обновлено: 10:51, 02 июля 2026
Лух Авт
Овс мув нэӊат кимет уйтантопса
Там ӆапатан «Россия» нэмпи национальной центран Овс мув нэӊат ураӊан кимет форум рупитас. Тамащ уйтантопса хуӆам таӆ кут йи пуш верӆа. Мет оӆаӊ отаӆ Хон Петра вошан манас. Тампуш Овс мув сыӆ муват эӆты ёхтам нэӊат Хон мувев воӆаӊ вошан ияха актащсат.
Хольмаӊ пеӆа нийӆ Овс мув Щёпр па Хаӆэват Пелак регион эӆты, ӆоватаӆан нийӆсот шимӆаӊ рут мир нэ уйтантопсая ёхтыӆыйс. Ӆув кутэӆан леккарат, арсыр тахаятан рупитты кущайт, няврэмат утаӆтыты, ёра рупата туты па вуӆы хотан касаӆман яӊхты нэӊат усат. Там йисан Тихоокеанской, Северной па Балтийской щарсатан мув сыӆӆув щавиман рупитты ёх нэӊӆаӆ там уйтантопсая ищи вохиӆысайт.
Оӆаӊмет форум манам порайн, шимӆаӊ мир хоятата мосты па уӆапсаев кентат верты арсыр яӆап нётапса верат рупатая вуйман усат. Хоятат яммаӆтыты, няврэмат утаӆтаты па вуӆы хотатан касаӆман яӊхты нэӊат эӆты потар манас.
Уйтантопсайн потартса, хоты еӆпи рупатая вуйм нётапсайт рупитӆат, муй щиран еӆӆы манты верат ям щира ӆарпиӆасат па маты верат хоӆна туӊматты мосӆат. Ты ёхтам нэӊат ещаӆт Янна Архиповна Кондыгина вуӆы хотан уӆты уӆапсайӆ эӆты потар тус. Щит эӆты, еӆӆы этты газет номеран ӆуӊтаӆн.
«Овс мув ямашак ӆэщатты вер эӆты потар тутэван, иса номасан тайты мосаӆ — щит, мет оӆӊа, йис пора эӆты щита уӆты рут мир хоятат. Маты отат шоши мувеӆан уӆӆат па ищки, ерт, пеӆӊа кутан касаӆман па веӆпасӆаман рупитӆат. Катра пора уӆапсаеӆ па ӆув рут мир ясӊеӆ ин там хатӆат унты шависэӆ па еӆӆы туӆэӆ.
Еӊта пасан суратан номпса понам потрат, торӆыя закон щиран нэпека ӆэщатты мосӆат. Щи порайн, хоят рупата хуват сайӆаман уӆты питаӆ па верты вераӆ ям пеӆа ямпсыена еӆӆы нёхӆаӆ.
Нумастэман, там кимет форуман, хоят уӆапса яммаӆтыты ураӊан ар партапса ястаса, маты отат щаха рупатая вуӆайт», — Евразийской Совет нэӊат форум куща нэ па сенатор Галина Карелова ястас.
Там уйтантопсаев Хон мувев ӆоватан арсыр рут хоятат ияха пиӆаӊа уӆты Таӆа постаман уӆ. Таӆ сыс хоӆна ар тахаятан щи таӆа постам уйтантопсайт ӆэщатӆайт па верты питӆайт.
Автор: Зоя Куртямова ханшам потар
