Таттама: Лариса Айваседо таттамы

<div class="content-lead">Чуки похона меӆ таӈичумаш. Таӆям дяхат вачутанаˮ шаӈкмян ӈамыˮ меӆ вытыˮ. Ӈочаˮ, нахаӆˮ, тутыкуˮ маньӆе ӈычимяˮ. Купыˮ куӈаˮ, ӆыншаӆмяˮ, ӆымтукˮ паӆдятˮ, куки дяхана тэмаӈ мянӈc кадяˮ. Дяхиˮ ӈупчики ӈычимяˮ, навышудёӆ хомяхамты. Татӈcвта диӆиӈ хусыкана каӆю ӈочаˮ вачутыˮ.</div><p>Четаӈ тыхуӆтаˮ маньӆе купыхина, ӆыншаӆмяхана тыхуӆяˮ. Нешаӈ дилхана тыхуӆма — куптат тадяӈайта шеӆ. Ӈочамʼ пюӆьш тыхуӆтаˮ ӈука дямʼ танаштуˮ. Чуки похона дячапёчитаˮ хаʼӈаˮ, таӆям выӈкна ӈачта дяхана ӈочата дику, дяӆя паӆатамыта. Купыˮ хомана вачуватмэхcнтуӈ тыӆамайˮ, вяӆуˮ поӈкна ӈайтаˮ ӈочаудиӆиˮ диӆюпыˮ, хомана кумайˮ.</p><p>Тыхуӆтаˮ маньштуˮ, чуки таӈичохона ӆыншаӆмяˮ тадяˮ. Няймы таӆьша ӈочаˮ меӆ куштуˮ, кумахатоӈ шан тэпюнанаӈc нишʼтуˮ кайˮ, ӈучиˮ понт тэйтоштуˮ. Понантоӈ нешаˮ, тасам капиˮ, вахандя капиˮ тыхуӆьш тайкушахат шеӆташтамыˮ кычиˮ мэʼштушˮ. Ӈочитуӈ ӈайшант тайкушайˮ колкуˮ, тайкуˮ, кинтˮ шеӆташтушˮ. Таӆьша ӈайшаӈкана ӈоча меӆ нишʼту хыӈу. Тыхуӆтаˮ тайкушай колкомта нинтавидян шаӆнаӈата, таӆям тыхуӆты.</p><p>Ӈочахат пантанӈата, кычанта няʼвым хэлаку, хома дюмпхана тамтанӈата, тайˮня дюмпта нимня вяӆ маӆʼудехана хаханӆанӈата. Таньше колкохона минӆена ӈоча дятнан ниʼ камтомт. Четаӈ чуки дилхана тыхуӆтаˮӆушиˮ кычиˮ мэʼштуˮ, лапкаханаˮ куӆкаӆиˮ шетшатаˮ деткуˮ тадяˮ. Понантоӈ ниӆинанаˮ- катананаˮ маньштушˮ: тыхуӆпатаˮ комытаˮ ӈочитаˮ детӆиӈ хcмдеты нинюта нытпёштуˮ, чупейʼ нинюта тэштуˮ, шаӈкмян халакуудиˮ ӈупчики ӈамуӆман хаʼӈаˮ.</p><p>Нешаˮ ӈочахат куӆкаӆиˮ ӈамӆуˮ шеӆташтуˮ. Чуки дилхана совхозханаˮ, общинаханаˮ мансӆаннаˮ нешаˮ тэмытуӈ ӈочитоӈ мансдяхатуӈ миштутуӈ. Ӈуп похона шича дют тоннаˮ ӈок ӈочиˮ ӈопшеӆ тэштуˮ. Ӈочаˮ ӈамсадямантуӈ камна шанат витаминутуӈ тадяˮ. Вептуӈ ӈупчики хома. Понантоӈ шай дякоштумахана нешаˮ атычевʼ ӈочиˮ вепакуˮ, купыдюˮ вепˮ кастахадя шайӈc ӆохомташтомайˮ, таньше шадяньштомайˮ. Тутыкуˮ, нахаӆˮ ӈупчики витаминтуӈ ӈукаˮ.</p><p>Чуки похона маняˮ дяханана нахаӆˮ меӆ вытыˮ. Четаӈ тытыӈуˮ маӆˮ нахаӆкатˮ пантыˮ. Татʼ ӈcвта диӆихина нахаӆˮ маньӆе хомяхамтыˮ, диӆиӈ хусыкана ӈай шоӆтуӈ дяптныˮ. Дяптмыˮ нахаӆˮ меӆ пяхат камаштут, шапчутуӈ касаштуˮ, шоӆтуӈ ӈамсадяхамштуˮ. Тытым танякуӈ мансаптанӈан — ӈукаˮ нахаӆˮ каʼамнадят. Чуки дилхана шоӆахатˮ шанат ӈамсадятаˮ ӈамӆуˮ, куӆкаӆиˮ паӆтонуˮ шеӆташтуˮ. Таӆям нахаӆ шоӆаˮ четаӈ ӈаӆкамана таӆаӈаˮ.</p><p>Нешаˮ ӈамантуӈ ӈокӆимна тытыӈкат нахаӆтатоӈ каʼамӆаштуˮ. Ӈамыӆихина маньшту: дяӈ халакуудиˮ — нахаӆукатʼудиˮ, таӆяхаудиˮ, пиньшукуудиˮ ӈупчики ӈамуӆман хаʼӈаˮ. Дяхат вачутанаˮ куӆкаӆиˮ ӈочаˮ, вепакуˮ, нахаӆˮ, тутыкуˮ, таӆьша ӈамыˮ шанат тэмс нешаӈкнаˮ, шаӈкмян халакохонаˮ таӆаˮ. Дямаˮ шичинаˮ ӈамӆымпи, таӆям хоматаш, ӆэтӆампёш таӆаӈа.</p><p>Лариса Айваседо патмы</p><p></p>

