Лух Авт
Ай ханты курт эӆты мир ӆоват унты
Россия первенство хон мувев ӆоватан уӆаман, Питӆор курт эӆты уӆты энамты няврэм Кирилл Хартаганов ӆаварт карты шуп нох аӆамман касман оӆаӊ места шитас. Касапса Тула нэмпи вошна курк тыӆащ 16-22-мет хатӆатна вус, хоты ӆув аратӆ 407,5 киӆа нох аӆмас, кимет места эӆты 67,5 киӆайн аршак.
Кирилл Хартаганов — кандидат в мастера спорта, Россия хон мувев сборная хоща ӆоӊман уӆ. Ӆув сэма питас ван хатӆап тыӆащ 6-мет хатаӆ 2006-мет таӆн Мужи вошн. Сэма питам юпина Питӆоран энмас па ус. Щит ӆув шоши куртаӆ, опращӆаӆ щиӆта уӆӆат.
Ащеӆ, Геннадий Филиппович, хуӆ па вой веӆпасӆаман уӆ, антеӆ — Оксана Иосифовна, куртаӊ леккар хотн рупитаӆ. Ӆын хуӆам няврэм тайӆатан. Няврэмӆаӆ кутан Кирилл мет ун, щаӆта кутпаӆ — Анна, айшак похиеӆ — Семён.
Кирилл Питӆорна 11 класс етшаптас па ин оӆаӊмет курсан Шадринской государственной педагогической университет хоща «Технология па информатика» щирн утаӆтыяӆ. Эви апщеӆ па Ёмвош технолого-педагогической колледж хоща утаӆтыман уӆ. Мет ай апщеӆ Питӆор ашкуӆайна 5-мет классна утаӆтыяӆ.
Ӆапатмет класс 14 таӆ ӆоват эӆты, Кирилл самаӊа тайты вераӆ туты питсаӆӆы. Район ӆоватна нох питас, еӆӆы па Пулӊавта ЯНАО первенство хоща китса. Щиӆта щи еӆӆы касапса юшаӆ манты питас.
– Ма воӆаӊ касапса пеӆа манты номас ант тайсам, туп порайн турник хоща нох щакарӆысам па щи. Щи порана ма ӆоватэм энамты ёх иса щи турник па брусья хоща пора хайман, ашкуӆа юпина, нёхамтысат, –Кирилл потарӆ. — Имоӆтына муӊ хощаев, ашкуӆая, айӆат утаӆтыты ху Георгий Осинцев ёхтас. Ӆув муӊев акатты питас па яӆап секция пуншас, хота пауэрлифтинг па гиревой спорт щирна муӊев утаӆтаты питас. Щи касапса щирна мосаӆ ӆаварт карты шупат нох аӆамты. Манэм щимащ касапса сама рахты питас. Еӆӆы па район ӆоватна касапсая китты питсаям, щита оӆаӊ местаят вуты питсам. Щи онтасна касапсаем мет самаӊа тайты питсэм. Хоӆна ямашак утаӆтыты питсам.
Щаӆта еӆӆы, 2023-мет таӆн Россия первенство хоща Кирилл 3-мет места шитаӆ. Амтам рувн, хоӆна ямашак ӆэщатыты питаӆ.
— Там касапсайна ма щи ӆоват аматсам па нумасты питсам, мосаӆ ищи па нох питты, оӆаӊ местаят шитты мосӆат, — Кирилл Геннадьевич ястаӆ. — Кимет, 2024-мет таӆн ма кандидат в мастера спорта нэмн юкантсаям Россия Кубок пауэрлифтинг хоща мойӆапса шитам ураӊна.
Туняӆ, 2025-мет таӆ сус пораян Кирилл 2-мет места Россия Кубок хоща Курган нэмпи вошан, шитас. Касапсая 300 юраӊ хоят 53 регион эӆты ёхтыӆыйс. Щи кутна муӊ ханты айӆат хоятэв ӆув юрӆ такан этаӆтасӆы. Щи ураӊна ӆув Россия сборная хоща ханшӆтаса.
– Тампуш, Ас нопатты тыӆащ 5-10 хатӆатн ма Китай мува Хайнань нэмпи воша китӆаям, хота ма шоши Россия хон мувем ураӊна касты питӆам. Щи аратӆ ун мирэв эӆты арсыр па муват эӆты мет юраӊ хоятат ёхатӆат, — Кирилл потарӆ. — Манэм шеӊк умащ, хоты ма ай куртые эӆты, ай шимӆаӊ ханты рут эӆты мир ӆоватна юрэм этаӆтаӆэм. Еӆӆы па шеӊк такан ӆэщатыты па нохӆы, оӆаӊ местаята, уратты питӆам.
Муӊ шоши энамты хоятэва ям ясаӊ ястаӆув, ям номасн ат утаӆтыйӆ па касапсайӆаӆ хоща яма ӆэщатыйӆ. Номас понӆув, мир ӆоватна, ханты няврэмев нох ат питаӆ!
Иван Сандрин ханшам потар
Авторы
Лух Авт
Темы