Сидяӈг: Лариса Вануйто’ тавы

<div class="content-lead">Ямальской районхана Сёяха’ хардахана «Пясик» нюбета проектм’ минрець. Тет яля’ ямбан’ миӈась. Манзаямдо’ «Лэё» мяд’ тер’’ тидхалембидонзь. Мел’’мана мирць теневана ненэць’ — Никита Львович Хороля таняна мэвысь.</div><p>Пыда округна’’ мелад’’ ненэцие’’ хардахана манзара. Харда па’’мя. Хуркари’’ выставкаха’’на, конкурсха’’на пирдырцеты. Выӈгы иланда саирм’ мивы ӈамгэрихи’’ната манэ’’лабтамбида.</p><p>Сёяха’ терха’’ «Дом культуры» мякана мирмам’ ӈадимдембавы. Теневабцота сер’ ненэцие тохоламбавы. Мирць ӈамгэри’’ танявам’, ханзер’’ мэць таравамдо’ ваде’’мы. Ненэця’’ лэхэд хуркари’’ ӈавэ сертабавы’’. Ханяӈы’’ мяд’ терсавэй’’ турмы’’. Ӈацекы ӈани’ тохоламбавыда. Етя школаханандо’ мастер-классам’ манэ’’лабтамбавы.</p><div class="content-new-image"><img alt="pic" src="https://storage.yandexcloud.net/ym-sites-static/c36332ea-8ff.webp" style="width:100%" height="709" width="1260"/><div class="content-image_child">Сидяӈг: Лариса Вануйто’ тавы</div></div><p>Тикы проектандо’ нямна Лариса Николаевна Вануйтим’ хонрамбидамзь. Пыда тарем’ лаханась:</p><p>— Хахаяда похо’’на Сёяхана’’ ӈэрм’ тер’’ ӈацекы’’ школам’ мале’’мяхадандо’ ӈопойхартадо’ ЯМКан’ мел’’мана миртяӈэ тохолко хэвы ӈэбта сава ӈэӈгусь. Илебей’’ ненэциена’’ ӈобкартадо’ миртяӈэ ни тохолку’’. Теда’ е’’эмнандо’ тюку серм’ ӈадимде идейваць. Грант’ еся мэць проектм’ серта таславаць. Нюрте’’э’ мирць тараванда’’ ӈамгэридава’’ тэмдаваць. Тад пуна тарця манзаям’ сававна теневана ненэцям’ ханзь тарась. Саляӈгарад’ мелад’’ ненэцие’’ манзаралаван’ вадам’ ӈэдараваць. Мирць теневана ненэцяндава’’ пюрӈаваць. Тарем’ Никита Хоролям’ хаӈаваць. Пыда ненэй ненэць’, выӈгы илам’ сававна теневада. Тет яля’ ямбан’ ненэцие, ӈацекы тохоламбись. Тоходаванзь турта ӈокась. Тикы манзаям’ ӈули’’ саву’’ӈадонзь. Школахана тохолкодина’’ поӈгана маси’’ мирмам’ мэнена ӈадимда. Ва’’лёй, пэдава ӈэӈгу. Ӈани похона тамна несэй манзаядва’’ тасламбаӈгува’’.</p><p>Мирманзь турмы Алексадр Ӈокдэтта инда ядэрабцо’’ тарця’’:</p><p>— Мань ӈацекы ӈэвани мальӈгэхэд мирць теневадм’. Хой’ няна тухудамзь. Па’’мя хархана мирцетыдм’. Теда’ «Пясик» проект’ сер’ едэй ӈавэ, машинкам’ тохоладм’. Тикахана лоӈгэйм’ падтадамзь. Падта’’мада — ты’ ӈэва. Ӈули’’ нензел’’ ӈэвы. Ехэрана мутрам’ няд’’мяць нини лоӈгэяд, масерт хар’’ни сертаӈгудм’. Тикан’ ма’’лёвэӈэ ялява’’ сававна мэ’’ӈаваць.</p><p>Тиканда выӈгана илени’’ поӈгана харто’ ихиндо’’ мел’’мана манзара теневана’’ ӈока’’. Ты’’ нямдахат, я’ хора’ лэхэт хуркари’’ масеро, сяр’ лы, пясик, халцо’’лэ мимбасеты’’. Маниеб’’, ихиня сава’’ ӈэсеты’’. Хардахана илени’’ поӈгана ва’’лёйвана мирць теневана’’ ӈани’ танясеты’’.</p><p>Автор: Руфина Окотэтто’ падвы</p>

Мирць тоховы’’

Таттама: А. Пяк таттамы

<div class="content-lead">Чейня нум дюпямшту, дяԓя’’ димпумшту’’. Ӈэԓм’ чеԓ’’ неша’’ няматаԓакуԓма дяԓян ӈанаташтут. Четаӈ выӈкна, петаԓахана диԓина неша’’, каԓтыхина мэна’’ ты’’ падиԓьчи’’ дяԓям «День оленевода» ӈэта’’. Чики праздник’ шаӈкмян тэмс неша’’ хашаӈоӈатуӈ.</div><p>Касама’’ неԓьшут тытуӈ дянямташту’’, ӈайтаԓёш кан’ видян тытуӈ тохоԓашту’’. Каса ӈашки’’ вяԓкуԓоԓьш, нэхэԓумпёш, ха’’моԓьш — таньше мянаԓьш пытатуӈ конуԓпёшту’’. Ни’’ ӈупчики няматаԓакуԓма дяԓям ӈэтаӈа’’. Куԓкаԓи’’ патмы’’ паныдю’’, пеми’’ хайтуԓаӈа’’, ӈочакохот мэкатай’’ ниӈвий пытуԓпи’’, пеми’’ че’эм паӈкаԓпи’’. Таньдет ӈайта мансдетоӈ манԓе выйнуӈ шеԓтапёнԓаштутуӈ. Нум дячамаӈ неԓьня мэдяташту’’. Чикехет мэдямайтуӈ мымктатуӈ хайтуԓаш чепяшту’’. Праздникан шаӈкмян неша’’ каԓьтуӈ ненэй паныдётуӈ мэш тошту’’.</p><p>Неԓьня Ямалхана диԓина’’ Ӈэԓм’ чеԓ’’ неша’’ поӈкнатуӈ мянаԓмантуӈ мэт Надым нимита каԓват няӈ ӈомшту’’. Маня’’ дяхатана Пуровский’ районхат мэна’’ ӈупчики таньняна мянаԓьшту’’. Татӈявта диԓихина Пюԓ дяханана диԓина’’ неша’’ Таԓкан ӈомтӈа’’. Няматаԓакуԓма дяԓям мэмантуӈ мэт шанат ӈисыхит, каԓтыхит мэна’’ туты’’. Ты’’ падиԓьчи’’ дяԓям непудянта шеԓ Пуровск’ дет ӈайта пуԓ ӈыԓна мэтӈатуӈ. Шича дяԓяӈ дямпан праздник’ минты. Мянаԓьчи’’ маныдемантуӈ мэты ӈука’’ тэмс неша’’ ӈомтӈа’’. Дяхаӈ мюӈ шича дюкат ва’та ненэй мяту’’ менӈа’’.</p><p>Чуки похона непудянтуӈ шеԓ куԓкаԓи’’ вильта’’ мероприятии’’ шеԓтаны’’. Мянаԓмантуӈ мэт томы’’ неша’’ тыӈ канхана ӈайтаԓёш няматаԓакуԓты’’, нэхэмтуӈ, нюӈк ӈаймямтут ӈычимчемпёшь поӈкнатуӈ мянаԓьш шана’коты’’. Пюԓ дяхана ӈайта ӈыди каԓват’’ ӈупчики ты’’ падиԓьчи’’ дяԓян ӈанатадят. Каԓпюԓкана, Каԓясамэхэна, Ханымейхана, Толькахана, Самбуԓкахана нешади’’ хомана ныптакомаӈ мэты куԓкаԓи’’ вильта’’ мероприятии’’ шеԓтаны’’. Ӈэԓм’ чеԓ’’ нешаӈкна няматаԓакуԓма дяԓя — пиԓи хома дяԓя. Нетуӈ кошту’’, няханатуӈ дёԓимяшошту’’, шана’ко мяӈаԓьшту’’, шаӈкмян дяхат томы’’ куԓкаԓи’’ тэмс нешади’’ манэшту’’.</p><p>Чики праздниктоӈ выӈкна, петаԓахана, каԓтыхи’’на диԓина’’ неша’’ пуӈ ченят ӈэташтутуӈ.</p><p>Автор: Андрей Пяк патмы</p>

Мянаԓма дяԓям ӈэта’’

