Лух Авт
Мув ӆыпи сорнет яма уйтаӆ
Там ӆапат ох хатаӆна, ун кер тыӆащ 5-мет хатаӆна, мув ӆыпи сорнет пиӆн рупитты ёх «День геолога» нэмпи емаӊ хатӆ 60 пуш постаты питӆа. Щимащ тахайна рупитты па рупитам ошаӊ шоши ханты хоятат ищи тайӆув. Потар шупевн Валерий Возелов эӆты ясаӊ понӆув.
Валерий Григорьевич Возелов — «Заслуженный геолог Российской Федерации» хон мувев ӆоватна. Щимащ ун нэм, ай кер тыӆащ 2016 таӆн хон мувев ӆаӊкар ху Владимир Путин, ӆувеӆ юкантас.
Валерий Возелов, Ӆорвош район Ун емаӊ ӆор пуӊаӆна вуӆы хотна, ван хатӆап тыӆащ 16 хатаӆ 1955 таӆна сэма питас. Антеӆ-ащеӆ вуӆы тащ тайсатан па вой-хуӆ веӆпасӆаман вусӊан. Щишна щи ай пора эӆты Валерий хуӆ веӆты пеӆа самаӊ.
«Ма опращӆам Хон-рут эӆты манӆат, Озеловат опращ нэм тайсат. Ащем потыртыйс, хуӆам пох устан: Хон-Васька, Хон-Ульку па Хон-Ванька. Ӆув ар вуӆы тащ таймеӆ. Щаӆта, хун Советской ласть ёхатӆ, ӆув тащӆаӆ лакки ортты питӆаят па Хон-Васька века туӆа, туп кат похӊаӆаӆ, Хон-Мишка па Хон-Микуль хащӆатан. Пуӊӆа хотӆатан па опращ нэмӆ хоща йи буква «В» понӆат. Опращ нэмев Возеловата йиӆ. Щиӆта щи муӊ еӆӆы уӆӆув, — Валерий Григорьевич ястаӆ. — Щаӆта айнайн вуӆы тащев воӆӆы нушая йиты питас.
Ашкуӆайна ма Джек Лондон ханшам нэпек «Золотая лихорадка» ӆуӊатсэм па нумасты питсам, мосаӊ муӊ мувев ищи сорнет тайӆ. Щишна номас понтсам геолога утаӆтыты. Ащемна щикуш ант эсӆысаям, ищипа утаӆтыты мантсам».
Ӆув Ӆорвош ашкуӆая 1963 таӆн туса. Ашкуӆа етшам юпийн, 1974 таӆн ӆув мохты ун тахая утаӆтыты манас. Тюменской индустриальной институт геологоразведочной факультет хоща нэпекӆаӆ масӆы па мохты тохи вуса. Щита вет таӆ утаӆтыйс, диплом горного инженера ёша павтас па 1979-мет таӆн Катра Уренгой нэмпи воша ёхтас. Щита Объединение «Уренгойнефтегазгеология» хоща рупитты ӆоӊаӆ. Щаӆта щи пора эӆты Валерий Возелов Северо-Уренгойской мув ӆыпи сорнет каншты тахайн геолога рупитас. Еӆӆы па ӆув ЗАО «Нортгаз» хоща ар таӆ мастера по исследованию скважин вус. Щиӆта ӆув 2016 таӆн щутщаты пенсиияя этаӆ.
Аратӆ ӆув няӆъяӊ пеӆа ӆапат таӆ рупатайӆ самаӊа версаӆы па тусӆы. Рупитмаӆ хуват мув ӆыпи ун сорнет оӆты тахаят каншман па пуншман нётас: Уренгойское, Ен-Яхинское, Южно-Пырейное, Утреннее, Гыданское, Бованенковское, Харасавэйское, Тамбейское па Новопортовское.
Ӆын ийимеӆ, Надежда Михайловна Талигина пиӆна, кат пох энмаӆсаӊан. Щит Ярослав Талигин па Михаил Возелов. Няврэмӆаӆ уна йисат, ун тахаян утаӆтысат, ин па ӆув хоттэӆат тайӆат па няврэмийӆаӆ энмаӆӆат.
Ин ӆув щутщаман пенсияян шоши Унтсыӆкуртаӆан уӆ, каш верӆ па ӆэты кем арат хуӆ мощатыйӆ. Щутщаты хатӆата, порайн, ӆув хощайӆ няврэмӆаӆ па хиӆыӆаӆ ёхтыӆыӆат.
Валерий Григорьевич ястаӆ: «Интам муӊ мувевн мув ӆыпийн уӆты сорнет каншты шимаӆ шоши хоят уӆ, иса па муват эӆты ёхтам ёх рупитӆат. Ма ӆаӊхаӆайм энамты хоятата ястаты, ат ӆуӆн ӆув щи вера ат утаӆтыӆат. Овас мувев — щит муӊ мувев. Муӊев мосӆат рут мувевн мув ӆыпи сорнет кашты па мувев сыстама тайты хоятат».
Иван Сандрин ханшам потар
Авторы
Лух Авт
Темы