дилма пуˮ тахана ӈинԯимты, таԯям «Ямал-потомкам!» ассоциацин мансдям минԯена нешиӈ шаӈкмян шеԯуˮ, деты законуˮ чедимямата таԯа. Четаӈ маняˮ ӈупԯи мансдям нишʼтумаˮ шеԯтапюˮ, чуки дилхана тасԯавтаˮ шеԯˮ ӈукаˮ.— Ӈамы ӈайватам шеԯтапитаˮ? Татʼнеԯьняӈ куԯка мансдям мэтӈатаˮ?— Дяна чеԯˮ ненаˮ ӈамыԯи вататуӈ, тасԯаш дяʼамнатуӈ шеԯтуӈ тадяӈcп, няӈна «Ямал-потомкам!» тоштуˮ. Ассоциацихина мансԯаннаˮ шичитуӈ няташтуˮ. Кукиˮ шеԯˮ, маняˮ тасԯамана нямна ниптуӈ ӈаˮ, чикехена нешаˮ ненаˮ тапаташтунаˮ. Няӈтуӈ маньштумаˮ кукяӈ кcш таԯа. Дяԯиˮ тахана мэʼшточинаˮ мансденаˮ камна ӈаԯдя ӈашкcхенаˮ мансԯанӈамаˮ. Ӈаԯдя ӈашкиˮ дет тонԯюта Молодёжныйʼ советхана мэнаˮ, мансдяӈ дет тохоԯкотаˮ ӈашкиˮ, школахана тохоԯкотаˮ ӈашкиудиˮ — чупей ӈокна мэмамаˮ таԯа. Маняˮ Ӈэԯмʼ чеԯˮ нешаӈcˮ каԯьнаˮ вивӈутутаˮ, пимшатаˮ, вататуӈ нэхэтаˮ ненаˮ шанкмяӈ мансдяханаˮ тадямэнӈаˮ, чикехена хома ӈайты.— Молодёжныйʼ советхана мэнаˮ ӈаԯдя ӈашкиˮ, ассоциациӈ правленихина мэнаˮ, пимши? Шичитаˮ няташтуˮ?— Татʼнеԯьняӈ ассоциациӈ правленихина мэнаˮ ненаˮ няш ӈокна мансԯанӈамаˮ. Пуӈ ӈcйвахана ӈай ӈопт ӈомтӈамаˮ. Мансдяна дет ӈайта вачинаˮ тасԯанӈамаˮ. Правленихина ӈаԯдя ӈашкиˮ тадямэˮ, куптаӈ ассоциацим нятапё мансԯаннаˮ нешаˮ. Чики ненаˮ шичинаˮ няташтуˮ. Звонийнаӈаԯ, мантӈан таԯьша ӈайватама тадя, нятакомаԯаˮ таԯаˮ, тайня пыʼтоӈ чики минхантуӈ шичинаˮ нятамантуӈ мэты тоштуˮ. Пуӈ хусыкана волонтёруˮ нятапёш ӈайваӈамашˮ. Маскировочныйʼ шентмиˮ паӈкаԯпёˮ, СВОхана мэнаˮ ненаˮ мячисэт ӈомтапёˮ нятакумашˮ. Чики мансдяма нимяˮ хитаԯан. Чикиӈ камна, тохоԯкотаˮ ӈашкиˮ куше диԯимам маныманаˮ мэты, школахаˮ кcштонӈамаˮ.— Нешадиˮ диԯишат каԯватˮ таʼамна дятыԯтаӈан, таньняна ӈайта первичныйʼ отделенитаˮ куше мансԯамам манымант мэт?— Нешадиˮ диԯишат каԯватˮ таʼамна ӈупчики дятыԯтаӈат. Няматаԯакуԯма дяԯиˮ ӈаймяӈ дёԯьшкана кcнӈамаˮ. Таньняна мансԯаннаˮ няхананаˮ мунутаӈамаˮ, куше мансдямтуӈ минԯемамтуӈ намтнаӈамаˮ.— Ӈэԯмʼ чеԯˮ нешадиˮ дет ӈайта управленихина, нешадиˮ дет тонԯюта Советхана мэнаˮ няханатаˮ ӈупчики мансԯаӈата? Пыт вихинянт таньше ӈокна мансԯама таԯана, хома шеԯ?— Ӈэԯмʼ чеԯˮ нешадиˮ дет ӈайта управленихина, нешадиˮ дет тонԯюта Советхана мэнаˮ ненаˮ няӈ ӈупчики ӈокна мансԯаӈамаˮ. Ӈамыԯи мероприятииˮ шеԯтапё пон шичина няташтуˮ. Маняˮ ӈуп шеԯ шеԯтапётӈамаˮ — дяна чеԯˮ ненаˮ нятапётӈамаˮ.— Пюԯ дяханана диԯинаˮ неша няханаˮ ӈамы ватам мэман хаʼӈан?— Пюԯ дяханана диԯинаˮ няханаˮ маман хаʼӈат: маняˮ ассоциацина «Ямал-потомкам!» нюньши пон нcшту. Ӈамыԯи ватанта, тасԯаман хаʼтаԯа шеԯта тадяӈcп, няӈна тоштутаˮ, маняˮ шичитаˮ нятанаӈамаˮ.Лариса Айваседо патмы

