обновлено: 06:44, 14 июля 2026
Лух Авт
Ӆапат емаӊ тор вой туса
Тор войт йис тэӆан Ӆорвош район муван тыхаӆӆаӆ верыӆыӆат. Хантэтан щи вой емаӊа тайӆа. Ӆув пеӆаел пойкащӆа па кетамты ант эсаӆӆа. Мир ӆоватан щи тохӆаӊ войт шимӆа йисат, щишан «Вурты нэпек» хоща ханшман уӆӆат. Ин хоятатан нэман энмаӆты питсайт.
Ущ тыӆащ 24-мет хатаӆан Ӆорвош район Кунават мува ӆапат тор вой пошах туса. Щита ӆув унт ӆыпийн уӆты кал лотата эсаӆсайт. Оӆаӊ сыс ӆув каматса хатӆ вошам эӆты ӆэщатам кораль ӆыпийн усат, еша утаӆсат.
– Кат нэ вой па вет ху тор пошхат кимет хатаӆан ким эсаӆсаӆӆув па ӆув верӆаӆ сахат самеӊ кал лотат кутан ӆэвман шушиӆыты мантсат. Уӆты мувеӆ вантыман яӊхты питсат, — ЯНАО департаментан природной ресурсат па экология хоща рупитты ху Дмитрий Замятин ястас. — Ӆув хоӆна анта шеӊк унат, веӆщи кат таӆ ӆовата йисат. Вет-ӆапат таӆ ӆоватан пошхат туты питӆат. Там емаӊ войт хув уӆӆат, хойтат ветъяӊ таӆ унты. Щишан нумасӆам, ты эсӆам торӆув ёхӆы ищипа ёхтыӆыты питӆат па тата тыхаӆӆаӆ верӆат.
Щи ӆапат пошхат Рязанской область Окской нэмпи заповедникан сэма питсат. Сэма питтыйн, пунӆаӆ охсар хорпи вуртэт. Энамтыйн, айнайн пунӆаӆ новия йиты питӆат па тохаӆ тайӆаӆ питыя йиӆат.
Мет оӆӊа тор пошхат 2009-мет таӆан эсӆысайт. Щаӆта па 2012-мет таӆан. Хон мувев куща ху Владимир Путин тор войт пиӆан Кунават мув хуват пурӆыман яӊхас. Хащам пуш 2019-мет таӆан каматса пошах тутӆыса. Аратаӆ Кунаватской заказник хоща хоӆмаӊ пеӆа хуӆам тор вой пошхат эсаӆман уӆӆат. Еӆӆы па 2031-мет таӆ унты там муван 50-кем тор войт эсаӆты артаӆаӆат.