Сидяӈг: Ю. Талеева’ тадтавы

<div class="content-lead">Индигахана Ледков’’ паӈгхат перена’’ мяд’ тер’’ таня’’. Тев’ ёльцянд’ пыдо’ «Индига» СПКхана иринато’, нисянато’ пэрмы серм’ минре’’. Тикы’’ ненэця’’ тэхэ’’на мэвадо’ Алексей Егорович Ледковхад миӈа. Пыда Тиман’ няӈы’’ ты пэртяхат паӈгды. Харта яхананда ӈока по’’ ямбан’ ӈэсы’ ервӈэ тарась. Ваеравы’’ юр’’ по’’ 70 — 80-ей похо’’на маня’’ округханана’’ пыда нюмда хусувэй хойхана сосеты. Манзаямда ӈани’’ яха’’на ты пэртя’’ пыдаван’ харвасетыдо’.</div><p>Алексей Егорович 1927 похона хор’’ ирийхана Тиман’ выӈгана соявысь. Выучейской’ ӈэсыхы школахана тет классм’ ёльцевысь. 13 похонанда мале ӈарка ненэцяндарев’ ты пэртяӈэ таравысь. 1944 похона Красной Армиян’ тэвыць, Курильской ӈохо’’на, Сахалин’ няна, Владивостокхана мэвысь. Пуня’ мяканда 1951 похона тэвыць. Пухуцяданда Ледков Евдокиям’ мэвысь. Хаюпа хэванда нерцюна пирибтя ёрмысь, нита ня халэдавысь. Хаюпа хэ’’мяхаданда хоян’ танавыць, вэсаконда хэвхана мята серо минревысь. Ледковха’ самляӈг нюди’ хойхана соявы’’, таняна вадёвы’’. Небяндо’, нисяндо’ хэвхана харто’ явнандо’ мюсермы’’.</p><p>1956 похона Алексей Егорович партиян’ тэвыць, тамальӈгана «Тиманец» колхоз’ ӈэсыхына ервӈэ хэвысь. 1963 похона манзаямда теневана нерм’ пэртям’ «Индигской» совхоз’ хаюрта ӈэсы’ ервӈэ ханадонзь. Ӈэсым’ тю’’у’ иладась, манзаядо’ сававна нерня’ миӈась. Сита КПСС XX съезд’ делегатӈэ тэрадонзь. Алексей Егорович Ледков «За победу над Японией» медальда таня. Сававна ӈока по’’ ямбан’ манзараванда нямна тарця’’ хуркари’’ ненадумда’’ми ня’’амвысь. 1985 по’ ӈэсонд’ пили’’ ӈэсы’ ервӈэ тарась, ӈацембой’’ ты пэрти тохоламбасеты. Пуна ныланаванзь тарпыць, нисянда минревы ӈэсы’ ервӈэ хасава нюмда таслаць. Алексей Алексеевич тет юкад вата по’’ ямбан’ тэхэ’’на мэ. Ӈули’’ нерде’ нисянда хэвхана мэсеты, тараб’’нанда нюмда нядабасетыда. Вэсако ӈэбта ӈод’’ ненэциеда етри’ тидхалембасеты.</p><p>Сяхари’ Алексей Алексеевич тарця’’ вади мэцеты:</p><p>— Хойхана хусувэй хибяри мэсь нида пират’’, харвабцода хари’’ яхад турта’ то’’олха. Ты пэртя хусувэй ӈамгэда ӈарка няха’’тата миӈа — мел’’ ӈэвада, ямда’ сахарамбавада.</p><p>Сян мэвна харад’ манзаи пэрманзь ханзетыдо’, хасава тарця’’ вади лэркабт’ мадасетыда:</p><p>— Мань хантадм’, ӈанир’’ ханда. Хибя нисянана’’ е’’эйӈэ тараӈгу, хибя тэхэ’’нана’’ мэӈгу?</p><p>Тенад’ выӈгана мэ, тыда мание, ӈэсында серо тидхалемби, тараванда мальӈгана хоян’ тэворта’’ ты’’ лекар нядабасеты. Пыда СПК «Индига» правленияхана мэ. Хусувэй серкана ирт’ ӈэда ненэць’. Ӈока по’’ ямбан’ иланд’ ивъер’ сырта, ненадумда’’мида ӈока’’. 2020 поход СПК «Индига» матдомдэй ӈэсы’ ерв’ Алексей Ледков Россияна’’ ненадо манзарана нювм’ минре. Пыда’ паӈгхаданда минда’’ ненэця’’ Тиман’ хойхана ты пэрма’ серкана ӈокханда манзаравадо’ сидя юр’’ поход ва’’ӈа’’. Ты’’ сехэрэдо’ тамна пон’ хайная. Тамна ӈока юр’’ по’’ ямбан’ Нум’ вэсако ябдамдо’ тэврамбая!</p><p>Автор: Юлия Талеева’ падвы</p>

Тиман’ мэбета’’

<div class="content-lead">Теда’ сэхэ’’ паӈохона сайнортина’’ нядаба яна’’ тер’’ таром’ ха’’аврамби’’. Хибя ханзер’’ пирӈада, мянувнанда ӈамгэхэби сертаби. Ханяӈы’’ хурка няд’’мам’ ӈадимдембавамдо’ нидо’ вадес’’, тарем’ ӈод’’ юндо’ няна’’ тэворӈа.</div><p>Тюку нява’’ ӈобтикы хэ’’ли’ лаханана ни ӈа’’, мунзипой’’ нида нядабасетыда. Теда’ ӈод’’ харвобта ӈани’ ехэраӈговакэва’’, сидна’’ янда тер’’ хонра’’. Тазовской районхана, Паюте хардахана, выӈгана Алексей Синчувичм’ Яптикм’ сававна теневадо’, пыда мирдаӈгурта ненэця’.  Мале сян по’’ ямбан’ ты пэртя’’ няханата манзара. Вы’ тер’’ поӈгана сававна сидта тенева’’. Хардахана илебата ӈод’’ харта тэсавэй.</p><p>Тюку по’ ты саполана иры нердена ялэ пиркана сайнорта’’ нита е’’эмня 7,5 тонна ты’’ ӈамзам’ ватормысь. Хальмер’’ Седе хардахана СПК «Тазовский» предприятийхана тушёнкаӈэ сертаӈгудо’. Тикыдо’ сайнорта’’ солдатха’’на’’ ӈэдараӈгудо’.</p><p>Небо’ Алексей Синчувич ӈани’ тарем’ нида нядабидась. Та’ мальӈгана мат’’ тонна’’ пир’’ ӈамзам’ ӈэдаравысь. Тушенкаӈэ банкы’’ мю’ сертавыдонзь. Ӈамзи мипаванда хавна мале танякуна квадроциклм’, мотоциклм’ ми’’мысь.</p><p>Сяхари’ нидо’ нядаван’ харвана’’ ненэця’’ тэри ӈэвандо’ сер’ ни’’ посан’’, мунзипой’’ манзаидо’ пэръядо’. Тарем’ тюку няна’’ тотрев сэсембада нина’’ янамбовна нядабахана’’. Пыдо’ саць ӈарка, тоенана манзаям’ минре’’, ӈодь мал’’ ӈэбана’’ сензава ӈэхэва’’.</p><p>Автор: Марина Ярой’ падвы</p>

Нида нядаби

Сидяӈг: А. Яптик’ тадтавы

<div class="content-lead">Округханана’’ тодо’’ марка’’на, нюдяко’’ хардаха’’на ӈэрм’ тер’’ ненэця’’, ӈацекы’’ паднаванзь ма’’люрӈаць. Ӈарка яна’’ тиӈгэвна ненадо яля миӈась. Хусувэй тэнз’’ харто’ вадидо’ саву’’ӈаць.</div><p>Ямалханана’’ тюку по’ хасаваюдимдей ӈарка паднавам’ мэ’’ӈаць. Тикы’ е’’эмня Саляӈгардахана толаӈгова’ мякана ненэй ненэця’’, хаби’’, ӈысма’’ ӈобт’ ма’’лыць. Тикахана тодо’’ лохохо’’на няхар’’ тэнз’’ вадавна диктантм’ падыбиць. Маня’’ «Няръяна Ӈэрм» газетам’ минреняӈэ ӈани’ паднаванзь хан’’ӈаваць. Илебей’’, ӈармбэй’’ ненэця’’ мале ӈокаць. Ханяӈыдо’ мяд’ терсавэй товыць.</p><p>Тюку пова’’ «Год героев» нюбе’’ӈа. Ӈадьбята ненэй вадавна падна’’мава’’ сайнормы ненэця’ нямна ӈась. «Снаряд’ лабара’’ма»м’ нюбе’’ӈась. Ӈавхы ненэй вадавна ӈэда букварьм’ сертавы Анатолий Иванович Рожин’ падвы. «Осколок снаряда» нюбета падвэнда пеляхад ханавы.</p><div class="content-new-image"><img alt="pic" src="https://storage.yandexcloud.net/ym-sites-static/ccbd71b6-c1a.webp" style="width:100%" height="708" width="1260"/><div class="content-image_child">Сидяӈг: А. Яптик’ тадтавы</div></div><p>Падна мале’’мяхадана’’ Дарья Ӈокдэтам’ хонрамбидамзь:</p><p>— Мань Санкт-Петербург маркана А. И. Герцен’ нюмам’ мэта университетхана тохолкудм’. Небо’ таняна паднадамзь. Тедахав’ Саляӈгардахана мэвани’ сер’ тюкон’ тодамзь. Небяхаюни-нисяхаюни, хадами нянани тоць. Ӈацекы ӈэвани мальӈгэхэд хардахана вадёдадамзь. Вадами лахана мэць теневаркав. Си’’ми хонрамбадам’ хамедаӈгув. Ненэй вадавна паднава нянани тоенарка. Хуркавна ӈод’’ падна тоходадм’. Тюку ялява’’ сававна мэ’’ӈава’’.</p><p>Ӈани ӈопой нем’ лахана ня’’ӈадамзь:</p><p>— Тарця диктант’ танява сава. Ненэця’’ вадамдо’ тензебтемби’’. Тад тикахад мань тарем’ тасламбив, ӈани похона хаця несэйвана серта тара. Ӈэрм’ тер’’ серо минрена’’ ханяримна юнм’ ӈэдарамбая’’. Тамна ӈокамбой’’ Ямал’ тер’’ теневава’ е’’эмня. Яна’’ тиӈгэвна ненэй вадам’ нерня’ тидхалембада’’ ӈока’’. Школаха’’на ӈацекы’’ поӈгана сававна ненэй вадавна тохолкода’’ таня’’, илебей ненэцие’’ поӈгана едэй’’ паднанина’’ ӈадибелыд’’. Сиддо’ ненадумдамба тара. Ӈудандо’ терӈэ ненадо падарм’ ня’’амбато’, ихинандо’ ӈарка таром’ минревадо’ соӈгу. Колледжхана тохолкоди паднаванзь етя ӈэдарамбабато’, сава ӈэӈгусь. Поӈганандо’ паднаван’ харвана’’ ӈока’’. Тохолку’’ ни’’им’’. Тикы’ сер’ тось я’’мадо’.</p><div class="content-new-image"><img alt="pic" src="https://storage.yandexcloud.net/ym-sites-static/065696a3-114.webp" style="width:100%" height="708" width="1260"/><div class="content-image_child">Сидяӈг: А. Яптик’ тадтавы</div></div><p>Округна’’ ӈардавна тамна хуркари’’ ненадо сер’’ ӈэвыць. Сёяха’ хардахана мяд’ мюня диктантм’ падыбавыць. Школа интернат’ тер’’, нюртей классаха’’на мэна’’ ма’’люрмыць. Тикахана ӈэрм’ яна’’ нямна стихотворения ваде’’мыць. «Язык моих предков угаснуть не должен» нюбета конкурсамдо’ ненэй няби луца вадавна мэ’’мэдо’.</p><p>Маня’’ мал’ хамедамбива’’: хусувэй тэнз вадамда теневабта, невхы иринана’’ минревы ила’ саирм’ нива’’ юрыбаӈгу’’. Тяхад ӈэда’’ паӈгона’’, вадина’’ теневаӈгуна’’.</p><p>Автор: Руфина Окотэтто’ падвы</p>

Мэбета вадава’’ мэ’’ӈава’’

