Лух Авт
Хор ханшты, ёнтты, сэвты па па верат пеӆа самаӊ нэ
Щиты Виктория Владимировна Сызарова эӆты ястаты рахаӆ. Ӆув там ванан 50 таӆа йис, щишн ӆув пиӆэӆн уйтантысам, уӆапсайӆ па рупатайӆ эӆты инщассам.
Щи веран Виктория ӆув рутэӆ эӆты айкеӆ тус:
– Ма щирэмн, кашӊ хатнэху опращӆаӆ юр еӆӆы туӆ. Ма, ванты, ханты семьяйн сэма питсам, энамсам па уйтӆэм — опращӆам юраӊат усат. Ащем — Владимир Павлович Сызаров. Ханты мирэв ясаӊ щирн, там рут ёх йис тэӆн туса па сыяӊа арысат, щишн Сызаров опращнэм кат ясаӊ «щи арат» эӆты тыйс. Щи ханты рут Касум мув Хуӆӆор курт эӆты ус. Опращем Павел Петрович Сызаров 1908-мет таӆн сэма питас, Тукъякаӊ куртаӊ нэ Устинья Ксенофонтовна Себурова имия вусӆы. Ӆыв семьяеӆн ӆапат няврэм сэма питсат, туп ӆаварт ляль порайн мушат эӆты няӆ пошхиеӆаӆ антома йисат. Опращем сэмӆы питас, ляля ант вуса, 1947-мет таӆн хув паната шушмас. Щащем утща хащас, ӆаварт ус, юхат ӆув ищи сорма питас. Евгения опеӆ Владимир па Кирилл апщеӊаӆаӆ энмаӆтас.
Виктория — ма рутэм, ванты, аӊкеӆ Екатерина Ильинична Шульгин рут эӆты йиӆ. Асикеӆ Илья Филиппович Шульгин нэмаӆ курта маса, щиты Илья курт тыйс. Щи курт Ӆорвош район нум муван уӆ, щит Ямал па Югра мувӊан кимаӆн. Илья Филиппович ун па юраӊ икия ус, ляля вуратас, туп сам мушӆ ураӊан ант вуса, хуӆ па вой веӆпасӆаты хайса — уӆапсайӆ хуват иса порайн хуӆ план тэкнаптас.
Владимир Павлович па Екатерина Ильинична Сызаровӊан семьяйн хуӆам эви сэма питсат: Виктория, Тамара па Алёна. Икеӆ тутаӊ хопатн, имеӆ ай тохтура рупитсаӊан. Виктория еӆӆы потартаӆ:
– Игрим куртан сэма питсам. Щи порайн щита «Газпром» таха рупитас, щишн ям уӆапса ус — СССР мувев арсыр мират 25 щёрас хоят рупитман ус, кат ашкуӆа па па мосты тахайт усат. Ма хут таӆа ювмемн ашкуӆая мантсам, яма утаӆтысам, пионерской отряд кущая усам, иса порайн хор ханшты эви иты стенгазета версам. Рущ ясаӊ, литература, черчение, хорат ханшты па труд урокат мосман тайсам. Ашкуӆа тумпийн «Юннаты», арыты, хор ханшты, ёнтты, сэвты па па верата утаӆтыты яӊхсам.
14 таӆ ӆоватн Виктория Ёмвоша ёхтас па педучилищайн воспитателя утаӆтыяс. Еӆӆы 1994-мет таӆн имохты Топоӆ вош Д.И. Менделеев нэмпи пединститут «Художественная графика» факультетн утаӆтыты питас, нумаӆмасӆы:
– Николай Ефимович Богданец па Валентин Степанович Колычев — ма урӊема мет тынаӊ утаӆтаты хоятӊан. Ӆын эӆтана туса хорат ханшты утаӆтысам. Щи пора — щит щуняӊ пора, ар пиӆнэ тайты питсам. Топоӆ вошн икия мансам, щита Илья похем сэма питас, туп щаль — икем ушас, там пора унты ан уйтса.
Нэпекан, Виктория Сызарова Суматвоша вохса, щита культура хотн методиста рупитас. Еӆӆы, хатӆ сыс ай няврэмат тайты хотн воспитателя ус. Еӆӆы Игрим курта касӆас, щита ипуляӊ «Детско-юношеской центр» па искусства ашкуӆа хоща няврэмат хорат ханшты утаӆтас. Щи тумпийн Виктория Суматвош район дума депутат иты куртаӊ шоши мир нушайт туӊматас. Ӆув онтасаӆн Чуанели куртан няврэмат кеша щутщаты таха па Игрим хоща «Центр национальной культуры» тыйсаӊан. Интам пора унты куртаӊ мир ӆувеӆа ун пумащипа ястаӆат. Щита уӆмаӆн ӆув шукащты Степан пох энмаӆты вус.
Ёхи хащам таӆатн Виктория Владимировна Ёмвошн ус па шукащты няврэмат тайты хотн, округ творчества хотн па утаӆтаты вер туты институтн рупитас. Ин Ягуръях курта касӆас па щита уӆ. Илья похӆ лялясман ӆавартан мушмаӆса, ёхи китса. Ин Степан лялясӆ, щишн аӊкеӆ кашӊ хатӆ пойкащаӆ, ляль сорашак ат сохнаӆ па похӆ тумтака ёхи ат керӆаӆ.
Лув ванкутӆы Ёмвоша ёхтыӆыйӆ, муӊ соӆтанӆув кеша хошам ӆуматсохат ёнтаӆ. Виктория — ханты ими иты ёнтты, сэвты, сак каратты па па верат еӆӆы туӆ, ёӆн ханты мир ӆуматсохат ёнтаӆ, вайт сэваӆ па сак эӆты арсыр хорамаӊ сак кеӆат каратӆ.
Виктория Владимировна, наӊ нуптэн 50 таӆа йис! Тамхатӆ наӊена ар хошам ясаӊ китӆув. Наӊ шоши мир кеша ар ям вер версан, щишн ун пумащипа ястаӆув! Еӆӆы хув йис, хув нупат тумтака щуняӊа-пищаӊа уӆа! Еӆӆы ищиты щи рут мирэн кеша ям верат вера!
Людмила Шульгина ханшам потар
Авторы
Лух Авт
Темы