Лух Авт
Таӆ хуӆ веӆпасӆаты пора етшас
Таӆ хуӆ веӆпасӆаты пора си етшас. Веӆпасӆаты ёх тыӆась сютсяӆат па ӆуӊ пораеӆа ӆэсятыты питӆат. Тампуш таӆан па товийн шеӊк иськи ус. Туп хуӆ веӆпасӆаты хоятӆув иси па рупитсат, планӆаӆ тэкаптасӆаӆ, хуӆӆаӆ масӆаӆ.
Веӆпасӆаты ёх нётапса
Шоши мир ёх, хой тасян яӊхаӆ, хой хуӆ-вой веӆман уӆ, хоӆ шоши мир ёх пиӆан рупитты департамент эӆты нётапсайн маты па охан нётты верэӆ уӆ. Ханты, ур па ёрн ёх хольмаӊ пеӆа ӆапат пормас шитты верытӆат. Мосты от вуты ураӊан, заявление ханшты па очередя ӆойты мосаӆ. Си порайн туп мосты пормасан маӆайт.
Хуӆ веӆпасӆаты хоятат сохаӆ, карты кур, хот ӆоӊаӆ лаӊкты сох па си ураӊан мосмитты картӆуӊк па па отат шитты верытӆат. Хасям таӆан кусяйт веӆпасӆаты ёх пиӆан уйтантыман, хоӆна яӆап верат яӆпитсат. Кат таӆ йи пуш йи хоттэӆ кат хоӆап па кат жилет ёша паятты верытӆат. Жилетӆаӆ хойм лыпат оляп тайты верэӆ уӆ. Тут маты па юх эватты пормасӊан ураӊан, яӆап таӆ тыӆась эӆты ёхӆы маты охаӆ хольмаӊ сёрс унты эӆатса. Си пормасӊан ураӊан ӆутты бензин, таӆ йи пуш катхосьяӊ сёрс соӆкувайн сохаптаӆайт. Кашӊ хуӆам тыӆась сыс хоӆна хуӆам сёрс соӆкува ёша паятты верытӆат.
Хоты таӆ пора манас
Хоты хуӆ веӆпасӆаты пора таӆ сыс манас, Ӆоркурт рыбоучастка ӆуӊтасты хуӆ веӆпасӆаты ху Иван Тимофеевич Яркин потар тус: «Таӆ сыс хоӆпат понман тайсув. Еша хуӆ мосятсув. Асэв поттыйн, ухаӆ еӊк порайн, хоӆапӆув понӆаӆӆув, омасты кеншак ат ус. Ас хаӆты унты хоӆапӆув ситы си омасӆат. Еӊкаӆ куӆа йиты юпийн, хоӆапӆув ныкшак хатӆтаӆӆув, нох ант ат потсайт. Хуӆӆув сарах хоӆапан мосятӆаӆӆув, уншак сорт — хар хоӆапан. Шик хоӆпа айшак хуӆ хойӆ. Сорт, мевты яӆап таӆ тыӆась эӆты ай кер тыӆась етшаты унты манаӆ.
Сяӆта па пунан, рюша эӆты верам ота, хуӆӆув мосятӆув. Ас хаӆты леп апсем пиӆан кат тонна кем мосятсаман. Ас хаӆты юпийн, ай кер тыӆасян апсем, ма па Леонид Петрович Русмиленко мув сэмат вантты яӊхсув. Хуӆ уӆман, сита па тонна кем хойӆыйс. Тампуш хуӆ шимаӆ ус. Мув сэма ӆоӊты хуӆэн еша ун. Хун акамаӆ, нох ёхатӆэв, шимӆа йиӆ — нык манаӆ. Каматса хатӆ сыс соймев па ӆыӆаӊ йиӊкан этаӆ, хуӆан па ёхатӆа. Сяӆта па нох ёхатӆэв. Си ураӊан вошам хир омасӆув, юх верман тайӆув. Нэмаӆ луӆах.
Ин тыӆась сютсяман, тови пеӆа ӆэсятыты питӆув: яӆап хоӆпат ёнтӆув, хоӆапӆув ӆэсятӆаӆӆув. Кеӆан, куклайн масаюв. Йиӊк этаӆ, хоӆпат мохты понты питӆув».
Хуӆ веӆпасӆаты хоятӆув тыӆась сыс яма ат сютсяӆат па ӆуӊ веӆпасӆаты порая туӊа-сира ӆэсятыӆат. Ӆуӊ веӆпасӆаты пораеӆ кеншака ат манаӆ, хоӆапӆаӆ ар хуӆан ат ёхатӆайт.
Альбина Тырлина ханшам потар
Авторы
Лух Авт
Темы