обновлено: 13:25, 30 июня 2026
Лух Авт
Каӆаӊата портун понты пора ёхтас
Хащам ӆапат щутщаты хатӆатан «Горковское» сельскозяйственной предприятие хоща каӆаӊ тащат ӆуӊатты питсайт па щи тумпийн портунан ӆощӆайт. Щи кеша нэман рупитты хоятат Ӆорвош район филиал «Окружной центр ветеринарии» эӆты ёхатсат. Ӆув щита яӊкем хатӆ сыс няӆ каӆаӊ тащ пиӆан рупитты питӆат.
«Горковское» сельскозяйственной предприятие хоща няӆ каӆаӊ тащ уӆ. Аратаӆ хут щёрс кем каӆаӊ шавиман тайӆайт. Ин, товийн сэма питам суюват пиӆан хоӆна аршак питаӆ. Кашӊ каӆаӊ ӆуӊатты па «сибирской язва» муш эӆты хурыман, портунан понты мосаӆ. Щи тумпийн ин каӆаӊ паӆа «бирка» нэмпи пос понӆа. Щимащ пос сахат рахаӆ артаӆаты, маты каӆаӊ хой пеӆа ӆунтасман уӆ.
– Муӊ ты рупитты Мужи вош эӆты китсаюв. Ма — ветеринарной фельдшер, па Павел Ануфриев — ветеринарной врач. Муӊев зоотехник Руслан Нева нётаӆ. Ӆув там тащӆаӆ хоща рупитаӆ, щишан шоши хоятӆаӆ ӆуӊ сыс ӆойты тахайт уятаӆ, — арсыр войт яммаӆтыты леккар ху Дмитрий Рохтымов ястас. — Муӊ патан мосты портунат акатсув па Ӆапатнаӊк воша ёхатсув. Щита ӆаваӆсаюв. Ай трэкол юкан машиная ӆэӆтассув па етна пелка Кев пеӆа этсув. Манты юшев Кев ӆыпи карты юш пуӊаӆта Саран мува манаӆ. Щиты муӊ 2-мет таща ёхатсув, хота Константин Серасхов бригадира уӆ. Ӆойӆтыты пушасаӆ ӆэщатам антом ус. Щишан муӊ еӆӆы мантсув па 3-мет таща ёхатсув. Щи тащан Николай Максаров бригадира понман уӆ. Ӆув хощаеӆ вошамӆаӆ ӆэщатман усат. Ар хоятан ӆойӆтыты хар, кораль иты, сора версэв. Кимет хатаӆан, аӆаӊ эӆты, тащэв ӆоӊаӆсэв.
Ӆоӊаӆтам тащэӆ ӆуӊатсэӆ — тампуш ветсот моӆтас суюв луӊ уӆты мува ёхатмеӆ. Кашӊ ӆуӊтам вой «сибирской язва» нэмпи муш эӆты вакцинайн понтса. Шоши войт ищи щимащ портунан ӆонщсайт па паӆӆаӆ посн версайт. Щи щирн ӆув таӆ пора ёхаттыйн хорасты тахая маты каӆаӊӆаӆ сорашак нэпек щиран ӆэщатӆайт па щи сахат ох митаӆылӆа. Каӆаӊ тумпийн, хотан уӆты ампат ищи «бешенство» муш эӆты уколатан ӆощсайт па суӆ-войт эӆты портунан ӆапатсайт.
Хуӆмет тащан рупитты етшам юпийн, леккарат няӆмет тащ пеӆа мантсат. Щита ищи калаӊ тащ ӆуӊатсэӆ па войӆаӆ портунан понтсаӆӆаӆ. Там ӆапатан оӆаӊмет таща яӊхӆат. Кимет ӆапатан па хащам тащан рупитты питлат.
Иван Сандрин ханшам потар