Ӈуп вив мэʼш мансԯанныˮ

Сидяӈг: Марина Яройʼ тадтавы

<div class="content-lead">Яляʼ падаркана лимбяʼ иры пэйˮ. Хаертаʼ сэв мале тюˮуна хая, яляʼ сэвмʼ манэсоˮмахаданаˮ маймбиваˮ. Янамбовна нарэй нувонаˮ тальняʼ миӈаˮ.</div>Выӈгана тецьбата ӈодˮ ненэцяˮ индоʼ ӈыламна маймбиˮ. Тадриʼ ненэсяри хаернаˮ сэв тюˮури пяӈгуда, яляʼ иня лимбикавна пайды ниʼ хаˮморта, яляда ямбуворта. Мюсертаˮ ненэцяˮ тикахад несэй иландоʼ пэнараха ӈэӈгу. Таʼ ёльцяӈгана пыдоʼ нитоʼ мядоˮмана, ӈыхыˮ яˮамна ӈэдалёрць пиртадоʼ. Тикы хусувэй ялярˮ сянаковаʼ ялэ хахаялтемби. Ненэцяˮ тикыдоʼ ӈулиˮ ӈатейдоʼ. Таʼ мальӈгана пыдоʼ яʼ тяхамбавы нидоʼ манэˮтаˮ.Тюкуˮ тодоˮ яхаˮна сертавыˮ сидяӈгˮ. Яʼ ханярина таʼ мальӈгана лимбяʼ ирыʼ ерканда тэвыць. Хаерˮ тюрʼ малʼ пирувна тюˮуна хаясь. Сенасяда яхананда — сенасись, тецьвахананда — тецись. Таремʼ ӈодˮ пихиня мэнаˮ тэри ӈопой яхана нисеты нуˮ. Хусувэй хибяри ӈамгэхэв сертавандада танясь. Тадӈоˮ мюсертаˮ ненэй ненэциенаˮ иламдоʼ ӈамгэхэрт тецяда нида табламбюˮ.Маняˮ ӈодˮ сензˮ нерняӈыˮ ялэнаˮ няюʼ ӈаниʼ маймбахаваˮ. Марина Ярʼ падвы

Лимбяʼ иры

Сидяӈг:  Аллина Яковлеваʼ тавы

<div class="content-lead">Маняˮ редакциянаˮ ӈобˮ хэвсахана ӈаˮ. Ӈобкана ӈопой манзаямʼ минреваˮ. Пыдоʼ хартоʼ хаби вадавнандоʼ паднаˮ, газетандоʼ нюмʼ — «Лух Авт». Хахаяда яляʼ ӈарка сояˮмаʼ ялямдоʼ ядабтамбиць. Газетандоʼ сидя юˮ самбляӈг поданда хаясь.</div>Ӈарка пэвдей ирыʼ 2000 похона тамальӈгы округнаˮ Ӈэвахы ерв хабиˮ газетадамдоʼ сертавандоʼ еˮэмня падартʼ пидтеˮмямда ӈабтась. Лимбяʼ ирыхына нердена газетадоʼ ӈадимясь. Хусувэй сиˮивхана хабиˮ хартоʼ вадавнандоʼ толаӈго пэйдаць. Тикыʼ нерцюна маняˮ «Няръяна Ӈэрм» газетанаˮ мюд ӈобˮ лабцадоʼ ӈадиберӈась. Ханзерˮ газетамʼ сертаба таравамда няднаˮ тухуць. Маняˮ нюртеˮэʼ табедамбинаць. Тедаʼ пыдоʼ мале тас паднанаӈэ хаяˮ. Юˮ поʼ ямбанʼ Геннадий Павлович Кельчин редактордандоʼ тарась. Газетанда нямна таремʼ лахана:— Нюртей газетаваˮ лимбяʼ ирыʼ матдомдэй яляхана ӈадимясь. Тамальӈгана ӈопойӈэ тада поʼ вэс паднадамзь. Сидяӈгадми Хабэча Хываревич Яунгад тамбсеты. Ӈамгэʼ пиркана Шурышкарской районхад Мужи хардахад Николай Никитич Нахрачёвмʼ паднанаӈэ няˮмадамзь. Пыда хаби вадаʼ хавна, луца вадавна падна ӈаниʼ пирˮӈадась. Тикыʼ хавна хуркариˮ лаханако, невхыˮ илеˮми, сё теневась. Ӈадьбянаˮ нянанаˮ манзаравада ӈарка ябась. Ӈобˮ поʼ манзараˮмахадани ненэцяндами маˮладамзь. Самбляӈгӈэ хаяваць. Ӈавнанаˮ газетаваˮ вадаваˮ мэˮманаˮ еˮэмня сертаваць. «ЛУХ АВТ»мʼ толабадаˮ хибяри ямдоʼ сянзь, невхы иламдоʼ нёда, хареˮ тэнзамдоʼ, паӈгодоʼ теневавандоʼ няюʼ табедамбинаˮ. Сидя юˮ поваˮ понхарт ни ханьˮ. Тедаʼ газетанʼ паднана ӈока. Ненэциенаˮ падвыдоʼ хартоʼ тэврамбидоʼ. Валентина Лонгортова, Юлия Накова, Нина Максарова, Надежда Лонгортова, Владимир Енов, Евдокия Серасхова, тикы ненэцяˮ нюбе хабиˮ сававна теневыдоʼ. Падвыˮ стихотворенийдоʼ, илеˮмидоʼ газетахананаˮ ӈадиберӈаˮ.Янаˮ терˮ хабиˮ газетамдоʼ сававна теневадоʼ. Хуркариˮ нюдякоˮ хардахаˮна, таӈоцяӈгаˮна, ты пэртяˮ ӈэсыхыˮна газетамдоʼ харвобтадоʼ. Ӈадьбятоʼ «ЛУХ АВТ»мʼ етриʼ толабидоʼ. Тарця сава иӈуд Евгений Ильич Ямрунʼ товысь. Ӈавна тикы серта таремʼ тензебтембидась:— Округхананаˮ тодоˮ тэнзˮ ӈэрмʼ терˮ илеˮ. Ӈокадоʼ ненэй ненэцяˮ, хабиˮ. Ненэй ненэцяˮ нинаˮ газетадоʼ таня, хабиӈэ яӈгу. Ӈадьбяни таʼ мальӈгана Геннадий Павловичмʼ хонрадамзь. Пыда нюртеˮэʼ нись харваркаˮ, таютась. Хабиӈэ тасалкурˮмахаданаˮ пуняʼ нись ӈаˮ. Мань таʼ мальӈгана Думаʼ депутатдамзь, ӈадьбянаˮ законˮ саирˮмана сертавандаˮ падарˮ няниʼ хаˮмыдаць. Понʼ нинась хамедамбюˮ. Ӈарка пэвдей ирыʼ 2000 похона округнаˮ ерв Юрий Васильевич Неёлов падаркана пидтеˮмямда ӈабтадась. Ватомʼ ӈэдарась. Тикыʼ тальняюʼ газетаваˮ ӈадибелыць. Тедаʼ газетахананаˮ ненэциедоʼ нёйдоʼ ёˮпюˮ. Сидтаˮ толабадаˮ ня ӈобкана паднадаˮ. Вадамʼ лэтрамбава — ӈулиˮ тоенана серˮ. Ненэцяˮ хареˮ вадамдоʼ мэпˮнандоʼ — тэнзадоʼ таня. Пыдараˮ, газетахана паднанаӈэ, вадамʼ минревандаˮ хавна, хабиˮ тэнзмʼ лэтрамбадаӈэ тарадаˮ. Тикы сехэрэраˮ пилиˮ нёдараˮ.Тедаʼ газетамдоʼ Аллина Кирилловна Яковлева няˮамбида. Пыда манзаямда техэ паӈгахаданда теневада. Таремʼ маˮнисяв: «Маняˮ ӈэрмʼ терˮ вадавна паднанаӈэ саць ӈарка манзаямʼ минреваˮ. Пявы сехэрэвнанаˮ илебей ненэцяˮ ядаӈгуˮ, ӈадьбянаˮ маняˮ етриʼ вареваˮ мэˮпанаˮ тара».Газетадоʼ тэнзамдоʼ нерняʼ пэрӈа. Хареˮ вадавнандоʼ паднанаˮ хареˮ пыхыдатоʼ едʼ ниˮ манзараˮ, пыдоʼ иландоʼ саирмʼ лэтрамбаваʼ няюʼ ӈарка таромʼ хаˮаврамбиˮ. Тад нерняʼ вададоʼ пилиˮ хайная.Марина Ярʼ падвы