Ӈочаˮ, нахаӆˮ ӈычимяˮ

Сидяӈг: Галина Кинчинаʼ тадтавы

<div class="content-lead">Таӈы нумгана нюдякоˮ хардахаˮна иленаˮ нинаˮ няхатоʼ таӈга тэворӈаˮ. Таремʼ нянандоʼ нядˮмаӈэ ту ӈаноˮ тарасетыˮ. Ненэцяˮ ӈамгэри таранадамдоʼ тэмда, нидоʼ манэˮманзь ядэрцетыˮ. Неноховавна Саляӈгарадʼ ёльцяндʼ ӈэдалёрцетыˮ.</div><p>Хахаяда яляʼ мань Надымской районхы Ӈыдʼ хардахад нердена ту ӈанохона миӈадамзь. «Виктор Черномырдин» нюбета нердена ту ӈаномʼ неняӈгˮ ирыʼ юдимдей яляхана ӈатеваць. Товыˮ ненэциеˮ поӈгана Саляӈгардахад, Яр-Саляхад миндаˮ мэвыць.</p><p>Ту ӈановаˮ пиʼ ямбанʼ Ӈыдʼ яхаʼ няˮавхана нусь. Хуняӈы яляʼ ёльцяндʼ мерцяда ӈэрмʼ няʼ сюръхалъяць, сахамась. Таремʼ ӈодˮ хубтахана юдимдей часʼ пиркана Ӈыдʼ харадʼ яха вархад ӈэдалэйваць. Ту ӈановаˮ сата мерцямʼ нивэда пилюсˮ, ӈарка хамбаˮ помна явмʼ мерʼ мадаваць.</p><p>Ӈэдалёвэӈэ юдʼ мянваˮ ӈэвакэваˮ. Ӈокамбойˮ пелядоʼ малʼ Ӈыдʼ тераць. Помнандоʼ нидоʼ теневавыдоʼ. Мань ханяӈыдоʼ небянатоʼ нямна, ӈанидоʼ нютоʼ нямна хамедэйнась.</p><div class="content-new-image"><img alt="pic" src="https://storage.yandexcloud.net/ym-sites-static/f8725dc7-6de.webp" style="width:100%" height="1328" width="2362"/><div class="content-image_child"></div></div><p>Ӈаркамбой не, Валентина Степановна Салиндер маˮнисяв:</p><p>— Тада иры таняна илеӈгудмʼ. Пуняʼ ӈаниʼ тюку ту ӈанохона хэсь тасламбив. Неняӈгˮ ирыʼ 24 яляʼ пиркана Ӈыданʼ пяӈгуда. Ту ӈанонʼ нибˮни еревˮ, илесь яни няюʼ автобусхана хандадмʼ.</p><p>Нядаӈгардахад янаˮ терˮ Ӈыдхандоʼ тиртя ӈанохона тэворӈаˮ. Ханяӈыˮ Запорлярныйʼ ёльцяндʼ машинахана ханˮӈаˮ. Тамнаʼ тяхаʼ яхаʼ мюмня ӈанохона ӈэдалыˮ.</p><p>Вануйто Алёна — илебей не. Сидя нюкцямда няць мимысь. Ханяʼ ӈэдалёвамда таремʼ вадеˮӈадась:</p><p>— Вэсакоми Аксарка — тер. Ненэй мямиʼ Лабытнангиʼ няна ӈэсеты. Таʼ ӈэвадыниʼ. Тыниʼ теневана няхаˮнани мэˮ. Ӈадьбяниʼ Ӈыдхана мядоˮӈадамзь. Ту ӈаноˮ яхананаˮ ӈулиˮ таранаˮ ӈамгэриˮ. Таӈы нумгана Саляӈгардахад таӈга Ӈыданʼ тэва пирӈав.</p><div class="content-new-image"><img alt="pic" src="https://storage.yandexcloud.net/ym-sites-static/d8bc9a45-7e2.webp" style="width:100%" height="1439" width="2560"/><div class="content-image_child"></div></div><p>Яр-Салянʼ нултаванаˮ серʼ ханяӈынаˮ янʼ хамыдаць. Таняна понарка мэваць. Ӈэдалаванаˮ мальӈгана ту ӈановаˮ ӈулиˮ паныць. Ненэцяˮ неняӈгадревʼ хуримна ниӈгэрӈаць. Ӈобкарт терсяда я яӈгусь. Яр-Саляʼ терхат ӈопой теневана нями маˮнисяв:</p><p>— Саляӈгарданʼ таʼ етриʼ ӈэдалёрцетываˮ. Ту ӈаноˮ хусувэй сиˮив яляхана таняˮ. Явмʼ вуниваˮ мадабюˮ. Яхаʼ мюмня ӈэдалываˮ. Тедаʼ тобˮни, няхарˮ яляʼ ямбанʼ лапкавна ядэртадмʼ. Теневана ниниˮ мякана сеӈгаӈгудмʼ. Масиˮ лекарˮ мятʼ хэбцудмʼ. Пуняӈы сехэрэни билетмʼ мале ӈахакуд тэмдавась. Таславы яляхана мякни хандадмʼ. Пыдараˮ ситаˮ тотревʼ тиртя ӈанорихиˮна ниваˮ ӈэдалёрˮ. Тикэда ёльце сава. Билетанаˮ саць ниˮ миресˮ. Тикахад тамна «Морошка» нюбета картамʼ нядˮмаӈэ мэˮӈаваˮ. Тэмдорпˮ, сехэрэнаˮ мирˮ тянюворӈа.</p><p>Таремʼ таӈы нумгана Ӈыдʼ терˮ Ямалнаˮ ӈарка мартʼ тэворць пирӈаˮ. Юдˮ поˮ тяхана ненэцяˮ тикы ӈаномдоʼ мале маӈгтыˮ ирыʼ пуданаˮ ялэˮ пиркана ӈатесетыдоʼ. Саляӈгардахад тохолковандоʼ пуд Ӈыдʼ терˮ ӈацекыˮ мандалӈэ тосетыˮ. Ӈарка харадˮ нямна ӈэдалёрманʼ харванаˮ Саляӈгарадʼ няʼ пясетыдоʼ. Тикахад таʼ ямбанʼ неняӈгˮ, тамна пилюˮ ирыхына янаˮ терˮ таӈга ханяриʼ хэсь пирӈадонзь. Тохолкодаˮ ӈацекыˮ вэбаʼ ирыʼ нерцюна пудана ӈанохона пырдариʼ тохолкова яхандоʼ малˮ ӈобкана хэсетыˮ. Небянадоʼ, нисянадоʼ нись тоса ӈэдабтасетыдоʼ. Ӈока ямʼ нисетыˮ сюртембюˮ.</p><p>Галина Окотэттоʼ падвы</p><p></p><p></p>

Явоˮ есиˮмана ӈэдалёрӈаваˮ

<div class="content-lead">Неняӈгʼ ирыʼ пудана яляхаˮна Нижний Тагилʼ маркана тедаʼ миндя сайнормахад товыˮ сёбар ненэцяˮ помнандоʼ сянэрмахана пирдырманзь ӈобтʼ маˮлёдаˮ. Ямалʼ яхад таняʼ Хальмерˮ Седеˮэʼ тер Иван Пурунгуй ханда.</div><p>Сянэртаˮ нюртей пирдырманʼ хуркариˮ яхат ненэцяˮ маˮлёда. Тиканʼ маˮлёвандаˮ малˮ ӈокхандоʼ тедаʼ миндя сайнормахана мэвыˮ. Маняˮ янаˮ тер няваˮ сянэрць теневанаˮ, ваць ваˮлёйˮ ненэцяӈгаˮна пирдырта. Тикы ядэръянда нерня сёбарˮ няваˮ тамна хуркариˮ пирдырмахаˮна ӈаниʼ пыхыдамда манэˮлабтамбидась.</p><p>Иван выӈгана соявы, Ӈэдяʼ хардахана школамʼ маˮлевы. Тохолкованда мальӈгэхэд пирдырмаʼ сероˮ няюʼ пыхыдамда ӈобˮ хорпавэда. Ӈэрмʼ терˮ ненэциеˮ пирдырма, сянэрма, теннисхана сянакова тикы нянаˮ сямянхат харвобтана серода. Армияхад тованда пуд харта яхананда илевы, мюсермы. Тедаʼ миндя сайнорманʼ пыда 2022 похона хэвы. Таняна ядараˮмахаданда яханда тэввыˮ. Иван Пурунгуй «Орден мужества» няби «Медаль за отвагу» няˮамвы. Пыда Хальмерˮ Седеˮэʼ хардахана иле, манзара.</p><p>Сянэртиˮ пирдырмахана сёбарˮ няваˮ сянэтаʼ тотревʼ нерняриʼ миӈая, ида сава ӈэя.</p><p>Нюдяне Махакуйʼ падвы</p><p></p>