Сидяӈг: А.Яптик’ тадтавы

<div class="content-lead">Округна’’ марка’’на хусувэй по’ «Лыжня России» нюбета пирдырмам’ мэцеты’’. Тикан’ хибяри’’ ма’’люрцеты’’. Ненэця’’ мяд’ терсавэй’’ турцеты’’. Ламбаха’’на сюрберць сёбар’’ ӈани’ пирдырцеты’’.</div><p>Саляӈгардаханана’’ яра иры’ нюртей’’ яляха’’на ӈэбта тарась. Вэва нув’’ ӈэсь ӈани яляха’’на ты’’ саполана ирыхана ӈась. Ламбитава’ мэлвахана пирдырман’ харвана’’ ӈокаць. Ӈацекы’’, ӈармбэй’’, илебей’’ ненэця’’ ма’’лыць. Ӈокханда няхар’’ юр’ пир’’ харад’ тер ӈэвысь. Ханяӈы’’ мяд’ терсавэяць. Редакцияна’’ терӈэ ӈани’ ядэрӈаваць. Сянакованзь товы’’ нина’’ падарт’ падыбинаць.</p><p>Турта’’ ся’ хунат сюрамба пир’’мамдо’ харто’ тасламбидонзь. Сидя сехэры: 500 метр’, 2025 км’ ӈэсонд’ ӈаханзь. Сидна’’ падыбавандо’ сер’ ӈудана’’ терад тамбиць. Сави, ненадумда’’ми’’ падро, значок ня’’маваць. Ядэр’’мани’ сер’ ӈоб’’ ненэй нем’, Виктория Хоролим’ ядабтадамзь. Ханзер’’ тэвманда нямна, ся’ хунат сюрамбаванда нямна хонрамбивась. Пыда тарем’ лаханась:</p><p>— Тюку яля’ хасава нюни ня ламбита ядэртани’. Мя’’ни тер’’ няць хусувэй по’ турцетыдм’. Тэри тарця мероприятия’’ ӈэва’ нерня манзаяханани си’’ми’ хонрамбасеты’’. Мань пуня’ нидм’ ӈэсету’’. Ламбаха’’на едейковам’ харвобтав. Ханяӈэхэ’’на ныланава’ яляха’’на тюкона ламбиторцетыдм’. Тедари’ нюми нюдя. Ӈарка сехэрэвна нини’ пирдырт’’. Самляӈг юр’’ метр’ ӈэсонд’ сюрамбаӈгуни’. Ненэцяӈг’’ мэ’’манда’’ вадини’’ тарця’’: «Пирдырманда’’ сехэромдо’ сававна сюртемдо’. Мал’ ялява’’ маямба мэкава’’».</p><p>Сянаковам’ хэтвандо’ сер’ лаханако нями хасава нюнда пумна паромбарка пин’ тарпыць. Маня’’ ӈод’’ тарпынаць. Нюртейӈэ 2025 км’ пяванда’’ нулъядаць. Тад пуна самляӈг юр’’ метран’ едейкованда’’ нито’ пумна хамедыць.</p><p>Редакцияхадна’’ Ӈанине Яптикы ямб сехэрэн’ сюрамбись. Пыда ва’’лёй сёбар’’ ненэй не. Хусувэй по’ пирдырманзь хан’’ӈа. Тикы серм’ тяхасовна теневада. Сехэрэмда ханзер’’ пирдалевамда хонрамбивась.</p><p>— Мер’ сюртев. Нерняна ламбитани’’ мандал’ поӈгана миӈадамзь. Сюрамбаб’’, сырада савась. Нумда ӈопой тецярка. Ӈудини’’ ханимяць. Сянимдейӈэ товами ниркав хамэда’’. Мань мале школахана едейкосетыдм’. Нянани ёльце нюрцям’. Олимпиадаха’’на, конкурсха’’на мэвани няю’ ня’’амвы’’ есяха’’нани нюртей ламбини’’ тэмдэйнась. Пыхыдами мэбеламба етри’ едейкованзь ханцетыдм’. Тарця серкана торомбэй’’ нини’’ мание тоходадамзь. Соревнованияха’’на пирдырцетыдм’. Тюку ялями ихинани сававна хая.</p><p>Тарем’ хардана’’ тер’’ ныланава’ ялямдо’ ӈобанзер’’ пирдырць мэ’’ӈадонзь. Ихинани ӈули’’ саву’’ян: «Маси’’ ӈани’’ похо’’на тамна ӈокамбой’’ ненэця’’ ма’’люрта’’. Нюдо’ сиддо’ мание ӈани’ турта’’».</p><p>Аватор: Руфина Окотэтто’ падвы</p>

Ламбитава’ яляхана

Сидяӈг: Руфина Окотэтто’ тадтавы

<div class="content-lead">Сянакова ялян’ сырманзь товы’’ евэйхана, тамна ӈани’’ ӈавор’’ тэнзахана ӈавламбидонзь, хуркари’’ конкурс’’ ӈаць.</div><p>Ханюй халэ ӈаябадӈэ ясьпади едтедамзь. Сянакоди’’ поӈгад Виктор Аникевич Худим’ ядабтадамзь, пыда мась:</p><p>— Пухуцяни ня’ Сюнай-Саляхад тонинзь. Нянани халям’ ясьпава нензел’’, халя ялэхэ’’ ӈаворта ӈаврава’’ ӈэ’’нив’. Теда’ тарця конкурсахана нюртей сянаковами. Есьмы’’ халэни ӈули’’ савамбовна хыдя’ мю’ мэйнинзь. Ӈоди, горчицам’, сэрм’ яӈга хыдякоци’’ мю’ вабтэйнинзь.</p><p>Тасу’ явхад Павел Яр не мяӈганда Арина Вануйти ня’ товэхэнзь. Пыди’ халямди’ хобамда хаврахая, тодо’’ ютекаха’’ маторкая, хыдя’ мю’ мэвэдинзь. Выӈгана илена’’ ты пэртя’’ тарем’ халям’ сертабасеты’’.</p><p>Приуральской районхад Марта Ивановна Ӈокэй  тарця вади хэтась:</p><p>— Нисяни ня’ тонинзь. Конкурс’ нямна няхатани’’ намдадамзь. Нисями халям’ сертаба ӈули’’ пир’’ӈада. Пуня’ нись ӈа’’. Есьмы’’ халэни ямб хыдяко’ мю’ мэйнинзь. Пэ’ терӈэ тарем’ ӈаворць тохобэва’’.</p><p>Ӈамгэ’ пиркана хамедавы ӈаврадо’ хыдя’ мю’ мэ’’хэя тольто’ ни’ ӈабтэйдонзь. Жюри’’ ӈули’’ саваркавна хусувэндо’ сертавы хорпиць. Падродо’ ня’’амба, тасалко ядэрӈаць. Тарем’ таславэдо’: Шурышкарской районхад ӈэда сямянхат ва’’лёйха’ ӈэвэхэ’, Виктор Аникевич пухуцянда ня’ нябимдейха’, Павел Тэтакучавич не мяӈганда ня’ няхаромдэйӈэ тэравэхэюдо’.</p><div class="content-new-image"><img alt="pic" src="https://storage.yandexcloud.net/ym-sites-static/ec304022-893.webp" style="width:100%" height="545" width="969"/><div class="content-image_child">Сидяӈг: Руфина Окотэтто’ тадтавы</div></div><p>Нябимдей яляхана халя’ евэй пирембиць. Харад’ тер’’ пирдырӈаць. Тикы нито’ поӈгана «Ямал-ню’’на’’ я!» Ассоциация’ терха’ Владимир Морозов няби Данил Худи мэ’’ӈаханзь. Вадади’ тарцясь:</p><p>— Теда’ халя’ евэйхана ненэцие ӈавламбаӈгува’’. Пыдо’ сямянхат ӈавыдотам’ тэрабаӈгу’’. Хусувэдо’ евэйто’ тахара’’ми харто’ тасламбидо’. Пиревына’’ хусувэндо’ ӈавыта яӈга.</p><p>Евэйм’ хорманзь товы’’ ӈокась. Ненэця’’ тодо’’ хибяри’’ пиревы хорпиць. Мал’ сававна ӈаврадо’ пиревыдонзь. Ненадумда’’ми ӈудито’ терӈэ ня’’маць.</p><p>Ты пэрти’’ сянакова яляхана хуркари тэнз’’ ӈавар’’ ӈаворӈаваць.</p><p>Автор: Руфина Окотэтто’ падвы</p>

Ӈавыдота ӈавар’’

Сидяӈг: Анна Яптик’ тадтавы

<div class="content-lead">Выӈгана илена’’ ӈэрм’ тер’’ ембдяродо’ сяхаринда сава’’ ӈэсеты’’. Ӈацекы’’, хасава’’, не’’ ембдяро манэ’’лабтамбиць.</div><p>Тюку по’ сэдвыдо’ тэвравы’’ ӈокаць. Поӈганандо’ яланда ӈоб’’лери хасава — Ӈокдэтта мэсь. Пыда Панаевск’ вымна мюсерӈа. Ӈацекы’’ небянато’-хаданато’ сэдавы панэцидо’, мальцидо’, пивидо’ ӈадимдембиць. Серо’’ теневана’’ ӈули’’ тяхасовна манэ’’саръядонзь.</p><div class="content-new-image"><img alt="pic" src="https://storage.yandexcloud.net/ym-sites-static/0b087905-16d.webp" style="width:100%" height="1439" width="2560"/><div class="content-image_child">Сидяӈг: Р.Окотэтто’ тадтавы</div></div><p>Ензя’ няд товы Любовь Ямкина тарем’ мась:</p><p>— Мань хар’’н мадавы’’ ӈодякоход сэдвы панэми, савами, пивини’’ манэ’’лабтамбидамзь. Тикы’ е’’эмня си’’ми ни’’ ненадумда’’. Тэри Сянакова ялян’ тетюмдей’’ товами. Манэ’’манда, тэмдаванда ӈока. Мань хобадами, пени тэмдаван’ харвадм’. Илебей не ӈэвани маляӈгана етри’ сэдорасетыдм’. Та’ маляӈгана ламп, линюй ялякоцям’ мэ’’цетыва’’, етя мадавында харми танясь. Тюку илаӈгана мядото’ мюй’’ яля’’.</p><div class="content-new-image"><img alt="pic" src="https://storage.yandexcloud.net/ym-sites-static/a4117884-010.webp" style="width:100%" height="1439" width="2560"/><div class="content-image_child">Сидяӈг: Р.Окотэтто’ тадтавы</div></div><p>Ненэцие’’ помна ядэрмани сер’ «Парад оленьих упряжек» нюбета пирдырман’ тэвываць. Таняна хасава’’, не’’ масеретна’’, подермы’’ ханодо’ манэ’’лабтаць. Таӈгарка янамбовна нито’ пумна ханодо’ вадаръядонзь. Ӈоб’’ ханм’ вадармым’ Анастасия Лаптандерм’ хонрамбидамзь. Пыда вадида тарцяць:</p><p>— Маня’’ Пэ’’ нямна мюсерӈава’’. Небо’ тюку конкурсахана мэдамзь. Нябимдей ян’ ха’’мыдамзь, ӈани’ тось таславась.</p><p>Лаханако ня’’мы нями паромбарка ханамда валкая, сита хамы няхата хаясь. Тыто’ подеро’’ ӈадимдембавы’’ ӈудито терӈэ есь’’ ӈэся’’ — сертификат ми’’ӈаць.</p><p>Саляӈгардаханана’’ Сянакова ялява’’ сававна хая. Мале ӈока пон’ нивы манэ’’мы нини’’ ядабтадамзь. Конкурс’’ хавна тамна мэкад, илека ӈавэ’’ манэ’’ӈаваць.</p><p>Автор: Руфина Окотэтто’ падвы</p>

