Лух Авт
Пошкан нэпек шитсат
Тампуш яӆап таӆ эӆты вуӆэӊ па вой-хуӆ веӆпасӆаты хоятӆув кеша Ямал мувев ӆоватан яӆап нётапса этас. «Ямал-потомкам!» Ассоциация онтасан, пошкан нэпек ёша паватты ураӊна посатам охат, ёхӆы маӆайт.
Пошкан нэпекат туӊа-щира ӆэщатты вер эӆты хув тэӆн потартыса. Хой хоятат, щикуш пошкан тайӆат, хой пошканат опращӆаӆ эӆты хащсат па нэпек щирна ӆэщатман ант усат. Хой ёх пошкан ӆутты ӆытӆайт, туп щи ураӊна утаӆтыты яӊхты мосаӆ. Щимащ утаӆтыты лотат ун вошатан уӆӆат. Щи унты ищи ротая яӊхты мосаӆ. Щишн хоятат ияха акатӆайт па утаӆтыты китӆайт.
Щиты, мет оӆаӊна курк тыӆащан вуӆы тащ хотаӊ ёх Ямальской па Кев сыӆ районат эӆты Надым воша яӊхсат. Щита утаӆтасайт, хоты сахат пошкан тайты мосаӆ.
Утаӆтыты щир йи хатаӆна манаӆ. Оӆаӊ хатӆ шуп, ёх хуӆантӆат, хоты закон щирн пошкан тайты мосаӆ, хоты пошкан верман уӆ па муй щирн ӆувеӆ лосытты па акатты рахаӆ. Хатӆ кутоп юпийна ёхтам ёх нэман ӆэщатам тир нэмпи тахая яӊхсат. Щита ӆув каматса пошкан эӆты нёӆ эсаӆсат. Щи щирн вантӆа, хоты ёх орытты хошӆат.
– Муӊ Мужи эӆты Надым унты ун кер тыӆащ 5-мет хатаӆн мантсув. Кимет хатӆ аӆаӊ эӆты утаӆтысув. Етна пелка утаӆтыйм ураӊна, ёх свидетельство нэпекатан, масайт, — Ӆорвош район Администрация хоща рупитты ху Дмитрий Костин ястас. — Аратӆ Ӆорвош раойнэв эӆты 11 хоят яӊхас. Ӆув иса яма утаӆтысат па пошкан эӆты орытсат. Щаӆта атаӆан ёхӆы этсув па кимет хатаӆн ёхи ёхатсув.
Яӊхам ёх посатам охӆаӆ ёхӆы маӆайт. Щи кеша леккар, юш манты нэпек, атаӊ-хатӆ сыс уӆам па утаӆтыйм ураӊна сохаптыйм ох нэпекат иса ияха акатты мосӆат. Щаӆта «Ямал-потомкам!» Ассоциация хоща заявление ханшты мосаӆ па тохи актам нэпекат понты. Щи юпина посатам охат ёхӆы китӆайт.
Иван Сандрин ханшам потар
Авторы
Лух Авт
Темы