Сянэртиˮ пирдырманʼ ханда

Сидяӈг: Марина Ярʼ тадтавы

<div class="content-lead">Танда няби пеляханда ваерамавахаданда ӈэрмʼ няна холкабэйˮ мараӈгахат яваˮ паскойдаревʼ хая. Ямалʼ янаˮ тиӈгывна яʼ ханярина ненэцяˮ тохорманзь ханӈаˮ.</div><p>Хойʼ няна мараӈгаʼ паӈгˮ вэби ӈадимаʼ ёльцьӈгана ненэцьʼ саӈода ӈобˮ таняʼ хаˮморта тоˮолха ӈэӈгу. Вадёданаˮ вэбаˮ ӈахакуд имʼ савумдамбдархаˮ ӈэсетыˮ. Ӈоди вадёдаваʼ мальӈгана ненэцяˮ тасиримна няркамбаӈгуˮ, ӈодяˮ таняӈгодакыˮ, нинякыˮ? Нумда хурка ӈэванʼ ӈаниʼ сававна сыртаˮ. Ӈодяˮ сававна вадёдава еˮэмня ненэцяˮ манднимˮ, маӈгтыˮ ирыʼ нерняна ямда хаераку сававна юдабата тара. Тикыʼ пуд сабе сэлˮ ӈэбта ӈаниʼ вэва ӈэӈгу, янамбовна яʼ ний ӈобˮ ябтарёбта тара. Мараӈгаˮ вэбакутоʼ пуд яʼ нимна сэрˮ ӈамдэдакудоʼ ӈадимдаˮ. Яʼ нимна лехэбтёдарахаˮ сэрˮ ӈамдэдакуˮ ӈаниʼ инʼ сававна хаˮмортаˮ. Ёльцяндоʼ таль пахаӈгаттоʼ ныклёбтоʼ ни серосˮ. Маняˮ яхананаˮ ӈэрмʼ мерця саць пэрцетыда, ханяӈэхэˮна ӈамдэдакудоʼ пулабтасетыда. Тарцяˮ сероˮ пуд тянёривна вадёдаˮ. Сэрˮ ӈамдэдакутоʼ хаˮамхава сюркартыд, мараӈгаʼ сэвкоцяˮ вадёда пэӈгудˮ. Саць пэсьдана яляʼ сэвкоцидоʼ ханяӈэхэˮна вадёданахандоʼ параӈгасетыˮ. Едабэйˮ мараӈгаˮ вадёдавандоʼ серʼ нярмортыдˮ, холкана пэӈгудˮ. </p><div class="content-new-image"><img alt="pic" src="https://storage.yandexcloud.net/ym-sites-static/dc735bfe-72a.webp" style="width:100%" height="1328" width="2362"/><div class="content-image_child">Холканавандоʼ мальӈгана ӈаниʼ ханзорка нумʼ ӈэбта сава, тикахана ӈодяˮ ӈавудотаˮ.</div></div><p>Тикыˮ паӈохона, мараӈгаˮ сававна вадёвамʼ хибяриˮ хартоʼ мысодотоʼ серʼ хыномдамбасетыдоʼ. Ӈопой тарця серˮ хэʼ сарёʼ ёльцьӈгана мэта. Ӈацекыˮ небя мядʼ синяна мюйкуʼ панʼ ӈыламна пинʼ «мараӈгаʼ хыдямʼ» ӈэдараӈгу. Хыдякоця сарёʼ икана панвы ӈэбта, ӈацекыˮ маймбаӈгуˮ, тикахананда мараӈгаˮ таняӈгуˮ. Таремʼ маˮлёвы идмʼ нюдямбойˮ нидоʼ хаця ӈэртадоʼ, пелямда янʼ вабтаӈгудоʼ.</p><p>Мараӈга ёльцянда ӈэсондʼ холкамахаданда ненэцяˮ ӈодиманзь ятналаӈгудˮ. Таславы яляханандоʼ мядʼ терˮ ӈобнзерˮ ӈодясавэйˮ яхатоʼ хандаˮ. Тохорцядандоʼ хуркариˮ ӈэсяӈо мэцетыˮ. Неноховавна нянандоʼ минартидоʼ идʼ едˮ ӈэсетыˮ. Нердеʼ таремʼ тохорманзь хэняˮ мараӈгинзь яхандоʼ тэввандоʼ серʼ хацяʼ ӈодиндаˮ.</p><div class="content-new-image"><img alt="pic" src="https://storage.yandexcloud.net/ym-sites-static/383df6d8-827.webp" style="width:100%" height="1328" width="2362"/><div class="content-image_child">Ядэромахадандоʼ мараӈгасавэйˮ юмбраконʼ сяйманзь ӈамдаӈгудˮ. Няхатата савараха ӈодяʼ паӈганʼ хуркариˮ нойкоци сяротаˮ.</div></div><p>Сермʼ минрена нядоʼ тикыда сяропапта вади хэтыбаӈгу: «Нернаˮ няӈы нойдёдараха ӈэяˮ». Вадита пуд мараӈгацямда юркана масаӈгуда. Хуркариˮ хартоʼ ӈавортаˮ ӈавракутоʼ яхалаку ӈодяндоʼ паӈгʼ ӈылʼ пэртыдоʼ. Тикаханандоʼ сававна ӈодимандоʼ еˮэмня ямдоʼ ӈавламбиˮ. Сяймахадандоʼ тикы ӈодяндоʼ юмброкоʼ хэвнякумна ӈодиманзь хандаˮ.</p><p>Тохормаʼ нямна ӈаниˮ хуркариˮ пунрыдˮ таняˮ. Ӈодиндаˮ ненэцяˮ ёльцянда тяхаʼ сяхаӈгарт малкобтоʼ ни тараˮ. Тохормаʼ мальӈгана ӈопой сэвтана мараӈга ныдпа вэва, ненэцьʼ хэвсиˮ хаёда. Ӈодиндаˮ едтоʼ мюʼ тодоˮ сидя, няхарˮ, тет сэвтанаˮ мараӈгы маˮламба ӈаниʼ хэвадаласетыдоʼ. Ханяӈыˮ тэрихив манзетыˮ: «Ненэцьʼ ябда няданда ханда».</p><div class="content-new-image"><img alt="pic" src="https://storage.yandexcloud.net/ym-sites-static/34b68d21-a97.webp" style="width:100%" height="1328" width="2362"/><div class="content-image_child">Яʼ поӈгана ӈодясавэй едамдоʼ лакамбой хаебатоʼ, ненадумдабатоʼ тара.</div></div><p> Хибяхав еданда ниʼ яʼ юмбмʼ мэӈгу, ханяӈэр пяʼ маликэцяхад муӈгсавэй ӈынрахакомʼ паклаӈгу, вадида мэта: «Парны тобˮ — ядаирˮ, маняˮ тобˮнаˮ — нёирˮ». Тикахана ненэцие яӈгодан маˮлавы ӈодяхатоʼ тэри ӈамгэˮ ниˮ лабцеӈгаӈгуˮ. Ӈаниˮ ненэцяˮ манзетыˮ: «Мараӈга мидерта ӈамгэ. Сяхариʼ минандʼ серʼ мараӈгасавэй ямʼ хобнанд, пуна салпнанд тикы ӈодид ӈаниʼ нид манэтˮ, тэмзвэрахаˮ ӈэӈгуˮ».</p><p>Ӈаркаˮ ненэцяˮ пэвсюмяʼ няӈы ӈодимамʼ волтамбасетыдоʼ. Ӈодиндаˮ яля ӈэваханда тохормаʼ сертоʼ малесетыдоʼ. Ӈодинзьʼ яхадандоʼ хэвандоʼ нерня тохортаˮ ненэцяˮ ямдоʼ яʼ юмбкана ненадумдаӈгудоʼ, тодоˮ сиˮив мараӈгаци хаеӈгуˮ. Тикахананда яхандоʼ ӈаниʼ сяхариʼ товамдоʼ хэтыбадарахаˮ ӈэӈгуˮ.</p><p>Мараӈгы маˮламбаваʼ паӈо сяхаринда илека серˮ. Хусувэй хибяˮ ӈодя таняван тохорциекудоʼ пандабнандоʼ, сыраʼ ӈэсоӈгана тикы ялякоцидоʼ тензибтембаӈгудоʼ. Маˮлавыˮ ӈодяˮ сяйʼ таӈэ тэри ӈавудотаˮ.</p><p>Алла Вануйтоʼ падвы</p><p></p>

Мараӈгымаʼ паӈо

Сидяӈг: Алла Вануйтоʼ тадтавы

<div class="content-lead">Неняӈгʼ ирыʼ юкад вата сибимдей яляхана маняˮ яхананаˮ илаʼ саироˮ хари тохоламбадаˮ ненэциеˮ ӈарка яля. Тарця манзаямʼ минренаˮ ненэциеˮ пэртиˮ сероˮ хари Салехардахана ӈэда музейхананаˮ ӈацекэхэˮ вадеˮядонзь.</div><p>Хуркариˮ ненэциеˮ поӈгана илаʼ саироˮ хари тохоламбадаˮ таняˮ. Тикыˮ ненэцяˮ луцаʼ вадавна манзь «этнограф»ˮ. Тарця манзаямʼ минренаˮ яʼ сярʼ нимна хуркариˮ ненэциеˮ тэнзˮ ханзерˮ, ханяна илевамʼ тохоламбиˮ. Манэˮмыˮ серодоʼ падыбидоʼ, тасламбидоʼ, вадеˮядоʼ. Тикы серˮ харта явна минда наука — «этнография». Маняˮ яхананаˮ тарця манзаямʼ минренаˮ юнетаˮ ненэциенаˮ таняˮ. Пыдоʼ илнаˮ саироˮ хари тохоламбиˮ, ӈани яʼ ненэцяӈгˮ ханзерˮ илеваваˮ вадеˮӈадоʼ.</p><p>Ямалʼ яханана харˮнаˮ ӈарка музейваˮ таня — «Окружной музейно-выставочный комплекс имени И.С. Шемановского». Иван Семёнович Шемановский хэхэʼ мядʼ манзаямʼ минревы, тикавнананда Иринархм нюбеˮмы. Тюку яхана манзараванда серʼ ӈэрмʼ терˮ ненэциеʼ илмʼ тохоламбавы, нядаӈговы. Тикы ӈарка ненэцьʼ маняˮ яхананаˮ нерденяӈэ падармʼ тохоламбади тидхалембавы. Ӈобтʼ маˮлавы ӈамгэхэтата 1906 похона музеймˮ сертавы.</p><p>Этнографʼ ӈарка яляʼ едʼ музейхана манзаранаˮ ӈацекыˮ няʼ тикы яляʼ нямна лахарю мэˮӈаць. Харта янда нямна мядондита теневабцу намдуванзь Нелли Сергеевна Гоглоева викторинавна хонаркусь.</p><p>Оксана Николаевна Окотэтто товы няхата ӈэрмʼ терˮ ненэцяˮ ханзерˮ мядонди ядабтамбавамʼ вадеˮӈась. Сяноковандоʼ серʼ ӈарка яндоʼ нямна ӈэда сё Елена Олеговна Поплавскойʼ ня мэˮӈаць. Тикытоʼ пуд тадтаˮми ӈобтʼ тидхалембиць. Ханзерˮ этнографʼ падмʼ маˮламба таравамʼ Ирина Викторовна Прохороваʼ ня вадеˮӈадонзь. И.С. Шемановскойʼ нювмʼ нюбета музейʼ манзаранахат ӈока сава ӈамгэмʼ намдаць.</p><p>Ӈацекыˮ сяхариʼ намдавыдоʼ тенеӈгудоʼ. Ненэциеˮ илаʼ саироˮ хари тохоламбадаˮ нинаˮ вадетаˮ хусувэй хибя илаӈгананда, манзаяханда тарояда.</p><p>Нюдяне Махакуйʼ падвы</p><p>Сидяӈг: Алла Вануйтоʼ тадтавы</p><p></p>

