Лух Авт
Айкеӆ каншты, ханшты па альты хоятат емаӊ хатӆэӆ постаcат
Щутщаты хатаӆан ямальской журналистика хоща ӆоӊам хоятат емаӊ хатӆэӆ постаcат. «Няръяна Ӊэрм», «Красный Север» газетайӊан па типография 95-мет таӆа щи йисат. «Ӆух Авт» оӆаӊ газет тыймаӆ вущ эӆты 25-мет таӆа йис.
Ханты мир ураӊан ханты ясӊаӊ газет этаман — щит ун амтап ус. Ванты, ин кашӊ хоят верытты питас ӆув рут ясӊаӆан айкеӆат ӆуӊатты. Округ эӆты этӆыты айкеӆат тумпийн, муӊ шоши хоятӆув верытӆат ханты мирэва ун онтас тувам хоятӆув эӆты ӆуӊатты. Куш наӊ леккар уӆа, вой па хуӆ веӆпасӆаты хоят, муй па няврэмат ашкуӆайн рут ясӊа утаӆтаӆан… Вератты па щукщатты хоятӆув ищи ант ёрэмаӆӆув. Ӆув ищи ун рупата верӆат. Мира этаӆтаӆат, муй хорпи хорамаӊ пормасат муӊ ханты мирэв верты хошаӆ.
Ясӊев ант хурӆаты ураӊан муӊ «Щущие» лопасан ай няврэмат ураӊан потрат, ӆуӊтарат па няврэмат ханшам хорат поныӆыӆув. Щи веран няврэмат ӆаӊхаман ханты ясӊеӆ пеӆа керӆаты питӆат. Энамты няврэмат хущты ураӊан муӊ ханшӆув, муй хорпи нётопсайт округ ӆоватан верыӆыӆайт, мата тахия щутщаты яӊхты верытӆат. Щаӆта па няврэмата альӆув, муй хорпи ошаӊ-щащаӊ няврэмиет ӆув кутӆаӆан уӆӆат. Щи порайн кашӊ няврэм ӆаӊхаты питаӆ ӆув тусаӆ, апраӆ ищи альты, ант еӆэмӆаты.
Кашӊ ӆапат монщат па йис потрат поныӆыӆув. Ванты, щи лопас сыстам ханты ясаӊан ханшман уӆӆа. Кашӊ монща ханты мир щащ понман уӆӆа. Ма нумастэман, хоят ӆуӊаттаӆ порайн, ӆув ӆыпи ханты щащӆ ищимет верӆаӆ, ӆув нопсаӆ ханты щира кератты питӆаӆӆы. Ин ар мир кутан ӆыӆӆаман уӆӆув па, щишан ищимет, ханты щащев вояпман уӆ.
Кашӊ хоята ястаты вутщиӆам, моӆты айкеӆ ки тайӆаты, муӊев каншиӆыяӆан. Нын унтан ёхатты кум ки ант тайӆув, ищипа ханшӆэв, газетая па интернета понӆэв. Муӊ ханты мир ураӊан рупитӆув. Щишан, куш нын касаӆӆаты, ноптаӆӆаты, муй па няврэмӆан ун воша утаӆтаты сонтамасат — айкеӆ вераты.
Ин газет тумпийн айкеӆат «ВКонтакте» па «Одноклассники» хоща ӆуӊатты рахӆат. Щитат мохты нын верытӆаты ясаӊ верты. Щий поныӆыты айкеӆӆув мохты муӊ мирэв па уӆапсаев эӆты аршак мир уятты питас, аршак хорамаӊ хор умащӆыты питас.
Кашӊ хоятэма вутщиӆам пумащипа ясаӊ китты. Нын онтасанан ханты мир ясӊев, уӆапсаев ант хурӆаӆ па еӆӆы Ас йиӊк иты овты питаӆ. Тумтак ёшна, тумтак курна щащиӆув-овращӆув мийм умащ ясӊев еӆӆы туӆэв па шавиӆэв!
Аллина Тоярова ханшам потар
Авторы
Лух Авт
Темы