Лух Авт
Юх эӆты ун пормасат вераӆ
Наталья Сергеевна Талигина верам рупатайӆаӆ антом туп округеван, хон мувеван па па муватан уятӆайт. «Дом ремёсел» хотан хус моӆтас таӆ рупитаӆ. Ӆув ар пелак ун рупатайт вераӆ, юх эӆты ӆувиӆаӆ эватаӆ, бензопила па па пормасат пиӆан рупитаӆ.
Кашӊ ӆуӊ Наталья Сергеевна парковой скульптура фестивалян касаӆ. Кат метра эӆты хут метра унты юхат эӆты хорат эватаӆ. Рупатайӆаӆ хоятат ураӊан ӆэсятты камн каш манты харатан па хоятат сютсяты тахайн шияӆаты рахаӆ. Ин па, рупитты тахаеӆан ун юх шупат оӆсат, ун экспозиция вераӆ.
Рупатаеӆ эӆты ситы ястас: «Муӊ кашӊ порайн вошеван, округеван, хон мувеван манты емаӊ хатӆатан, фестивалятан пиӆтасьӆув. Яӆпа ёхтам таӆ — ӆов таӆа ӆуӊтасаӆ. Сишан сютсяты хатӆатан вератты ёхтыӆыты няврэмат пиӆан нялэт версув. Нялы хося ӆов ох эватсув. Хоӆна, хой ӆытса «Вуӆы таӆ унтан» панно ӆэсятас.
Хасям таӆан Томск воша «Ӆайм емаӊ хатӆа» яӊхсам, «Мойпар па амп» скульптура ӆэсятсам. Ин Госзаказ сирн «Мойпар па макла» ун скульптура эватӆам. Рупатайӆам монсят хуват, моӆты сюжет вантман тыйӆат, хон мувата яӊхты вантопсайн моӆты номпса ёхатаӆ, шоши мир ёх уӆапса альӆам».
Ханты тус нэӊийиӆам мет ям ясаӊан ястаӆӆам: тумтака уӆатан, хоттэӆ хоятӆын, няврэмӆын Тураман ат шавиӆайт, Яӆап таӆан яӆап рупатайт ат тыйӆат, ханты уӆапсаев еӆӆы туваӆан. Тумтак ёш па тумтак кур!
Альбина Тырлина ханшам потар
Авторы
Лух Авт
Темы