Вар мадавы, си’’ив падрота’’

<div class="content-lead">Ты’’ саполана иры’ 25 яляхана культурахана манзарана’’ ненадо яля. Ямалханана’’ тарця серм’ минренава’’ ӈока. Пыдо’ харто’ пирувнандо’ мал’’ яхана’’ ӈарка таром’ ха’’аврамби’’.</div><p>Яна’’ ханярина сиддо’ ненадумдабиць, Салехардхана ма’’люрӈаць. Округва’’ нерня’ минрена саць саву’’ӈаць. Нерня’ мэвыто’ поӈгана ӈэрм’ тер’’ ӈани’ таня’’. Ненэй ненэцяӈгат сёётэй няхаюна’’ Татьяна Нюдихасововна Лар няби Елена Хабиевна Уфимцева «За заслуги перед Ямалом» ненадумда’’ми ня’’амӈаханзь. Пыди’ сидябты’ ӈока’’ по’’ ямбан’ ОЦНКхана манзараӈаханзь. Татьяна Нюдихасововна «Вы’ сей» ансамбльм’ ӈадимдесь. Елена Хабиевна «Сыра’ сэв» ансамбль таранаӈэ тарась.</p><div class="content-new-image"><img alt="pic" src="https://storage.yandexcloud.net/ym-sites-static/c06b5e6a-f5f.webp" style="width:100%" height="708" width="1260"/><div class="content-image_child">Сидяӈг: А.Яптик’ тадтавы</div></div><p>Ямална’’ ӈэвахана мэна ервхад яӈга ненадумда’’ми ня’’мавы’’ таняць. Округна’’ культура’ департамент’ ерв Евгений Колтунов няндо’ мипидась. Ӈопойдо’ Тасу’ я’ тер Валерия Гутман (Тибичи). Пыда сидндет ю’’ ёнар’’ есяхана тердевы падарм’ ня’’мась. Яхананда музейхана юкад вата мат’’ по’’ пир’’ манзара, нум’ ед’ ӈэда серо минре, проектамда тид’’ падванда няю’ грант’ еси’’ няд’’мам’ ня’’марпись. Валерия тарця вади мэ’’ӈась:</p><p>— Хальмер-Седе’’э’ няд паромбари’ тодамзь. Тюкохона сидна’’ ёльце сававна ядабта’’. Неноховавна си’’ми нядабада’’ няхани’’ сава вади ӈэдараван’ харвадм’. Пыдо’ сиципой’’ тамбирувна ва’’лёядм’ нидамзь ӈэӈгу’’. Хэвхана нядаӈгода таняб’’, ӈамгэри сер’’ тоенабцода ни ӈадю’’.</p><p>Тамна ӈани’ ӈопой ненадумда’’мам’ ня’’мавы ненэць’ — Светлана Леонидовна Вэнго. Ӈавнанда соя’’ма’ яда Сюнай Саля’ няд ӈа. Теда’ Салехардхы Е.В. Образцова’ нюмам’ мэта Школа искусств’ мякана манзара. Таняна нюдяко ӈацекы падтаӈго, сэдора, панорць тохоламби. Ёльце мел’’ не. Сяхаринда хуркари’’ пирдырмаха’’на мэсеты, сэдвы’’ ӈамгэрида манэ’’лабтамбасеты.</p><p>Тамна ӈани’’ ненэця’’ поӈганандо’ ӈокаць. Тарем’ минрена манзаидо’ саву’’ма ёльце сава. Ненэцие’’ манзара харвабцодо’ ӈокворӈа. Тамна’ тяха’ Ямална’’ ед’ варемдо’ мэта’’.</p><p>Автор: Анна Яптик’ падвы</p>

Пэдава’’ ӈэвы’’

<div class="content-lead">Тандая’ Сале’ хардхана сёётэй няна’’ концерт ӈась. Ныланава’ яляхана едэй сё намдаваць. Нядма Няруй ня хар’’на’’ вадавнана’’ хыно’’ӈаваць, ӈопой час’ ханзер’’ хэвам’ ниваць хамада’’.</div><p>Ненэй сёхо’’ инзелеванзь товы ӈокась. Юрёда ханярид сита манэ’’манзь товэць. Вануйто мяд’ терха’ Сёяха’ выӈгад товэхэнзь. Концерт пэва’ нерцю’’ няданди’ хонаркудамзь. Юлия Сёёновна няби Павел Париденявич тарем’ лаханаӈаханзь:</p><p>— Мани’ то’’мами’ мале хубтемя, сидя ирыӈэ хая. Салехардан’ ӈояк’’ тэворцетыни’. Тюкон’ тур’’мами’ сидя по’ техэ ӈэӈгу. Сёётэй’’ ма’’лёвам’ намда не нюми сидни’ тюкон’ тэврась. Хынотаха’’ инзелевам’ харвабтасетыми’. Нядма Няруй’, Елена Лаптандер’, Надежда Сэротэтто’ (Евай) сёхо’’ инзелесетыни’. Хар’’на’’ мякаваханана’’ сё, ярабц мэтава’’ сабе яӈгу. Танякуна’ таняса’’ма, едэй’’ мутра’’ ӈадиво’’махад тарць мэць ӈэвадэйна’’. Теда’ хой’ няна лаханакохорт вуни’’ мэс’’. Ӈавна хэвняд тона таняӈгу, таминда лаханакум’, ярабцм’ мэ’’манда ӈэ’’нив.</p><p>Ёльцянда томзь яӈга ӈарка лохо’ мю’ тюваць. Няхаюни’ тарана, хынота сававна маниеванди’ е’’эмня нерняку’ ӈамдыхынзь. Ненэцие’’ мал’’ ӈамда’’махад Нядма’ «Ядэрта» нюбета сёмда хэӈгабтась. Пуна лакри’ «Яберена Нумги»‘ тер’’ ӈадимяць, сянэрта суюкоци’’ то’’олхакоць. Пудандо’ Елена Уфимцевам’, «Вы’ сей» ансамбль’ тер, Матрёна Ивановна нюбета группам’, Екатерина Салиндерм’, Масне Няруйм’, Олит Тевлянаутм’ манэ’’ӈаваць.</p><div class="content-new-image"><img alt="pic" src="https://storage.yandexcloud.net/ym-sites-static/1b6034d7-711.webp" style="width:100%" height="624" width="1108"/><div class="content-image_child">Сидяӈг: Анна Яптик’ тадтавы</div></div><p>Елена Хабиевна тарця вади хэтась:</p><p>— Мань Семён Николаевич’ хасава нюм’ ӈахат нюдя ӈэдаханда теневав. Хайна хыно’’мада нянани сава, сёда няд’’мяць мале сян тарабцом’ сертадамзь. Не нюми няби не нюни не ню ня ӈэбтм’ ня’’амба тараваць. Тарем’ илна’’ ӈобкад перевам’ манэ’’лабтаваць. Тад нерня’ тамна ӈока манзаям’ ӈобнзер’’ серта тасламбини’.</p><p>Чукотка’ няд товы Олит Тевлянаут хыносо’’ма ӈани’ тид’’ ӈась. Пыда тарем’ мась:</p><p>— Нядма’ сёхо’’ инзелесетыдм’. Ямалхана пыда сита то’’олха сёётэйнда’’ танява ӈули’’ сава. Ямда хынабтамби, янда юнм’ ӈарамдамби. Ӈобкана хыно’’махани’, яхананда’’ мядомахани маймбидм’.</p><p>Ӈули’’ пуданаӈэ Масне ня едэйвана падвы «Ёльце» хынабцамди’ мэ’’ӈаханзь. Не нюди’ Ейнеди’ нянанди’ нюртей мэва сцена’ ниня нусь. Тандая’ сё мэ’’манзь пяванда’’ няхата вади ӈэдарамбись: «Нерняри’ ӈада’’, ӈамгэхэртан’ сейда’’ нёя’’ пин’’!»</p><p>Концертм’ маниевы’’ ёльце маймбиць. Пыдо’ ма’’нисям’’: «Иланда ямбан’ нерняри’ ӈэдалёя, инда ӈылан’ хыно’’ӈая, саць маймбая».</p><p>Автор: Анна Яптик’ падвы </p>

