Лух Авт
Охсар похална мет сыйӊ емаӊ хатӆ манас
Охсар похална каӆаӊаӊ нэӊхэт емаӊ хатӆ манас. Щита ӆув Ямал мув хуват манты каӆаӊаӊ нэӊхэт емаӊ хатӆат ки вуйман мет сыйӊтат манаӆ. Касӊ таӆ мур тэӆ нэӊху Ас сыӆна актащӆат.
Мет алаӊна каӆаӊ охлаӊ анас манас, ӆув Воӆаӊ Ляль пеӆа китты нятапсы хор версат, хоты карра каӆаӊ охална ляль пеӆа нёха, хуӆ, консервайт, вай сохат, масайт па вайт тусайт итта ищиты понтсат. Щиты, Воӆаӊ Ляльна парам нэӊхэт номлатсайт.
Майӆата ёхтам нэӊхэт ораӊна пормас савиты хатна ропыттытат йи корӆуӊкӆы верты каӆаӊ охал акатты мастер-класс версат, ӆув ветеранат, ляль порайна ропытам нэӊхэт эӆты постаса.
«Муӊ каӆаӊӆу Воӆаӊ Ляльна нох питты ораӊна сэӊк вуӆ вклад версат. Хонты кепа каӆаӊат онтасна Мурманск вас фашистатна вута ант веритса», — Охсар похал пормас савиты хатна ропытты Гаврил Лаптандер лавас.
Каӆаӊаӊ нэӊхэт манам хатӆна хатӆаӆ сэӊк ям ос, най, хасам, щи онтасна касты харат ямас мантсат: юх таӆсат, охал соппы наварсат, тынщаӊ явалсат, савлантсат па каӆаӊ охална навраӆтысат.
Каӆаӊаӊ нэӊхэт ораӊна там тампус ялта хыщам емаӊ хатӆ ос. Итта ӆув ӆуӊ лайты тахайӆаӆна манта питӆат.
Вера Лонгортова хансам потар
Авторы
Лух Авт
Темы