Илаʼ саироˮ хари тохоламбадаˮ

<div class="content-lead">Янаˮ тиӈгывна хусувэй ӈэрмʼ терˮ илелаваˮ районхаˮна, маркаˮна советˮ сертаць. Тикыдоʼ мале танякуй похона ӈадимяць. Советанʼ ӈэрмʼ терˮ иламʼ сававна теневанаˮ ядэрӈаˮ.</div><p>Хэвы сиˮивхана Приуральской районхана ӈэрмʼ терˮ таслаковамʼ мэˮӈаць. Таняна райондоʼ ӈэвахана мэна янда ӈэрмʼ терˮ лаханако няˮӈась. Ӈобˮ вададоʼ школахана тохолкуртаˮ ӈацекыˮ мякандоʼ, тохолкулава яхандоʼ тэврамбаваʼ нямна ӈась. Тикыʼ хавна ӈармы ненэциеˮ нядˮми, хареˮ вади лэтраваʼ нямна лаханакурӈаць.</p><p>Тасалкурмандоʼ пуд ӈобˮ иӈут хаˮмыдаць. Тад нерняʼ районханандоʼ тохолковаʼ серо минрена департаментʼ няʼ ӈобкана манзаямдоʼ тидхалембаӈгудоʼ. Таремʼ сельбяʼ няна школахана тохолкода ӈацекы харасиˮ харданʼ тэврамбаванʼ харваˮ. Тодоˮ янʼ хэвандоʼ нерня Советахандоʼ едэй ненэцие таслаць. Таремʼ ӈобкана ваˮлёйˮ пэʼ терˮ хареˮ яндоʼ терˮ нядабаӈгуˮ.</p><p>Нюдяне Махакуйʼ падвы</p><p></p>

Яндоʼ терˮ нядабиˮ

Сидяӈг: Анна Яптикʼ тадтавы

<div class="content-lead">Илаӈганандоʼ тараванда манзаядамдоʼ тохоламба пявандаˮ илебейˮ ненэцяˮ тедаʼ тэтнаˮ. Пыдоʼ ӈахакуд тохолко ядамдоʼ тэрабиˮ. Тевʼ ёльцяӈгана падродоʼ хуркариˮ яхаˮ ӈэдарамбидоʼ.</div><p>Яхананаˮ тюку ялэˮ пиркана мале няхарˮ ёнарˮ падармʼ колледжахаˮ падвыць. Ӈокадоʼ Салехардыхы колледжмʼ тэравыць. Тикыʼ хавна ханяӈыдоʼ Новой Уренгойʼ, Ноябрьскʼ хардахаˮна тохолкованʼ харвавыˮ. Сямянхат харвобтана манзаядоʼ яʼ тебтмʼ нэкалпава ӈэдараха. Лекарˮ, мядонди ядабтамбава манзаямʼ тэрабавыˮ.</p><p>Ханяӈыˮ илебейˮ ненэцяˮ тохолковамдоʼ хартоʼ салдамбаӈгудоʼ. Сяӈок ӈацекы тохолко пэвамʼ сельбяʼ няна вэбаʼ ирыхына пунумдаӈгудоʼ.</p><p>Падродоʼ хартоʼ тэврамба, Госуслуги нядˮмяць ӈэдарамба пиръядоʼ.</p><p>Нюдяне Махакуйʼ падвы</p><p></p>

Тохолкова ядамдоʼ тэрабиˮ

<div class="content-lead">Пуданаˮ поˮ хойхана таʼ мерета еся хано мэтаˮ ӈадиберӈаˮ. Таминдоʼ мюселембидоʼ. Ханяӈыˮ ненэцяˮ тамна савуˮядоʼ. Тарцямʼ мэˮмаʼ няюʼ ӈаниʼ таславы падро сертаба тарасеты. Тикысипойʼ еся ханамд марць пиртадоʼ. Хэвы сиˮив яляхана ӈобˮ юнмʼ намдаваць.</div><p>Округхананаˮ тарця есяˮ ханˮ — меретаˮ снегоходˮ няби квадроциклˮ мэˮмаʼ няюʼ падродоʼ мирелеванʼ харваˮ. Теневабцод манэˮлабтаванд няюʼ есямʼ пэнзь сероˮӈа. Тикыʼ няюʼ ӈобˮ ёнарˮ есямʼ салда тараӈгу. Гостехнадзорхана манзаранаˮ маˮнисямˮ, есяхаˮнатоʼ инспекторʼ манзаямʼ салдамбаӈгуˮ. Тикы нядоʼ ӈэдалёрманʼ харвана ненэциеˮ теневабцо манэсарта. Ненэцяндʼ ядэрмахартада ӈаниʼ мирˮ ӈэˮнивˮ. Тедариʼ едэй сертоʼ ӈобтʼ тасламбаӈгудоʼ.</p><p>Тарця еся ханхаˮ тамна тракторˮ, мотовездеходˮ, экскаваторˮ, сырамʼ маˮламба мэта машинˮ нятаˮ. Нерцюбтʼ Россияхананаˮ B, С категорийˮ мэтаˮ ватомʼ сибемдець.</p><p>Нюдяне Махакуйʼ падвы</p><p></p><p></p>

Тарана юн

<div class="content-lead">Ты пэртяхаˮ тедаʼ поʼ самляӈг юрˮ мянʼ тыˮ пардонˮ ларасмʼ митаˮ. Яӈганаваʼ ёльцьӈгана тыˮ лекарˮ тикыдоʼ хартоʼ ӈэсыʼ терхаˮ тэволаӈгудоʼ.</div><p>Митерпадаˮ пардонтоʼ лабтэйˮ ӈаниˮ похот манэць яӈгаˮ. Тедаʼ ларасакудоʼ хойʼ няна мюсермаʼ мальӈгана нива саˮневоӈгдандоʼ еˮэмня мэё неракоход сертавыˮ. Тердоʼ ӈодˮ техэˮ похотатоʼ пансаркаˮ. Ӈокханда мюняндоʼ сидя юкад вата самляӈг пардонˮ тэнзˮ ӈаˮ. Ханяӈыдоʼ тыʼ сёнзяʼ мюй хабцяӈо савумдамба мэтаˮ. Тыʼ тобаʼ хадеро масыба, мерю савумдамба мэтаˮ ӈамгэˮ таняˮ. Неноховавна епдяхана неняӈгахат, пилёхот ты лэтрамба таранаˮ ӈамгэˮ мэвыˮ. Тикыˮ пардонхаˮна ханзерˮ тымʼ лекарабта таравамʼ хусувэй тэсавэй ненэцьʼ мянувнанда хамэдамбида.</p><p>Пилиˮ нерденаӈэ ларасаку Пэˮ нямна мюсертаˮ няˮмарӈаць. Неняӈгˮ ирыхына тарця тыˮ лекарˮ пардонˮ лабтэйˮ ӈаниˮ яхаˮ тэваӈгудˮ. Тыˮ пардонˮ хойʼ терˮ ненэцяˮ хардахаˮнатоʼ няˮма ӈаниʼ пирˮӈаˮ.</p><p>Нюдяне Махакуйʼ падвы</p><p></p>

