Маняʼʼ акцияваʼʼ минʼʼӈа | «Красный Север»
0°C

обновлено: 07:33, 23 января 2023

Няръяна Ӈэрм

Маняʼʼ акцияваʼʼ минʼʼӈа

Ӈобʼʼ сава яляʼ нёʼ сивна Елена Николаевна Окотэтто падкоцямʼ няʼʼамба ӈадимя. Ӈарка нябаковаʼʼ харта нямбара ӈэсь, минханда лаханако пэйʼʼ. Пихий нувоʼʼ, пудана юн вадеʼʼла. Ненэй неʼʼ лахарёʼʼ ямб ӈэсетыʼʼ. Хэванда нерняʼ падкоцянда мюдʼ тола матʼʼ книгамʼ ӈадимде. Ма: «Тюкуда нянандаʼʼ манзаяхананда тараӈгуʼʼ, малʼ ненэй вадавна падвыʼʼ. Нядʼʼмаданда мэидаʼʼ»!


Нюртеʼʼэ тэри ӈобʼʼ сэвхана манэʼʼян. Пунаʼ сававна таслаʼʼ, ненэй вадаханаʼʼ ӈулиʼʼ таранаʼʼ ӈэвыʼʼ. Таремʼ книгы нямʼʼмахаданаʼʼ редакцияхананаʼʼ яляʼ няюʼ ӈэда иӈутʼ хаʼʼмываць. Небоʼ «Няръяна Ӈэрм» ненэй ненэцяӈэ редакцияхананаʼʼ акциямʼ серта таславаць. Тикыʼ тальняюʼ саць ӈарка тарана ненадо сермʼ пяваць. Ненэй вадавна падвы книгы маʼʼламба пяваць. Тикынаʼʼ ханярид тэврамбинаʼʼ. Ненэйвана тёняӈы Ензяʼ няд паднана нянаʼʼ, Любовь Прокопьевна Неняӈгʼ манзаяʼʼ яӈгуць. Тарцядаваʼʼ пюсь Носко харданʼ ӈэдалёрӈаваць. Танядʼ ӈока ненэй вадавна падвыʼʼ книгамʼ тэвраваць. Школандо ервʼ Виктория Ивановна Земцова акцияхананаʼʼ сиднаʼʼ ӈулиʼʼ сававна нядась.

Фото: Марина Яр
Фото: Марина Яр

Сельбяʼ няна Салехардахана ӈаниʼ ӈобʼʼ пачо няваʼʼ Сергей Валентинович Худи лаханась. Пыда маʼʼнисяв, сяӈок тара малʼ ханэйдаʼʼ. Нянанда тамнаʼ сававна лэтраӈгудаʼʼ. Тикыʼ няхаданаʼʼ хуркари маӈгʼʼ, невхы похоʼʼна ӈадибермыʼʼ книгыʼʼ ховаць. Сергей Валентиновичʼ мякад лабтэйʼʼмана падро тэврамбинаць. Пыда няданда ӈобтикы хуркари ехэрана книгы ховаць. Тарця пачо нинаʼʼ нядмяць редакцияхананаʼʼ библиотекадваʼʼ маʼʼлаваʼʼ.

Тюку яляʼ пиркана няхарʼʼ юркад вата книгамʼ маʼʼлавэваʼʼ. Пыдараʼʼ ӈодʼʼ мяканандаʼʼ ӈамгэри ниня тарана ненэй вадавна ӈэда книганда танябʼʼ, «Няръяна Ӈэрм» редакциянʼ тэврараʼʼмаʼʼ. Таремʼ ӈобкана ненэй вадаваʼʼ лэтраӈгуваʼʼ.


0

0

0

0

0

0



обновлено: 07:33, 23 января 2023

Темы