Лух Авт
Овс мув ветмет касты па юращты ёнтопсайт
Там ванан Ямал мувеван Овс мув ветмет касты па юращты ёнтопсайт мантсат. Шоши мувев сборной командая лоӊам няврэмат тамащ касапса харан няӆмет пуш оӆаӊ местая этсат. Ёмвош округ — кимет, хуӆмет места па Красноярской край.
Овас мувата ӆуӊтасты яӊ регион эӆты касапсая ветсот ветъяӊ энамты няврэм ёхтыӆыйс. Оӆаӊ таӆ касапса верам порайн сот моӆтас хоят туп ус.
Касапса манты вет хатӆ сыс эвет-похат ӆохан хухатӆысат, ӆохан хухаӆты кут пошкан эсаӆсат, катӆантыман юращсат, фигурной катание этаӆтасат, настольной теннисан па волейболан ёнтсат.
Овас мув многоборье касапса ищи тохи ӆоӊаӆман уӆ. Щит эӆты ма Денис Сергеевич Лонгортов пиӆан потрэмисам. Ӆув няврэмат касапса вер пеӆа утаӆтаман, Пулӊават вошан, окружной спортивной ашкуӆайн рупитаӆ.
«Еӆпи Арктической ёнтопсайт па Хон мув сыӆан усат. Ма ашкуӆайн утаӆтымем порайн Канада мува касты яӊхсув. Ин мув сыӆ юшат лап пентсайт па муӊ округев ротая Ямал мувеван тамащ ёнтопсайт версат. Ветмет пуш манты касапсайн вет пуш усам. Оӆаӊ сыс касапсая тувам няврэмат пиӆан тренер щира ёхтыӆысам. Ин па Овас мув многоборье касапсайн нэпекат ханшман секретаря рупитсам. Касты няврэмат тынщаӊ па ӆайм ёваӆсат, ятапщи пиӆан хухатӆысат, ухаӆ шоппи па хуӆам пуш хой хувашак навармаӆ наварсат. Округ командаев оӆаӊ местая этас. Касты ёхӆув юраӊат, каркамат, апраӊат. Кимет тахайн Ёмвош округ, хуӆмет па Саран мув няврэмат.
Хащам ӆапатан па Овкурт эӆты Анжелика Лонгортова па Эвелина Пугурчина Южно-Сахалинск воша мантсаӊан. Щита 16–17-мет таӆ ӆоват няврэмат кутан первенство России по северному многоборью касапса манаӆ».
Тамащ касапса «Спорт России» па «Развитие физической культуры и спорта» программая ӆэщаӆаӆ. Министерство спорта Российской Федерации па ЯНАО касты па юращты верат туты департамент там касапса ӆэщатсэӆ.
Зоя Куртямова ханшам потар
Авторы
Лух Авт
Темы