Нядма ня хыно’’ӈаваць

<div class="content-lead">Мале тетимдей по’ Салехард’ ядхана сывандана’’ пэ’ тер’’ сянаковам’ мэцеты’’. Ӈарка пирдырма’ ялэ’’ нерня мэ’’манда’’ тыдо’ хорпасеты’’, вэва’’ ӈэб’’нандо’ тадасетыдо’, тарем’ тэравыдо’ пирдырманзь ханасеты’’. Тандая’ нина’’ ӈани’ ядабтэйнаць. Александр Тайбери’ мякана ма’’лываць. Ненэця’ мале ӈахакуд тодо’’ ӈэсыхыт товыць.</div><p>Пэ’’ тер’’ поӈгана тикы сянаковахана пудана вадамда юнета нядо’ Леонид Ильич Лаптандер мэцетыда. Тюку по’ мале таславы яляхана ӈани’ хонравэдонзь. Хардахад тованда нида мале ӈатевыдась. Тадӈо’’ «Ямал-нюна’’ я!» Ассоциация’ ӈудандана Эдуард Хабэчевич Яунгад таняна мале сававна теневана нядо’. По’ сидя вэкана няхата тэворцеты. Леонид Ильич ма’’нисяв:</p><p>— Мале тев’ ёльцяӈгана нина’’ ӈатейна’’, маня’’ теневава’’, тадри’ Салехардахана пирдырмана’’ нерня’ ӈобт’ ма’’лёдава’’. Тикы’ нерцюна хар’’на’’ ӈобт’ тэворцетыва’’, теда’ ханяцей’ нюрцямӈэ хая, ӈока хибя’’ турӈа’’, юнва’’ ханярина со, тюку яля’ ӈани’ сянакурць пэӈгува’’.</p><div class="content-new-image"><img alt="pic" src="https://storage.yandexcloud.net/ym-sites-static/e83f528c-c50.webp" style="width:100%" height="709" width="1260"/><div class="content-image_child">Сидяӈг: М. Яр’ тадтавы</div></div><p>Нумда талмась, ёмзяли’ ха’’морӈась. Мякана сидямбой ӈавка мяевысь. Пунахав ӈэсыхындо’ ненэця’’ то’’махад ты’’ туро’’, вэн’’ мад’’ ӈопой тёрӈэ хаяць. Няваталаӈго мэ’’манда’’ хабто яркыба хасава’’ мар’’ хоба’’ тынзяӈганандо’ ӈэдаравандадо’ яӈгусь. Тюку по’ хэд’’ иӈумна сертавэдонзь, ӈока тыдо’ харто’ яхана хаевыдонзь. Юр’ мян’ хабтрихид ярколаць. Мядондито’ поӈгана тамна тёняӈы ненэцие’’ округхад товыць. Анатолий пудана си’’ив по’ ямбан’ ненэй ненэцие’’ округхана мюсерӈа. Таняна малкодаӈэ тара. Хусувэй ныланавахананда соя’’ма’ яханда турӈа. Тюку по’ ӈод’’ тикы ватом’ нидась ӈэдара’’. Мядоманда хавна пирдырмахана мэсь. Нерня’ нибата ха’’ам’’, пирдырма нянанда инда ватось.</p><p>Ӈоб’’лад’’мана ӈэдалёрӈаць. Сюрхалаӈгана’’, маханя’, сятаня’ хэвы’’ таняць. Тикы’’ нидо’ ӈани’ яӈорэй’ ӈэдалаӈгасеты’’. Няваталаӈго пявандо’ мальӈгана Александр Тайбери’ пирувна ӈэдалёрць пирмы яӈговысь. Алексей Тысия ӈодь хаеревыць. Нямда тэваван’ харвавы Дмитрий Тайбери Алексей’ пуд ӈадимясь.</p><p>Нехэт ва’’лёй Екатерина Тайбери ӈэвысь. Хибяхарт сита тэва я’’мась. Няданда Наталья Тысия хаись. Тикы нява’’ хусувэй по’ пирдырцеты. Ӈэдалаванда мальӈгана сырмы хасава’’ мамондоць: «Натальяхав, хасавахат мерема’ сер’ ӈа». Тарця ӈэвысь. Няхаромдэйӈэ Нина Лаптэй тэваць. Мэевна хананда ни’ ӈамд’’махаданда тэри хибяри тэва я’’маӈгудась.</p><div class="content-new-image"><img alt="pic" src="https://storage.yandexcloud.net/ym-sites-static/770d2bb6-d2a.webp" style="width:100%" height="709" width="1260"/><div class="content-image_child">Сидяӈг: М. Яр’ тадтавы</div></div><p>Пирдырмито’ мальӈгана помнандо’ мэта’’ тыдо’ таминдо’ тасламбидонзь. Пуна’ тарабата ханото’ ты несэйвана подеромбидонзь. Ӈани’’ ты’’ лэк’’ ӈэвы’’, ханяӈы’’ нерняри’ са’’ӈа’’, ӈаниндо’ нензаминдидо’ выдаӈгавы’’. Тарем’ Салехардахана мэ’’манда тэдамдо’ тасламбиць.</p><p>Леонид Ильич Лаптандер депутатна’’ ӈэвахана мэнам’ Сергей Миронович Ямкинм’ мядо’’манзь ха’’мысь. Тамбир’’ ерв ӈобтикы терси’’ нивысь ту’’. Харта ватовнанда ӈоб’’ мэкад пирдырмам’ сертась. Мал’ ӈобкана нито’ ирмня ӈобкана ӈэдалэйдаць. Нерденаӈэ товэн’ Сергея Миронович харта манданда ӈуда’ терм’ ми’’мандась. Нита нерня илебей ненэця’ Роман Тайбери ӈадимясь. Пыда ю’’ ёнарм’ е’’эйӈась.</p><p>Мале тидаркаӈэ хэ’’мяхаданда хасава’’ ярколаць. Ӈока яӈорэй’ тюрм’ яркавы’’ мядонзэйдамдо’ ня’’маць. Ти, тарем’ Пэ’’ тер’’ поӈгана ӈоб’’ ялява’’ мэ’’ӈаваць.</p><p>Автор: Марина Яр’ падвы</p>

Пэ’’ тер’’ тёр’’ я’’авлыць

<div class="content-lead"><strong>Дюԯнуй диԯиӈ шича дю’’ ӈуп дяԯяхана тэмстуӈ чадю нешади’’ ватаӈ дет тонԯюта дяԯя ӈяшту. Чики хома шеԯым шаӈкмян тэмс’’ неша’’ каԯьтуӈ ватамтуӈ дюԯмаӈ тайхана шеԯтамы. Четаӈ дяӈ чиӈкимана шеӭв дёнаԯкат ӈука’’ вата’’. Пу’’ тахана шанат тэмс нешади’’ вата’’ диӈкумшту’’. Маня’’ нешаӈэ ватама четаӈ нипнана ԯэтԯампю ӈупчики шан пуӈ каймяхаты диӈкумты.</strong></div><p>Ненэй неша’’ шича тэмстуӈ. Петаԯахана диԯина’’ неша’’ ԯусаӈ патаԯкана лесные ненцы. Пытоӈ выӈкна диԯина’’ нешади’’ ӈинԯи дяӈ чеԯӈэ, ӈинчеԯмана падиԯдятуӈ. Нешаӈ вата шича диалекта, чики ватаӈ каԯԯахаӈ няхатач ӈинԯихиӈ. Лакхай похот ватам тохоԯампюта учёный’’ маньшту, петаԯахана диԯина’’ нешади’’ ватам шеԯкта ватаӈэ тонԯапë таԯа. Таԯьша ӈяпта ӈотнаӈ, кимяхаԯт чики шеԯым шеԯтаман нита хас. Таԯям четаӈ нешаӈ ватамана ӈайта тохоԯко мэта патԯу’’ ӈинчеԯ ватамана паташтутуӈ. Петаԯахана диԯина’’ неша’’ письменностьтуӈ дику, каԯьтуӈ ватаманантуӈ ӈайта шанԯи патаԯтуӈ. Нип ԯэтԯымпю нешаӈ вата диӈкумты.</p><p>Четаӈ неша’’ нюхунатуӈ каԯьтуӈ ватаманантуӈ деняԯ ниш’ту’’ мунус’’. Мякнантуӈ каԯьтуӈ ватамнуӈ ниня мэта ӈашкиуде’’, нешаӈ ватамана мунуман ниш’ту’’ хас’’. Четаӈ Пуровский’ районхана нешаӈ ватаӈ дет тонԯюта’’ урок’’ шанат каԯтыхина ӈайта школа-интернатхана’’ тадя’’. Неԯьчеэй школан томантуӈ похона нешади’’ ӈашкиуде’’ мунуш, патнаш каԯьтуӈ ватаманантуӈ тохоташту’’. Чикехет ӈалка’’ классыхи’’ каймяхатоӈ каԯитуӈ ватамтоӈ манԯе ԯусаӈ вататаԯям тохоԯампёштутуӈ. Таԯкахай школа -интернатхана мансԯанна’’ неша’’ нена’’ нюча классхана тохоԯкота’’ ӈашки’’ неньшаԯмана тохоԯкомаӈ мэт, таньнякуй похона’’ каԯьтуӈ диалект’манантуӈ электронный’ патԯу’’ шеԯтаӈаш’’. Чикитуӈ мэш нюча ӈашкиуде’’ тохоԯампёштутуӈ. Ӈаԯка класс’хана’’ тохоԯкота’’ ӈашки’’ урокихинатоӈ ӈинчеԯ ватамана ӈайта патԯу’’ мэшту’’. Таԯям ӈашки’’ тохоԯампюта’’ нена’’ ӈинчеԯ ватамана патмы’’ ваче’’ нешаӈ ватамана ӈашкехеэ кэташтутуӈ. Таньше урокатуӈ минԯештутуӈ. Тай’’ня тохоԯкота’’ ӈашки’’, нешаӈ ватам хомана каматаштутуӈ. Нешаӈ ватан ӈашки’’ тохоԯампюта’’ минԯенитуӈ урокатуӈ’’ вильмаӈ мэты куԯкаԯи’’ викторини’’ шеԯташту, диктанту’’ пытыпёшту’’, олимпиадахана мэшту’’. Тохоԯампючетуӈ ӈашки’’ няш каԯьтуӈ ватантуӈ де’эмня исследовании шеԯташту’’.</p><p>Чикиӈ камна каԯтыхина диԯина’’ неша’’ пу’’ тахана каԯьтуӈ ватаманантуӈ диктант паташту’’. Няймы четаӈ куки ӈашки’’ витуӈ нешаӈ ватам тохоԯампюмаӈ нядём ниш’ту ӈа’’. Каԯьтуӈ ватаманантуӈ мунуман ниш’ту’’ хас’’. Кукиты нешаӈ ватам чедимяптуӈ ӈотнаӈ, каԯьтуӈ ватамтуӈ ниш’ту’’ мэс’’. Школахана мэш, мякнантуӈ мэптуӈ ненсаӈайта ԯусаӈ ватамана мунушту’’.  Таԯям четаӈ маня’’ ӈаԯка’’ неша’’ӈэ ватана дет шеԯутаӈама’’ — чикехена нина’’ каԯьтуӈ ватамтоӈ нитуӈ дюԯан’’. Нешаӈ ватамана деԯымпёвтамыӈ мунуштоны’’.</p><p>Ӈаԯтана ӈашки’’ чики таԯана шеԯ дет шатхаԯтдят, чикехена ӈяхядяш петаԯахана диԯина’’ ненэй неша’’ навэт каԯьтуӈ письменностьтуӈ ӈычимты.</p><p>Автор: Андрей Пяк патмы</p>

