Лух Авт
85-мет таӆ-ӆуӊаӆ постас
Яӆап таӆ тыӆащ оӆаӊмет хатаӆан Анастасия Архиповна Максарова 85-мет таӆ-ӆуӊаӆ постас. Ӆув ийикеӆ Прокопий Герасимович пиӆан Питӆоран уӆӆаӊан. Туняӆ хутъяӊ таӆ постасӊан, ияха уӆты питман вуш эӆты.
Ӆорвош район па округ ӆоватан Анастасия Архиповна аратаӆ миран шеӊк яма уйтӆа. Ӆув ханты мир уӆапса тувман ийикеӆ сакӊан иса тащан яӊхсаӊан. Ин уна пеӆка йисӊан па, щишан куртан уӆӆаӊан. Прокопий Герасимович инты унты куш таӆан, куш ӆуӊан хуӆ веӆпасӆаты яӊхиӆыйӆ. Ёӆан ант омасаӆ. Хоты ӆув ястаӆ, хот ӆыпийн аӆ омасты — ермат. Щишан яӊхтаӆан, ӆувеӆ ӆащкам па марэм антом.
Анастасия Архиповна инты унты хонна татӆасыйӆ, верыттаӆ кеман ёнтасыйӆ. Ӆув катра порайн шеӊк ар хорамаӊ сох ёнтасыйс. Щи пораятан хоттэӆ хоятӆан хоӆ ӆуматты мосас. Ӆапат няврэман иса хошам па хорамаӊ сохатан яӊхиӆысат. Ин хиӆыӆаӆ ищи ӆув ёнтыӆыйм сохӆаӆ ӆумтыӆыӆат. Мет шопаӊ, таща яӊхтэӆ порайн.
Ин ӆын няврэмӆан эӆты Эдуард па Вячеслав тащан хоттэӆ хоятӆаӆ пиӆан яӊхӆаӊан. Аӊкеӆ па ащеӆ уӆапса еӆӆы туӆӊан. Вана касӆытэӆан иса аӊкеӆ па ащеӆ хоща хойӆыӆӊан. Ин тыӆащ питщаман Анастасия Архиповна няврэмӆаӆ па хиӆыӆаӆ хоӆ ёхтыӆысат. Мосмаӊа тайты аӊкиеӆ, хиӆыӆаӆа — аӊкаӊкеӆ па щащеӆ мойӆаптасэӆ, апаӆмасэӆ, хошам ясӊатан ястыӆысэӆ.
Муӊ аратаӆ ханты мирэв эӆты ищи мойӆапса ясаӊ китӆув. Анастасия Архиповна па Прокопий Герасимович, тумтака уӆатан! Ойӊа-пищаӊа, йисаӊа-нуптаӊа!
Аллина Тоярова ханшам потар
Авторы
Лух Авт
Темы