Лух Авт
Муӊ нумӆэв…
Ӆорвошан, ун кер тыӆащ кимет ӆапат соханты хатаӆан, 70 моӆтас хоят ӆохан хухаӆты ӆойӆысат. Щи касапса, нэман, Антон Антонович Рохтымов шуӊат кащтыты ураӊна ӆэщатыса. Ӆув СВО ляль хоща соӆтана ус. Ӆыӆӊат уӆмаӆн шеӊк самаӊа ӆохан хухатӆыйс.
Антон Рохтымов, 3-мет хатаӆан Ас потты тыӆащ 1989-мет таӆн, Ӆорвошан сэма питас. Щи куртаӆан ус па энмас. Ӆорвош ашкуӆа 11-мет класс унты утаӆтыйс. Ӆув ай пора эӆты апраӊ па каркам няврэма ус.
Ащеӆан касты тахаята патан иса тутӆыса. Щиты ӆув, оӆаӊ классат эӆты па ашкуӆа етшаптаты унты, арсыр касапсаята яӊхас. Кашӊ таӆ, ашкуӆа эӆты район па округ ӆовата касты китыӆыса. Хой порайн Ямал мувев эӆты па мувата яӊхас. Яма касты ураӊна, 2007-мет таӆн, Ӆорвош район апраӊ энамты ёх кутан «Любительской спорт» номинацияйн нох питас. Касапса тумпина ӆув арыты па якты каш верты лотата ищи яӊхиӆыйс.
– Няврэмӆам кутан, Антон оӆаӊ па мет ун похием. Ӆув манэм шеӊк яма нётас, апщиӆаӆ эӆты вантман хащиӆыйс. Щутщаты хатӆатан муӊ, ийикем шуӊат па похӆам пиӆан иса унта яӊхиӆысув. Щита шай йинщсув, ӆэтот кавартысув па касапсаята ӆэщатысув. Похӆам ар ӆухас тайӆат, ӆув ищи муӊ хощаев мойӊа ёхтыӆыӆат, — антеӆ, Людмила Тимофеевна Рохтымова, ястаӆ. — Ӆуӊ сыс унтан рых па толах актыӆысув. Ин утӆам щиран похӆам хоӆна щи унта яӊхӆат, хуӆ веӆӆат, вой туӆат. Ма нумастэман, мин няврэмӆаман яма энмаӆсаман.
Ашкуӆа етшам юпийн, еӆӆы утаӆтыты номас понман, Антон Пулӊавта манас. Ӆув щита Ямальской многопрофильной колледж хоща тутаӊ хопат сэвс тайты хоята утаӆтыйс. Щи утаӆтыйм щираӆ щирн еӆӆы рупитты питас. Кев сыӆ район Охсар вошан «КС» нэмпи тутаӊ хопан рупитас.
– Ун похием ашкуӆа етшам юпина мохты соӆтана тутӆыса. Северной Осетия мув Моздок нэмпи вош хоща 2008-2009-мет таӆатан ус. Отделения хоща командира поныӆыса. Младший сержант нэм тайман ёхи ёхтас, — Людмила Рохтымова потартаӆ. — Ин хун СВО нэмпи ляль айкеӆ этас, каркам похием нумасас па ищипа нэпек ханшас мувев аратыты ураӊна. Сусан 2024-мет таӆан манас, кат тыӆащ утаӆтыйс па ДНР «Атлант» нэмпи 3-мет мотострелковой бригада хоща китса.
Ван хатӆап тыӆащ 29-мет хатаӆан 2024-мет таӆан, Донецкой Народной Республика Красноармейской район Пустынка нэмпи вош аратыман, соӆтанэв мушмаӆса па антома йис.
Антон Рохтымов хуӆам похаӆ — Фёдор, Илья, Севастьян — ищи каркама энамӆат. Похӆаӆ нэм оӆаӊ буквайт эӆты «ФИС» позывной ӆувеӆ юкантас. Антон Антонович ӆув похӆаӆ ӆыпийн еӆӆы уӆ, еӆӆы ӆохан хухатӆыман касаӆ… Ӆув куртаӊ хоятӆаӆан нумӆа. Таӆта еӆӆы, ӆув урӊаӆа юкантам касапса кашӊ таӆ ӆэщатты питӆа. Муӊ па ищи нумӆэв па ант ёрэмаӆэв…
Иван Сандрин ханшам потар
Авторы
Лух Авт
Темы