Тыˮ пардонˮ ларас

Сидяӈг: Юлия Талееваʼ тадтавы

<div class="content-lead">Янаˮ ӈарка ялямʼ яхананаˮ хусувэй поʼ сававна мэцетываˮ. Тюку мэвахана нумда ибась, хаеракось.</div><p>Округхананаˮ ӈокаˮ тэнзˮ ненэцяˮ ханёсиˮ илеˮ. Хусувэдоʼ харта иланда мэсыдмʼ минре. Яхаданаˮ нэкалпадаˮ ӈавориˮ хавна, ӈаниˮ тарана серˮ таняˮ. Таремʼ ӈодˮ хусувэдоʼ хареˮ иланда саирмʼ нерняʼ минре. Тарця сермʼ ӈобˮ ӈарка хэбидя яляхана манэцетыдмʼ. Округхананаˮ ӈарка янаˮ хэбидя яляхана хареˮ панынаˮ серыбасетываˮ. Тюку поʼ ӈодˮ ӈаниʼ нувʼ панударевʼ хаяваць.</p><p>Мань ӈодˮ ной паными мэць тодамзь. Хэбидя ялянʼ хартоʼ ембяродоʼ мэтаˮ, хуркариˮ тэнзхад перенаˮ ӈобтʼ маˮлэйдаць. Нитоʼ пумна паской паныдоʼ мэць ненэцяˮ тарпорӈаць. «Юман» нюбета чувашˮ яʼ терˮ, ӈанидоʼ казакˮ ембяро мэць ядаць. Луциˮ косовороткамʼ серхая Белушье ӈэсыхыд тарпвыˮ таняць. Хареˮ паныдоʼ мэтаˮ хадянанаˮ манэˮӈаваць. Пысабцо! «Вурам митя» ӈысмиˮ клубʼ мелˮмана сэдоранаˮ поʼ ямбанʼ сэдыбавыˮ едэйˮ ӈысмиˮ паныдоʼ мэць ӈадимяць. Ненэй ненэциеˮ «Мелˮ неˮ» клубʼ терˮ ёльце паскояць. Светлана Попова не нюхуюта няʼ, Ольга Бобрикова хасава ӈацекэцямʼ вадась. Канин яʼ паныдоʼ мэць ядаць. Нюдя яʼ панэхэна Екатерина Мужикова товысь. Поӈгнандоʼ мань ӈодˮ Ӈарка яʼ терˮ панэми мэць маймба ядадамзь. Мале понʼ тарця ялянʼ хамекудамзь. Ханзерˮ сэдвы ӈэвамда тензибтембидамзь, тарана ӈаворида маˮладамзь. Ненэциеˮ ембдярˮми сомбойкоцясь. Хойхана мюсерта мелˮмана сэдорана неӈэ пыхыдами тасламбивась. Панэкоми тецьда яляхана сава ӈэӈгу, хаеркана ни ядембаӈгуˮ. Тикахад невхыˮ похоˮнаˮ илевыˮ перениˮниˮ илʼ мэсыдмʼ нерняʼ минрева харвабцоми ӈармдамби. Ненэй ненэцяˮ паныдоʼ тэри таремʼ мэтаˮ ниˮ ӈаˮ, хусувэнда харта паӈода таня. Паской панымʼ мэць яда сейхана ёльце савараха.</p><p>Малʼ хартоʼ ембдяродоʼ мэˮӈаць</p><p>Хэбидя яляхана «Марадʼ сей» нюбета ядэлававаˮ нувʼ панурахась. Паской паныдоʼ мэтаˮ хибяриˮ ӈокаць, нидоʼ мание маймбиць. Хусувэй хибяри ваˮлёйӈэ пыхыдамда тасламбидась — ӈарка, мэё яхана илева ябдоʼ. Сава серˮ тэри таремʼ ваераӈгана ни ӈаˮ. Тикыʼ пуд ныланаванзь товы хибяри лаханакурць няˮайнась. «Ойраты» нюбета клуб калмыкˮ тандаяʼ ӈадимдевы. Пыдоʼ ӈаниʼ поӈгананаˮ мэць. Тельвискахад товы, Киркеева Дина, лекарˮ мякана манзарана, мась:</p><p>— Округхананаˮ калмыкˮ ӈокаˮ ниˮ ӈаˮ. Маняˮ мядʼ терсавэй самляӈг поʼ тяхана товаць. Нянанаˮ сава, ханяхартʼ хэванзь ниваˮ ятнаˮ. Хареˮ ембдяронаˮ мэць товаць. Ёльце сава сермʼ тюку яхана иленаˮ сертавыˮ. Хусувэваˮ харта иланда мэсыдмʼ тасламбахая иле. Ихина саць сава.</p><p>Анна Канюкова Нюдя яʼ тер, паӈгода таняд переˮ. Хонгурейхана вадёвы ӈаниʼ лаханась:</p><p>— Тюку яляʼ Нюдя яʼ терˮ панымʼ мэˮӈадмʼ. Небями мелˮмана сэдорана несь. Тенев, ӈока панэкоци сэдсеты. Мань ӈодˮ небяни тотревʼ сэдора пыхыдами тохолаванʼ харвав. Сяхариʼ хареˮ панэдами сэдаӈгудмʼ. Сяӈокˮ хибяриˮ тюкохона маˮлыˮ, малʼ хартоʼ ебдяродоʼ мэˮӈаˮ. Ихинани маймбабцо.</p><p>Яхананаˮ хусувэй поʼ тарця тарана сермʼ минресетыˮ. Ӈобˮ яляʼ ненэцяˮ хареˮ паӈготоʼ паны серсетыˮ. Тодоˮ тэнзаваˮ ӈэбˮнанаˮ ӈодˮ — малʼ Россиянаˮ терваˮ, янаˮ иламʼ нерняʼ минренаваˮ.</p><p>Юлия Талееваʼ падвы</p><p>Сидяӈгˮ: Юлия Талееваʼ тадтавыˮ</p><p></p>

Тодоˮ тэнзаӈэ ӈопой яʼ терваˮ

<div class="content-lead">Хоˮяʼ Саля хардахана иленаˮ ӈокаюмʼ пелядоʼ илеваʼ ёртиˮ, нямзэхэртиˮ манзаи хариˮ минренаˮ ненэцяˮ. Пэʼ терˮ ненэцяˮ неняӈгʼ ирыхына халямʼ пэртиˮ ӈарка ялямʼ ӈобнзерˮ ядабтамбидоʼ.</div><p>Хоˮ Саля хардахана илена Гавриил Алексеевич Лаптандерʼ вадавна, халямʼ пэрти ненэциеˮ едʼ ӈэда ӈарка яля 1965 поход неняӈгˮ ирыхына ӈэванзь таславэдоʼ. Тиканда мале матˮ юˮ нюртей поʼ маняˮ яхананаˮ тарця ялямʼ ядабтамбидоʼ.</p><p>Тикы яляʼ Пэʼ терˮ хуркариˮ хардахататоʼ ӈобтʼ Хоˮ Салянʼ маˮлыць. Ӈаниˮ яхат товыˮ мядондидоʼ ӈобтаремʼ таняць. Хубтакохона явʼ варанʼ хойʼ ӈанохона пирдырмандаˮ илебейˮ ненэцяˮ маˮлыць. Тюку поʼ тодо сидя ненэциеˮмана, сиˮив ӈанэрць ханˮӈаць. Нитиʼ нерняюʼ Григорий Негачи няби Андрей Негачи хаˮамъяханзь. Ӈанэртаˮ нитоʼ пирдырманʼ, явʼ лаӈгʼ ниня мале сян мядˮ терˮ хартоʼ мысытоʼ серʼ халяʼ евэйˮ пиримбиць. Ханяӈыдоʼ невхыˮ хаданахататоʼ намдвытоʼ, манэˮмытоʼ серˮ пиреӈгурӈаць. Хусувэндоʼ пиревы евэй ӈавудоˮӈась.</p><p>Сёбарˮ «Земля спорта» ӈарка пирдамахана пыхыдыдоʼ хорпидонзь. ГТОʼ няюʼ таславыˮ хуркариˮ пирдырми помнандоʼ мэˮӈаць. Россияʼ яʼ терˮ юнета Имант Бальчитисʼ вадавна, сямянхат няхататоʼ ваˮлёйˮ сёбарˮ тамна ӈарка пирдырмахаˮ хэсь пиртадоʼ.</p><p>Яляʼ ертʼ тэвмахаданда, Хоˮ саляʼ харадʼ лата сехэрэвна ӈокаˮ мядʼ терˮ ӈарка площадьʼ няюʼ ялъядаць. Ӈулиˮ нерняна сямянхат нюдяˮ ӈацекыдоʼ минрець. Ядвандоʼ серʼ сё мэˮӈаць, маймбиць, хусувэндоʼ ида савась.</p><p>Ӈокаˮ ненэцие ӈарка площадянʼ маˮлёхова, хуркариˮ илекаˮ серˮ пэйдаць. Нердеʼ Заксобранияʼ няд, АПКʼ Департаментʼ няд, райондоʼ ӈэвахана мэнахад халямʼ пэртиˮ манзаиˮ хари сававна минренаˮ манзараниˮ едʼ вади мэˮӈаць.</p><p>Тикыˮ пуд халямʼ сертабававна пирдырӈаць. Хасаваˮ ханибтевы халямʼ сертабиць. Неˮ едэйˮ няˮамвыˮ халэ хырабиць. Тадʼ пуна таӈы ембдяро манэˮлабтамбиць. Хабиˮ, ӈысмаˮ, ненэй ненэциеˮ сэдвыˮ паныˮ, имбытадоʼ манэˮӈаць. Тикы яляʼ ваˮлёйˮ, сёбарˮ, мелˮ хибяˮ ханяӈэхэртадоʼ ӈудаʼ терсиˮ нись ханьˮ.</p><p>Товыˮ ненэциеˮ едʼ хуркариˮ илекаˮ сянакубц сертабиць. Тикахана ӈэдаˮ выставкаˮ сававна инʼ хаˮморӈаць. Мядоʼ терˮ нямна ӈацекыˮ сертавыˮ падтами ӈыдавыць. Ёртиˮ, ватаӈгодиˮ, халямʼ пэртиˮ манзаиˮ тэнзˮ серо манэˮлабтамбадаˮ сидяӈгˮ таняць. Музейʼ манзаранаˮ хэвыˮ похоˮна ӈанохоˮна мэˮмы матороˮ тэнз манэˮлабтярӈэ ӈыдавыць. Ӈавна халямʼ пэртаˮ ӈанохоˮнатоʼ хуркариˮ маторо ӈэдалёрць мэˮмыˮ.</p><p>Ӈарка ярмарка яляʼ ямбанʼ миӈась. Ненэцяˮ таранаˮ ӈамгэри тэмдарамбиць.</p><p>Пэʼ терˮ халямʼ пэртиˮ ӈарка ялямʼ мядʼ терсавэй ӈобнзерˮ ядабтамбвадоʼ ӈулиˮ сава. Иринатоʼ нисянатоʼ пэрмыˮ серˮ яʼ тахаˮ ниˮ ёходˮ. Ненэцяˮ пилиˮ Саляʼ явʼ мюмня халямʼ пэртаˮ.</p><p>Автор: Алла Вануйтоʼ падвы</p><p>Сидяӈгˮ: Алла Вануйтоʼ тадтавыˮ</p><p></p>

