обновлено: 10:38, 02 мая 2024
Няръяна Ӈэрм
Юнета нява’’ тензебтембавы’’
Ненэй вадава’’ падаркана мале ӈока по’ ямбан’ таня. Юнета ӈарка учёной’’ падарт’ тэврадонзь. Пили’’ нерденаӈэ ӈани я’ тер’’ ненэця’’ паднавы’’. Пыдо’ е’’эмняна’’ ӈули’’ ӈарка таром’ ха’’авравы’’. Сяхаринда тараб’’нанда ӈока по’’ тяхана невхы ненэцяӈгат намдавыдо’ теда’ тола пиръяна’’. Поӈганандо’ тарця нюбе теневава’’: М.А. Кастрен, Т. Лехтисало.
Время для чтения ~ 3 минуты
Минревы манзаямдо’ тамна’ тяха’ маня’’ яна’’ тер’’ пявэдо’. Ненэй ненэцяӈгат вадава’’ лэтравана’’ няю’ иланда ямбан’ Мария Яковлевна Бармич манзарась. Сита ханярина илена ненэй ненэця’’ мал’ тенева’’. Хибяхавм’ тохоламбавы, тамна ӈани’’ пыда сита няць книгы падыбавы’’. Сие ниць иры’ 26 яля’ соя’’ма’ яляда ӈэӈгусь. Ӈадьбята манзарась яхананда, Ӈэрм’ тер’’ тохолкось Институтхана сита тензебтемба ӈобт’ ма’’люрмы’’. Учёной’’, ӈацекы тохоламбада’’, тохолкода студент’’ сертавы манзаита нямна лаханавы’’. Тикы’ хавна тамна ӈани ӈэрм’ тер’’ вади тохоламбавы’’ учёной’’ хурка таром’ ха’’авравамдо’ ваде’’мы’’.
Ямал’ тер, Светлана Ивановна Тусида вадамда интернет’ мутрам’ няд’’мяць мэ’’мэда. Луца вадахад ненэй вадан’ падвы манзаи’’ нямна лаханавы. Тикы’’ тарця’’ толаӈгобць’’: «Евангелие от Луки» — «Лука падвы Маямбабцо Юн», «Иисус — наша жизнь» — «Иисус маня’’ илма’’», русско-ненецкий словарь.
Сёяха’ школахана манзарана Меретя Григорьевна Тусида ӈобтикы мякаданда вадида ӈэдарамбавыда. Вадавнанда, нерняӈы илма’’ минреванда’’ — ӈацекы’’, илебей ненэця’’. Ӈадьбято’ школаханандо’ яӈга «педкласс» таня. Ӈаркамбой классахана мэна’’ нюдямбой нидо’ тохоламба тохолкурӈа’’. Ханяӈыдо’ таӈы ныланавандо’ мальӈгана самляӈг — мат’’ потна нидо’ школахана тараванда теневабцохо’’ тохоламби’’. Няд’’маӈэ харе’’ ненэй вададо’ тара. Хусувэй урокахана юнета учёной не’ падвы толаби’’.
Сергей Алексеевич Мызников, Ӈэрм’ тер’’ Институтхана манзарана, Мария Яковлевна’ нямна вадамда мэ’’мы. Иланда ямбан’ ненэй вада’ нямна падвы манзаида ваде’’мы. Гашилов Аркадий Иванович ӈацекы’’ е’’эмня падвыда тензебтевы.
Мария Яковлевна ненэй вадава’’ нерня’ минревы не. Ӈацекы’’ е’’эмня падвы толаӈгобцяда самляӈг юкад ва’’ӈа’’. Тикы’ хавна ненэця’ вадавна ӈэда словарьда таня’’. Хусувэй школахана ненэй вадан’ ӈацекы тохоламбада’’ ялэхэ’’ мэ’’ядо’. Яна’’ тиӈгэвна тохолавы ненэцянда пирханда ӈока, ханярина табекуда нёда манзара’’: Ямал’ ӈардавна, Ӈарка я’ няна, Таймырхана, мал’ сава и’ ӈукана тензебтембидо’.
Автор: Г. Окотэтто’ падвы
