Няръяна Ӈэрм
Иламда харта тасламбида
Вадами яˮавлада пирибтякоʼ нямна ӈэванда. Пуданаˮ похоˮнаˮ иланʼ ивъерʼ сыртаˮ ӈаць хибяриˮ тянё ниˮ ӈаˮ, маняˮ яхананаˮ ӈаниʼ таняˮ. Пыдоʼ сяхариʼ яханандоʼ тарана серо тасламбувандаˮ. Тарцянʼ тоходана тедаʼ хусувэдоʼ харта манзаямда пэрӈа.
Ӈопой тарця няваˮ — Юлия Григорьевна Талеева. Пыда сертабадада ёльце ӈока. Ӈаць некоця Ӈарка хойʼ яхана мюсермы, ты пэртя ненэцяʼ не ню. Перенида тевʼ ёльцяндʼ хареˮ иламдоʼ хойхана минреˮ. Хасава няхаюда тыдиʼ пэрӈахаʼ. Нисяда — Григорий Александрович, небяда — Мария Ивановна, мале пенсияхана мэӈахаʼ, Красноймʼ нюбета хардахана илеӈахаʼ.
Юлия школанда пуд Няръяна маркана колледжмʼ малевы. Тамна Архангельскʼ университетхана тохолку. Тедаʼ маркана хуркари тарана серо минре. Ненэциеˮ округʼ депутатˮ Собранияʼ илебейˮ ненэциеˮ палатаʼ ервʼ ӈудаʼ ӈылыӈэ тара. Небоʼ МГИМО няби тодоˮ яхаˮна иленаˮ ӈэрмʼ терˮ Ассоциацияʼ минрена «Школа общественной дипломатии» тохолковахана нерняʼ хаˮмыць. Хареˮ манзаянда ирмня яваˮ хуркариˮ форумхаˮна, фестивальхаˮна манэˮлабтабасетыда. Юлия хусувэй пэртамда ёльцьханда тидхалембида. Тикыта хавна нюдя ӈэдаханда сёбарˮ ӈэˮнивˮ. Хасуюˮ поˮ ямбанʼ «Хаяр» нюбета ансамбльхана тарась, хыноˮӈась. Пуна «Илебц» театрхана сянакосеты. Тикыта няюʼ сита ненадумдаць.
Юлия таремʼ мась:
— Хариˮ иʼ ӈудмʼ тюˮуʼ минреваʼ еˮэмня сермʼ теневанаˮ тараˮ, тикахана хусувэй едэй ӈамгэ сававна ӈадимда. Нямд нядˮмяць нин няркнаӈгуˮ. Ӈамгэри форумхана маняˮ тоходанаваˮ: несэй ненэцямʼ торумдаӈгун, сертабада манзаямд маниеӈгун. Округнаˮ илебейˮ ненэциеˮ тасалковаʼ еˮэмня маˮлёвамʼ хамэдамбиваˮ. Сиднаˮ ӈарˮ нинаˮ манзаи тасламбадаˮ нинаˮ ӈобтʼ маˮлаӈгунаˮ, сертавандинаˮ таслаӈгуваˮ. Ӈаць хибяриˮ ӈарка яляхана ӈамгэмʼ тасламбавамдоʼ хамэдаӈгуваˮ. Товыˮ нинаˮ лахана нятынаˮ, таремʼ нядаӈгодаˮ, масиˮ, ӈокамдаˮ. Тюку поʼ пеляхана Няръяна маркана илебейˮ ненэциенаˮ парламентʼ Совет ӈэӈгу. Тикаваˮ Россиянаˮ Северо-Западной Парламентʼ Ассоциацияхад паӈгдёда. Ӈарка янаˮ юˮ яхад хибяриˮ тутаˮ.
Тюку ялэˮ пиркана Юлия Талеева Оренбургʼ маркана «Евразия Globӈl» тодоˮ ёˮ тиӈгы илебейˮ ненэциеˮ форумхана мэ. Таняд намдавыˮ теневабцода ӈаниʼ таромʼ нянаˮ хаˮавраӈгуˮ.
Юлия Талееваʼ падвы
Авторы
Няръяна Нгэрм
Темы