Халямʼ пэртиˮ ӈарка яля

<div class="content-lead">Чуки похона мыԓичуӈ тэмстуӈ чадю нешайˮ дил нямна, деты хома шеԓ ӈычимты. Тат’ навэт Ӈэԓм’ чеԓˮ нешаˮ, ӈамсутатуӈ детхятуӈ каԓятатуӈ катамантуӈ мэт, шан’ патаԓ ниш’тоныˮ патанˮ.</div><p>Каԓиˮ дет ӈайта патаԓ патватмыӈ каԓиташтоныˮ. Няймы тэмстуӈ чадю нешайˮ дет тасԓёта ФАДН шеԓтамы Реестрхана нимитуӈ пачумаˮ таԓа. Таԓьшанта дякоп, нешиӈ патаԓшипëй ни’ каԓитан. Пуӈ дямпан шаӈок каԓиˮ ӈуп нешаӈ каташат, таԓьша шеԓоˮ диԓишатуӈ регионханатуӈ тасԓаштондятуӈ.</p><p>Чики неԓьня выӈкна, петаԓахана диԓинаˮ нешаˮ ӈамсутатуӈ детхятуӈ каԓятатуӈ катаман хапнантоӈ, неԓьшут патаԓтатуӈ паташтушˮ. Непоӈ Пюԓ дяханана дюԓкат ва’та чет’дюˮ нешаˮ таԓьша каԓиˮ патаԓ патӈашˮ. Мятачеԓˮ ӈука ӈайта нешаӈкна ӈукаˮ каԓяˮ таԓаˮ. Ӈамсутатуӈ каԓятатуӈ мэмантуӈ камна, нешаӈиˮ катамайтуӈ каԓитуӈ пеԓь ты”туӈ, вэдякутуӈ каԓят мэштутуӈ. Тат’ӈу выӈкна чуувна диԓина нешиӈ шадят таньше кусамэй пуӈ каԓиˮ патԓуˮ пытыпёты.</p><p>Таԓям патаԓ патватмыӈ каԓитама нянантоӈ хома. Кимя тэмстуӈ чадю нешайˮ дет тасԓёта Реестрхана нимта ни’ пычу, чики нешиӈ тамна понта шеԓ квотаӈ дет ӈайта патаԓ паташтоны. Таԓьша каԓиˮ патаԓт МФЦмана, «Госуслугиˮ ними’та порталмана неԓьшут Хаԓяӈкаԓтыхина ӈайта АПК департаментан ӈайтапта таԓаˮ.</p><p>Тат товнта похона каԓям катаман ха’таˮ, ӈуп диԓитуӈ кыди, таԓям патԓотоӈ меԓ шеԓташь таԓаӈаˮ. Тэмстуӈ чадю нешайˮ дет тасԓёта Реестрхана ними’туӈ пачутаˮ ӈай, ӈамсутатуӈ каԓятатуӈ катамантуӈ мэты, навэт шан’ каԓиˮ патԓуˮ ниш’тоныˮ патанˮ.</p><p>Лариса Айваседо патмы</p><p></p>

Хома шеԓ ӈычимты

Сидяӈг: Альберт Окотэттоʼ тадтавы

<div class="content-lead">Юнета сёбарˮ ненэй ненэцяʼ няваˮ, Альберт Окотэтто ямб сехэрэмда тедаʼ мале нябимдей иры пирдалембида. Маӈгтыˮ ирыʼ нюртей яляхад Москваʼ няд Ӈэрмʼ няʼ харта яˮалринда нэкалˮӈадась.</div><p>Сюрмбаванда ямбанʼ интернетʼ мутравна ненэцяӈгˮ ханяна мэванда нямна паднасеты. Ӈокханда сехэрэнда ямбдада — 3200 километрʼ пирˮ. Пуданда юдʼ мянʼ ехэрана ямʼ хаеӈгу. Неняӈгˮ ирыʼ юдимдей яляʼ Хабиˮ яʼ варанʼ тэвавыць. Югорскхад Советскийʼ ёльцяндʼ таняна иленаˮ сёбарˮ ненэцяˮ нянанда сюрмбавыць.</p><p>Альберт ёльце вырэй ӈэрмʼ тер. Ханяӈэхэна ӈулиˮ яˮавласеты. Хусувэй яляʼ 55-60 километрмʼ пирдалембасеты. Сямянхат ӈока километрмʼ ӈопой яляʼ тяхаʼ Таёжный нюбета хардахад Советскийʼ няюʼ сюрмба мадавэда. Таʼ мальӈгана 73 километрмʼ пирдалевы.</p><p>Таремʼ сюрмба хуркариˮ паскойˮ я хомби, ехэранаˮ яʼ тер торомдамби. ВКонтакте страницахананда падсетыда. Ӈопой юнда ёльце илекась:</p><p>— Нюдя ӈэвани мальӈгэхэд боксхана тароˮмамʼ харвабтадмʼ. Таʼ мальӈгана Костя Цзюʼ сидяӈг мяканани танясь. Тамна Москва маркана таславась: «Сехэрэни ниня Серов нюбета харад таняӈгу. Таняна ӈавнанда ненадо сёбарˮ илесь. Тикы хардакомʼ манэць тараӈгу». Ӈавэдана Серовʼ хэванʼ тэввани серʼ сиˮми таняӈы яʼ тер Павел нядась. Владимир Цезаревич Черниʼ мятʼ мядоманзь хаянинзь. Таремʼ мань юнета сёбармʼ тохоламбавы ненэцямʼ лахана няˮӈадамзь. Пыда ӈавнанда Константин Цзюʼ тренерӈэ таравы. Ихинани ӈацекэдревʼ ӈулиˮ маймбидамзь. Ӈудани терӈэ няданда харта падвы толаӈгобцямда няˮмадамзь. Мякананда сеӈгадамзь. Тикы ялями понʼ тенеӈгув.</p><p>Хабиˮ явна миманда мальӈгана Альберт тарця юнмʼ ӈэдабтась: «Мале сян яляʼ ямбанʼ интернетʼ мутравна лахана нив пиратˮ. Сехэрэни ниня ӈобкарт харад, лапка яӈгода. Сиˮми нёдаˮ ёпюˮ. Серониˮ саваˮ».</p><p>«Няръяна Ӈэрм»хана паднанаӈэ нянда ӈаниʼ лаханаваˮ: «Нерняриʼ сюрмбюˮ! Неняӈгˮ, сарё, сата мерця сит нёяˮ табˮламбюˮ. Яʼ поӈгана нядаӈгодар ӈока ӈэя».</p><p> Галина Окотэттоʼ падвы</p><p></p>

Нерняриʼ сюрмби

Сидяӈг: интернетхад ховы

<div class="content-lead">Тандая’ ханя’ сава юнм’ намдаваць. Ӈопой яна’’ тер пирибтя ненэцие’’ е’’эмня толаӈгобцям’ падвысь. Ямална’’ толаӈгулава’ яха’’на хось пиртара’’.</div><p>Саляӈгардахана вадёданвы, тоходанвы Анфиса Сэротэтто «Мамако» нюбета книгам’ падвысь. Луца вадавна падвы иле’’мяда нюртейда. Тикында нерцю’’ харе’’ хэтвы хайнана вади падыбасеты. Пыхыдамда «Ругинский клуб»‘ тер’’ понд’ мэдась. Тедалахана тикы’’ няхатата ӈарка няд’’мам’ хомби. Ӈобӈгэв’ сита нерня’ пэраць нядаӈгу’’.</p><p>Ӈокханда ненэцие’’ е’’эмня ӈадимдеванда толаӈгобцяда няхар’’ юр’’ ӈэӈгу. Мал’ округна’’ паднани’’ падвы ялян’ ӈадимдембади’’ серо теневани’’ мандал’’ таром’ няд’’мяць ӈадимдеӈгуда.</p><p>Анфиса сертавы манзаянда ед’ тарем’ лаханась: «Тюку падвэми мале сян по’ манзая’’ӈавась. Ихинани ёльце ваде’’ман, манэ’’лабтаван харвавась. Толаӈгода’’ ненэцяӈг’’ илебей не’, Едэйне’ иле’’мям’ намдрамбаӈгудм’. Падвэхэнани хар’’н яни тер мэневами, ями сямами, ненэй не, небя саву’’мами ваде’’ӈадм’».</p><p>Ӈавна паднана няна’’ иринада, хаданада вымна мюсерӈаць. Едэйненда паӈг’’ ӈод’’ ӈани’ хой’ няд перенарха’’. Несэй иланд’ тэвавахана сита невхы’’ табеко’’ нядаби’’, нерня’ иланд’ табедамби’’.</p><p>Автор: Анна Яптик’ падвы</p>