Газетамдоʼ толабидоʼ

<div class="content-lead">Мале танякуй похона ӈэрмʼ терˮ хэбидяˮ яˮ пидицяˮ нивандоʼ тэймандоʼ еˮэмня ӈопой падартʼ падыдонзь. Таняна ӈэдаˮ тэйпа нидоʼ ӈэдарамбюˮ. Сянда яӈэ толыˮ. Ненэй ненэцяˮ хэбидя ёдоʼ ӈаниʼ таняна падыˮ.</div>Таремʼ манзаранаˮ учёнойˮ сяӈок поˮ ненэцяˮ таняʼ ядэрмамʼ, хибя хэхэˮ яӈэ толёвамдоʼ тасламбиˮ. Хахаяда яляʼ Тасуʼ явʼ няд юнмʼ намдаваць. Таняна небоʼ учёнойˮ манзаравыˮ. Пыдоʼ тет хэбидя ямʼ («Сядэ хэхэʼ я», «Тадебя хэхэʼ я», «Тыʼ ӈэва седа», «Няхарˮ Ӈэвтеˮэ») сяндаӈэ нивыдоʼ таслаˮ. Маˮнимˮ, тарця серо ӈарка янаˮ законˮ саирмʼ нюракуць минрейдоʼ. Тедаʼ тикыˮ хэбидяˮ яˮ сяӈок пондоʼ ӈэвамʼ, хибяˮ мядʼ терˮ, еркарˮ ненадо яӈэ толёвамдоʼ тасла яˮамвыˮ. Ӈадьбята неры вадеˮмыˮ ёнаˮ сянда яӈэ нивыдоʼ падˮ.Тарця ӈавэ тасла яˮамвандоʼ пуд тад нерняʼ ненадо яхатоʼ ненэцяˮ таремʼ ӈодˮ ядэрць пиртадоʼ. Яʼ тебтмʼ нэкадпадаˮ сехэрэнʼ нёховабтоʼ еревˮ, хэбидяˮ ёдоʼ тамна илева сенасиˮ яханатоʼ ӈэӈгуˮ. Ӈопой, тедаʼ ненэй ненэцяӈэ хэбидяˮ ёдоʼ хартоʼ лэтрамбабатоʼ тара.Таремʼ мале танякуй похона Ямальской районхана ненэй ненэцяˮ хэбидя ямдоʼ хартоʼ мюмдедонзь. «Яʼ малʼ хэхэ» ненэй ненэциеˮ поӈгана сямянхат ӈарка хэбидя яӈэ таславы. Няданда ӈарка «Сэрˮ ӈо». «Яʼ малʼ хэхэ» ямʼ няюна ӈа. Таняна ты пэртяˮ хэбидя яндоʼ сиˮив мяˮ нямдо хартоʼ маˮлэйдонзь. Ханондаць. Тарабата сяхариʼ мюсертаˮ ненэцяˮ хэнумдорманзь тэворць пиртадоʼ.Хэбидяˮ яˮ илеваʼ ямбанʼ ненэй ненэцяӈгана сяндаˮ ненадоˮ яӈэ толыˮ. Хэˮлиʼ таняʼ ниˮ ядэрˮ. Тарця сероˮ хара ӈаниʼ тенева тараˮ. Сянда падаркана ӈэбатоʼ, нибатоʼ ненэй ненэцяˮ тенхана ӈаˮ.Марина Яройʼ падвы

