Лух Авт
Хон Петра воша яӊхам ханты эвие
Ашкуӆайн яма утаӆтыты няврэмат, мойӆапса юкана, арсыр вошат вантты па уйтантопсаята тутӆыӆайт. Йи тамащ емаӊ хатӆ кашӊ таӆ Хон Петра вошан ӆэщатыӆа. Хон мувев хуват ихощъяӊмет класс «вет» па «няӆ» поса етшам няврэмата катра пора хорпи вурты паршаӊ катер этаӆтаӆа.
Ямал мувев эӆты эвет, похат ищи тохи яӊхсат. Хольмаӊ пеӆа кат няврэм кутан Ващъёханов курт эӆты йи ханты эвие ус. Щит Татьяна Петровна Озелова. Ащеӆ — Пётр Николаевич, «Ямалкомунэнерго» тахайн карты аймтты хоята уӆ. Аӊкеӆ — Людмила Валерьевна, ӆапка нэӊа рупитаӆ. Хуӆам няврэм тайӆаӊан, ӆув кутэӆан Татьяна мет ун.
Ашкуӆайн утаӆтымаӆан, ханты эвиев арсыр касапсайт, олимпиадайт па хоятата нётты верат хоща пиӆтащиӆыйс. Нэмоӆты порайн пуӊаӆан ант ӆойс. Аӊкеӆа-ащеӆа па апщиӆаӆа ищи иса нётас.
«Хун ма тамащ айкеӆан ёхатсайм, шеӊк аматсам. Кашӊ эви па пох нумасыйӆ вурты паршаӊ хоп ванттыя яӊхты. Туп щи кеша шеӊк ар юр утаӆтыты вера понты мосаӆ. Емаӊ хатӆ порайн муӊ Дворцовой площадь хоща хоӆыена акатсаюв. Хоят тэӆыя. Няврэмат ант ушты ураӊан, округ эӆты ёхтам эвет-похат пиӆан каматса ун хоят ус. Муӊ группаев эӆты ӆаваӆты нэӊа Кристина Викторовна Куртямова ус. Ӆув Пулӊават вошан ошаӊ няврэмат утаӆтыты центран рупитаӆ. Кашӊ хоят Нева ёхан хоща ванашак манты ӆаӊхаса. Ар хоят кутан лап ант тапаӆты ураӊан, муӊ тохи ант эсаӆсаюв, ёхан яма ныты паӆшак тахая тусаюв. Турам пеӆа хорам ольпаӊ тутат эсаӆсайт, хус иты верам соткем арат нови тутат эӆты актам хорат этаӆтасайт. Ар хоят потарты шув кутан, хорам арэт арыты сый яма щащас. Имоӆтыйн тутаӊ, вурты паршаӊ хоп муӊ ещаӆтэв щи этас. Ун, хорам, умащ вантты. Утаӆтыты няврэмат пиӆан рупитты хоятата ун пумащипа ясаӊ ястаты утщиӆам. Тамащ уйтантопса нэмоӆты порайн ант ёрэмаӆэм. Щита ма яӆап ӆухсат уйтсам, ям хоятат пиӆан пиӆтащсам. Щаль туп, ашкуӆайн утаӆтыты етшасам. Кум шитман, тамащ уйтантопсая, ма ӆуӆан ипуш па яӊхсам», — ихощъяӊмет класс етшам эви Татьяна Озелова ястас.
Хуӆамхощъяӊ няврэм па Москва воша тутӆысайт. Тохи Андрей Свалов яӊхас. Ӆув ищи Ващъёханов ашкуӆайн утаӆтыйс.
Ашкуӆайн утаӆтыты няврэмата ястаты утщиӆув, яма утаӆтыяты, яӆап вер верты аӆ паӆаты. Щи порайн, еӆӆы манты юшӆан кентат пуншатӆат, хува манӆат. Куш ай куртан, куш ун вошан утаӆтыӆты, хоят ӆув нэмаӆ еӆӆы ӆув щи туӆӆы.
Зоя Куртямова ханшам потар
Авторы
Лух Авт
Темы