обновлено: 08:54, 23 января 2023
Лух Авт
Яӆап «дорожной карта» шоши мир ураңан
Овс мув шимӆаң мир хоятат нётопсайн маты щиран яӆап верат ӆоңаӆсайт. Ямал мув губернатор Дмитрий Артюхов щимащ партапса мийӆыйс, хун ӆуңан тащан яңхты хоятат хоща яңхас.
«Ямал кашң вер сахат оӆңа питыӆыйӆ. Щи веран ант мосаӆ шоши мират эӆты ёрэмиты, там мув сайӆаты хоятат эӆты. Муң эӆтаев ӆойӆ касӆыман яңхты хоятат уӆапса нох аӆамты вер, энамты няврэмӆаӆа кум маты ӆув юшеӆ хуват манты. Овс мув шимӆаң мир хоятат кеша АПК, ветеринария, леккар, утаӆтыты па рупата щират иса яӆпа вантман уӆӆайт», — ЯНАО губернатор Дмитрий Артюхов ястас.
Знаний Таӆан шоши мир хоятат няврэмат утаӆтыты щира шеңк ар юр понӆа. Вет ашкуӆа-интернатан 74 няврэм яӆап уӆапса ята ӆэщатӆайт. «Ашкуӆая ӆэщатыӆув» акция манаӆ, хота ай няврэмат ӆуңатты, ханшты утаӆтаӆайт. 2021-мет таӆан 188 веӆщи ашкуӆая манты няврэм утаӆтаса, тампуш нумасӆа 450 няврэм ашкуӆа ураңан ӆэщатты.
Щаӆта «образовательной сертификатат» ищиты округ колледжатан утаӆтыты ураңан рупитты питӆат. Ин сертификат сахат 136 няврэм утаӆтыйӆ.
Ӆув щирэӆан уӆты вуӆэң ёх эӆты ищиты нёхи 450 соӆкувайн вуты питӆа. 2019-мет таӆан 79 тонна мийман уса, 2022-мет таӆан — 600 тонна. Ветеринарат ураңан хуӆам вагон-хот ӆутӆа. Щи порайн ӆув ант питӆат нумасты, хота ӆувиӆаӆа хоӆты. Вакцинация порайн ӆув соткем хатаӆ нюрам хуват яңхӆат. Ветеринарата нётты ураңан 60 хоят вохӆа. Пушасат верӆат, вуӆэт воштаӆат, муй веран иса хатэмиӆат, катӆантыӆат.
Овс мув шимӆаң мир хоятат ураңан хот пормасат мийӆыӆайт, хота хуӆмет па ёӆта няврэм сэма питас. Ун тахаятан утаӆтыты няврэмат стипендияйн маӆайт, хот митэӆ сохаптаӆа, заочной щиран утаӆтыты няврэмат утаӆтытэӆ сахат ищи охан маӆайт.