Вата мэш таԯа

Сидяӈг: Артур Окотэтто’ тавы

<div class="content-lead">Ямална’’ илебей ненэця’’ ханярина пир’’ӈадо’. Тарем’ мале сян нява’’ Москва’ иркана ӈэда харад’ няна иле, манзара пэвыд’’. Пыдо’ ехэрана яхана, Шихово нюбета нюдяко харад’ хэвхана ӈэда зоофермахана ненэй ненэцие’’ ила’ саирм’ ваде’’ӈа’’, манэ’’лабтамби’’.</div><p>Тандая’ яӈга «День народов Севера» фестивальм’ ӈадимдембавыць. Мядонди’’ е’’эмня ӈэрм’ тер’’ сянакубц манэ’’лабтамбавы’’, хуркари тохолкова сертабавы’’, сё мэти хамы’’. Илека серм’ «Северная деревня» нюбета проектм’ ня’’амбада Артур Окотэтто ваде’’ӈадась:</p><p>— Ӈобӈгуна ими ядэрӈась. Теда’ Ямал’ тиӈгывна Ты пэрти’’ яля’’ пэванзь пэръяд’’, тюкохона ӈобтикы сянакобна’’, пирдырпа’’на’’ саванё’’. Тикахад яра иры’ 8-9 яляхаюна’’ ӈули’’ илебядё мэ’’ӈахаюнаць. Мядондина’’ ханзели’’ майбтамбинаць. Хасава’’ ныхыдырӈаць, ӈопой яхад няхар’’ мэва санарӈаць. Помнандо’ пирдырмы’’ ӈудандо’ терад ня’’маць. Е’’эмняндо’ яӈга мядонзэй, медаль хамададамзь. Тарця ӈудани тер танясь: ненэць’ буркадамда сэда табеда пир’’ӈась, сэдорана не’ ня тарем’ тасламинзь. Тамна ӈаними тодо’’ тэнз’’ ӈавыдота’’ ӈавраха’’на пандавы падкось.</p><div class="content-new-image"><img alt="pic" src="https://storage.yandexcloud.net/ym-sites-static/524e0a3f-e94.webp" style="width:100%" height="664" width="1181"/><div class="content-image_child">Сидяӈг: Артур Окотэтто’ тавы</div></div><p>Тикы’ хавна ненэцие тюрм’ яркыба тохоламбавыдо’, тэхэ’’на ӈэдалёлтамбавыдо’, халя’ евэйхана, есьмы халяхана ӈавламбавыдо’. Сёяха’ выӈгана вадёвы Артур Пэвкович тарем’ лаханась:</p><p>— Ненэй сёхо’’ инзелеваць, Геннадий Салиндерм’ хыно’’манзь хаӈадамзь. Юнета сёётэйва’’ сидя яля’ ямбан’ концертм’ минресь. «Увезу тебя я в тундру» сём’ мэ’’манда ёльцяӈгана ӈули’’ мэкадась, хыно’’манда сер’ падвы нензаминдяхана подермы ханм’ вадарӈась. Тюку по’ «День народов Севера» ялям’ нюртей мэва ӈадимдеваць. Ӈани похона тамна саваркавна, несэйркавна серта тасламбива’’. Харад’ иланд’ торомбэй’’ тарцяхад ехэрарка’’, ӈадьбята тоенаркась. Нерня’ хар’’на’’ ниваць пунрю’’, пиртанакэва’’, нинякэва’’. Сабе ӈамгэхэртава’’ яӈгусь, ханяӈы’’ ӈамгэрина’’ тикаривна хамадамбинаць, пэвсюма’ ӈэсонд’ манзарасетыва’’. Хуркавна ӈод’’ хэбидя ялява’’ ӈадимдева’’, туртаха’’на илекась.</p><p>Сянакова’ хавна ненэця’’ тэмдорць пир’’мэдо’. Артур Пэвкович тандая’ лабкам’ нэвысь. Ямал’ тиӈгывна иленаха’’ вадам’ ӈэдарамби:</p><p>— Си’’ми нядабаванда мел’’ ненэцяндами, манзара нядми пюрӈадм’. Хобахад сэдвы, ӈодякоход паӈгалмы ӈуда’ тер’’ мирда’’ман’ харвабта’’ няни ӈэдарамбида’’. Тарем’ есядамда’’ недвоць пиртада’’. Мань турта ненэцями ӈока ӈэсеты, тюкохона тарця ӈаво сававна тэмдабидо’. Интернет’ мутравна няни паднада’’, хонаркуда’’.</p><p>Автор: Анна Яптик’ падвы</p>

Ӈэрм’ тер’’ ялям’ мэ’’мы’’

Сидяӈг: Марина Яр’  тадтавы

<div class="content-lead">Ты пэртина’’ иландо’ сибё ӈэва’ е’’эмня округханана’’ нядаӈгода’’ ерв’’ манзара’’. Поӈганандо’ хуркари’’ таня’’. Тарем’ ӈод’’ вы’ тер’’ иландо’ ни яӈгавор’’. Хусувэй мэва’ ервото’ ня’ таславандидо’ ӈадимзеты’’.</div><p>Хахаяда яля’ Шурышкарской районхана ты пэртито’ ня ӈарка тасалковам’ мэ’’ӈаць. Тикадо’ тэхэ’’на мэна’’ ненэцието’ нерняӈы’’ ялэ’’ нямна ӈась. Тасалковаханандо’ районандо’ ерв Олег Попов няби Россияна’’ ты пэрти’’ Союз’ ӈэвахана мэна Михаил Яр мэ’’ӈаханзь. Округханана’’ ты пэрма’ нямна манзарана’’ ерводо’ ӈани’ таня’ тэвормыць. Районханандо’ тэхэ’’на мэва ӈобтикы саць тарана ӈамгэ, ӈэрм’ тер’’ ила’ саирм’ лэтрамбада паӈгаӈэ тара. Тикым’ няд’’мяць яханандо’ хаби’’ невхы иландо’ саирм’ нёда’’, харе’’ вадидо’ лэтрамби’’. Та’ Пэ хой’’ ядхана мюсерӈа’’, сыв’ пэдари’’ поӈгана иле’’. Пыдо’ ненэй ненэця’’ тотрев’ таӈок харе’’ иленадо’, мюсертадо’ яӈгу, тэсавэйдо’ совхозхана манзара’’, харто’ ӈавкыдо’ луца’’ ты’’ поӈгана вадабидо’.</p><p>Теда’ ӈобт’ тэвор’’маханандо’ тюку’’ ялэ’’ пиркана ты пэртито’ ил’ хурка ӈэвам’ ваде’’ӈаць. Яханандо’ ненэся тыто’ хадо’’ сава ӈэвы’’. Ёря нядэй няд’’мяць суюдо’ сяхаринда сававна вадабидо’. Тарем’ ӈод’’ вэва нумӈг’’ тоса’’, сэрад’’ танясеты’’, тикы’’ янхад ты’’ хадо’’ салаби’’ ӈылна хаё пирӈа’’. «Мюсерта’’ ненэця’’ мывдахавабто’ вэва нумли сиддо’ таӈыламда пирта», — тэхэ’’на мэна’’ харто’ тасламбидо’. Ӈэрёй хабартавамдо’ ӈани’ тензебтедонзь. Ханзер’’ тад нерня’ манзаравамдо’ тасламбиць.</p><p>Ты пэрти’’ серо теневана Михаил Едэйкович хаби’’ яханандо’ тыдо’ лэтрава’ нямна инда ядэробцо хэтась. Пыда пэдарахана ты пэрмам’ сававна теневада, ӈадьбята вадида ӈули’’ яхандо’ ха’’морӈаць. Няхата тамна тяхасовна ты пэрмам’ ваде’’ӈась.</p><p>Тасалко’’махадандо’ ты пэрма’ манзаи’’ тид’’ маниебцохондо’ ӈобкана тэвыдаць. Ӈоб’’ иры’ хэ’’мяхад ӈани’ ӈобт’ тэваӈгуд’’. Тикадо’ ты пэрти’’ пирдырма’’ ялэ’’ пиркана ӈэӈгу.</p><p>Автор: Марина Ярой’ падвы</p>

Ты пэрма

Сидяӈг: t.me/Ugai_VK няд ханавы

<div class="content-lead">Тасу я’ вымна мюсерта мяд’ терха’ Степан Тэсида няби Венера Яр ненадо нядаӈгосэйм’, «чумовой капитал»м’ ня’’амӈаханзь. Пыди’ сидя ӈацекэмди’ вадабихи’. Ӈаркаюм’ хасава нюнди’ сидяхад вата пода. Нюдяюмди’ тандая’ лимбя’ ирыхына соясь.</div><p>Степан Чакувич — ты пэртя, СПК «Тазовский» нюбетахана манзара. Пэрта’’ тыда мюсерта ненэцяӈгана ӈули’’ та мась’’. Пыда выӈгы иламда тид’’ минреванда хавна Сянакова’’ ялэ’’ ёльцяӈгана хуркари’’ пирдырмаха’’на мэсь пэрӈа, сяни’’ мэва’ мэбе’’манда нид нерня’ ха’’морӈа.</p><p>Венера ӈацекэхэюда мание, мята манзаи пэрӈа, сэдора. Таддикахад воспитательӈэ тара, ӈэсыхынандо’ школан’ хэванда’’ нюдяко’’ ӈацекы тохоламби. Ӈавна Санкт-Петербург маркана Александр Иванович Герцен’ нюмам’ мэта университетхана ненэця’ вадам’ минренаӈэ тоходанась. Мале ӈамгэ’ пирт’ харта янда школахана манзарась. Мята тер’’ ӈадиво’’махад хой’ няна иле пэяць. Теда’ ӈарка таромда тэхэ’’на илена’’ ӈацекэхэ’’ ха’’аврамбида.</p><p>— Маня’’ хар’’на’’ сертавы балокаханана’’ илева’’. Мяд’ ея’ хоба мэядава нензел’’ ни ӈа’’. Нюдяко ӈацекы пэрма’ мальӈгана сабе таня’ ӈани’ нин тэворт’’. Ӈадьбята ӈу, ея, хорм’, хан ня’’амвами’ ёльце сава, — Венера Юрьевна тарем’ лахана.</p><p>2025 похона сидя нюсавэй ненэцяӈг’’ мипада няд’’мам’ нянди’ нюртейӈэ ми’’ӈадонзь. 2021 поход мяд’ ӈамгэри няхар’’, тет, тамна ӈокарка нюм’ ховэри’’ мяд’ тер’’ ня’’марпабто’ серо’’ӈась. Тюку поход нябимдей нюм’ соявэхэ’’ ӈани’ мипа пядонзь.</p><p>Автор: Анна Яптик’ падвы</p>

Харти’ мяти’ мяраӈгуху’