Паднана не

<div class="content-lead">Пюԓ дяхана ӈайта Толькахана диԓина’’, каԓитана’’ капи’’ ӈупчики мансдянтуӈ дет тонԓюта дяԓям мэ’ӈаш’’.</div><p>Чики дяԓяхана чуувна петаԓахана диԓина’’ капи’’ чупей’ каԓтан тоӈаш’’. Пы’тоӈ ӈупчики нэхэмтуӈ, нюӈк ӈаймямтуӈ конуԓпёш поӈкнатуӈ мянаԓяш’’. Ӈанохана ԓапяташ матапёмытуӈ дяхантуӈ пен ӈуп километраӈ кун ӈаймай. Ӈаԓка не’’туӈ мянаԓтан ӈашкиуди’’ ӈупчики поӈкнатуӈ шана’куш’’, Пюԓ дяханана ӈайта Ассоциацихит «Ямал-потомкам!» мячисы’’ ня’амӈаш’’. Поӈкнатуӈ шана’ко мянаԓмантуӈ камна Толькахана диԓина’’ капи’’ дечтуӈ лекаԓки’’ ӈычимчеӈаш’’. Толька куптана ӈайта нюча каԓват, таԓям лекаԓ’’ таньнямна ӈопкат ниш’ту’’ дятэԓ’’.</p><p>Чуки дилхана куԓкаԓи’’ кавша’’ ӈычимшту’’. Ненымана тавсуԓта’’ деча’’ вайма’’. Таԓям каԓитани’’ дет тонԓюта дяԓян томы’’ капи’’ чупей пы’татуӈ лекаԓт ӈычимчеӈаш’’. Чикиӈ камна кыпудятуӈ таттаӈаш’’, УЗИхана дечтуӈ маныӈаш’’, дена’’ чимутуӈ чим’’ лекаԓт ӈычимчеӈаш’’.</p><p>Чуки пома’’ — дечашама пуӈc тунԓы, Ямална ӈаԓка веԓв таньше тасԓамы. Дечашама — ненэй ӈаԓкамана таԓана шеԓ. Таԓям таӈичохона дёԓеԓьш чепьмантуӈ неԓьня каԓитана’’ капиди’’ мятчеԓ’’ хомана ныптаку’’, дечтуӈ лекаԓки’’ ӈычимчеӈа’’. Татнеԓьняӈ «Пуровская» общинахана мансԓанна’’ шан’ таньше мэма ӈудютуӈ дякуты, таӈичохона дяԓи’’ тахана каԓиташтоны’’.</p><p>Автор: Лариса Айваседо патмы</p>

Ныптаку’’, дечтуӈ маныӈа’’

Фото: Алла Вануйто / Няръяна Нгэрм

<div class="content-lead">Салехардахана ӈэда «Наследие» толаӈгулавахана ӈэрм’ тер’’ яна’’ юнета’’ ненэця’’ хуркари илека ӈаво минре’’. Тикан’ ӈоб’’ тарця сава лахарём’ мэ’’манзь Валентина Нёлёковна Няруй тэворӈась.</div><p>Ӈули’’ нерде’ ӈацекы’’ ед’ минрена «Голоса Ямала» нюбета проектм’ тидхалембада нита ня’ ӈацекэхэ’’на лаханакурмысь. Ваде’’мыда нюдя ӈэванда мальӈгэхэд нисянданда, небяхаданда намдавы’’ табекуда. Ӈацекы’’ мяка’’нато’ намдорта’’ табекудо’ ӈобтикы нянда ваде’’ядонзь. Пыдо’ ӈобкана ханзер’’ ӈарка’’ ненэцие’’ табеку няд’’мяць пыхыдм’ нерня’ пэрма’ нямна тасалкуць. Лахарёндо’ пуняна Валентина Нёлёковна нянда инзелевы’’ нита ня’ яӈга тохолковам’ сертась. Ӈацекы’’ ихинандо’ пойда’’ табекуто’ хари падарт’ падтамбидонзь.</p><p>Ӈацекы’’ пуд Валентина Нёлековна ӈарка’’ ненэцие’’ няць лахарёмда тамна’ тяха’ вэтадась. Тикы яля’ хэвханда товы’’ нида мал’ теневана нида ӈэвыць. Ӈули’’ нерде’ В. Няруй пили’’ нюдя ӈэванда мальӈгэхэд намдормыта, манэ’’мыта нямна лаханась. Вадёданванда ямбан’ тикы’’ серода пыда иланда няю’ хурка таром’ ха’’аврамам’ ваде’’ӈась. Ханзер’’ тохолкоди’’ няби ӈацекы тохоламбади’’ ед’ нядабава’ падро падыбавамда ӈани’ тензебтембидась. Хусувэй падвэмда харакута’ сер’ тидхалея хэтыбидась.</p><div class="content-new-image"><img alt="pic" src="https://storage.yandexcloud.net/ym-sites-static/374b2ef3-2e4.webp" style="width:100%" height="1440" width="2559"/><div class="content-image_child">Фото: Анна Яптик / Няръяна Нгэрм</div></div><p>Товы’’ нида пыда етя сава вади хэтабиць, иле’’мяхатато’ хуркари тензебтембадидо’ ваде’’ӈаць. Мядонди’’ поӈгана Вячеслав Хобкович Вануйто мэсь, ярабц, сюдбабц теневана ненэць’. Я’ ханзер’’ ӈадиво’’ма’ нямна ӈэда сюдбабц’ пелям’ ханась. Геннадий Павлович Кельчин луца вадахад хаби’’ вадавна харта падвы «Конёк-Горбунок» лаханако’ пелям’ сёӈэ мэ’’ӈась. Нита мэта’’ вада’’ ихинанда тэри саваць. Ханяӈэхэ’’на харта падвыда ӈобкана ӈани’ сёӈэ ханабидонзь.</p><p>Лахарёндо’ пуданахана Валентина Нёлековна няби Галина Хывдалевна невхы’’ табеку’’ сер’ ӈобт’ ма’’лёвы’’ ниди’ сяйлабтамбихинзь. Пыди’ товы’’ нита ня’ толь’ тяхана мяд’ тер’’ мэта’’ мэсыдо тензебтембихинзь.</p><p>Тикы яля’ тарця ӈоб’’ сава нява’’ толаӈгулава’ хардахана ядабтамбиваць. Валентина Нёлековна Няруй ненэй ненэцие’’ юнета ненэць’. Ӈока по’’ ӈацекы тохоламбади’’ няю’ нядаӈгода’’ падро сертабадаӈэ манзарась. Тохолкоди’’ няю’ ненэця’ вадавна ӈэда толаӈгобцяӈо падыби. Тарця сава нява’’ маня’’ вадава’’, илна’’ саирм’ нерня’ падаркана минре сидна’’ нядаби.</p><p>Автор: Алла Вануйто’ падвы</p>

Табеку’’ сер’ лахана

Фото: Марина Яр / Няръяна Нгэрм

<div class="content-lead">Маӈгты’’ иры’ юкад вата самлянзимдей яляхана округханана’’ Саля’ яв’ мюмня халяда пэяд’’. Хахаяда ӈэда предприятий’ манзарана’’ Саля’ яв’ икня таӈга хане’’.</div><p>Приуральской районхана таӈы халядавадо’ пэй’’. Аксарковской халядани’’ предприятий’ ненэциедо’ Саля’ яврихина ни’’ халяда’’, пыдо’ еси’’ хара’’мана ватаӈго пир’’ӈадо’. Ёртидо’ юкад вата яхана халям’ хадаби’’, ӈокханда няхар’’ ю’’ поӈга’ тер’’ манзара’’. Тюку по’ мале няхар’’ юр’’ тонна халям’ ватавыць. Ӈэрёй’ салабанда ёльцянд’ тамна хасаваюр’’ тонна халям’ ӈыдаванзь тасламби’’.</p><p>Аксарковской халядани’’ предприятий’ ерв вадавна, тюку по’ малева’ ёльцянд’ тамна мат’’ юр’’ тонна’ халям’ ӈыдабато’ тара. Тикыдо’ таросяда халя’’ ӈэӈгу’’: пыри’’, нёя’’, падвы халя’’, лысу’’.</p><p>Ӈэрм’ тер’’ е’’эмня халядава’ няю’ саць сава юнм’ намдаваць. Сидна’’ халэ хадаба ӈэдарамбаӈгу’’. Вэба’ иры’ нердена яляхад едэй’’ вато’’ ӈадимда’’. Тикахана ӈэрм’ тер’’ ӈаябаддамдо’ хадавандо’ няю’ ва’’лер’’ сертаба ни тараӈгу’’. Пыхыдадо’ ӈэрм’ тер’’ реестран’ падвы’’ сяни яӈорэй’ халям’ хадабава’ няю’ падро ни’’ сертабаӈгу’’. Пыхыдадо’ реестран’ нивы падрабтавы’’ ненэця’’ пилю’’ иры’ 25 яля’ ӈэсонд’ падродо’ падбато’ тараӈгу’’. Тикахана тованда 2027 похона таӈга ханеӈгу’’. Падродо’ халядани’’, ты пэрти’’ серо’’ тидхалембада департаментан’ ӈэдарамбабато’ тараӈгу. Ти: Салехард, улица Республики 73. Вэба’ иры’ нюртей яляхад яноларабато’ ни серос’’.</p><p>Тедари’ округна’’ тиӈгывна халядана’’ поӈгадо’ икад терси’’ нидо’ нэкалпю’’.</p><p>Автор: Марина Ярой’ падвы</p>

