Лух Авт
Тумтак уӆапсая постам Таӆэв питщасэв
Там таӆан муӊ аратаӆан питӆув потарты муй хорпи верат тумтак Таӆэван верты питӆув. Муӊ газетаев мохты ищи потрат ханшӆув, муй хорпи леккарат тайӆув, касты харата пиӆтащиты мохиӆув эӆты ищи потрат туӆув. Щи тумпийн муй вер таксар, тумтак уӆапсая хойӆ — нын иса верытӆаты муӊ ханшты лопасӆуван ӆуӊатты.
Тумтак уӆапса — щит кашӊ хоят эӆты. Ант вантман, хота наӊ рупитӆан, муй верӆан. Хащам таӆан «Ямальские встречи» нэмпи уйтантопсайт вет вошан мантсат. Ямал мува щимащ мойӊ хоятат ёхтыӆысат: конькийн хататӆыты нэ Ирина Сӆуцкая, джаз араӊ нэ Этери Бериашвили, олимпийской чемпионка Светлана Хоркина, «Умнее всех» хоща пиӆтащийм Александр Кравченко, ищиты конькийн хататӆыйм хоятӊан Роман Костомаров па Оксана Домнина, Россия заслуженной артистка Алёна Бабенко, психолог Лариса Суркова па Россия народной артист Дмитрий Певцов.
Там уйтантопсайт манам порайн 4,4 щёрас хоят ёхтыӆыйс. Ар хоят ёхтыӆыйс, хун специальной военной операция хоща уӆты хоятат пиӆан уйтантопсайт верыӆысайт. Там «Ямальские встречи» нэмпи проект округан 2022-мет таӆ эӆты рупитаӆ, хун Дмитрий Артюхов Честный маршрут вермаӆ порайн щимащ номас понас. Национальной библиотека щи вер таӆаӊа верӆаӆӆы, уйтантопсайт ӆэщатаӆ.
Хуӆам таӆ сыс 55 воӆаӊ хоят вохиӆыса. Ветхощъяӊ щёрас моӆтас уйтантопсая ёхтыӆыйс. Ёхтыӆыйм хоятат инщассат, муй эӆты ӆув уйтты ӆаӊхасайт. Щишан, там вер аратаӆ мира мосаӆ. Щи ураӊан еӆӆы оӆӊитӆа.
Аллина Тоярова ханшам потар
Авторы
Лух Авт
Темы