Сидяӈг: А.Ткачев’ тадтавы

<div class="content-lead">Ӈодь’’ яляна’’ тю’’уна хан’’лава’ сер’ Салехардан’ ӈэрм’ тер’’ сёбар’’ товыць. Е’’эмняндо’ Ямална’’ Чемпионатм’ няби Первенством’ ӈадимдембиць. Юр’ мян’ ненэця’’ теневабцодо’ манэ’’лабтаць, поӈгадандо’ сямянхат ва’’лёйдо’ тэраць. Ямал’ няби Пэ’’ няд, Тасу’ няби Пяко’’ яхад, Хаби’’ я’ няд, Салехардахад ӈэда’’ ма’’лыць.</div><p>Школаха’’на тохолкода’’ 16-17 потна’’ ӈацекы’’, нядандо’ ӈаркамбой’’ илебей’’ ненэця’’ яра иры’ 11-14 яляха’’на пирдырӈаць. Хано санарпавадо’, ӈопой яхад няхар’’ мэва санармадо’, пям’ ня’’амба сюрбермадо’ «Авиатор» нюбета спортзалхана ӈаць. Лар’’ яха’ вархана тыбци моёпиць, тюрм’ яркыбиць. Ӈэрм яхана вадёвы’’ пихина тецьдахана мэвамдо’ таӈга пирдаледонзь. Ӈамгэ’’ таняна’’ ныхыдо’ мал’’ ӈадимдейдонзь. Ӈани’’ пото’’ тотрев’ сёбарна’’ ёльце варемдо’ мэ’’ӈаць. «Северное многоборье» ӈэрм’ яхана харвабтана сянакубцаӈэ толы. Ӈадьбята тарця пирдырман’ турта’’ похо’’ ӈокамдана’’. Тюку по’ поӈганандо’ ӈока едэй нюмам’ намдаваць. Сямянхат ва’’лёйдо’ ты’’ саполана иры’ 15-24 яляха’’на Белоярский хардан’ ӈэдалаӈгуд’’, хаби’’ яхана округна’’ ед’ сянакода’’.</p><p>Неновна 16-17 пота’’ поӈгана Яр-Сале’ терм’ Вадим Худим’ саву’’ӈа’’. Пыда тюрм’ яркыбавахана рекордм’ мэвы. Тюрамда 198 мэва яркавэда, тынзянда ӈобкарт’ хэвня’ нивы ха’’ам’’. Юдимдей классахана тохолкода’ вадавна тет час’ пирт’ яркулавы. Мякананда хусувэй яля’ хамековы, тынзямда етри’ ня’’амбавэда. Юкад вата няхар’’ по’’ тяхана рекордм’ ӈабтавым’ хаевы.</p><p>Хусувэй пирдырмахана нито’ нерня’ ха’’амвыдо’ таня’’. Хибяхав ёльце ӈаха’’ санавы’’, ӈока ханм’ санавы, сюрберць мере’’мы, тыбкамда хубта ян’ мовы, тюрм’ таӈга яркыбавы. Пыдо’ я’’амнадо’ яӈгу! Харто’ имдо’, вырэймдо’ мэць тяхари’ ӈа’’! Таддикахад хэвханандо’ ӈарка’’ нидо’, сиддо’ тохоламбадидо’, тидхалембадидо’ мэ’’. Сяхаринда нюдо’ нерняку’ пэраць мядото’ тер’’ нядаӈгу’’. Тамна’ тяха’ варемдо’ мэ’’ӈая’’, ӈобнзер’’ нерняри’ миӈая’’!</p><p>Автор: Анна Яптик’ падвы</p>

Мэбете’’э нюбе намдава’’

Сидяӈг: yam.yanao.ru няд  ханавы

<div class="content-lead">Лимбя’ иры’ 15-16 яляхана Ямальской районхы Яр-Сале хардахана Арктикам’ нюбета мякна’’ тёр’’ я’’авлыць. Таняна тодо’’ маркат, округна’’ тиӈгы районхат товы’’ ныхыдарта’’ Ямална’’ Чемпионатм’ мэ’’ӈаць.</div><p>Хасава’’, не’’ ханяӈэндо’ ныхыдырць мэбе’’мам’ хорпиць. Хусувэдо’ харта саӈгомгананда пирдырӈась. Ӈокханда юркад вата сёбар’’ ненэця’’ сянакованзь товыць. Сидя яля’ ямбан’ ныхыдырманда’’ ӈарка лохо’ мюня тёрдо’ я’’авлыць. Сырманзь товы’’ пирдырманда’’ нидо’ я’’авла масабтамбидонзь.</p><p>Тарця пирдырмам’ округханана’’ хахаяда похо’’на ӈадимдедонзь. Сёяха’ тер’’ ту хабтабади’’ ерв — Николай Иванович Окотэтто манзара нята нита ня яля’ ня’ ӈэда иӈуд няндо’ ха’’амвыць. Мале сян по’’ хэ’’мяхад ныхыдарма округханана’’ юнета сёбар’’ сянакубцаӈэ хая. Ямална’’ тиӈгывна тикы сянакубцхана мале юнета ӈадимя’’. Поӈганандо’ не’’ ӈани’ таня’’. Ярсаляхана нерня’ ха’’амвы ненэцие лаханакурць няйнась. Индо’ ядэрабцо тарем’ ваде’’ядонзь.</p><p>Константин Вануйто нюртей ян’ ха’’амвы, пыда 90-105 кг саӈгом’ мэта’’ поӈгана ныхыдырӈась.</p><p>— Мань Ямальский район’ Яр-Саля’ хой’ няд тодамзь. Хамеко’’мами сабе яӈгу, ныхыдырць ня’’мэхэбини’’ мал’’ мэбе’’ӈаць. Хусувэхэдандо’ ныхыдарця’ пям’ марӈавась. Теда’ харта тарем’ еремя — нюртей ян’ ӈани’ ха’’мыв’’. Ӈоб’ тарця сянаковахана пыхыдами хорпасетыв. Сянакова яляхана нерня’ ха’’морцетыдм’.</p><p>Нехэт 70 кг саӈгом’ мэтахат нябимдей ям’ ханавы не’ нюмда Лидия Яр. Пыда Си’’ив Харв маркад товы.</p><p>— Нердена по’ тарця Чемпионатхана пыхыдами хорӈав. Теда’ ихинани тэри сава, нябимдей ян’ ха’’мыв. Тад нерня’ ӈоб вареми мэтадм’, ныхыдами ма’’ламбаӈгудм’, тамна нерня’ ӈадиман’ харвадм’.</p><div class="content-new-image"><img alt="pic" src="https://storage.yandexcloud.net/ym-sites-static/5c58c3fd-1fd.webp" style="width:100%" height="708" width="1260"/><div class="content-image_child">Сидяӈг: yam.yanao.ru няд  ханавы</div></div><p>Мэнако Окотэтто няби Дмитрий Окотэтто Сёяха’ выӈгад товэхэ’. Мэнако харта саӈгомгананда нида мал’ нэкалъядась. Ӈадьбята нюртей ян’ ха’’мыць. Дмитрий няхаромдэй ян’ ха’’амвы’’. Пыда тарем’ мась:</p><p>— Мани’ тарця чемпионатм’ намда хой’ няд тонинзь, тамини’ Сёяха хардахад Ярсалян’ билет тэмдани’. Тюкона мэвами ихиня ӈули’’ сава.</p><p>Тасу я’ тер’’ ӈыхы яхана илебато’ ӈод’’, тикы сер’’ сидто’ нивысь табла’’, сянакованзь няби я’ вэкад товы’’. Ӈопойдо’ — Кирилл Няч, 65 кг саӈгомда мэта’’ нита поӈгана мэбе’’мысь.</p><p>— Мань нюртей сянакудм’, ӈанихина тарем’ ныхыдоро’’мами яӈгу. Чемпионат’ нямна интернетм’ няд’’мяць намдадамзь. Тадтикахад ненэцяндава’’ ма’’лаваць. Ӈобкана тось таславаць. Тюку сидя яля ӈули’’ сававна хаяха’. Мань яни терхат нерня’ ха’’амвы ӈока. Сёнзями ёльце маямби, теда’ манэць ӈыхы ян’ тэри нивэва’’ ту’’.</p><p>Сидя яля’ ямбан’ саць мэбэтидо’ таслэйдо’. Нерня’ ха’’амвы’’ ненэцяӈг’’ ӈудито’ терӈэ кубок, медаль, есь мипиць. Таняна нерня’ ха’’амвы’’ сёбар’’ Россияна’’ тиӈгывна ӈэванда Чемпионатан’ ханда’’. Мэбета’’ нито’ поӈгана тамна ва’’лёй ӈэвамдо’ манэ’’лабтамбаӈгу’’.</p><p>Автор: Мария Окотэтто’ падвы</p>

Ва’’лёй ныхыдырта’’