Сяндаˮ хэбидяˮ яˮ

<div class="content-lead">Пудана поˮ ӈэрмʼ терˮ илаʼ нямна хуркариˮ кино сертабиˮ. Илмаˮ ехэрана ненэцяӈгана мэкадʼ тоˮолха. Тадӈоˮ ӈаниʼ тэнзˮ илмаˮ манэсоˮмахадандоʼ нянаˮ несэйвана сырӈаˮ. Илмаˮ сававна торомдамбиˮ.</div>Ханяӈыˮ кино ӈэрмʼ терˮ хартоʼ сертабидоʼ. Тикахана иландоʼ саирмʼ техэ паӈгхадандоʼ манэˮлабтамбидоʼ. Сяниˮ яӈорэйʼ ӈамгэхэртадоʼ пайӈэ ни ханасˮ. Пыхыданаˮ сававна кинохона тумдыбинаˮ.Тандаяркаʼ кино сертабадиˮ нямна ӈаниʼ ӈобˮ сава юнмʼ намдаваць. Мале танякуй похона «Мядʼ паӈг» нюбетамʼ тадтамба пяць. Тикамдоʼ техэ яханда нидонзь тэвраˮ, есьдоʼ сусавыць. Тедаʼ маˮнимˮ, Президентской грантʼ есь нядˮмяць киномдоʼ сертаба ёльцеӈгудоʼ.Выӈгана иленаˮ илебейˮ ненэциеˮ илеˮмямʼ падыбиˮ. Ӈэвахана мэнадоʼ Галина Ачембоевна Матарас, пыда «Минлей» организацияʼ нермбэртя. Режиссердандоʼ Владимир Тумаев тара. «Белый ягель» киномʼ тадтамбаванда нямна теневаваˮ. Кинохона ненэй ненэцяˮ сянакуˮ. Пыдоʼ таславы тохолковамʼ мэˮэмдавэйˮ. Ямальской районхы Юрибей яхаʼ няна иленаˮ ненэцие тадтамбавыˮ. Тикыʼ нямна Галина Ачембоевна тарця вадамʼ мэˮӈась:— Ненэй ненэциеˮ иламʼ мюданда манэˮлабтамбиваˮ. Ненэцяˮ хартоʼ иламдоʼ мэˮӈаˮ. Маямбиˮ, тэдорӈаˮ, ӈаворӈаˮ, лахарёдоʼ мэˮӈаˮ… Сяхариʼ хэвняд туртаˮ хибяриˮ илмаˮ манэˮлабтамбабатоʼ илмаˮ яӈгамдамбидоʼ, пайӈэ сертабидоʼ, ихиня тарця вэва. Тюку кинохонанаˮ маняˮ ненэй ненэцяӈэ хареˮ илмаˮ техэ паӈгахаданда манэˮлабтамбиваˮ.Киномдоʼ тюку поʼ нараʼ няна манэˮлабтаӈгудоʼ. Маняˮ ненэй ненэцяӈэ ӈулиˮ ӈатенаваˮ.Марина Ярʼ падвы

Едэй киномʼ манэˮтаваˮ

Сидяӈг: Марина Ярʼ тавдтавы

<div class="content-lead">Ненэй ненэцяʼ нянаˮ, Анна Павловна Неркагиʼ падвы няби яʼ панхана толаӈгудоʼ. Тедариʼ ненэй ненэцяӈэ поӈгананаˮ ӈобˮ ненадо паднанаваˮ. Тикы няваˮ тэнзанаˮ нямна ӈэда юнмʼ яʼ сярʼ нимня минреда.</div>Анна Павловнаʼ падвы «Белый ягель»мʼ ӈани яхаˮна вадеˮӈадоʼ. Лондонʼ няна книгамда ӈадимдеӈгуˮ. Россиянаˮ книга ӈадимдембада Ассоциацияхана манзараниˮ вадавна, тикы манзаямʼ поʼ ямбанʼ минревэдоʼ. Луцаʼ вадахад ӈаниˮ пареӈодаˮ вади тэволавы не ӈэрмʼ терˮ иламʼ техэ паӈгханда хамедаванда еˮэмня Анна Павловнанʼ ӈэдалёрмысь. Таняна ханзерˮ илеваваˮ торомдамбавы.Книгамдоʼ сие ниць ирыхына СШАхана ӈадиманзь вадеˮӈадоʼ. Пуна Канадаʼ няюʼ ядэлаӈгудоʼ. Тикыʼ нерцюна Анна Павловнаʼ падвы Испанияхана, Германияхана, Италияхана ӈадимдембидонзь. Нобелевской премиянʼ нерняʼ пэрӈадонзь. Падвэвнанда тамна киномʼ сертабиць.Пыдараˮ ӈодˮ, ненэй ненэцяӈэ, няндаˮ падвы ӈаниʼ толабидаˮ. Тикыдаˮ маняˮ ӈэрмʼ терӈэ илнаˮ нямна ӈаˮ.Марина Ярʼ падвы

Ӈани яхана толаӈгудоʼ

Сидяӈг: t.me/YANAO_official няд ханавы

<div class="content-lead">Округнаˮ ӈэвахы ерв нылынаваʼ яляхана теневана нита мядоˮмана ӈэдалёрӈась. Таʼ 2023 похона Пэˮ тэлˮмана мюсертаˮ мядʼ терхаˮ тэворӈась. Вэненго мядʼ терˮ</div>Пэˮ тэлхана сава юндоʼ пилиˮ со.Ерваваˮ нюртей яӈорэйʼ мякˮ ни тэворˮ. Тюку нида мале танякуй похона торомдэйдась. Тедаʼ тамна саць ненадо серˮ сидта таняʼ тэврась. Дмитрий Андреевич Артюхов илебей Вэненгаʼ мядʼ терхаʼ еяʼ мяд капиталмʼ миˮӈась. Округнаˮ тиӈгывна тарця 400-ӈэ толы.Несхаʼ, Дмитрий, Дарья Вэненго сидя нюдиʼ. Небяютиʼ-нисяютиʼ мякана илеӈахаʼ. Пыдоʼ малʼ Пэˮ нямна мюсерӈаˮ. Хареˮ тыдоʼ пэрӈаˮ. Тарцяˮ есь няˮамˮмахадандиʼ мятамдиʼ мяраӈгухуʼ, хартиʼ иламдиʼ пяӈгухуʼ. Ерваваˮ еˮэмнандиʼ сава вади хэтась:— Ямалваˮ сояӈгана ӈацекыˮ нямна ӈаниˮ ёˮ терˮ поӈгана нерняна ӈа. Мюсертаˮ ненэцяˮ сяхариʼ нюдоʼ ӈока ӈэсеты, тедаʼ ӈодˮ тарця. Ӈока хибяˮ невхыˮ иринатоʼ илаʼ саирмʼ нёдаˮ, тикы ихиня саць пои. Таремʼ пыдоʼ хареˮ тэнзамдоʼ ӈокамдамбиˮ.Еяʼ мядʼ капиталмʼ 2021 похона округнаˮ ӈэвахы ервʼ ватовна ӈадимдедонзь. Миртя — самляӈг юрˮ ёнарˮ еся. Тикандоʼ терӈэ ӈуˮ, еяˮ, хорˮ, ханˮ тараˮ.Марина Ярʼ падвы

