Няръяна Ӈэрм
Яваˮ ёльце паской
Нумда ядемзь яваˮ илелъйˮ. Пилиˮ нердеʼ лахацяˮ малхад тарензяˮ поркабтасетыдˮ. Тамна нувода ядевомахад нероˮ, пюӈгˮ мал ӈадимзетыˮ. Неняӈгˮ ирыхына выӈгана ваӈгˮ тэлˮ, хоёˮ сюмбˮ нийˮ падтавэрахаӈэ хэсетыˮ.
Тедаʼ яваˮ хуркариˮ падярахаˮ, тасехэйˮ, ӈодяʼ тебтрахаˮ, няръяна тэнзӈэ хая. Тикы ӈамдэдˮ ӈэваˮ малкэцяˮ. Паскойвана яʼ нимня лехэбтыˮ. Ненэйвана яляʼ няюʼ сядотаˮ тэлхаˮна ӈокавна вадюрӈаˮ.
Выʼ, пэдараʼ терхана ӈамдэдˮ, нероˮ, пюӈгˮ, малˮ тытоʼ ӈавраӈэ тараˮ. Ӈадьбятоʼ ненэцяˮ хумбанзиˮ нидоʼ ныдпюˮ. Мядʼ мюня вадабада таско танябˮ, ӈамдэдота яʼ някуʼ ядэласетыдоʼ. Таняна ӈавкаця нянанда тарана ӈамдэтадамда харта тэраӈгу.
Луцахаˮна хусувэй ӈамдэд харта нюмдя таня. Ненэй ненэцяӈгаˮна таʼ вадёнанаˮ малˮ ӈамдэдаӈэ вадеˮядоʼ. Ӈобˮ, сидяриˮ нюмзавэйˮ. Нюмзьбатоʼ ӈодˮ ненэциеˮ саӈомʼ майбтамбидоʼ.
Тарцяˮ ӈавыдотаˮ ӈамдэд ӈаворць тынаˮ хэвадоʼ суворӈаˮ. Ӈамгэʼ пиркана тудакоˮ ӈадимдаˮ. Тыˮ саць харвобтэйдоʼ. Ӈавна ненэциенаˮ тыˮ ӈавранэ таславы ӈэвандоʼ еˮэмня нидоʼ ӈаворцетуˮ.
Тюку поʼ пэдариˮ някуна ӈодяˮ мале ӈадимяˮ. Мараӈгаˮ, лынзермяˮ холкавыдˮ. Ламдуйриˮ, емзьдейриˮ тамнаркаˮ. Юмбарад нюракуць тохортаˮ ӈацекыˮ варемдоʼ мэˮӈаˮ. Неняӈгˮ, нибярё сиддоʼ ниˮ табˮламбюˮ.
Марина Ярʼ падвы
Сидяӈгˮ: Марина Ярʼ тадтавыˮ
Авторы
Няръяна Нгэрм
Темы