Няръяна Ӈэрм
Сава юн
Небой поʼ вэбаʼ ирыхына мюсертаˮ ненэциеˮ еˮэмня саць тарана закон ӈадимясь. Ненэй мякаˮна иленаˮ неˮ нямна ӈась. Минрена манзаяндоʼ тэнзмʼ падаркана «работник кочевого жилища» нюмдедонзь.
Тикы ненадо ватомʼ ненэй ненэцяʼ няваˮ, сенаторӈэ таравы Григорий Петрович Ледков ӈадимдедась. Вадавнанда, тодоˮ яхаˮна иленаˮ ӈэрмʼ терˮ иле мэта мядодоʼ яӈгаˮ. Ненэй мякаˮна, юртахаˮна, балокхаˮна иленинаˮ таняˮ. Ӈадьбятоʼ падаркана таремʼ падвэдоʼ — «работник кочевого жилища».
Мюсертаˮ неˮ ӈока поˮ ямбанʼ мядʼ мюйˮ манзаидоʼ ӈамгэхэртаӈэ нисетыˮ толюˮ. Ӈахат совхозхаˮна недбямʼ няˮмарпавандоʼ еˮэмня ты пэртяʼ нядаӈгодаӈэ падсетыˮ. Тедаʼ ты пэрмаʼ серо няˮамбадаˮ ервˮ хамедадоʼ: несипойˮ выӈгана илʼ яӈгода, хасава мята терсяӈгу, манзаямда тидˮ минре яˮмаӈгуда.
Тедаʼ мюсертаˮ неˮ нямна ӈаниʼ ӈопой сава юнмʼ намдаваць. Пилюˮ ирыхына Ненэциеˮ округхана ӈэвы тасалковахана ненадо табекомʼ вадеˮмыˮ: «Мядмʼ пэртяӈэ манзаранаˮ неˮ ты пэртяӈэ, халямʼ хадабадаӈэ, ханенаӈэ таранаˮ хасевтоʼ серʼ мерʼ пенсиянʼ ханˮпатоʼ тара. Мядʼ манзаидоʼ пыдоʼ хавнандоʼ хибяхарт сертаба нида пирасˮ. Ты пэрмахана ӈарка таромʼ минреˮ».
Ӈарка ерв Дмитрий Медведев тикы табекомдоʼ савуˮмэда: «Тамнаʼ тяхаʼ таслаӈгуваˮ. Ненэсянда ӈэрмʼ няна невхы иландоʼ саирмʼ нёданаˮ неˮ сертабада манзаядоʼ ӈока. Сиддоʼ законʼ ныхыʼ серʼ нядаӈгуваˮ».
Едэйвана ӈадимдеванда вато неримʼ ни нядабаӈгуˮ, невхы илнаˮ саирмʼ лэтрамбаӈгу.
Галина Окотэттоʼ падвы
Авторы
Няръяна Нгэрм
Темы