Лух Авт
Вуӆ Ляль хуват манам нэӊху
Муӊ семьяюна ляль потрат аса ма вуӆ ащем пущщи оллат, щит Пётр Алексеевич Негачи. Ӆув 1920-мет таӆна ай тахайт патты тыӆащна 15-мет хатӆна Харсаимна сэмна питас. Пулӊават райвоенкомат эваӆт нэпекна ёхатса, Красной Армия хоща вахса. 1942-мет таӆна уйт ӆор тыӆащна 238-мет сопас юватӆыты полк пеӆа хастаса. Карелия мувна лялесас, Свирь ёхан хощаӊна — щит Онежской па Ладожской лар кутна. Щиӆта Белоруссия мувна лялеста ёхтас, Могилёв хощаӊна.
Ӆув амэм эӆты лаваӆтымаӆ, хоты 1942-мет таӆна щёхар тыӆащна ӆув па холна хут нэӊху немщатна сыятамат. Нэпекӆаӆ немщат хоща ант питтэӆ ораӊна мув ӆыпина хырмеӆ, щиӆта локки манмеӆ. Щита ёхан олмаӆ, мохыӆаӆ певаӆта хасмеӆ ораӊна, ёхан йи пелакна унсмеӆ, па ӆувиӆаӆ вантмаӆ антам. Ӆув па певаӆта ант хасмаӆ ораӊна, хыщмаӆ. Щита нянь памат энаммеӆ, щитат кутна ӆапат ӆыӆӆы ханятымаӆ, нянь пам нахрат ясна сукатман ӆывмаӆ, щиты олмаӆ. Ӆапат щиты ханятымаӆ юпина, воллы па веритмаӆ ёхан унста, юх марэмамаӆ, щит онтасна унсмаӆ. Ёхан йи пелакна ёхатмаӆна, нёхаммаӆ, немщатна сыяӆам па юватлита питам. Щита нёхаммаӆ порайна нялна хайм, щиты щи нёхаммаӆ па ӆув мохыӆаӆ хоща ёхатмаӆ. Госпиталь эваӆт этмаӆ юпина Псковской область пеӆа лялеста китам, щит мули курк тыӆащ 1944-мет таӆ ос. Щиӆта Карелия мувна питас, ёхат Кольской полуостров пеӆа ёхатмаӆ.
Ай тахайт патты тыӆащ 8-мет хатӆна 1944-мет таӆна стрелок Пётр Негачи «За боевые заслуги» медальна юкантса. Нэпекӆаӆна хансман ол: «Карельской фронтна, ляль эӆты йиты кутна, Кольской районна Мурманской область пеӆа, касаӊ хатӆ ясаӊ тус рота кощайӆ эваӆт действующий взвод коща пеӆа». Щиӆта сахат вуӆ ащем Норвегия пеӆа китса, хата ӆув Ас патты тыӆащ 30-мет хатӆ 1944-мет таӆ маса Киркенес хощаӊна лялесас. Щи порайна «За оборону Советского Заполярья» боевой медальна маса. Щиты ляль хуват мантаӆ эваӆт Венгрия мувна ёхтас. Австрия мувна Вена иӆпина 1945-мет таӆна ун кер тыӆащна 3-мет хатӆна лялеста волыяс. Щи хатӆ мули аӆаӊ нох верттамат, соматлиты комна тэӆна ант миямат, щи порайна лавам: «Победа!» Щиты ӆув лялесам таӆӆаӆ нявремӆаӆ эӆты лаваӆтымаӆ. Щи емаӊ хатӆ, Ас нопатты тыӆащ 9-мет хатӆ сэм йиӊк пиӆна лаяӆсаӆӆы. Ляль манты хуват муӊ ханты яхлу каман сок вантсат, хонды харты мохыӆаӆ сансна ант ханятысат. Лялессат ищиты мур тэӆ нэӊху иты нох этта веритсат.
Ляль юпина ям олапсы вантмеӆ антам
Щи паӆтап ляль етсамаӆ юпина, Пётр Алексеевич Негачи парта Харсаим пеӆа ёхтас, хата ищи нэӊхэт ляль юпина ям олапсы вантмеӆ антам. Нявремӆаӆ ӆапатта вериттаӆ ораӊна, такан ропытас.
Пётр Алексеевич хуӆ веӆта питас, передовой хуӆ веӆтытты йис. Ропыттаӆ хуват ар Почётный грамота таяс па ямас ропыттаӆ ораӊна орденна маса. Ямас веӆпасӆас, вай сох артан совхоз пеӆа мас. Приуральской мувна каӆаӊна яӊхас. Щита ӆув ныӊ вус, ийимеӆ ветхощъёӊ таӆ эваӆт ляль пеӆа ропытта питас, ёӊ таӆна ӆув эваӆтэӆ ай ос. Ӆын аратэӆна ёӊ няврем тайсаӊан, топ вет нявреман ӆыӆаӊӊи хыщас. Йи ях нявреман вуӆӆы ювман антамми йис, ниӆ эви хыщас.
Вуӆ ащем ай кер тыӆащ 29-мет хатӆ 1987-мет таӆна антамми йис, щи порайна ӆув ӆапатъёӊ пеӆа хут таӆаӆ ос. Ма щи порайна топ кат таӆам ос, щитна ма ӆувеӆ ант номлэм. Амэм ясаӊна ӆув мули патраӊ нэӊху оллимаӆ, ямас веӆпасӆамаӆ, нэӊхэт эӆты иёлты нятмаӆ. Ӆув ямас ханты, саран, ор ясаӊна потармаӆ, холна ляльна яӊхтаӆ эваӆт хатань, рущ ясаӊ онттамаӆ па потарта питмаӆ.
Пётр Алексеевич Негачи ямас лялесмаӆ ораӊна, Вуӆ Ляльна нох питам ниӆъёӊмет таӆӆы ювамна, СССР Верховной Совет Президиум ай кер тыӆащ 14-мет хатӆ 1985-мет таӆна постам Указ хуват Орден Отечественной войны II-мет степень меваӆ посан юкантса.
Там хатӆ па муӊ ӆув нявремӆаӆ, ӆув лаваӆтам ясаӊӆаӆ номман тайӆаӆӆу. Касӊ таӆ Ас нопатты тыӆащ 9-мет хатӆ ӆув хорӆ вуйман муӊ «Бессмертный полк» акция хоща сосӆу.
Вера Лонгортова (Климова) хансам потар
Авторы
Лух Авт
Темы