Лух Авт
Леккара рупитты ханты эви
Округеван там таӆ яммаӆтыты па тумтака уӆты Таӆа постаман уӆ. Таӆ сыс яӆап леккар хотат омасты, яӆап пормасат ӆутты питӆайт. Няврэмат яммаӆтыты ураӊан яӆап касты тахайт пуншӆайт, уйтантопсайт, фестивалят, касапсайт, нётапса акцияйт верӆайт, рупитты ёх утаӆтаӆайт.
Кашӊ таӆ хон мув регионат эӆты округ вошата па куртата леккарат рупитты вохӆайт. Ӆув кутэӆан ар веӆси рупитты питсям энамты ёх. Округ леккар хотатан шоши мир рупитты ёх шияӆаты па рахаӆ. Там лопасан Пулӊават вошан рупитты ханты эви Злата Антоновна Теткина эӆты потрэм туӆэм.
Хоты рупатая уса
Злата Пулӊават вошан уӆ, округ леккар хотан фельдшера рупитаӆ. Веӆси грипп хонсяпсайн кашаӊа йиты хоятат пиӆан оӆаӊ приём туӆ. Хоты рупитты питас, ясаӊ верас: «Ма Харсойман энампсам. Куртаӊ ашкуӆайн ихосьяӊ класс унты утаӆтысам. 2020-мет таӆан Пулӊават вош многопрофильной колледжа утаӆтыты ёхатсам. 2024-мет таӆан «Лечебной дело» специальность хуват етшаптасам. Фельдшера утаӆтыйм няврэмат, утаӆтыты етшаты юпийн, мохты рупатая вуты верытӆайт. Там йис шоши мир ёх эвета-похата рупата ӆаварт уятты, шеӊк ант вуӆайт.
Няӆ таӆ сыс терапия урок Ирина Петровна Кныш тус. Ӆув Пулӊават вош леккар хотан терапевта рупитаӆ. Социальной сеть хося уӆты группайн ясаӊ верас. Фельдшера йи хоят мосмитас. Ма мохты телефон хуват инщассэм. Кимет хатаӆан леккар хота ёхатты парсайм. Хун тохи ёхатсам, ма пиӆэман утаӆтыты эви сита па шияӆасам. Ӆув па ӆавӆасас. Куся нэӊев ма пиӆэман потрэмийс, ястас, ӆавӆаса, телефон хуват ясаӊ верӆув. Хуӆам хатӆ хасяс, айкеӆан ёхатсайм, неотложной помощь кабинета кат хоят мосмитаӆ. Ситы рупатая вусайман».
Хуӆ веӆпасӆаты хоттэӆ эӆты
Ханты эвиев аӊкеӆ-асеӆ хуӆ веӆты хоятӊан. Хоттэӆ мохиӆаӆ эӆты ситы ястас: «Муӊ семьяев ун. Аӊкем-асем нийӆ няврэм тайӆаӊан: ӆапат эви, йи пох. Аӊкем — Светлана Михайловна Теткина (Падранхасова). Асем — Антон Семёнович Теткин. Ма кат опи па яй тайӆам. Па отӆам айшакат. Кат апсем Пулӊават вош колледжан «Пожарное дело» специальность хуват утаӆтыӆӊан. Йи апсем яртъяӊмет класса яӊхаӆ, кимет отэм — ӆапатмет классан утаӆтыйӆ. Семьяеван леккарат антомат, ма утся.
Аӊкем-асем Каменка куртан, Харсойм пуӊаӆан, хуӆ веӆпасӆаман уӆӆаӊан. Ас нопатты тыӆасян тохи манӆаӊан, Ас потты тыӆасян туп Харсойма ёхатӆаӊан. Таӆан-товийн куртан сютсяӆӊан».
Оӆаӊ рупитты порайӆ
Злата пиӆнэӊаӆ пиӆан рупатая вусайӊан. Яха рупитӆаӊан, йи хотан уӆӆаӊан. Оӆаӊ рупитты порайӆ эӆты па айшукие потар тус: «Рупатая вуймем юпийн, катӆэм ӆапат стажировкая яӊхсам, терапевт кабинетан омассам, сита нётсам. Си юпийн, воӆаӊ леккар хотан веӆси кашаӊа йиты хоятат пиӆан рупитты питсам. Пиӆнэӊем пиӆан ситы таӆаӊ таӆ рупитсаман.
Ин кусы ӆарыты сирн рупитӆув. Йи ӆапат кашаӊа йиты хоятат хося ёхи яӊхӆув. Хун мушаӊ хоят ар, 11.00 сёс эӆты 13.00 сёс унты вызован рупитӆам. Кум тайман мушаӊ ёх нэмӆаӆ, уӆты тахайӆаӆ компьютер ӆыпия ханшӆаӆӆам. Сяӆта па вет сёс унты мушаӊ хоятат хося яӊхӆам. Кимет ӆапат Артеева вошхулы леккар хотан, первичной приём туӆам. Хуӆмет ӆапат — воӆаӊ леккар хотан. Ситы рупатаем манаӆ».
Муй мет ӆаварт ус
Леккара рупитты эвиев рупатайӆ мосмаӊа тайӆаӆӆы: «Оӆаӊ порайн шеӊк ӆаварт рупитты ус. Оӆаӊ хатӆэм шеӊк яма нумӆэм. Паӆтап ус. Хоты хоятат пиӆан потрэмиты, программа пиӆан рупитты, ант хошсам. Муй хорпи диагноз понты па муй хорпи леккара китты, ант уятсам.
Мет ӆаварт рупатаеман ус, хун кашаӊ хоята ёхи яӊхты мосас. Ант уятӆан, муй ӆаваӆты. Туӊа сира диагноз верты мосаӆ. Наӊ ясӊен, верэн эӆты, хоят уӆапса еӆӆы манаӆ.
Леккара заочной сирн утаӆтыты мосаӆ. Сикуш еӆӆы утаӆтыты утсиӆам, кум ант тайӆам, ох мосаӆ. Хой веӆси рупатая ёхатаӆ, туп сот сёрс соӆкувайн сохаптаӆа. Хуӆам тыӆась рупитӆан, охан сохаптаӆайн, заявление туп ханшты мосаӆ. Охӆан ки вуӆӆан, хуӆам таӆ йи тахайн рупитты мосаӆ».
Рупатаен самаӊа тайи
Ар пелак куртаӊ няврэмӆув Пулӊават вош колледжан леккар хотан рупитты хоятата утаӆтыӆат. Туп си рупата шеӊк яма уйтты мосаӆ. Злата сита утаӆтыты эвета па похата каматса ясаӊ китас: «Сит шеӊк ӆаварт рупата. Фельдшера утаӆтыты няврэмӆува яма утаӆтыты па рупатаеӆ самаӊа тайты мосаӆ. Утаӆтыты манты еӆпийн, яма нумастыя. Кашаӊ хоят еӆӆы уӆапсайӆ, муӊ верты верэв эӆты манаӆ.
Ма пиӆэман шеӊк самаӊ, вещкат хоятат рупитӆат. Рупатаем эӆты вантман, ям хоятан ликапсайм. Ма ӆувиӆаӆа ям ясаӊ ястаты утсиӆам. Хун ӆаварт ус, нётсайм, муй ант уйтсам — альсайм».
Альбина Тырлина ханшам потар
Авторы
Лух Авт
Темы