Теневана няхата тэворӈась

Сидяӈг: Марина Ярʼ тадтавы

<div class="content-lead">Тыˮ ниць ирыхына Россия янаˮ ӈэвахыˮ ӈудонданаˮ Ӈэрм терˮ нерняӈы иламʼ савумдаваʼ няюʼ ненадо падармʼ падаць. Тикы яʼ мидыхыд хартоʼ яхаˮнатоʼ иленаˮ ненэциеˮ едʼ сертавы Концепциямʼ 2036 поʼ ёльцяндʼ нёдаӈгуваˮ.</div>Тандаяркаʼ хахаяда няхарˮ поˮ ямбанʼ ӈэвандаˮ серо пидтеˮмяханатоʼ мэйравыдонзь. Сямянхат таранаӈэ толёдаˮ — экономической, социальной серо нерняʼ тидхалембава, иле мэтаˮ ё тарулава, невхы илаʼ саирмʼ мэˮма, ты пэрма, ёрма, ханева.Ӈокханда илмаˮ савумдаваʼ няюʼ падартʼ юркад вата манзаи падвыˮ. Неноховавна таранаӈэ иле ёнаˮ лэтрамбавамʼ таславыˮ. Таремʼ хусувэй поʼ янаˮ сярʼ ний хабто ӈэвамʼ манэˮсартаˮ. Тикыʼ хавна ӈэрмʼ терхат вадамʼ минренаӈэ тэравыˮ нинаˮ яʼ индадмʼ, яʼ юрмʼ нэкалпадиˮ тасалковахана мэӈгуˮ. Едэй яхана манзара таслабтоʼ, ӈэрмʼ терхат хонаркодаˮ. Тыˮ хадырць яˮ, халямʼ хадабадиˮ ёловаʼ яˮ, хэбидяˮ, тамна ӈаниˮ илнаˮ саирмʼ нёда сертавыˮ ненадорка яˮ — малʼ лэтрамба таславыˮ.Сава нядˮмаӈэ ненэциеˮ сертавыˮ ӈамгэри, ӈамзи, халэ мирдапавамʼ падвыˮ. Тодоˮ Ӈэрмʼ ёˮ ӈэвахаˮна мэнаˮ ервˮ яндоʼ терˮ мирдападиˮ ӈавори хуркариˮ выставкахаˮна, ярмаркахаˮна манэˮлабтамбаӈгудоʼ. Вадавнандоʼ, таремʼ тэмдортидоʼ ӈоквортаˮ — ӈэрмʼ терˮ иландоʼ няюʼ мэˮманда есядамдоʼ недвопа пиртаˮ.Тикыʼ хавна Ӈэрмʼ няʼ ӈани яхат туртаˮ ненэциеˮ еˮэмня яӈга мядонзь ядамдоʼ сертаӈгуˮ. Ты пэртиˮ ӈэсыˮмана, ёртиˮ таӈоцяˮмана ӈэдалёртаˮ ӈобтикы таняӈгуˮ. Серодоʼ мале ӈахакуд таславыˮ ӈэӈгуˮ. Мядондаˮ ненэцие мядолабтамбаванʼ харванаˮ тикымʼ манзаяӈэ мэтадоʼ, таняд есядамдоʼ хомбаӈгуˮ.Сававна, таӈга илеваʼ еˮэмня ненэциеˮ илесь хардахаˮна юне намдорць мэта интернетмʼ, связьмʼ савумдамбаӈгуˮ.Тохолковаʼ нямна сертавандаˮ манзаяˮ:— ӈэрмʼ терˮ вадавна ӈэдаˮ толаӈгобцьʼ падыбава, школахаˮ ӈэдабтамбава,— едэй мутры нядˮмяць ӈэрмʼ терˮ вади лэтрамбава.Ӈэрм терˮ илаʼ саирмʼ лэтрамба сертавандидоʼ:— хэбидя я, илаʼ саирмʼ, невхы сё, лаханако лэтрава, теневава, мэˮма,— ӈэрмʼ терˮ вадавна лахананаˮ, паднанаˮ, хынотаˮ, лаханако мэтаˮ ненэцие тюˮуʼ тидхалембава, ӈэрмʼ терˮ вади, илаʼ саирмʼ тохоламбадаʼ учёной нядабава.Галина Окотэттоʼ падвыСидяӈг: Марина Ярʼ тадтавы

