обновлено: 04:15, 03 августа 2026
Няръяна Ӈэрм
Ту сяндада яӈгу
Тюку поʼ неняӈгˮ ирыʼ еркад епдяˮ паӈо ёльце яˮавлы. Нумда тамбирувна ядемби, яʼ ний ӈарханда сэлуйӈэ хая. Выӈгана, пэдараʼ помна ядабˮ, ӈэт ӈылы етриʼ маркадарта. Ядембада ялэˮ хавна тамна хэˮ сарёˮ таняць. Ханяӈыˮ районхаˮна хэˮ туˮ янхад яваˮ парана пэяць. Тикыʼ хавна ӈокамбой пеляда яʼ, пэдараʼ паранава ненэцяӈгат миӈа.
Ямалнаˮ тиӈгэвна ханярид вэва юн намдорӈаваˮ. Яʼ сярʼ ниймʼ лэтрамбадаˮ неняӈгˮ ирыʼ нерденаˮ ялэˮ пиркана округхананаˮ мале сян паранана ямʼ вадеˮӈаць.
Тедаʼ пуданаˮ вадидоʼ тарцяˮ:
— Ӈокханда 23 парана ямʼ хабтабиваˮ, ӈобˮ серʼ ӈардадоʼ — 3350 гектар. Тикар ёльце ӈарка. Тет районʼ няна я парана: Красноселькупской, Надымской, Приуральской, Пуровской районхаˮна. Таняна 537 ненэцямаˮ манзараˮ. Нядˮмаӈэ сидя Ми-8 тиртя ӈаномʼ мэˮӈаˮ.
Тумʼ хабтабадаˮ серодоʼ тидˮ минревандоʼ няюʼ хусувэй ӈамгэдоʼ таня. Тикыʼ хавна харадʼ терˮ, паранана яʼ хэвхана мюсертаˮ ӈэрмʼ янаˮ терˮ сидтоʼ нядабиˮ. Хартоʼ ямдоʼ лэтрамба таӈгмʼ ниˮ хомбюˮ. Ненэцяˮ ныхытоʼ пирувна писавэйˮ яляʼ ямдоʼ лэтрамбидоs.
Янаˮ ӈардавна ненэцие табедамбиˮ:
— пэдарахана мэбтаˮ, тумʼ нёдаˮ сянакусˮ,
— хасуй яʼ еркана сяхаӈгартʼ тумʼ нёдаˮ пятабюˮ,
— маˮлавыˮ таборо, хасуй ӈуво ӈобтикы харта инда серʼ ханярина нёйдаˮ парадамбюˮ, тикыʼ еˮэмня таславыˮ яˮ таняˮ,
— пэдарахана, выӈгана хабтавдавэйˮ сярамбидаˮ, серамбидаˮ тэри янʼ нёйдаˮ моёпюˮ.
Ӈаркаˮ нинаˮ манзетыˮ: «Ту ненэй ненэцяӈгана хэбидя ӈамгэ. Сянако ни ӈаˮ. Ненэцяʼ явоӈэ тара. Хибяри выӈгы мякнанда тусипой нида пирасˮ. Тухуна пыхыдамда ядемдаӈгу. Ӈаврадамда пиреӈгу. Нябиʼ серʼ ту ненэцяндʼ, яʼ, нувʼ сармикˮ едʼ ӈарка маямʼ тэвра пирӈа. Харадˮ, пэдараˮ паранаваʼ ёльцяӈгана хибяриˮ ӈока ӈамгэдоʼ ёцетыˮ. Туˮ сяндада яӈгу».
Таʼ я паранавахад ёльце лэтрыдаˮ. Пихина тумʼ пятабабтаˮ, етриʼ маниераˮ. Сяхариʼ парана ямʼ манэпатаˮ, ямʼ лэтрамбадахаˮ 112 номертʼ лаханадаˮ.
Галина Окотэттоʼ падвы
