Лух Авт
Ворӊа хатӆэв ванамаӆ
Яӆпа йиты ӆапатан, ун кер тыӆась ӆапатмет хатаӆан, ханты хоятат Ворӊа хатӆэӆ постаты питӆат. Ай куртатан уӆты ханты ёх унта порыӆыты яӊхӆат. Вошаӊ хоятат сютсяты хатӆатан емаӊ хатӆа ӆаваӆӆайт.
Хасям таӆатан аршак вошаӊ ханты хоят, колледжатан утаӆтыты энамты ёх Ворӊа хатӆа ёхтыӆыты питас. Садика яӊхты няврэмат кеша емаӊ хатӆат верӆайт. Пулӊават вошан щущиет пиӆан рупитты ханты нэӊат «Сорнеӊ хуӆые» нэмпи садикан каман хорпи хар ӆарпитӆат.
Там пуш Пулӊават воша ёхтыӆыты хоятат па вошаӊ ёх Канась Пухӆа, Ӆапатнаӊк вош «Саран курта», «Геолог» хар хося сютсяты хатӆатан емаӊ хатӆа ёхатты верытӆат. Си харатан Ворӊа имева постам вантопса этаӆтыӆа, касапсайт манӆат, тынасты харат ӆарпитӆайт. Вератты харатан няврэмат па ун хоятат вощлах, нэпек па щашкан эӆты ворӊа хор верӆат.
Ворӊа имев ӆаваӆман, ханты хоятат хорам сохӆаӆ ӆуматман па ермак охшамӆаӆ ярман, няврэмӆаӆ, рутӆаӆ па хоттэӆ хоятӆаӆ пиӆан Валентина Михневич «Мув тай» вуӆы хотан ӆаваӆӆайт. Мойӊ хоятат вуӆы хорты тахайн ох понман, сумат юха щашкан па калащ кар ярамты верытӆат. Вуӆы хотан вуӆы нёхи па хуӆ, порыӆыйм ӆэтот ӆавемиты, шай йинсьты. Няврэмиет каман ёнтты па касты харан ӆэсятӆайт.
Ханты хоятат, ун емаӊ хатӆа ёхтыӆыяты, порыӆыяты. Тумтак ёш, тумтак кур! Ойӊа-пищаӊа, йисаӊа-нуптаӊа!
Альбина Тырлина ханшам потар
Авторы
Лух Авт
Темы