Лух Авт
Ханты арат арыты «Ёмвош ёх» группа
Там мосванан Ёмвошан уӆмем порайн, «Ёмвош ёх» группайн ханты арат арыты нэӊат пиӆан уйтантысам па потрэмисам. Арыты нэӊат кусяя Фаина Павловна Иштимирова (Костина) уӆ.
Хоты яха актасисат па арыты питсат потар тус: «Имоӆтыйн ма Людмила Тихоновна Гурьева пиӆан Нижневартовской района яӊхсаман. Сита кат таӆ йи пуш фестиваль манаӆ. Якты, арыты, вератты хоятат вантсув, жюри хося ӆоӊаӆман усман.
Муӊ кашӊ порайн сита арыты хоятат хуӆатӆув, туп Ёмвошан симась арыты группа ант тайӆув. Си арат ханты нэ уӆ. Людаем пеӆа ястаӆам, пора си манаӆ, мосаӊ нэӊат акатӆув па арыты питӆув.
Си пора эӆты ӆапат таӆа йис, хоты группаев тыйс, нийӆ нэ арыты яӊхаӆ. Ӆапат кат пуш уйтантыӆув. Ёмвош округ районатан манты емаӊ хатӆата яӊхӆув, вошан манты уйтантопсаята вохиӆыӆаюв. Округ вошата, куртата, хота вуӆы ёх па Ворӊа хатӆат манӆат, тутӆыӆаюв».
Аӊкем-асем уӆапса
Фаина Павловна рут ясӊаӆан ант потартаӆ, ёӆан иса русь ясаӊан. Сит эӆты айшукие ястас: «Асем охаль, аӊкем ханты нэ ус. Кутӆаӆан русь ясаӊан потарсаӊан. Сишан ма рут ясаӊӆам ант уятӆам. Аӊкем няӆъяӊкем таӆ леккар хотан рупитас. Асем колхозан. Уӆман сыс асем ханты ясӊаӆ утаӆтасӆы.
Аӊкем Ольга Ильинична Костина, охаль ясӊаӆ ант уятсаӆӆы. Шеӊк тус нэӊа ус. Шеӊк хорамаӊа ёнтасас. Ай пора эӆты аӊкеӆан утаӆтаса. Пенсияя манмаӆ юпийн, ма си порайн рут мир ёх каш верты хотан рупитсам, ернасат ёнтты мосас. Ӆув ястас, ма ёнтӆаӆӆам. Ма уӆмем сыс, нэмоӆты порайн ант вантсам, хоты ӆув ёнтасаӆ. Тата па, ӆув ай эвета ханты ернасат хоӆ ханшийн хораптасӆы. Ханты нэӊата щашкан сахат ёнтас. Ма тайты сохӆам ӆув иса ёнтсаӆӆы. Ма ернас кеман туп верытӆам. Сит па ям».
Рупатаеӆ
Куся нэӊиев Ванзеват вошан Сумат вош районан ус. Пулӊават вошан культпросвет училище 1980-мет таӆан якат якты специальность етшаптас. Рупатайӆ эӆты ясаӊ верас: «Няӆъяӊ моӆтас таӆ культура хуват рупитӆам. Полнават вошан рупитты питсам. Сяӆта Верхне-Казымской па Белоярской вошатан рупатаем тусэм. 1990-мет таӆат юпийн, шоши мир хоятат рут ясӊеӆан шеӊк ант потартсат, уӆапсаеӆ ёрэматы питсат. Ун кусяйт яха уйтынтымеӆан, ясаӊ версат, мир ёх каш верты хотат пуншты. Мет оӆаӊ симась таха Белоярской вошан ӆэсятса. Си порайн ма сита кусяя усам. Муй рупата мосас, иса версам. «Овас хорамат» хоттэӆ коллектив пиӆан яӊ таӆ рупитсам. 2002-мет таӆан Ёмвоша вохсайм. Си порайн «Хатӆ най» обско-угорской театр пуншса. Тохи яӊхты хоятат якты утаӆтасам. Ярхус таӆ рупитсам. Сиӆта народной творчество хота рупитты ёхатсам».
Рут ясӊем еӆӆы туӆэм
Ханты нэӊиев ӆапат таӆ сыс ханты ясаӊан арат арыман, ясӊат утаӆтас па айшукие потарты питас: «Оӆӊа ясаӊӆам ант тыйсат, ёвра мантсат. Си еӆпи ханты ясаӊан этты газета ӆуӊатмем порайн, нэмоӆты оша ант паятсам. Ин мосаӊ хоӆ ясӊат ант уятӆам, ӆуӊатты такан верытӆам.
Ма яха арат арыты нэӊӆама ун пумасипа ясаӊ ястаӆам. Муӊ иса яха, опет иты. Хун мосаӆ, иса ванан, мохты ёхтапӆат. Хой хув ант ёхтыӆыйӆ, марэмиӆув. Ма ӆувиӆаӆ хоӆ самаӊа тайӆаӆӆам».
Альбина Тырлина ханшам потар
Авторы
Лух Авт
Темы