Лух Авт
Ниӆсатмет чумовой капитал хантэт эӆты питас
Там ванан Ямал мув губернатор Дмитрий Артюхов Кев сыӆ хантэт хоща ёхтыӆыяс, Вэненго хаттэӆна. Щита масты вер сахат яӊхас, Дмитрий па Дарья энамты хаттэӆ эӆты ниӆсатмет чумовой капитал мас.
Туняӆ ай тахайт потты тыӆащна ӆын кимет нявреман сэмна питас — эви, Василиса нэмна масӆан. Вуӆ йикан Кирилл, тампус кат таӆаӆӆы йиӆ. Итта ӆув Дмитрий ащи па амы — Юрий Дмитриевич па Алекандра Николаевна пиӆна йи хатна оллат.
«Россия хон мув хуват ки вантман, Ямал мув няврем сэмна питта тахайна алӊищ ол. Сэӊк ям, хонты энамты хаттэӆатна мет ар няврем сэмна питаӆ. Муӊ региону ораӊна сэӊк вуӆ вер, шоши мир нэӊхэт олапсэӆ, щирӆаӆ-пищӆаӆ савиман тайтэӆ ораӊна. Кат молтас таӆӆы щи йис, хоты ма там хаттэӆна майӆата яӊхмем, щи порайна Дмитрий па Дарья веӆащ яха олта питсаӊан, тамхатӆ па мули кат няврем тайӆаӊан. Ма номастэмна, щиран хат тайта питтан юпина, хаттэӆан холна па энмаӆ. Масӆ, вутн яӊхты энамты хаттэӆат халэват хатӆэӆна так курна ат лайӆат», — Ямал мув губернатор Дмитрий Артюхов лавас.
Ор хатна йи пасан сыӆна амасман, губернатор па касӆыман яӊхты мур йиӆап нятапсэт па Ямал мувна савиман тайты щират-пищат пуӆяӊ потарсат. Там ванан каӆаӊаӊ нэӊхэт партонаӊ ӆаращатна мата питсайт. Щит, па па мета маса мерайт Овс мув нэӊхэт олапсы конны верты план хоща лоӊаӆсайт, щи план Ямал мувна йи таӆ мули ропытаӆ.
Вутн яӊхты энамты хаттэӆат олапсы конны верты ораӊна — чумовой капитал верса — щит Ямал мув губернатор Дмитрий Артюхов 2021-мет таӆна ӆэщатам нятапсы. Йи хаттэӆ ораӊна маты ор хат тэӆ хоща тамащ пормасат лоӊӆат: олат, парщин па нюки ӆаӊкпат, кор, сахлат па пормас таӆлиты охлат. Йи щимащ хаттэӆ тынаӆ ветсат щёрас молтас. 2025-мет таӆ эваӆт чумовой капитал кимет няврем сэмна питтаӆ итна мата питса (щи алаӊна холмет няврем сэмна питам юпина мийӆыса), щи онтасна мет ар энамты хаттэӆ щираӆ хатна касаӆта веритаӆ. Ай тахайт потты тыӆащ 2023-мет таӆ эваӆт чумовой капитал ясна пайтты вер конамса: 180 хатӆ сыс мийман ол, яс эваӆт хансам доверенность хуват па хаттэӆ мохыӆаӆна вута па веритӆа.
Чумовой капитал хоща лоӊты пормасат верты ораӊна муниципальной предприятияйт, общинайт па ёра вер тайты нэӊхэт ропытӆат, ар пелак пормас ясна йинтӆат. Щи онтасна, шоши мир нэӊхэт ропата тайӆат: каӆаӊ сох ӆэптамӆат па нюкет йинтӆат, ол па охлат верӆат. Тамхатӆ щита 130 молтас тус ясаӊ нэӊху ропытаӆ.
Вера Лонгортова хансам потар
Авторы
Лух Авт
Темы