Сидяӈг: Н. Сэротэтто’ тавы

<div class="content-lead">Яр-Саляхана «Яля’ иня»‘ тер’’ «Голоса тундры» нюбета хэбидя ялям’ сертавыць. Пыдо’ «Яля’ сэв» нюбета культура’ мякана ма’’люрӈаць. Хардахана илена ненэцие’’ е’’эмня лаханаку ваде’’ӈаць, хыно’’ӈаць.</div><p>Ӈокханда сидндет’ пир’’ манзаям’ манэ’’лабтавы’’. «Ӈодяко’ тэнзан’» ядэрта’’ не ӈацекы’’ харто’ сэдвы’’ имбытадодо’ ӈадимдевы’’. Тамна тет некоця’’ Анастасия Ладукай’ сэдвы имбытадо’ сервы’’. Пыдо’ ӈэрм’ яхана вадёданана ӈодяраха’’ ӈэвы’’. Илья Сэротэтто мел’’ ненэцям’ савута сём’ ханавы. Вячеслав Хобкович Вануйто «Я’ тэта нюдм’» ярабц’ пелям’ мэ’’мы. Несэйне Сэротэтто няби Максим Хороля ӈули’’ теневана луца сём’ ненэй вадавна падвэхэ’, каверм’ сертавэхэ’. Ёльце илекавна хынабцади’ лэ’’эмна хан’’мы. Евгений Худи СВОхана мэна’’, ява’’ лэтрамбада’’ нина’’ ед’ падвы «Нён яркая’’» сёмда мэ’’мы. Таддикахад Илья Ерменявич няби Евгений Варьевич пыри’ нямна ӈэда спектакльм’ манэ’’лабтамбавэхэ’. Тамбирувнанда мэкадаха’ ӈэвэхэ’, мядонда’’ письмбато’ пулыто’ нид тэри макабтырмы’’.</p><div class="content-new-image"><img alt="pic" src="https://storage.yandexcloud.net/ym-sites-static/bcf22aaf-aef.webp" style="width:100%" height="709" width="1260"/><div class="content-image_child">Сидяӈг: Н. Сэротэтто’ тавы</div></div><p>— Нерня’ мя’’ни’ хэвхана манзаини’ пэрӈанинзь. Мань я’’амна сырцяӈгана сырӈадм’, няхани мадм’: «Поӈгад манэтан? Халэв’’ ӈоб’’ пявыдо’». Недецям’ мимбада нями лэрё санэй’’. Ма’’нив’’: «Ӈэё, манэкан». Тикав нив хань’’. Маня’’ мякана манзаина’’ пэраць хаива’’. Нява’’ поӈгамда вата, пырим’ еремдевы. Тидӈэ хэсь мята няю’ пароць, хальмер’’ няюмна хэсь тасла’’нидав’’. Тадхав’ ялъй’’. Ядванда сер’ марцьханда хибяхав тойдамба пяда, сидя-няхар’’ тойдада, хамэда я’’мада. Ватаӈгодава’’ мя’’амна ӈапамба ӈадимя. Паромба миндаханда ӈоб’’ нёховы. Няданда хонаркудм’: «Ханзер’’ хаян?» Лэрё няни санэй’’, мань ӈани’ ӈападм’. Вадець пяда: «Хальмер’’ нямна тодамзь. Павэхэни си’’ми ладыбада танянив’’. Пуня’ сыласетыв’’ — ӈамгэхэрт яӈгу. Хибя си’’ми пя, ӈылека си’’ми пя?» Еремдевы пырида павэхэнда ладыбавэда ӈэ’’нидав’’. Харада тарця: пыри мерари’ хаӈгана ни ӈа’’, пад’ мюня ӈэбта тара, — Илья Ерменявич тарем’ ваде’’ӈадась.</p><p>Няндо’ инзелеванзь, сырманзь товы ӈокась. Поӈганандо’ ӈаркамбой’’ ненэця’’ танявыць, пыдо’ тарця вади хэтвы’’: «Хардахавахана ненэй вадава’’ ялэхэ’’ вунива’’ мэс’’. Илна’’ нямна ӈэда сё, иле’’ми намдава — ёльце сава».</p><p>Вадам’ минренадандо’ Несэйне Сергеевна няби Артур Полькович Сэротэтто таравэхэ’. «Янамбовна ӈоб’’ ма’’люрцетыва’’, хамекосетыва’’. Теда’ «Яля’ иня» терӈэ манзаина’’ ӈадимде таславаць. Тюку сер’’ма’’ сидя по’ ямбан’ минрева’’. Нина’’ етри’ нина’’ манэпю’’, лаханаку ваде’’ма’ хавна хусувэва’’ харта манзаясавэй. Ӈанихи’’на ӈаркамбой зал тарава’ сер’ ӈа, тамна ӈокарка ненэцям’ ма’’лаван’ харвава’’», — Несэйне Сергеевна тарем’ ибедорӈа.</p><p>Автор: Анна Яптик’ падвы</p>

Лаханакудо’ ёльце мэкад’’

<div class="content-lead">Сяхаӈгав’ тодо’’ хардахат Саляӈгардахана ӈацекы тохоламбада’’ ма’’люрӈаць. Теневана’’ няхатато’ тохолкурӈаць. Теневабцодо’ ӈадимдембиць. Таняна Мария Яптикым’ торомдадамзь. Лаханакурмани’ сер’ иланда ваде’’ӈась. Пыда Ямальской районхад Пэ саля’ хардахад ӈа. Нисяхаюда-небяхаюда выӈгана илеӈаха’. Ӈацекы ӈэванда мальӈгэхэд хой’ няӈы илам’ сававна теневада. Тохоламбада ӈацекэхэта ханзер’’ ӈэрм’ тер’’ илам’ ваде’’мамда, манэ’’лабтамбавамда хонрамбидамзь.</div><p>— Мань Яптик’’ саля’ хой’ няна соядамзь. Ӈацекы ӈэвани’ мальӈгэхэд таняна иледамзь. Выӈгы иле’’мями ихинани тенев. Няханани поёрманзь, нерманзь, тудако, ӈоди ма’’ламбуванзь ханцетыдм’. Нюдяко ӈэдахани небями, хадами си’’ми хусувэй ӈамгэхэна тохоламбихинзь. Сэдора, халям’ хыраба теневадм’. Хадани пивад сэдадамзь. Ӈобкана сэдоранинзь, си’’ми тидхалембись. Тикы нюртей сэдъями тамна тенев. Мя’’ни тер’’ хусувэхэндо’ нид ӈодякоход паӈгалӈадамзь. Панормам’, ӈодяком’ пэрмам’ сямянхат харвобтав. Хардахана ханяӈэхэна панорцетыдм’. Хой’ ня’ небяхаюни’-нисяхаюни’ манэ’’манзь ханцетыдм’.</p><div class="content-new-image"><img alt="pic" src="https://storage.yandexcloud.net/ym-sites-static/68e9cd41-fff.webp" style="width:100%" height="708" width="1260"/><div class="content-image_child">Сидяӈг: Руфина Окотэтто’ тадтавы</div></div><p>Си’’ив похонани’ хардан’ тохолкованзь тэвываць. Тиртя ӈанохона сидна’’ ханаць. Пэ саля’ интернатан’ тэвынаць. Таняна сэврини мэ’’ӈадамзь. Луца вадам’, ханзер’’ ембата таравам’ нивась хамедамбю’’. Паднабцям’ ня’’амбавам’, парта’ тяхана ӈамдё ехэрадамзь. Тохолкованзь товэӈэ ӈопой классахана мале сянваць. Ӈаркамбой’’ тохолкода’’ нина’’, луца’’ нена’’ сидна’’ табедамбасеты’’. Тикы’ сер’ харад’ иланд’ тухудамзь. Ӈани похона нябимдей классан’ то’’махадани’ нянани нензелась. Тарем’ школа-интернатхана хасава юдимдей класс’ ӈэсонд’ мэдамзь.</p><h2>Манзаянда нямна</h2><p>— Саляӈгардахана Ямальской многопрофильной колледжхана нюдяко ӈацекэхэ’’на манзара тохолкурӈадамзь. Хар’’ни ихини таня’ хэсь таславась. Тохолко вареми мэ’’ӈадамзь. Тарана’’ серка’’на ӈани’ мэсетыдм’. Пуна школахана манзара пэйваць. Таӈок по’’ сер’ теневабцуни тамна сававна ӈокамдаванзь, институтхана тохолкудамзь. Теда’ манзаями тяхасовна мэнев. Хусувэй по’ тидхалембада’’ серона’’ яӈгамдамбасетыдо’. Мань ихинани сава. Ӈамгэхэв ехэранам’ тохола тарасеты, тикы ӈани’ нюрцям’ ӈэсеты. Ӈацекы тохоламбава нянани нензел’’. Нюртей тохолко пэвы тохоламбидм’. Пыдо’ вадёдавандо’ ямбан’ мань ӈод’’ едэй ӈамгэхэ’’ тоходанадм’. Тюку по’ тетимдей классм’ малеӈгу’’. Тохоламбадини’’ мал’’ маркана иле’’. Выӈгы илам’ ехэрадо’. Няндо’ ты пэртя’’, ӈэрм’ тер’’ ханзер’’ илевам’ вадецетыдм’. Ханяӈэхэ’’на киноӈэ, сидяӈгаӈэ манэ’’лабтамбасетын’. Ӈацекыни’’ тэри’ пысаӈгасеты’’, хонравандадо’ ӈока ӈэсеты. Хуркари’’ мэкад’’ серк’’ ядэласетын’.</p><p>Ӈобаӈгуна школаханана’’ «Душа Ямала» нюбета этно-фестивальм’ ӈэванзь ваде’’ӈаць. Тарцям’ намда мань ӈацекэхэ’’ни мадамзь: «Ямал’ нямна стихотворениедамда’’ тохолаида’’. Ӈэрм’ тер’’ ембдяро сераӈгуда’’». Тикы ненадо фестиваль ӈарка яна’’ тер’’ тодо’’ тэнз’’ ненэцие’’ яля’ е’’эмня миӈась. Ӈацекыни’’ ненадумда’’ма’ падарм’, ӈудито’ терад ня’’маць. Тад нерня’ ӈани’ варева’’ мэтава’’.</p><p>Тарем’ падарка’’на ва’’лёй нява’’ манзаямда сававна минремда. Тамна’ тяха’ саць тарана таром’ ха’’аврамбамда.</p><p>Автор: Руфина Окотэтто’ падвы</p>

Ӈацекы тохоламбада

<div class="content-lead">Ханярина хардаха’’на ӈэрм’ тер’’ нина’’ ненэй вадава’’ ханзели’’ нерня’ минредо’. Тикы’ сер’ вадёдана’’ ӈацекына’’ вадамдо’ теневаӈгудо’.</div><p>Тазовской районхана Халмер-Седехэна интернатхана илена’’ ӈацекы’’ лаханако ӈадимдембаӈгу’’. Ӈарка табекода нядандо’ Алиса Дмитриевна Неркахы тара. Ӈобкана сертабавандадо’ — «Лэмороко» нюбета театр.</p><p>Небо’ «Российский Север» форумхана Алиса Дмитриевна грант’ еся ня’’амвысь. Нядаӈгосэй’’ есяха’’ната таславы театрамда тидхалембаӈгуда. Теда’ тараванда ӈамгэридамда тэмдавы. Тад пуна тамна ӈани’’ серода таслахая, ӈацекыта ня хамекода’’. Хуркари лаханако ты’’ саполана ирыхына манэ’’лабтамба пяӈгудо’. Манзаянда тид’’ мимб’’, ӈани’’ нюдяко’’ хардаха’’на ӈацекэхэ’’на манзарана’’ няхата вадетада.</p><p>Ненэй вадавна ӈэда’’ лаханако выӈгана илена’’ ӈацекы’’ нензел’’мана вадетыдо’. Вадамдо’ ехэранарка’’ ӈоб’ тарем’ тохолкода’’. Лаханакохонато’ ӈэрм’ тер’’ ила’ саирм’ манэ’’лабтамбаӈгу’’.</p><p>Пэдава нява’’ ӈацекы’’ е’’эмня ёльце сава тарана серм’ сертаби. Тамна тяхасовна варемда мэ’’ӈая. Ӈэрм’ тер’’ илебей’’ ненэця’’, ӈацекы’’ иринато’ ила’ саирм’ тидхалё минремдо’.</p><p>Автор: Солне Ӈокдэта’ падвы</p>

Няръяна Ӈэрм