Ӈэрмʼ терˮ иламʼ савумдаваʼ вато

Сидяӈг: Лилия Артееваʼ ӈэдабтавы

<div class="content-lead">Ӈэрмʼ янаˮ ӈардавна хуркариˮ вырэйˮ, ваˮлёйˮ илебейˮ ненэциенаˮ таняˮ. Пыдоʼ Ямалнаˮ нямна Россия янаˮ тиӈгэвна сава юнмʼ минреˮ. Сёбарˮ, сёётэйˮ, таранаˮ, мелˮ ӈэдакыˮ. Поӈганандоʼ падтаӈгоди ӈаниʼ теневаваˮ. Ӈопойдоʼ — Лилия Артеева. Иланда, минрена манзаянда, мята терˮ нямна хонрамбивась.</div>Лахана нята нями мале ӈока поˮ ямбанʼ Ӈыдʼ школахана манзарась. Таняна сэдораваʼ, ӈавар пирембаваʼ урокахаˮна харадʼ терˮ ӈацекы тохоламбись. Падтаӈговаʼ нямна ӈэдаˮ теневабцудоʼ ӈобтикы няданда хомбидонзь. Манзаямда ёльце тидˮ минредась. Тамна «Движение первых» ненадо серкана тарась. Тохоламбадида яляʼ няюʼ ӈэдаˮ серкˮ тидхалембидась. Тедаʼ ӈацекыда сава ихина тензебтембасетыда.Харта сехэрэмда нёдаВэбаʼ ирыхыд иланда ӈулиˮ несэймась. Сита тотревʼ хусувэй хибяри лакриʼ иламда тамбирувна несэймда нида пиратˮ. Пыда харта выравнанда харвабтана, теневана манзаяримда пясь. Лилия таремʼ ибедорӈа:— Нюдя ӈэвани мальӈгэхэд падтаӈговамʼ харвабтав. Школахана яӈга ханяхавана тикы сертʼ нидамзь тохолкурˮ. Ӈопой, падтаӈговаʼ уроканаˮ минревы луци неваˮ сиˮми сававна табедамбасеты. Сита нядˮмяць ӈолепяхаˮна падтаӈгурць тухудамзь. Тикыʼ хавна хадани нюˮ малʼ хартоʼ падтаӈго пирӈадоʼ.Тобольск маркана тохолковани мальӈгана теневабцуниˮ тамна ӈокамдэйнась. Сямянхат нердена ӈолепяхаˮна падтавэми 2012 похона сертавась. Ненэй ӈарка манзаядни тасламбив. Тикыʼ пуд ханярина мэбˮни ӈодˮ, етриʼ падтаӈгурцетыдмʼ. Сертабадиниˮ сабе ненадоӈэ нисетын тасламбюˮ. Тэри ини харвабцоӈэ мэцетын. «Падтаӈгурӈадмʼ… Ӈока янаˮ терˮ таремʼ пирӈадоʼ. Нядандоʼ ӈамгэхэна яӈгадмʼ? Ненэй падтаӈгодаˮ — юнета ненэцялиˮ. Мань ӈадимдевандами яӈгу», — таремʼ ими ядэрцеты. Сейми пинаркасеты, ихинани тарця вадахат тосаркасетыдмʼ: «Таросядамʼ сертаби».Яляʼ няриʼ сырӈаӇобаӈгуна ӈопой табекомʼ намдадамзь: «Мелʼ ненэцяˮ, тамбирувна мародаˮ нёдаˮ ӈаˮ. Теневабцудаˮ пыдарираˮ еˮэмняндаˮ тавыˮ ниˮ ӈаˮ. Яʼ тиӈгывна ненэциеˮ иламʼ савумдамбаванда еˮэмня мэˮэйдаˮ». Ти, тикахад хамедав: «Хибяхав сертавэми манэˮманда серʼ сава иӈутʼ хаˮмаӈгу, тарэнзяда савумда». Харˮни пыхыдами хонрадмʼ: «Хибяхав манзаиниˮ вэваӈэ таслабта, падтаӈго ӈэвадаӈгудмʼ? Ӈамгэхэв илаӈганани несэймда?». «Яӈго. Хуркари ӈэбта ӈодˮ, падтаӈгуртадмʼ. Ӈаниʼ серʼ яˮмав». Таремʼ харвабтана манзаями илни серӈэ таслав. Падтавыниˮ мирдапин, таняд есядами хомбидмʼ. Сертавыниˮ ненэцяӈгˮ интернетʼ мутравна ӈадимдембин. Таняна группами таня. «Лилия Артеева|Художница с Ямала|Lili ART» нюбеˮӈа. Тикымʼ нядˮмяць падтавыниˮ манэць пирӈаˮ. Ӈамгэхэвмʼ тэмдаванʼ харвабто, паднаˮ.Мелʼ мята терˮНебями — Антонина Сергеевна Артеева. Харта еркарада — Ӈокдэтта. Иланда ямбанʼ сиднаˮ ембапасеты. Пибинаˮ, мальцинаˮ — малʼ пыдаʼ манзаида. Сэдора, паркола хадами Светлана Ходевна тохоладась. Нюдя ӈэванда мальӈгэхэд нюдя ӈавори, ютъи сэдыба табедамбавэда. Пивахавˮ, панэхэвˮ мале школамʼ ёльцеˮмахаданда пявыда. Мирдападиниˮ поӈгана небяни сэдъяˮ таняˮ. Ханяӈыдоʼ тодоˮ тэнзˮ ӈухукоˮ. Ябтоˮ, нябыˮ пыяхат сертавыˮ хавна едэйˮ сянако сэдыби. Лапкахад тэмдавыˮ «кукла» ненэй ненэцяндаревʼ ембапида. Ной паныдоʼ, ниʼ индоʼ, ӈэбтодоʼ малʼ ненэйрахаˮ. Хусувэй сянакода ӈани сянакохоˮтата яӈга, ӈобкарт ӈобˮ тоˮолсада яӈгу. Ӈаркаюмʼ не нями мале ӈока нюʼ небя. Ӈобтикы мелʼ не. Нюкцида, вэсакода не няни сэдвы мальци, пиби мэˮӈаˮ. Падаркана падтаӈго теневабцода нянанда ненэй ӈавори сэдыба нядˮмаӈэ тара. Ямалʼ сояˮмаʼ яляхана пыдиʼ сэдъидиʼ ӈаниʼ мирдапинась, выставкахана ӈобтикы манэˮлабтамбинась.Манзаита нямнаПуданаˮ падтамбадита нямна Лилия таремʼ лаханась:— Тедаʼ сертабадиниˮ сырэй ялэˮ нямна ӈаˮ. Сюртявӈэ матормыˮ пя латакоциˮ нина падтаӈгурӈадмʼ. Неноховавна харпоˮ ялэˮ падтаˮминиˮ ӈокаˮ. Ханяӈыниˮ нюдямбойˮ, ӈаниниˮ ӈаркамбойˮ. «Сделано на Ямале» ярмаркахана янаˮ терˮ савуˮядонзь. Тедаʼ мале янамбовна Ты пэртиˮ ялэхэˮ хамекудмʼ. Таняна тэмдортаˮ ӈока ӈэсетыˮ. Ненадовна нядˮмаӈэ интернетхана минрена группами мэˮӈадмʼ. Таняд тодоˮ я терˮ сиˮми хомбиˮ. Харвабцутоʼ серʼ тэмдавандадамдоʼ тэрабиˮ. Ти, тарця манзаямʼ илниʼ сехэрыʼ ненадумдаˮмаӈэ мэˮӈадмʼ.Галина Кинчинаʼ падвы