Халяда’’

Сидяӈг: Мария Окотэтто’  тавы

<div class="content-lead">Тев’ ёльцяӈгана та’ школам’ малевы’’ ӈули’’ тэтна’’. Пыдо’ едэй иланд’ хамеку’’. Сёнзито’ мюня ӈобтикы няркна’’. Таддикахад хусувэйдо’ тамна’ тяха’ тохолко таравамда хамэдамбида. Хой’ няна мэнахарт’’ падродо’ ма’’ламби’’, ӈэдарамби’’.</div><p>Сёяха’ тер Ярослав Ӈокадэта 10 классм’ малесь. Таминда колледжан’ хэсь таславэда. Сёбар’’ хасава. Ты пэрти’’ сянакова’ яля’ мальӈгана сяхаринда пирдырцеты. Яр-Салян’ тэворцеты, Саляӈгардахаван’ тэворо’’мада яӈгу. Теда’ хой’ нямна мюсерӈа. Падрода Саляӈгардахана мэна ӈарка не няда ми’’манзь мэйда.</p><p>Не нямда хомбидамзь. Мария тарем’ ваде’’ӈадась:</p><p>— Ӈани яляхана е’’эйдани нюдяко нями тюкон’ тонараха ӈэӈгу. Мань Сёяхан’ хандадм’. Сита нядабавандида таняӈгу’’. Харадм’ таӈга торомдаӈгуда. Нянда табекурӈадамзь, физкультурам’ пэртаӈэ хань’’, сяхари’ сёбар’’ ӈацекэхэ’’на манзараӈгун, тодо’’ ё’’ тиӈгывна ӈэда пирдырмаха’’ хантан. Ма’’нисяв: «Машин’’ сулорпадаӈэ, ты’’ лекараӈэ хэван’ харвадм’. Пон’ вунидм’ тохолкод’’». Мань ма’’нисядам, няхаромдэй манзая’ тэнзар ӈани’ таняява. Ӈани ӈопойданда падуванзь хандадм’, нябихибида мале сита тохоламбдада харта ӈэдарэйдась.</p><p>Ӈани’ ӈопой тохолкованзь ятнана тидянди’ ню — Роман Ӈокадэта. Ӈобӈгэв’ нянандо’ та’ мюсерманзь турӈа. Харта нида выӈгана нядэ’’, халям’ пэрӈа’’. Неканда тотрев’ ӈобтикы сёбар’’, нерняри’ ӈэда ненэць’. Пыда 9 класс’ пуд тохолкованзь хэванзь мэ, машин сулорпади’’ манзаям’ торомдамбаӈгу.</p><p>Тюку няхаюна’’ пилю’’ иры’ нюртей ялэ’’ пиркана хардавна ӈадимдаӈаха’. Пуна март’ тиртя ӈанохона ӈэдалаӈгуху’. Тикахавад несэй иланд’ ха’’маӈгуху’, мяканди’ ӈояк’’ тэвортаӈаха’. Тохолко мале’’мяхаданди’ янди’ тер’’ ед’ таромди’ минреӈгуди’.</p><p>Автор: Анна Яптик</p>

Тохолкованзь выӈгад тутӈаха’

Фото: Марина Яр / Няряъна Нгэрм

<div class="content-lead">Тюку’’ тодо’’ яхат ма’’лавы юн’’, мал’’ ты’’ нямна ӈа’’. Ханяна яӈгана’’, хибя сяӈок тым’ пардонтавы, сямбират’ яӈганаӈгу’’ ӈобт’ ма’’лэйнаць. Таддикахад ты пэртя’’ едэй мутры ханзер’’ мэ’’мам’ ваде’’ӈава’’.</div><p>Тасу’ явхана тыдо’ поса’ хабцяӈгад маӈгты’’ иры’ нердена ялэ’’ пиркана яӈгаба пяйдонзь. Манзаямдо’ вэба’ иры’ ӈэсонд’ минреӈгудо’. Тасу’ яв’, Паюте’’э’, Ӈоя’, Ӈэдя’ выӈгана мэнаха’’ тэворта’’. Теда’ яханандо’ ю’’ ты’’ лекар’’ бригада’’ яӈгана’’. Тюку яля’ пиркана самляӈг ю’’ ёнар’’ тым’ пардонтавыць. Таняна сидя юр’’ ю’’ няхар’’ ёнар’’ тым’ яӈгабато’ серо’’ӈа. Тикыто’ ирмня бурцеллёз хабцям’ таславандо’ няю’ тэхэт вэям’ хан’’ла’’. Манзаямдо’ яна’’ тиӈгывна сяхаринда мирци’’ пэрцетыдо’.</p><p>Пэ’’ хою’’ няна ӈод’’ ты’’ лекар’’ ӈобтикы тэтна’’. Яханандо’ мат’’ ю’’ ӈоб’’ ёнар’’ тым’ яӈгаӈгу’’. Тюку по’ яноць пардонтаӈго пэйдаць. Округна’’ ты’’ лекар’’ ӈэвахана мэна ерв Евгений Попов’ вадавна, нямэхэна пон’ нарась, ӈадьбято’ пэ’’ тер’’ яноць яӈгана пэйдаць. Тецьдахана ты’’ лекар’’ манзара нидо’ пирас’’. Пыдо’ пардондо’ икня поёлтамбада’’, тикар тецьда нумгана салабаӈэ хэсь пир’’ӈада. Тарем’ ӈод’’ тыто’ ӈокаюм’ пелям’ мале пардонтавыдонзь. Сельбя’ ёльцянд’ 547 ёнар’’ тым’ яӈгаванзь тасламби’’.</p><p>Сямянхат ӈока тым’ — Ямальской районхана яӈгавы’’, пуданда — Тазовской район миӈа, няхаромдэй — Приуральской район. Ты’’ хавна малкось вэнеко ӈани’ пардонтамбидо’. Вэнеко’’ хаӈгулабто’ ты хабцяӈгана ӈани’ палабта пиртыдо’.</p><p>Яна’’ тиӈгывна ты пэртина’’ тарем’ иле’’. Ӈамгэ’ пиркана Ямална’’ ӈардавна сяӈок сую ӈадимам’ намдаӈгува’’. Тедари’ ӈатенава’’.</p><p>Автор: Марина Яр’ падвы</p>

Тына’’ едясяӈгу’’

Сидяӈг: Макар Окотэтто’ тавы

<div class="content-lead">Маӈгты’’ иры’ нердена’’ яляха’’на Пэ’ саля’ хэвхы тохони яда поӈгарманзь хан’’ӈадамзь. Тамальӈгана сидя юдерцям’ ня’’мадамзь. Мякни ядадм’, тарем’ яднахани телефонми муно’’лы’’. Москва’ няд минда вада то: «Торова, Макар! Алтай’ нямна ӈэдалёрман нин харва’’?» Мань мадм’: «Ханядм’ харва’’!» Тарем’ сян яля’ иле’’мяхадани тиртя ӈано’ мю’ ӈамдыдм’, ехэрана ё манэ’’манзь хаядм’. Ӈарка неро явм’ малнда ня’ тандамба пяв.</div><p>Хари’’ вадам’ лэтрава’ нямна ӈэда проект таня. Нюмда — «Языковая арт-резиденция. Музыка слова». Ӈарка яна’’ ханярид ӈэда харто’ вадавнандо’ паднана ненэцие ӈобт’ ма’’ламби. Сидя по’ тяхана мань тикы проектхана мале мэдамзь. Тамальӈгана Республика Башкортостанан’ хан’’ӈаваць.</p><div class="content-new-image"><img alt="pic" src="https://storage.yandexcloud.net/ym-sites-static/e84a016c-82a.webp" style="width:100%" height="970" width="1725"/><div class="content-image_child">Сидяӈг: Макар Окотэтто’ тавы</div></div><p>Теда’ Катуньм’ нюбета яха’ вархана илева’’. Тюкохона юд’ мян’ ялям’ мэтава’’. Ӈокханда сидя ю’’ ненэцяма’’: мал’ паднана’’, вадам’ нерня’ минрена’’. Тикы нини’’ Я’ малан’ тэворо’’мадо’ юӈгу. Мань тюку яхана вы’ хойни нямна иле’’ми вадетаӈэ тарадм’.</p><p>Мядонзэйӈэ «Няръяна Ӈэрм» газетам’ тэврадамзь. Ненэй вадавна падна юн’ падарм’ няхани’’ толабаванзь мипивась. Вадам’ нибто’ ӈод’’ хамэдамбю’’ нянандо’ тарем’ ӈод’’ нюрцям’ ӈэвысь. Тикы’ хавна «Ёртями» тэврадамзь. Падвы толаӈгобцьми я’ ханяримна ӈэдалёрӈа.</p><p>Автор: Макар Окотэтто’ падвы</p>

Няръяна Ӈэрм