Лух Авт
Щёкат ропатайӆ ораӊна вуӆ нэмна юкантса
Ям айкеӆна ёхатсаю! Охсар похал хуӆ веӆты предприятие Харсойм курт рыбоучасток прибрежной лов хуӆ веӆты ху Сергей Перчеда «Заслуженной работник рыбного хозяйства РФ» почётной звание нэмна юкантса. Щимащ партапса нэпек Россия хон мув Президент Владимир Путин хансас.
Хуӆ веӆты тахайна Сергей Егорович мули ниӆъёӊ молтас таӆ ропытаӆ. Щи арат таӆ сыс щимащ щёкат ропата сэмӆаӆ лап тохарман верта веритӆаӆӆы.
Ропатайӆ сэӊк самаӊтат тайӆаӆӆы, итта, энамты нявремат онттаӆ, хуӆ веӆты пиӆӆаӆна холантман тайӆа. Щи арат таӆ сыс мойӆапсы па ишакты нэпекат тайӆ.
«Пон ласката хаста масӆ. Касӊ нэӊху пон ласкаты тахайӆна метка тайӆ, понӆ ӆэвасы тахайна ант ёхаттаӆ ораӊна. Напатман ниӆ привяз тайӆам, касӊ холамсат метра хуват. Товына, хонты оваӆ так, щёс молтас напатӆу, щиты айӆта оваӆ сус пеӆа аямтаӆна, кат щёскем пон напатта питаӆ.
Имоса порайна щимащ так ватна питсам. Номассам иӆ хампаллайм. Щиты айӆта ватна вуты ласкасайм. Якар ласкасам, понӆам нёл эваӆт таӆсаӆӆам. Оӆлийӆ щиты…
Хоты карра щёкат ос хуӆ веӆта, итта па щиты. Мотораӊ хапат кепа этсат. Парта лавалтта ант масӆ, карра хоты ӆупна парта лаваӆсу, итта анта, моторан парта мантаӆ ораӊна аматӆэн, щиты айӆта туӆайн.
Итта хуӆ веӆты ях кутна ӆэвасы нэӊху антам, топ хой самаӆна щи вер такан тайӆаӆӆы хыщсат. Па щимащ нэӊхэт, хой олмаӆ хуват топ хуӆ веӆман ос, вуӆ пелакки ювман па ропата пеӆа мули ант манаӆ», — Сергей Перчеда лавас.
Итта, ӆув пиӆэӆна Харсойм рыбоучастка, щимащ щёкат ропата верман па план мийман ниӆъёӊ молтас нэӊху ропытаӆ.
Щи томпына Сергей Перчеда контрольной лов хоща пиӆтащийӆ, наука эӆты Ас хоща олты тынаӊ хуӆ онттада нятаӆ.
Вера Лонгортова хансам потар
Авторы
Лух Авт
Темы