Ӈэрмʼ яваˮ падтамби

<div class="content-lead">Тазовской районхы Ӈэдяʼ хардахана ненэй ӈацекэхэна манзарана Людмила Мэбетавна Ярмʼ лаханако няˮӈадамзь. Пыда ӈарка пэвдей ирыʼ пуданаˮ ялэˮ пиркана ӈацекыта нямна вадамда мэˮӈась:</div>— Маняˮ ӈацекынаˮ интернатхана ӈулиˮ сейдоʼ нярканаˮ. Мале сянʼ яляʼ хэˮмяхад ханяӈыˮ мякандоʼ пяӈгудоʼ. Сиддоʼ мятоʼ терˮ хосаяӈгуˮ. Маняˮ ӈахат школахана тохолкурˮманаˮ мальӈгана поʼ ямбанʼ школахана мэсетываˮ. Ханяхартʼ ниваˮ ӈэдалёрцетуˮ. Таʼ мальӈгана таремʼ няби яʼ пананʼ есяʼ ханхана ӈэдалёртаˮ яӈгосетыˮ. Тедаʼ ӈацекынаˮ мале теневаˮ: «Сывʼ мякандоʼ пяӈгудоʼ». Мань тидхалембадиниˮ пуданаˮ тохолковаʼ яляхаˮнатоʼ варемдоʼ мэˮӈаˮ. Тохолковаʼ серодоʼ вэнзерˮ мимбанандоʼ сиддоʼ ниˮ ӈэдараӈгуˮ, ерваваˮ небянадоʼ-нисянадоʼ няць лаханакурта. Тарця яӈговаʼ еˮэмня тедаʼ ӈахакуд варемдоʼ мэˮӈаˮ. Таремʼ ӈодˮ ӈыхы яхана иленаˮ ненэцяˮ нюдоʼ нидоʼ хосаясетуˮ. Пыдоʼ интернатхана илесетыˮ. Сянмбой ӈацекы хаюрцеты. Пыдоʼ еˮэмняндоʼ ӈобтикы хуркариˮ мэкадˮ ӈавэ сертабасетываˮ.Ныланаˮмахадандоʼ ӈулиˮ ехэрана ненэцяӈэ турцетыˮ. Хойхана яляʼ няʼ ӈэда пэдёдамдоʼ нэкалпиˮ. Сава иӈутʼ хаˮморӈаˮ. Ӈаябаддамдоʼ ӈамдаˮ, тэхэˮнатоʼ мэӈгуˮ. Мятоʼ терˮ хэвхана идоʼ таӈгаӈгуˮ. Пунахав тамна самляӈг ирыʼ хэˮмяхад ӈаниʼ няхатоʼ пяӈгудоʼ.Тедаʼ интернатхананаˮ иле лохонаˮ мюйʼ паскойӈэ сертабиваˮ. Хадымʼ нултаваць, хуркариˮ сомбойˮ еӈглюс ӈыдаваць. Тикынаˮ малʼ ӈэбатоʼ харˮнаˮ сертабинаць. Ӈацекыниˮ тарця сава ваˮлеро ӈанэдамбавамʼ харвобтадоʼ. Хусувэдоʼ ӈамгэхэв тарана иӈудмʼ хэтыби. Тадриʼ Ӈэрмʼ сей ириваˮ Ӈэдяʼ хардавна ӈаниʼ ӈадимда, тохолкодаˮ ӈацекынаˮ ӈудаʼ терад тэвраӈгу. Маняˮ хуркариˮ сё тохоламбиваˮ, имбытадваˮ сэдыбиваˮ. Пуна тикынаˮ серˮмахаданаˮ ӈобкана Ӈэрмʼ сей ириваˮ ядабтаванзь пяӈгуваˮ.Таремʼ Тазовской районхы, сямянхат ӈыхы яхана ӈэда Ӈэдяʼ хардахана ты пэртяˮ нюˮ едэй помдоʼ ядабтаванзь ӈанэкурӈаˮ.Марина Ярʼ падвы

Сырэй ныланавадоʼ

<div class="content-lead">Маня’’ ӈэрм’ ява’’ саць паской. Няби я’ панхана Ӈэдя’ тер’’ выӈгана хаерта сэв ӈодь сэван’ ӈадимя. Редакцияна’’ сава ня Данил Марюй вадам’ ӈэдарась.</div>Данил хахаяда яля’ харе’’ соя’’ма яханда тэворӈась. Пыда манэ’’мыда няна’’ ӈэдарэйдась. Ӈэдалёро’’мида тарем’ ваде’’ядась:Нини’’ мядодо’ Ензя’ няна ӈа’’. Хальмер’ Седе’’э’ хардахад ӈэдалё мале хубта. Тев’ ёльцяӈгана саць теци. Вэнзер’’ ембдёховаб’’ пивня ядэрма’ то’’олха ни ӈа’’. Ненэй ненэцяӈгав’’ ёря мальцяха’’нато’, со’’окаха’’нато’ ӈамгэхэрт тецьда сиддо’ ни табламбю’’. Пихиня ӈамгэхэв манзаидо’ етри’ танясеты’’. Нито’ мядо’’мана’’ ӈэдалёрӈа’’, поёрӈа’’, ханяӈыдо’ тамна халяда’’. Таняна мэвани мальӈгана ялянда сэв я’ пан’ нимня ӈадибелыць. Тад нерня’ хусувэй яля’ хаерта тю’’у’ пэртада, тарем’ янамбовна ибаӈэ ханда.Пыдара’’ ӈод’’ Ӈэдя’ выӈгана ханзер’’ илевамдо’ ӈани’ манэ’’ӈара’’. Тюку’’ сидяӈг’’ таняд тэвравы’’.Марина Ярʼ падвы

