Немаʼ юдэхэʼʼна тыни маниедмʼ | «Красный Север»
0°C

обновлено: 08:49, 25 января 2023

Няръяна Ӈэрм

Немаʼ юдэхэʼʼна тыни маниедмʼ

Лимбяʼ ирыʼ 25 яляхана тохолкода илебей ненэциеʼʼ едʼ таславы хэбидя ялямʼ ядабтамбиваць. Маняʼʼ Салехардахана колледжхана мэнинаʼʼ ӈокадоʼ выӈгад ты пэртяʼʼ ӈэсыхыд товыʼʼ. Тюкуʼ няваʼʼ ӈодʼʼ ӈобтикы ты пэртяʼ хасаваʼ ню. Яр Ярослав «Оленевод-механизаторӈэ» нябимдей по тохолку. Хахаяда яля ниниʼ пихиняʼ торомдэйнинзь. Помнаниʼ мале понʼ лаханакурӈанизь. Нями таремʼ вадамда пядась.


— Мань нябимбей по тыʼʼ лекараӈэ тохолкуртиʼʼ техникумхана тохолкурӈадмʼ. Ӈавнани тамна тарця мэкад манзая танявахад ехэрадамзь. Школаниʼ пуд ӈаниʼ яʼ яӈгова еʼʼэмня тюконʼ тодамзь. Ихинани мадамзь тыʼʼ ядхана вадёвэӈэ ӈамгэ едэймʼ намда пиртадмʼ? Тарця нивы ӈаʼʼ. Тюкохона хуркари мэкад ӈавэ вадеʼʼӈаʼʼ. Нянани сидя юʼʼ илебей ненэцяʼʼ тохолкуʼʼ. Поӈгананаʼʼ ӈобʼʼ пирибцяваʼʼ танясь, ӈобʼʼ луцаʼ ӈацекэваʼʼ. Небоʼ школанаʼʼ программамʼ, тедаʼ мале манзаяхананаʼʼ тараванди тохоламба пяваць.

Малʼ ӈэбʼʼнаʼʼ вареваʼʼ мэʼʼӈаваʼʼ. Ниниʼʼ тодо районхат ӈаʼʼ, ты пэртиʼʼ нюʼʼ. Ваднанда тыʼ илаӈгад перена яхана манзара пиртаваʼʼ. Хабартавахана няданзюртаваʼʼ, ӈэсыхына малкодаваʼʼ, мирдаӈгурмаʼ серкана ӈаниʼ мэсь ниваʼʼ яʼʼмаӈгуʼʼ, тыʼʼ лекарахаʼʼна, яӈганаваʼ ёльцяӈгана ӈэвкоӈэ тараӈгуваʼʼ.

Фото: Марина Яр
Фото: Марина Яр

Ӈарка некархаваʼʼ

Тедаʼ группанаʼʼ терӈэ ненэй ненэцяʼ няваʼʼ Руслан Викторович Худи минре. Ханяӈэхэна мунʼ мянава нинякэваʼʼ ӈаʼʼ, няваʼʼ нянанаʼʼ ӈулиʼʼ сава ӈэсеты. Лаханакурпата, табедамбабата нюдя нядревʼ тидхалембасеты. Ихиня тарця ӈарка няʼ танява ӈулиʼʼ пои. Тарабата харʼʼнаʼʼ мэбʼʼнаʼʼ сиднаʼʼ тэдорта, вэвахад хэӈгаханда сюрта. Ӈарка некархаваʼʼ.

Тадриʼ тохолкурʼʼманаʼʼ ирманя манзаяваʼʼ хорпаӈгуваʼʼ. Руслан Викторович маʼʼнисяв, ты пэртя ӈэсыхыʼʼ практикаваʼʼ мэтаваʼʼ. Хорʼʼ ирыхыд — лимбяʼ ирыʼ ӈэсондʼ таняна мэӈгуваʼʼ. Ненэсяри ӈодʼʼ тохоламбадинаʼʼ хойʼ илаӈгана ӈулиʼʼ тарана ӈэвыʼʼ. Нюртеʼʼэ мадамзь сиднаʼʼ тэхэна малко тохоламбаӈгодакыʼʼ, тедаʼ тарця нивы ӈаʼʼ. Ӈамгэʼ тоʼʼолха малкоʼ вэнекоʼʼ танявамʼ, ненэйвана лампʼ лэё масабʼʼтамбада — генератор, мерета еся «Буран», квадроцикл мэць тохоламбиʼʼ.Тикыʼʼ тыʼ илаӈгана ӈулиʼʼ тараʼʼ. Техникумхана тохолкованаʼʼ няюʼ есямʼ ниваʼʼ салдамбюʼʼ, сиднаʼʼ ӈавламбиʼʼ, ембапиʼʼ.

Фото: Марина Яр
Фото: Марина Яр

Теневабцоʼʼ — тарана серʼʼ

Техникумхана мэва хавна библиотекахат книгадами хосаясетыдмʼ. Тикы сермʼ мэнев. Сёбарʼʼ сянакубцʼʼ харвобтадмʼ. Илаӈгы ненэцие ниниʼʼ организациянʼ ядэрцетыдмʼ. Нисяни телефонувна лаханасетыдмʼ, нюртеʼʼэ тытоʼ хурка ӈэвамʼ, мядонаʼʼ ханяна мярвамʼ хонрамбасетыдмʼ. Ӈарка пэвдей ирыхына илаӈгы ненэциеʼʼ форум ӈэва мальӈгана няданзюртаӈэ тарадамзь. Тодо ӈэрм яхат товыʼʼ няхатани ӈока хибямʼ торомтадамзь.

Мань тюкоми ёльцеʼʼмяхадани тамна тяхаʼ хэванʼ харвадмʼ. Илаӈгана университетхана тохолко сероʼʼӈа. Тыʼ пэртянʼ ӈэхэртабатʼ, теневабцоʼʼ — тарана серʼʼ.

Тодо янʼ хэвани нерняʼ Ярослав нюрцьбямда таремʼ мась:

— Тюку таʼ неками, хойхана мэна ниниʼʼ малко тидхалембаӈгудмʼ.


1

0

1

0

0

0



обновлено: 08:49, 25 января 2023

Темы

Новости ЯНАО