Ӈэдяʼ выӈгана

Татма: Андрей Пяк таттамы

<div class="content-lead">Ӈашкиуде» неԓьшут чики дяԓямтоӈ ӈэтаӈатоньш. Куԓкаԓи» мэкат паныдю» мэш утренникан тоӈаш». Пюԓ дяхана ӈайта ассоциацим «Ямал-потомкам!» няш ӈашкиуди» праздникат шеԓтаӈаш». Таԓкахана диԓина» ӈашкиуди» диԓюнатуӈ мят майпёш тоӈаш». Ӈашкиуди» хомана ныптакомаӈ мэт праздник’ шеԓтамы» неԓьшут ӈанатамэт.</div>Ӈыдихийтуӈ шеԓ ӈашки» утренник’ минԓеш ЦНКхана мансԓанна» шичитоӈ нятапиш». Пы’тоӈ ӈашкиуди» хыниԓмаӈ мэты» вильта шутпяԓс шеԓтаӈаш». Ӈашкиуди» шанат шана’кохона» шана’куш», кынуӈаш», поӈкнатуӈ мянаԓяш». Чешча вайсыку ни нюнта няӈ утренникан тоӈаханьш’. Ӈашкиуди» тохоԓамытуӈ стихотворенитуӈ вачаӈаш», нятуӈ ӈучи» ня’ампёш катукуӈ чемна таԓаӈаш». Чуки похона ёлкахана дюԓкат ва’та» ӈашки» мэӈаш». Мятуӈчеԓ» ӈука нешади» ню» камна нешанатуӈ СВОхана мэна» ӈашкиуди» утренникан тоӈаш». Таняӈ томы» хомана майдят. Шана’кош хитамахататоӈ ӈашкиуде» чупей детыпуӈ дет ӈайта мячисы» — подарки ня’амӈаш».Маня» Пюԓ дяханана общественное’ движение «Ямал -потомкам!» няхаԓдю”кат ва’та пуӈ ӈокна мансԓаӈахаӈ. Нешади» дет ӈайта празднику» шеԓтапёш пдицахана мансԓанна» пон нятакошту». Деты пуӈ неԓьшуна Пуровский’ районхана мансԓанна» ТЭК дет тонԓюта» предприятии» чупей ӈашки» подаркит тэмтапёш нятакошту».Андрей Пяк патмы

Майпёш шана’куш”

Фото: Сё мэта сей няд ханавы

<div class="content-lead">Мале сян по’ тяхана «Поющие голоса» проект ӈась. Теда’ январь’ иры’ 1 яляхад март иры’ 1 яля’ ӈэсонд’ ненэця’’ ӈани’ видео сертаби’’. Ненэй ненэця’’, хаби’’, тасу’ хаби’’, ӈысма’’ мал’ конкурсхана мэ’’.</div>Сёётэй’’ ненэця’’ тюку конкурсм’ ёльце ӈатевэдонзь. СЁ МЭТА СЕЙ терм’, Саттане Ӈокэйм’ хонрамбидамзь. Пыда Хальмер’’ Седе’’э’ хардахана иле. Харта соя’’ма яда — Сёяха. Хуркари ненэй сё, иринда сё мэцеты. Теда’ ӈани’ хыно’’манзь мэ.«Поющие голоса»‘ нямна Саттане тарця вади мэ’’ӈась:Харе’’ вадан’ сё тидхалембава конкурс 2019 похона ӈадимясь. Тамальӈгана Тюмень маркана тохолкудамзь. Маня’’ «молодежка»‘ терӈэ ӈобт’ ма’’лываць. Баста’ сём’ ненэй вадан’ ӈарханда падаваць. Хусувэй я’ тер харта вадавнанда вадида сертабидась. Пуна ӈобт’ тасламбиваць: ӈамгэ вада ханзерарка сомбоковна хэтаб’’ сава ӈэбтав’’. Видеори сертавдавэй’ хаись. Тикахад Едэй по’ някуна ханяӈы’’ нина’’ мякато’ хаяць.2020 похона конкурс ӈани’ танясь. Тет вадавна сертаба пядонзь. Тамальӈгана ма’’нидам’’: «Тедахав’ нивандархав пирас’’, хуркари ӈэё». Сёкоцяхавахаюни таняӈаханзь, сидя сём’ сертадамзь. Теда’ тикы сёхоюни мэ’’ман’ нихиюн харва’’. Ӈанисэй сём’ пада тасладамзь.Тикы’ пуд ими ядэрӈась, ӈани похона таняӈгува. Ӈани похона ӈамгэхэрт яӈгусь. Небо’ ӈани’ мадамзь: «Самляӈг по’ хэ’’мяхавахад нинякы ӈадимд’’?» Самляӈг по’ хая — ӈадимя.Тедахав’ мань маймбидм’. Тюку конкурсм’ мале ӈока ненэця’ ӈатевэда ӈэванӈгабя. Ненэй вадавна сертавы’’ сё’’ мале ӈока’’ ӈэӈгу’’. Си’’ив яна’’ тер’’, хахаяда ё’’ тер’’ мал’ ма’’лёда’’.Сава юнм’ намдвани сер’ ими таминда ядэлыць. Анна Асти’ сём’ ненэй вадан’ падван’ харвадм’. «Homay» сё ӈани’ сава. Сё мэта Тадебя’ «Сэр’’ мерцяда» таня. Тикым’ падаб’’, ӈани’ сава.Саць тоенанада харе’’ вадан’ луца’ сём’ тидхалембава. Ханяӈы’’ вада’’ маня’’ вадавнана’’ хэтнана’’ ни’’ӈа’’.Ӈамгэ серта тара? Нерня луца’ вадавна, тамна ӈани’ ӈамгэхэв вадавна ӈэда сём’ ненэй вадан’ падаӈгун, тидхалеӈгун. Тикы сёмд видеон’ падхая мэтар. Пуна харт «Вконтакте» страницахананд ӈадимдеӈгур (страницамд нэсь нён юр’’). Тикахад #поющиеголоса2026 хештэгм’ ӈабтаӈгун. Хонраван’ харвананд таняб’’, конкурсм’ минренаха’’ падан’’.Автор: Анна Яптик

Няръяна Ӈэрм